2018թ. դեկտեմբերի 20-ին ԵՊՀ ԻՄ-ի տնտեսագիտության ֆակուլտետի ՈՒԳԸ կողմից արդեն 3-րդ անգամ մասնաճյուղում անցկացվեց ավանդույթ դարձած տնտեսագիտական ինտելեկտուալ խաղը, որին մասնակցում էին «Ֆինանսներ» և «Տնտեսագիտություն» մասնագիտությունների I-III կուրսերի ուսանողները:

Ժյուրիի անդամներն էին «Տնտեսագիտություն» մասնագիտության 3-րդ կուրսի ուսանողուհի Տիգրանուհի Թիրաբյանը և «Ֆինանսներ» մասնագիտության 2-րդ կուրսի ուսանողուհի Լուիզա Մադաթյանը:

Խաղը բաղկացած էր 4 փուլից: Առաջին փուլում տրվեց ուսանողների գիտելիքները ստուգող, ընտրովի պատասխանով մասնագիտական 10 հարց:

Երկրորդ՝ «Թաքնված բառեր» փուլում մասնակիցները խառը տառերից բաղկացած աղյուսակից պիտի գտնեին մասնագիտական տերմիններ:

Երրորդ փուլում տրվեցին մասնագիտական թեքումով տրամաբանական հարցեր:

Վերջին՝ չորրորդ փուլում մասնակիցները պիտի լուծեին տնտեսագիտական խաչբառը:

Թեժ պայքարից հետո 36 միավորով հաղթող ճանաչվեց «Էկոնոմիստ» թիմը (Ղազարյան Սևադա, Խաչատրյան Սոսե, Օհանյան Արշակ), որը պարգևատրվեց պատվոգրով:

 2018թ. դեկտեմբերի 18-ին ԵՊՀ ԻՄ-ի հումանիտար գիտությունների ֆակուլտետի «Օտար լեզու և գրականություն», «Հայոց լեզու և գրականություն» մասնագիտությունների 2-րդ կուրսերում կայացավ «Հայկական մշակույթ» թեմայով բաց դաս, որը վարում էր Տուրիզմի կառավարման և մշակութաբանության ամբիոնի դասախոս Անի Կոստանդյանը:

Բաց դասին ներկա էին Հումանիտար գիտությունների ֆակուլտետի դեկանի պաշտոնակատար Կ.Պողոսյանը, Տուրիզմի կառավարման և մշակութաբանության ամբիոնի ասիստենտ Ա.Ուլիխանյանը, բուհի վարչական աշխատակիցներ, ուսանողներ:

Դասի ընթացքում ներկայացվեցին հայկական մշակույթի շրջանները՝ հայ մշակույթը Արարատյան թագավորության (Ուրարտու) շրջանում, հելլենիզմի ժամանակաշրջանում, հայկական միջնադարյան մշակույթը (5-14-րդ դդ.), 15-18-րդ դդ. հայկական մշակույթը, նոր շրջանի հայկական մշակույթը (19-20-րդ դարասկիզբ), հայկական մշակույթը 20-րդ դարում և անկախացումից հետո: Քննարկվեց նաև Հայկական Վերածնունդ թեման:

Ուսանողները հանդես եկան գրական-երաժշտական կատարումներով՝ ներկայացնելով հայ դասականների (Նարեկացի, Քուչակ, Սայաթ-Նովա, Կոմիտաս, Մեծարենց, Սահյան, Սևակ և ուրիշներ) բանաստեղծություններից և դրանց հիման վրա գրված երգերից:

Վերջում բաց դասի մասնակիցները դիտեցին ընտանիքի վերաբերյալ ֆիլմ:   

 2018թ. դեկտեմբերի 18-ին ԵՊՀ Իջևանի մասնաճյուղի տնտեսագիտության ֆակուլտետում կայացավ ՀՀ դրամավարկային քաղաքականության վերաբերյալ սեմինար-քննարկում, որը վարում էին ՀՀ կենտրոնական բանկի ներկայացուցիչները՝ Դրամավարկային քաղաքականության վարչության պետ Վահագն Գրիգորյանը, Դիլիջանի ուսումնահետազոտական կենտրոնի տնօրեն Արմեն Նուրբենկյանը, Տնտեսական հետազոտությունների վարչության տնտեսագետ Արթուր Ղալթախչյանը:

Այն կազմակերպվել էր Դիլիջանի ուսումնահետազոտական կենտրոնի տնօրեն Արմեն Նուրբենկյանի և ԵՊՀ ԻՄ-ի տնտեսագիտության ֆակուլտետի, Ուսանողական գիտական ընկերութան, Ուսանողական խորհրդի համագործակցությամբ:

Բովանդակալից սեմինար-քննարկման ընթացքում ներկայացվեց ՀՀ կենտրոնական բանկի վարած քաղաքականության էությունը, հանգամանորեն քննարկվեցին քաղաքականության լծակները։ Նշվեց, որ մինչև 2006 թվականը ԿԲ-ն նպատակադրում էր փողի ագրեգատները։ Հետագա հետազոտությունները ցույց տվեցին, որ այդ եղանակն ունի բազում խնդիրներ և ցածր արդյունավետություն, ուստի 2006 թվականին անցում կատարվեց գնաճի նպատակադրմանը:

Անդրադարձ կատարվեց նաև Հայաստանում գործազրկության խնդրին, հաստատված տոկոսադրույքի հավելաճի (ռիսկ պրեմիում) մակարդակին, ինչպես նաև գնաճի վերաբերյալ հասարակության սպասումներին: Յուրաքանչյուր եռամսյակը մեկ կատարվող հարցումների ամփոփ նկարագրում հստակ տեսանելի էր, որ 2001-2016 թվականներին հասարակության սպասումները գնաճի վերաբերյալ բավականաչափ բարձր են (հարցվածների շուրջ 65 տոկոսն ուներ գնաճի սպասումներ), իսկ 2016-2018 թվականներին գնաճի սպասումները որոշ տատանումներով ընդհուպ մոտենում են 10 տոկոսին:

Ներկաները մեծ հետաքրքրությամբ մասնակցեցին սեմինարին՝ ակտիվորեն ուղղելով իրենց հետաքրքրող հարցերը, որոնք կապված էին ոչ միայն դրամավարկային քաղաքականության, այլև տնտեսության այլ բնագավառների հետ:

 2018թ. դեկտեմբերի 17-ին «Միկրոտնտեսագիտություն» դասընթացի շրջանակներում ԵՊՀ ԻՄ-ի տնտեսագիտության ֆակուլտետի «Տնտեսագիտություն» մասնագիտության 3-րդ կուրսի ուսանողները գիտաճանաչողական այց կատարեցին ՀՀ կենտրոնական բանկի Դիլիջանի ուսումնահետազոտական կենտրոն:

Ուսանողները նախ այցելեցին ուսումնահետազոտական կենտրոնում գործող թանգարան, որտեղ ցուցադրված էին դեռևս Ալեքսանդր Մակեդոնացու, Արտաշեսյանների, Կիլիկիայի, հայկական և այլ թագավորությունների մետաղադրամներ, դրոշմակնիքներ, տարբեր տարիների, ինչպես նաև 2018թ.  թողարկված երրորդ սերնդի թղթադրամներ:

ԵՊՀ ԻՄ-ի «Տնտեսագիտություն» մասնագիտության 3-րդ կուրսի ուսանողները մասնակցեցին նաև հետաքրքիր վիճակագրական նյութերով հագեցած դասախոսության, որի ընթացքում խոսվեց ՀՀ ԿԲ-ի որդեգրած քաղաքականության, 2008 թվականի ճգնաժամից հետո պարադիգմի փոփոխության և մակրոպրուդենցիալ քաղաքականության մասին: