2019թ. մայիսի 14-ին ԵՊՀ ԻՄ ՈՒԳԸ նախաձեռնությամբ մասնաճյուղում առաջին անգամ կայացավ «Ամենախելացին» ուսանողական ինտելեկտուալ խաղը, որին մասնակցում էին 10 ուսանող՝ մասնաճյուղի բոլոր ֆակուլտետներից։

Խաղը վարեց «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանողուհի Լիանա Ներսիսյանը։

Խաղի առաջին փուլն անցկացվեց բջջային հատուկ հավելվածի՝ Quizizz-ի օգնությամբ, տրվեց ընդհանուր զարգացվածությունն ստուգող 10 հարց, ընդ որում՝ մասնակիցները լրացուցիչ միավորներ էին վաստակում նաև հարցերին արագ պաասխանելու համար։ Առավելագույն միավոր հավաքած 5 ուսանողները հնարավորություն ստացան խաղը շարունակել երկրորդ փուլում։

Երկրորդ և երրորդ փուլերի համար «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանող Արայիկ Շահնազարյանը HTML, CSS և JavaScript լեզուների միջոցով ստեղծել էր համակարգչային հատուկ ծրագիր, որն էլ խաղի 2-րդ և 3-րդ փուլերը հնարավորինս մոտեցնում էր հեռուստախաղի ձևաչափին։

Երկրորդ փուլում մասնակիցները 10 թեմայից ընտրեցին երկուական թեմա, այնուհետև փորձեցին պատասխանել թեմայի հարցերին 1 րոպեի ընթացքում։ Լարված մրցակցության պայմաններում 2-րդ փուլը հաղթահարեցին «Պատմություն» մասնագիտության 3-րդ կուրսի ուսանող Մհեր Ղալումյանը (3-րդ փուլի համար ընտրված թեման՝ Միխայիլ Տալ), «Պատմություն» մասնագիտության 2-րդ կուրսի ուսանող Մարգարիտ Թամրազյանը (3-րդ փուլի համար ընտրված թեման՝ կինոռեժիսոր Մհեր Մկրտչյան) և «Սերվիս» մասնագիտության 3-րդ կուրսի ուսանող Տիգրան Ղուշչյանը (3-րդ փուլի համար ընտրված թեման՝ Ջեյմս Քեմերոն)։

Թեժ պայքար ծավալվեց նաև 3-րդ փուլում։ Մասնակիցները պետք է պատասխանեին իրենց կողմից նախօրոք ընտրված թեմային վերաբերող հարցերին։

Առավելագույն միավորներ վաստակելով՝ «Ամենախելացին» խաղի հաղթող ճանաչվեց Տիգրան Ղուշչյանը:

ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, ողջունելով և խրախուսելով ուսանողների նախաձեռնությունը, շնորհավորեց ուսանողական ինտելեկտուալ խաղի բոլոր հաղթողներին և նրանց անձամբ հանձնեց պատվոգրերը: 

Խաղի հաղթող Տիգրան Ղուշչյանը տնօրենության կողմից պարգևատրվեց մեդալով, պատվոգրով և հուշանվերով:

Պատվոգրերով պարգևատրվեցին Մհեր Ղալումյանը և Մարգարիտ Թամրազյանը, ովքեր զբաղեցրել էին համապատասխանաբար 2-րդ և 3-րդ հորիզոնականները։

Ինտելեկտուալ խաղի մյուս 7 մասնակիցներին հանձնվեցին հավաստագրեր, իսկ խաղում մեծ օգնություն ցուցաբերելու համար շնորհակալագրեր տրվեցին  դասախոսներ Նաթելլա Գրիգորյանին, Արա Ազատյանին, Վլադիմիր Պողոսյանին, Ալիսա Հասանյանին, Ռոբերտ Յոլչյանին և ուսանողներ Լիանա Ներսիսյանին, Արգիշտի Մարգարյանին։ Արայիկ Շահնազարյանը խաղում անգնահատելի ներդրում ունենալու համար պարգևատրվեց խրախուսական հուշանվերով և պատվոգրով։

Բոլոր լուսանկարները տե՛ս Պատկերասրահում: 

 2018-19 ուստարվա II կիսամյակում ԵՊՀ Իջևանի մասնաճյուղում կայացավ նախագծերի կառավարման վերաբերյալ սեմինար-քննարկում, որը վարեց Տուրիզմի կառավարման և մշակութաբանության ամբիոնի ասիստենտ, պ.գ.թ. Համլետ   Մելքումյանը:

Սեմինար-քննարկմանը մասնակցում էին ԵՊՀ ԻՄ-ի տուրիզմի   կառավարման և մշակութաբանության ամբիոնի դասախոսներ, Տավուշի    տուրիզմի   զարգացման  և  հետազոտության կենտրոնի  աշխատակիցներ:

Հ.Մելքումյանը քննարկման մասնակիցներին ներկայացրեց իր փորձը, որ ձեռք էր բերել 2018թ. հոկտեմբեր-դեկտեմբեր ամիսներին Տավուշի տուրիզմի զարգացման և հետազոտության կենտրոնի ու ԵՊՀ ԻՄ-ի համագործակցության շրջանակներում կայացած՝ «Ծրագրերի   կառավարում՝ կայուն զբոսաշրջության  զարգացման  նպատակով» (Project  Management  for  Sustainable  Tourism   Training   Aid PM4SD  UNDP   Armenia) դասընթացի ժամանակ:

Վերջինս մշակվել  է  JLAG-ի (PM4SD  հավատարմագրված   ուսուցողական կազմակերպություն)  և  Training Aid-ի կողմից, իրականացվում է «Ինտեգրված   գյուղական  զբոսաշրջության  զարգացում» ծրագրի  շրջանակներում: Դասընթացը ֆինանսավորվում  է Ռուսաստանի Դաշնության և իրականացվում ՄԱԶԾ   հայաստանյան  գրասենյակի  կողմից` Տարածքային   կառավարման  և   զարգացման   նախարարության  հետ  համագործակցությամբ: Մասնակիցներին դասընթացը հնարավորություն է տալիս  ծանոթանալ և օգտագործել  ծրագրերի   նախագծման  լավագույն  փորձը:

Հ.Մելքումյանը սեմինար-քննարկման մասնակիցներին սովորեցրեց  նախագծերի կառավարում՝ կայուն  զարգացման  համատեքստում: Շեշտը դրվեց կայուն  զբոսաշրջության ոլորտի  զարգացման և  դրա  կառավարման  առանձնահատկությունների վրա:

«Կայուն զարգացման նախագծերի  կառավարումը տեղական ինքնակառավարման մարմիններին և ընկերություններին օգնում  է  աշխատել   թափանցիկ: Սովորեցնում է ծրագրերն իրականացնել այնպես, որ  դրանք ունենան համապարփակ օգտակարություն թե՛ համայնքի, թե՛ տնտեսվարողի, թե՛ տեղական ինքնակառավարման մարմինների  համար: Միաժամանակ կայուն  զբոսաշրջության զարգացման  հիմքում  դրվում  է  բնապահպանական, տնտեսական և սոցիալ-մշակութային հավասարակշիռ զարգացման մոտեցումը, որոնք երկարաժամկետ կայունության  հասնելու  համար  անհրաժեշտ  երեք առանցքներն  են», – ընդգծեց Հ.Մելքումյանը:

Սեմինարի ընթացքում ծավալվեց հետաքրքիր քննարկում:

 2019թ. մայիսի 10-ին ԵՊՀ Իջևանի մասնաճյուղում կայացավ Վիլյամ (Ուիլյամ) Շեքսպիրի ծննդյան 455-ամյակին նվիրված միջոցառում, որը կազմակեպվել էր Անգլերեն լեզվի և գրականության ամբիոնի կողմից:

Միջոցառմանը մասնակցում էին «Օտար լեզուներ» մասնագիտության 3-րդ կուրսի ուսանողները, ներկա էին նույն մասնագիտության մյուս կուրսերի ուսանողները և ամբիոնի պրոֆեսորադասախոսական անձնակազմի ներկայացուցիչները:

Ուսանողներն անգլերենով ներկայացրին Շեքսպիրի կենսագրությունը, նրա հիմնական ստեղծագործությունները, արտասանեցին հատվածներ հայտնի ողբերգություններից, ինչպես նաև սոնետներ:

Մասնավորապես նշվեց, որ  Ուիլյամ Շեքսպիրը (William Shakespeare, 1564-1616 թթ.), ում հաճախ անվանում են Անգլիայի ժողովրդական բանաստեղծ, ծնվել է Մեծ Բրիտանիայի Ստրատֆորդ ըփոն Էյվոն քաղաքում: Շեքսպիրի գրական ժառանգությունն ընդգրկում է 154 սոնետ, 2 պոեմ և 36 պիես: Շեքսպիր-դրամատուրգի ստեղծագործությունը բաժանվում է 3 շրջանի (1-ին՝ 1590-1600 թթ., 2-րդ՝ 1601-1608 թթ., 3-րդ՝ 1609-1612 թթ.), որոնցից ամենաարդյունավետը համարվում է երկրորդը, երբ գրվել են «Համլետ», «Օթելլո», «Լիր արքա», «Մակբեթ», «Անտոնիուս և Կլեոպատրա» հայտնի ողբերգությունները և այլն: Շեքսպիրի պիեսները թարգմանվել են ժամանակակից բոլոր հիմնական լեզուներով և բեմադրվել են ավելի հաճախ, քան որևէ այլ դրամատուրգի ստեղծագործություններ:

Միջոցառման մասնակիցները նաև պատրաստել էին Շեքսպիրի ստեղծագործությունների հիման վրա նկարահանված ֆիլմերի թրեյլերների թարգմանությունները, որոնք ձայնագրվել էին:

Շեքսպիրի ծննդյան 455-ամյակին նվիրված միջոցառումն անցավ ուրախ և հաճելի մթնոլորտում:

 2019թ. մայիսի 10-ին ԵՊՀ ԻՄ-ում տեղի ունեցավ թիմային ինտելեկտուալ խաղի մասնաճյուղային առաջնություն, որին մասնակեցին 8 թիմեր, ներառյալ՝ ՈՒԳԸ 1 և ՈՒԽ 2 թիմերը։ Ուսանողներին հնարավորություն էր տրված թիմում ներառել ոչ միայն նույն կուրսի ուսանողներին, այլև տարբեր կուրսերի, մասնագիտությունների և ֆակուլտետների ուսանողների։ Այս ձևաչափի նպատակը թիմերի արդյունավետության բարձրացումն է։

Ժյուրիի անդամներն էին «Պատմություն» մասնագիտության երկրորդ կուրսի ուսանողուհի Մարգարիտ Թամրազյանը, նույն մասնագիտության առաջին կուրսի ուսանողուհի Արփինե Մարտիրոսյանը, «Տարրական մանկավարժություն և մեթոդիկա» մասնագիտության երրորդ կուրսի ուսանողուհի Դիանա Սարդարյանը։

Առաջնությունն անցկացվեց 1 փուլով, որի ընթացքում տրվեց տրամաբանական և ընդհանուր զարգացվածության բնույթի 20 հարց։

Հետաքրքիր և լարված պայքարից հետո առաջնության հաղթող ճանաչվեց “SPARTA” թիմը (Ղազումյան Լարիդա, Ղալումյան Մհեր, Բալդրյան Ալիխան, Քոչարյան Նունե, Մելիքբեկյան Սուրեն):

Երկրորդ տեղը գրավեց ՈՒԳԸ թիմը, իսկ երրորդ տեղը՝ «Տարրական մանկավարժություն և մեթոդիկա» մասնագիտության առաջին կուրսի թիմը։

Հաղթող թիմը պարգևատրվեց պատվոգրով և հուշանվերով, երկրորդ և երրորդ տեղերն զբաղեցրած թիմերը՝ պատվոգրերով, մյուս թիմերը՝ հավաստագրերով։

Բոլոր լուսանկարները տե՛ս Պատկերասրահում: