2019թ. նոյեմբերի 7-ին ԵՊՀ ԻՄ-ի տնտեսագիտության ֆակուլտետում կայացավ մեքենայական ուսուցման վերաբերյալ սեմինար-քննարկում, որը կազմակերպվել էր Դիլիջանի ուսումնահետազոտական կենտրոնի տնօրեն Արմեն Նուրբենկյանի և ԵՊՀ ԻՄ-ի տնտեսագիտության ֆակուլտետի, ուսանողական կառույցների (ՈՒԳԸ, ՈՒԽ) համագործակցությամբ:

Այն վարեց ՀՀ կենտրոնական բանկի ներկայացուցիչ Արամ Բուտավյանը:

Բովանդակալից սեմինար-քննարկման ընթացքում ներկայացվեց, թե ինչ է մեքենայական ուսուցումը, և դրա ինչպիսի տեսակներ գոյություն ունեն:

Խոսվեց յուրաքանչյուր տեսակի առանձնահատկությունների և կիրառման ոլորտների մասին (էլեկտրոնային նամակների սպամներ, վարկերի դասակարգում, ձեռագիր տեքստերի ճանաչում, մակրոտնտեսական փոփոխականների կանխատեսում, կյանքի տևողության գնահատում, նկարների ճանաչում, ինքնակառավարվող մեքենաներ, ռոբոտների տեղաշարժ և այլն):

Անդրադարձ կատարվեց նաև մեքենայական ուսուցման նախագծերի քայլերին, դրամավարկային քաղաքականության արձանագրությունների մեջ առավել հաճախ օգտագործվող բառերին, որը պարզում են հենց մեքենայական ուսուցման շնորհիվ:

Վերջում ներկայացվեցին այնպիսի առցանց աղբյուրներ և դասընթացներ, որոնք կօգնեն ուսանողներին ավելի խորը ծանոթանալ այս ոլորտին:

Ներկաները մեծ հետաքրքրությամբ մասնակցեցին սեմինարին՝ ակտիվորեն ուղղելով իրենց հետաքրքրող հարցերը:

 2019թ. նոյեմբերի 5-ին «Հեռանկարներ և նոր հնարավորություններ. ԵՊՀ Իջևանի մասնաճյուղի ուսանողները Մայր բուհում» ծրագրի շրջանակներում ԵՊՀ ԻՄ-ի մի խումբ ուսանողներ հյուրընկալվեցին Մայր բուհում, որ իրականացվեց ԵՊՀ ԻՄ-ի տնօրենի պաշտոնակատար Ա.Մակարյանի առաջարկով, մասնաճյուղի արտաքին կապերի բաժնի ու ԵՊՀ շրջանավարտների և կարիերայի կենտրոնի համագործակցությամբ:

Մասնաճյուղից ԵՊՀ էին այցելել Արտաքին կապերի բաժնի վարիչ Արման Եգանյանը, շրջանավարտների և արտաքին շահակիցների հետ տարվող աշխատանքների համակարգող Էրինե Ղարայանը, մարքեթինգային աշխատանքների համակարգող Արմինե Մելքումյանը և քսան ուսանող:

Ծրագրի հիմնական նպատակն է նպաստել ՀՀ աշխատաշուկայում ուսանողների մրցակցության բարձրացմանը և ընդհանրապես խորացնել Մայր բուհի ու մասնաճյուղի միջև համագործակցությունը:

Հանդիպման ընթացքում ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը նշեց, որ ծրագրի օրակարգը կազմվել է այնպես, որ համալսարանում ուսանողների օրը լինի հնարավորինս հագեցած, մասնակիցները հնարավորություն ունենան ծանոթանալու աշխատաշուկայի պահանջներին և անհրաժեշտ հմտություններին: «Այս ձևաչափով համագործակցությունը Իջևանի մասնաճյուղի հետ առաջինն է, – ընդգծեց Կարինե Նազարյանը, – բայց ԵՊՀ շրջանավարտների և կարիերայի կենտրոնն ամեն ինչ անելու է, որ նմանօրինակ համագործակցությունը շարունակական բնույթ կրի»:

Ուսանողներին ողջունեց ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը: Նա, շնորհավորելով ուսանողներին Իջևանի մասնաճյուղի հիմնադրման 25-ամյակի կապակցությամբ, նշեց, որ ինքը շատ ուրախ է, որ այսօրվա ծրագիրը տեղի է ունենում ԵՊՀ հիմնադրման հարյուրամյակի միջոցառումների շրջանակում: «Դեռևս մի քանի ամիս առաջ, երբ մենք Իջևանի մասնաճյուղ այցելեցինք, անդրադարձանք նաև մասնաճյուղի ուսանողների ներգրավվածությանը միջազգային գործընթացներին»,- փաստեց Արթուր Իսրայելյանը՝ հավելելով, որ պայմանավորվածություն է ձեռք բերվել ԵՊՀ Իջևանի մասնաճյուղի ու ԵՊՀ շրջանավարտների և կարիերայի կենտրոնի միջև՝ պարբերաբար մասնաճյուղ այցելելու և ծրագրեր ներկայացնելու, որոնց կարող են մասնակցել նաև Իջևանի մասնաճյուղի ուսանողները: Արթուր Իսրայելյանը նշեց, որ ԵՊՀ ԻՄ-ի տնօրենի պաշտոնակատար Անուշավան Մակարյանը ցանկություն է հայտնել մասնաճյուղում կազմակերպել արևելյան 3 լեզուների՝ չինարենի, ճապոներենի և կորեերենի դասավանդում. «Մենք արդեն այդ համագործակցության ստեղծման ցանկության մասին հայտնել ենք ՀՀ-ում Չինաստանի և Կորեայի դեսպանություններին»:

ԵՊՀ պրոռեկտորն ուսանողներին խորհուրդ տվեց հատկապես ուշադիր լինել CV գրելու հմտությունների մասին դասախոսությանը՝ աշխատաշուկայում ճիշտ ներկայանալու համար:

Այնուհետև ուսանողները շրջայց կատարեցին ԵՊՀ Լյուդվիգ Ղարիբջանյանի անվան պատմության թանգարանում:

Թանգարանի տնօրեն Հեղինե Գասպարյանը հյուրերին ներկայացրեց համալսարանի հիմնադրման պատմությունը, անվանի պրոֆեսորների ընծայագրերով հազվագյուտ գրքերն ու գիտական աշխատությունները, բուհի պատմությանը վերաբերող արխիվային փաստաթղթեր, լուսանկարներ, ֆիլմեր: Ուսանողները ծանոթացան նաև 100-ամյա ԵՊՀ-ում պահվող բացառիկ նմուշներին:

Շրջայցից հետո ուսանողներին ողջունեց ԵՊՀ շրջանավարտների և կարիերայի կենտրոնի տնօրեն Լիլիթ Հակոբյանը և նրանց համար անցկացրեց «CV գրելու և գործատուին ներկայանալու հմտություններ» խորագրով դաս-քննարկումը: Նա ուսանողներին ներկայացրեց հարցազրույցների ընթացքում հաճախ տրվող հիմնական բարդ հարցերը, կարևորեց տվյալ կազմակերպության և դրա գործունեության վերաբերյալ թեկնածուների իրազեկվածությունը, ինչպես նաև հագուստի ճիշտ ընտրությունը:

Այնուհետև կենտրոնի աշխատակից Արմինե Հաջաթյանը խոսեց ճիշտ և մրցունակ CV կազմելու գաղտնիքների մասին:

Ծրագրի շրջանակներում ուսանողները հանդիպեցին նաև «ՎԵՈՆ Արմենիա» ՓԲԸ ՄՌԿ բաժնի ղեկավար  Աշխեն Պողոսյանի հետ, ով ուսանողներին ծանոթացրեց հարցազրույցին պատրաստվելու և ներկայանալու նրբություններին, իսկ եթե արդեն ընդունվել են աշխատանքի, ինչպես ընտելանալ ընկերության աշխատաոճին:

Հանդիպման ընթացքում ուսանողներն ակտիվորեն մասնակցեցին հարց ու պատասխանի ձևով քննարկման, տեղեկացան մեկ թափուր հաստիքի մասին, վերջում իրենց գոհունակությունը հայտնեցին հանդիպման կազմակերպիչներին:

ԵՊՀ ԻՄ-ի բնական գիտությունների ֆակուլտետի «Ինֆորմատիկա և կիրառական մաթեմատիկա» մասնագիտության 3-րդ կուրսի ուսանողուհի Լիանա Ներսիսյանը, շնորհակալություն հայտնելով ծրագրի կազմակերպիչներին, մասնավորապես նշեց, որ շատ արդյունավետ և օգտակար օր անցկացրեց ԵՊՀ-ում. «Ծրագրի մասնակցությունից հետո միանշանակ ինձ համար արդեն ավելի հեշտ կլինի ինտեգրվել աշխատաշուկայում, քանի որ սեմինարավարները նաև որպես գործատուներ մանրամասն բացատրեցին, թե ինչպես պետք է CV գրել, ինչպես ներկայանալ հարցազրույցին և հետագայում կայանալ որպես լավ մասնագետ»:

Հանդիպման վերջում շրջանավարտների և արտաքային շահակիցների հետ տարվող աշխատանքների համակարգող Էրինե Ղարայանը ևս շնորհակալություն հայտնեց կազմակերպիչներին՝ նշելով, որ նմանատիպ հանդիպումները նպաստում են Մայր բուհ-մասնաճյուղ համագործակցության խորացմանը, հույս հայտնեց, որ այդպիսի համատեղ ծրագրեր հաճախակի կիրականացնեն:

 2019թ. նոյեմբերի 4-ին ԵՊՀ ԻՄ-ի տնտեսագիտության ֆակուլտետի «Ֆինանսներ» մասնագիտության երրորդ կուրսի ուսանողները Ընդհանուր տնտեսագիտության ամբիոնի ասիստենտ Ա.Ալեքսանյանի ղեկավարությամբ այցելեցին Երևանում գործող «Հայաստանի ֆոնդային բորսա» ԲԲԸ (նախկինում՝ «ՆԱՍԴԱՔ ՕԷՄԷՔՍ Արմենիա»), որը ՀՀ միակ ֆոնդային բորսան է:

Հայաստանի ֆոնդային բորսայի և կենտրոնական դեպոզիտարիայի մասնագետները մեր ուսանողների համար անցկացրին «Ֆոնդային բորսայի էությունը և հիմնական ծառայությունները» և «Կենտրոնական դեպոզիտարիայի կողմից ռեեստրի վարման, պահառության և քլիրինգ/վերջնահաշվարկի ծառայությունները» թեմաներով սեմինարներ:

Նախ՝ սեմինարարավարները համալսարանականներին շնորհավորեցին ԵՊՀ-ի 100-ամյակի և մասնաճյուղի 25-ամյակի կապակցությամբ՝ մաղթելով նորանոր ձեռքբերումներ, ապա  հարց ու պատասխանի ձևով անցկացրին սեմինարները:

Սկզբում ներկայացվեցին կենտրոնական դեպոզիտարիայի  կողմից ռեեստրի վարման, պահառության և քլիրինգ/վերջնահաշվարկի ծառայությունները:

Այնուհետև Լևոն Մովսիսյանը պրեզենտացիաների ուղեկցությամբ ներկայացրեց  ֆոնդային բորսայի էությունը և հիմնական ծառայությունները:

Ուսանողները սեմինարավարներին ուղղեցին իրենց հետաքրքրող հարցերը, որոնք առավելապես վերաբերում էին արժեթղթերի շուկայի գործիքներին, բորսայի կապիտալին, նրանցից ստացան սպառիչ պատասխաններ: Լ․Մովսիսյանին ուսանողները լրացուցիչ խնդրեցին ավելի պրակտիկ մեկնաբանել քլիրինգը և պրոցեսինգը: Իրենց հերթին ուսանողները հաջողությամբ պատասխանեցին ՌԵՊՈ և ՍՎՈՊ գործարքների կնքման մասին իրենց ուղղված հարցերին, ապա համեմատական անցկացրին ՀՀ ֆոնդային բորսայի և ՀՀ կենտրոնական բանկի աշխատանքային մթնոլորտների միջև:

Սեմինարների վերջում մարքեթոլոգները պատմեցին բորսայական հայտնի ավանդույթի՝ զանգի մասին: Ուսանողները հետաքրքրությամբ լսեցին պատմությունը՝ իրենք էլ օրինակներ բերելով Ուոլ Սթրիթում գործող Նյու Յորքի ֆոնդային բորսայի՝ Մեծ հարթակի աշխատանքներից:

Հանդիպման վերջում «Ֆինանսներ» մասնագիտության 3-րդ կուրսի ուսանողները շնորհակալություն հայտնեցին կազմակերպիչներին՝ նշելով, որ իրականացված բովանդակային քննարկումներն ավելի ամրապնդեցին իրենց գիտելիքներն ու կարողությունները, նրանք հավելեցին, որ ուղղակի սիրահարված են բորսայական աշխատանքներին:

 2019թ. հոկտեմբերի 28-ից նոյեմբերի 2-ը ԵՊՀ Իջևանի մասնաճյուղում (առկա ուսուցման համակարգում) ընթանում են 2019-2020 ուստարվա առաջին կիսամյակի I ընթացիկ քննություններն ու ստուգումները:

ԵՊՀ ԻՄ-ի ուսումնամեթոդական վարչության պետ Ա.Դավթյանը հավաստիացրեց, որ քննաշրջանն անցկացվում է համաձայն սահմանված կարգի (Բակալավրի կրթական ծրագրով ուսումնական գործընթացի կազմակերպման կարգի)՝ նախատեսված կիսամյակի 9-րդ շաբաթում, որի ընթացքում ուսանողներն ազատված են ուսումնական պարապմունքներից:

Ընթացիկ քննությունների և ստուգումների հարցաշարերը, ըստ սահմանված կարգի, նախապես տրամադրվում են ուսանողներին:

Գրավոր ընթացիկ քննություններն ու ստուգումներն անցկացվում են տեսախցիկներով կահավորված լսարաններում:

Յուրաքանչյուր քննությունից կամ ստուգումից հետո դասախոսը ուսանողների հետ իրականացնում է քննարկում:

Բանավոր և թեստային ձևով անցկացված քննությունները գնահատվում են անմիջապես տեղում (լսարանում), իսկ գրավոր քննությունները 7 օրվա ընթացքում ստուգվում են դասախոսի կողմից և քննարկվում ուսանողների հետ:

Քննական գործընթացի թափանցիկությունն ու հրապարակայնությունն ապահովելու նպատակով քննությունների արդյունքները տեղադրվում են ԵՊՀ ԻՄ-ի պաշտոնական կայքէջում:

Ընթացիկ քննությունների և ստուգումների արդյունքները քննարկվում են ֆակուլտետների գիտական  խորհուրդների և ամբիոնների նիստերում:

Բոլոր լուսանկարները տե՛ս Պատկերասրահում: