Հարգելի՛ համալսարանականներ, 2018թ. հունիսի 22-24-ը Երևանում Հումանիտար հետազոտությունների հայկական կենտրոնը (ՀՀՀԿ) Հայաստանի ամերիկյան, Երևանի պետական և Բեյրութի Հայկազյան համալսարանների, Հանուն ժողովրդավարության զարգացման ՀԿ-ի, Կոնրադ Ադենաուեր հիմնադրամի, Բուն TV առցանց ալիքի, Խնկո Ապոր անվան մանկական գրադարանի հետ համագործակցությամբ և Գալուստ Գյուլբեկյան հիմնադրամի աջակցությամբ կազմակերպում է «Հայաստան 2018. իրողություններ և հեռանկարներ»  միջազգային գիտաժողովը:

Այն նպատակ ունի մասնագիտական վերլուծությունների ու շահագրգիռ քննարկումների միջոցով քարտեզագրել հայաստանյան հասարակության քաղաքական, տնտեսական և հանրային իրողությունները ու դրանց զարգացման համար հնարավոր մոդելներ մշակել:

Գիտաժողովը տեղի կունենա Հայաստանի ամերիկյան համալսարանի Փարամազ Ավետիսյան մասնաշենքում (Մարշալ Բաղրամյան 40):

Մուտքն ազատ է։

Ծրագիրը և զեկուցումների ամփոփումները՝ հայերեն և անգլերեն, կարելի է տեսնել հետևյալ հղումով: 

Գիտաժողովի հետ կապված մանրամասներին, ինչպես նաև Հումանիտար հետազոտությունների  հայկական կենտրոնի  գործունեությանը  կարելի է  ծանոթանալ Կենտրոնի կայքում հետևյալ հղումով՝ http://archumanities.am/category/projects/hayastan-2018:

2018թ. հունիսի 30-ին՝ ժամը 11:00-18:00-ն, Ենոքավանում տեղի կունենա հայկական բույսերի «Հայ բույս» փառատոնը, որը հնարավորություն կտա ճանաչելու Հայաստանում աճող հայտնի ու անհայտ բույսերի նշանակությունն ու կիրառությունը։ 

Փառատոնին մասնակցելու համար դիմումների և տաղավար ամրագրելու վերջնաժամկետը հունիսի 15-ն է: 

Տարվա ամենասպասված ու ամենավառ, բացահայտումներով լի այդ օրվա՝ «Հայ բույս 2018» փառատոնի ընթացքում մասնակիցները նաև հնարավորություն կունենան հիանալու ծաղկարվեստի վարպետների աշխատանքներով՝ ֆլորիստների մրցույթի ժամանակ:

Փառատոնի ընթացքում կլինեն տարբեր ուսուցողական խաղեր ու միջոցառումներ՝  թե՛ երեխաների, թե՛ մեծահասակների համար։

Մուտքն ազատ է։

Ենոքավան տեղափոխվելու համար տոմսեր կարելի է ձեռք բերել՝ զանգահարելով 044 288 818 հեռախոսահամարով կամ tomsarkgh.am կայքից:

https://www.facebook.com/events/2071935873095602/

ԵՊՀ ԻՄ շրջանավարտների և կարիերայի կենտրոնը տեղեկացնում է հետևյալ թափուր աշխատատեղերի մասին`

• Վաճառող-Խորհրդատու (մինչև 01.07.2018թ.)

• ԶԲՈՍԱՇՐՋԱՅԻՆ ՏԵՂԵԿԱՏՎԱԿԱՆ ԿԵՆՏՐՈՆԻ ՀԱՄԱԿԱՐԳՈՂ (մինչև 25.06.2018թ.)

• ՀԱՃԱԽՈՐԴՆԵՐԻ ՍՊԱՍԱՐԿՄԱՆ ՄԱՍՆԱԳԵՏ (մինչև 25.06.2018թ.)

• Վարկային գործակալ Իջևանի մասնաճյուղում (մինչև 24.06.2018թ.)

ՍՑԵՆԱՐՆԵՐԻ ՀԱՆՐԱՊԵՏԱԿԱՆ ՄՐՑՈՒՅԹ

 «ԼոգոՍ» Իրավապաշտպան ՀԿ-ն  հայտարարում է հեռուստատեսային խաղ-շոուի սցենարների հանրապետական մրցույթ:

Ովքե՞ր կարող են դիմել

Մրցույթին կարող են մասնակցել սցենարիստներ, անհատ ստեղծագործողներ և բոլոր այն անձինք, ովքեր հետաքրքրված են։

Նպատակը

Սցենարի նպատակն է ի ցույց դնել համայնքապետի և/կամ ավագանու օրինակելի մոդել/ներ։ Հեռուստախաղի արդյունքում ժյուրիի և հեռոսւտադիտողների ձայների մեծամասնությամբ պիտի հաղթի այն մասնակիցը, ով տեղական ինքնակառավարման խնդիրներին օրենքի ոգուն և տառին համապատասխան լուծումներ կտա։

Սցենարում պետք է նկարագրվեն տեղական ինքնակառավարման բարդ իրավիճակներ, համայնքի անդամների, հարևան համայնքների, Ազգային Ժողովի, Կառավարության, բիզնեսների, դոնորների և այլոց հետ կապված խրթին իրավիճակներ։ Խաղի մասնակիցները պիտի ցուցաբերեն հմտություններ և օրենքների իմացություն իրավիճակներից դուրս գալու համար։ 

Զուգահեռաբեր խաղը պետք է ծառայի որպես կրթական գործիք հանրության ավելի լայն լսարանի համար՝ հասկանալի դարձնելու ժողովրդավարական օրակարգի ձևավորման և տեղական ինքնակառավարման մասնակցային գաղափարախոսությունը։

 Ինչպիսի՞ն պետք է լինի սցենարը

Հեղինակներն ազատ են առաջարկելու հեռուստախաղի ձևաչափը և իրականացման եղանակը։ Խնդրում ենք հաշվի առնել, որ նկարահանման համար հատկացվելու է 2 ամիս, ուստի ենթադրվում է, որ հեռուստախաղը 3 մրցակցային փուլ կունենա, յուրաքանչյուրը՝ 30-40 րոպե տևողությամբ։ 

Առաջարկված սցենարները պետք է ներկայացնեն և արտացոլեն Հայաստանում ժողովրդավարական կառավարման մարտահրավերները և քվեարկության համակարգը։

Այն պետք է լինի դինամիկ՝ դերակատարներին դնելով բարդ իրավիճակների մեջ, որոնցից դուրս գալու համար նրանք պետք է մշակեն ռազմավարություններ/մարտավարություն: Ինտերակտիվ բաղադրիչը պարտադիր է, քանի որ հեռուստադիտողները պետք է հնարավորություն ունենան արձագանքելու, մեկնաբանելու, հարցեր տալու և, ի վերջո, քվեարկելու համար:

Մրցանակը

Լավագույնը ճանաչված սցենարի հիման վրա կնկարահանվի հաղորդում և եթեր կհեռարձակվի Շիրակի մարզային հեռուստատեսությամբ։  Հաղթող մասնակիցը կպարգևատրվի 150.000 ՀՀ դրամով:

Ե՞րբ է դիմելու վերջնաժամկետը

Սցենարները կարող եք ներկայացնել մինչև 2018 թվականի հունիսի 20-ը։

 Ինչպե՞ս մասնակցել

Մրցույթին ներկայացվող սցենարները և մասնակցության հայտադիմումը  կարող եք ուղարկել logosngo@gmail.com կամ infologosngo@gmail.com էլ. հասցեներին` թեմայի տողում նշելով՝ «Սցենարի մրցույթ»։

Հայտադիմումում պետք է անպայման լրացնել բոլոր դաշտերը:

Լրացուցիչ տեղեկատվություն

«ԼոգոՍ» Իրավապաշտպան ՀԿ-ն երաշխավորում է Ձեր հեղինակային իրավունքների պաշտպանությունը:

Մրցութային հանձնաժողովի կողմից կարող են ընտրվել տարբեր հայտատուների կողմից ներկայացված սցենարների մասեր և այդ դեպքում կազմակերպության կողմից նախատեսված դրամական պարգևը հավասարաչափ կբաշխվի ընտրված հայտատուների միջև:

Հարցերի դեպքում կարող եք զանգահարել՝ 093/041 053330 հեռախոսահամարներով:

Եթե դուք ուսանող կամ գիտաշխատող եք և ուզում եք այս օգոստոսին մեկուկես շաբաթով համատեղել մի քանի հրաշալի բան՝

• հայագիտական խտացված դասընթաց, բայց ոչ թե շոգ լսարաններում, այլ Հայաստանի բնության ու մշակույթի չքնաղ վայրերում,
• արշավներ, դասեր ու քննարկումներ անտառներում, ձորերում զով գետակների ափին,
• ծանոթություն շուրջ երեք տասնյակ հրաշալի ուսանողների ու գիտաշխատողների հետ,
• հետաքրքիր բանավեճեր, քննարկումներ, վիկտորինաներ,

Ուրեմն հայագիտական արշավային դասընթացը (ՀԳԱԴ) հենց ձեզ համար է։ 

ՀԳԱԴ-ի հերթական՝ 6-րդ շրջանը կիրականացվի 2018 թ․ օգոստոսին Կոտայքի և Գեղարքունիքի մարզերում և կտևի շուրջ մեկուկես շաբաթ (ամսաթվերը և երթուղին դեռ քննարկման փուլում են): 

Ի՞նչ է ՀԳԱԴ-ը

Հայագիտական արշավային դասընթացը նվիրված է հայոց լեզվի և մշակույթի պատմական զարգացման հիմնահարցերին և դրանց հետազոտման մեթոդաբանության խնդիրներին: ՀԳԱԴ-ը նախատեսված է Հայաստանի բուհերի և ինստիտուտների՝ հայագիտական հեռանկարներ ունեցող և բարձր առաջադիմություն ցուցաբերող ուսանողների ու գիտաշխատողների համար։

ՀԳԱԴ-ի կազմակերպիչը և գիտական ղեկավարը լեզվաբան, բ․գ․թ․ (PhD, Լեյդենի համալսարան), հետդոկտորական հետազոտող (postdoctoral researcher, Վիեննա, Ավստրիայի գիտությունների ակադեմիա) Հրաչ Մարտիրոսյանն է։

ՀԳԱԴ-ի դասախոսությունների ու գործնական պարապմունքների հիմքում ընկած են հայոց լեզվի պատմության և հնդեվրոպաբանության վերաբերյալ Հ․ Մարտիրոսյանի ավելի քան քսանամյա հետազոտությունները: Գիտարշավների նախորդ շրջանները հաջողությամբ իրականացվել են 2008, 2011, 2014, 2015 և 2016 թվականներին: 2018-ին նշվում է ՀԳԱԴ-ի տասնամյակը։ Ավելի մանրամասն այս արշավային դասընթացների մասին կարող եք կարդալ կցված փաստաթղթում։

Ինչպե՞ս մասնակցել

ՀԳԱԴ-ին կարող են մասնակցել հայագիտական լուրջ հետաքրքրություններ ունեցող բարձր կուրսերի ուսանողներ ու գիտաշխատողներ։ Մասնակցության մտադրության դեպքում անհրաժեշտ է ՀԳԱԴ-ի կազմակերպիչ Հ․ Մարտիրոսյանին նամակ գրել էլ. փոստով (hrch.martirosyan@gmail.com) կամ Ֆեյսբուքով (hrach.martirosyan.58)՝ մի քանի տողով ներկայացնելով ձեր հետաքրքրություններն ու մասնակցության շարժառիթները, և նամակին կցել ձեր CV-ն։

Շտապե՛ք, տեղերը սահմանափակ են։ Վերջնաժամկետը հունիսի 20-ն է։ Թեկնածությունները հանգամանորեն կքննարկվեն և կընտրվեն մասնակիցները՝ այդ մասին վերջիններին տեղեկացնելով մինչև հունիսի 30-ը։

ՀԳԱԴ-ի մասնակցության հիմնական կանոնները

Հայագիտական արշավային դասընթացներն ունեն մի շարք առանձնահատկություններ և անբեկանելի կանոններ.

• Մասնակիցները հիմնականում գիշերում են գյուղական տներում, քնում հատակներին՝ քնապարկերում. ոտքով շատ են քայլելու։ 
• Հեռախոս կարելի է գործածել միայն երեկոյան կարճատև ազատ ժամանակի ընթացքում։ ՀԳԱԴ-ի կարևորագույն նպատակներից են դասախոսությունների ժամանակ առավելագույն կենտրոնացումը և ամբողջ ընթացքում իրական հաղորդակցումը։ Ճամփաներին բնականաբար կարելի է օգտվել հեռախոսից, բայց միա՛յն լուսանկարելու համար։
• Քնելու հրահանգը իսկապես քնելու հրահանգ է։
• ՀԳԱԴ-ը կրոնական կամ քաղաքական ուղղվածություն չունի։ Խմբում տիրում են այլոց անձնական կարծիքների նկատմամբ հարգանքն ու հանդուրժողականությունը։ Քննարկումներում կրոնական, քաղաքական կամ այլ տաբուներ չկան։
• Ալկոհոլը խստագույնս արգելված է ամբողջ ընթացքում։

Մասնակցության ֆինանսական պայմանները

ՀԳԱԴ-ի բուն դասընթացն անվճար է մասնակիցների համար։ Սակայն պետք է նկատի ունենալ, որ այսպիսի նախաձեռնությունները զգալի հավելյալ ծախսեր են պահանջում (փոխադրամիջոցներ, կացարանի վարձ, սննդի, ջրի ու էներգիայի ծախսեր և այլն)․ ՀԳԱԴ-ի կազմակերպիչը անձնական ֆինանսական ներդրումով ապահովում է այդ ծախսերի զգալի մասը, իսկ մյուս մասն ապահովում են դասընթացի մասնակիցները։ Յուրաքանչյուր մասնակցի վճարի չափը 15-30 հազար դրամի սահմաններում է՝ ըստ մասնակցի ֆինանսական կարողության (այն դեպքում, երբ որևէ մասնակցի համար վճարման նշված չափը կարող է խնդիր առաջացնել, դա առանձին կքննարկվի տվյալ մասնակցի և կազմակերպչի միջև)։

Եթե մասնակիցների ուսումնական կամ գիտական հաստատությունները կարող են իրենց համար օրապահիկների վճարներ տրամադրել, ապա դասընթացի կազմակերպիչն այդ հաստատությունների ղեկավարներին նախապես անհրաժեշտ նամակներ կգրի։ 

Հայագիտական արշավային դասընթացներին ավելի մանրամասն ծանոթանալու համար կարող եք այցելել նաև Հ․ Մարտրոսյանի ֆեյսբուքյան էջը։ ՀԳԱԴ-ի նախորդ շրջանների ալբոմներից մի քանիսի հղումները.

• https://www.facebook.com/hrach.martirosyan.58/media_set?set=a.409132979100070.112105.100000101155806&type=3
• https://www.facebook.com/hrach.martirosyan.58/media_set?set=a.423408344339200.115314.100000101155806&type=3
• https://www.facebook.com/hrach.martirosyan.58/media_set?set=a.908714449141918.1073741840.100000101155806&type=3
• https://www.facebook.com/hrach.martirosyan.58/media_set?set=a.867035823344928.100000101155806&type=3
• https://www.facebook.com/hrach.martirosyan.58/posts/1342015842478441?hc_location=ufi
• https://www.facebook.com/hrach.martirosyan.58/media_set?set=a.1382434338436591.1073741848.100000101155806&type=3

Աղբյուրը՝ http://armscoop.com