2019թ.  մարտի  15-ին  ԵՊՀ  ԻՄ-ի  հումանիտար   գիտությունների   ֆակուլտետի «ՀԼԳ» մասնագիտության   2-րդ  և  3-րդ   կուրսերի  ուսանողները Հայոց լեզվի և գրականության ամբիոնի վարիչի պաշտոնակատար բ.գ.թ., դոցենտ Վ.Ավագյանի  գլխավորությամբ այցելեցին Ազատամուտ համայնքի մշակույթի տուն:

Այցելության նպատակն  էր Ազատամուտում անցկացնել միջոցառում՝ նվիրված  նույն համայնքում բնակվող Բալասյանների տոհմի ծագման պատմությանը, նշանավոր  դեմքերին` հանձին   Գառնիկ   Բալասյանի:

Զեկուցումով հանդես եկավ «ՀԼԳ» մասնագիտության 2-րդ կուրսի ուսանողուհի Լիլիթ Բալասյանը, ում զեկուցումը հագեցած էր հետաքրքիր զրույցներով, իրենց տոհմին վերաբերող ուշագրավ տեղեկություններով:

Լիլիթի պապիկը` Գառնիկ  Բալասյանը, մասնագիտությամբ եղել է բանասեր, լրագրող, գրել է բանաստեղծություններ, որոնցից մի  քանիսը  ուսանողներն  արտասանեցին միջոցառման ընթացքում:

Ներկայացվեցին նաև երգեր՝ դաշնամուրի նվագակցությամբ:

Հետաքրքիր պատմություններով հանդես եկան Գառնիկ Բալասյանի ընկերներ Աշոտ Մարդանյանը և Ֆեդյա Ղուկասյանը, ովքեր նույնպես մասնագիտությամբ  բանասեր են:

Իր տոհմի պատմությունը ներկայացրեց նույն մասնագիտության 3-րդ կուրսի ուսանողուհի Քրիստինե Քոչարյանը:

Միջոցառումը եզրափակեց Ազատամուտի համայնքապետի պաշտոնակատար Վահագն Ալավերդյանը՝ շնորհակալություն հայտնելով համալսարանականներին նման նախաձեռնության համար, որի շնորհիվ ընդլայնվում է նաև բուհ-համայնք   համագործակցությունը:

Վերջում տեղի ունեցավ հյուրասիրություն:

 2019թ. մարտի 15-ին Իջևանի քաղաքապետարանում տեղի ունեցավ «Երիտասարդը ՏԻՄ-ի գործընկեր» 4-ամսյա ծրագրի ամփոփումը:

Ծրագրում ընդգրկված էին 18-20 տարեկան 17  երիտասարդներ, ովքեր ԵՊՀ Իջևանի մասնաճյուղի ուսանողներ են:

Նրանք հնարավորություն ստացան զարգացնելու և հզորացնելու իրենց գիտելիքներն ու կարողությունները քաղաքացիական-հասարակական ոլորտում, նոր մակարդակի հասցնելու ՏԻՄ-երիտասարդություն կապը և տեղական որոշումների մակարդակում լսելի դարձնելու երիտասարդության ձայնն ու առաջարկները:

Ծրագրի շրջանակներում  կազմակերպվել  են դասընթացներ, խմբի անդամների  կարողությունների և գիտելիքների հզորացում՝ շահերի պաշտպանության, կարիքների վերհանման ու հարցումների անցկացման, համայնքային ծրագրերի նախագծման ու իրականացման, որոշումների կայացման գործընթացում դերակատարների համագործակցության կայացման մեխանիզմների վերաբերյալ:

Մասնակիցները սովորել են, թե ինչպես պլանավորել շահերի պաշտպանության քայլերը, բացահայտել հիմնախնդիրը, քարտեզագրել առկա ներքին ու արտաքին ռեսուրսները, գնահատել կարիքները և այլն:  Նրանք երիտասարդների շրջանում իրականացրել են նաև հանրային հարցումներ, որոնց արդյունքների հիման վրա կազմել են առաջարկությունների փաթեթ՝ ՏԻՄ-երին ներկայացնելու համար:  

Իջևանի համայնքապետի և ավագանու անդամների հետ կայացած հանդիպմանը, որին մասնակցում էին նաև գործընկեր կազմակերպությունների՝ «ՕքսԵՋեն» հիմնադրամի և «Վորլդ Վիժն Հայաստան» միջազգային կազմակերպության, ԵՊՀ ԻՄ-ի ներկայացուցիչներ, խումբը ներկայացրեց առաջարկություններ՝ համայնքում երիտասարդների ու ՏԻՄ-երի միջև համագործակցության խորացման նպատակով:  Առաջարկվում էր, օրինակ, Իջևան համայնքի բյուջեով  երիտասարդական  փոքր նախաձեռնությունների ֆինանսավորում հատկացնել՝ տեղական  դրամաշնորհների հայտարարման կարգով:

Իջևան համայնքի ղեկավար Վարդան Ղալումյանը, ողջունելով ծրագրի մասնակիցներին, կարևորեց  երիտասարդների նախաձեռնությունը, պատրաստակամություն հայտնեց համագործակցելու և համատեղ ծրագրեր իրականացնելու: Նա նշեց, որ ավագանու հետ անպայման կքննարկեն առաջարկները և երիտասարդների հետ շփումները կդարձնեն ավելի հաճախակի:

Բոլոր մասնակիցները ստացան հավաստագրեր:

Ծրագրի ամենագլխավոր արդյունքն այն է, որ հիմք դրվեց երիտասարդների ու ՏԻՄ-երի միջև նոր համագործակցության, որը հնարավորություն կտա երկխոսության ծավալման, նոր գաղափարների քննարկման ու համայնքում երիտասարդների քաղաքացիական ակտիվության խթանման համար: Հավելենք, որ երիտասարդական աշխատանքի խթանմանն ուղղված «Երիտասարդը ՏԻՄ-ի գործընկեր» ծրագիրն իրականացվում է  «ԵՄ-ն հանուն երիտասարդության՝ հմտություններ ապագայի համար» տարածաշրջանային ծրագրի (2018-2020 թթ.) շրջանակներում՝ Իջևանի համայնքապետարանի  և «Վորլդ Վիժն Հայաստան» միջազգային  բարեգործական կազմակերպության հետ համագործակցությամբ:

 2019թ. մարտի 16-ին ԵՊՀ ԻՄ-ի հումանիտար գիտությունների ֆակուլտետում կայացավ կանանց տոնին նվիրված միջոցառում, որը կազմակերպել էր Անգլերեն լեզվի և գրականության ամբիոնի վարիչի պաշտոնակատար բ.գ.թ., դոցենտ Քրիստինե Հարությունյանը:

Ներկա էին ֆակուլտետի վարչական և պրոֆեսորադասախոսական անձնակազմի ներկայացուցիչներ, ամբիոնի անդամները, տարբեր մասնագիտությունների ուսանողներ, մասնակցում էին «Օտար լեզուներ» մասնագիտության 1-ին կուրսի ուսանողները:

Կանանց տոնին նվիրված միջոցառման լեզուն ոչ միայն անգլերենն էր, այլև ֆրանսերենը, ռուսերենը և մայրենին:

Միջոցառման ընթացքում ներկայացվեցին կանանց տոնի նախապատմությունը և տարբեր երկրներում այն նշելու ավանդույթները:

Ներկաներն ունկնդրեցին երգեր և բանաստեղծություններ անգլերենով, ֆրանսերենով, ռուսերենով, հայերենով և ուկրաիներենով, ականատես եղան նաև պարային գեղեցիկ կատարման:

Միջոցառման վերջում ուսանողները բարեմաղթանքներով բացիկներ և ծաղիկներ նվիրեցին միջոցառմանը ներկա դասախոսներին:

Ապա ելույթ ունեցան Հումանիտար գիտությունների ֆակուլտետի դեկանի պաշտոնակատար Կ.Պողոսյանը, Անգլերեն լեզվի և գրականության ամբիոնի վարիչի պաշտոնակատար Ք.Հարությունյանը՝ գեղեցիկ միջոցառման համար իրենց գոհունակությունը հայտնելով ուսանողներին և նրանց մաղթելով միշտ լինել նույնքան ստեղծագործ ու եռանդուն, ուսման մեջ ցուցաբերել բարձր առաջադիմություն:

 2019թ. մարտի 15-ին Տավուշի մարզպետարանում մամուլի ասուլիսի և ԵՊՀ Իջևանի մասնաճյուղում տեղեկատվական հանդիպման միջոցով ներկայացվեցին մարզում մեկնարկող տեխնոլոգիական կրթական ծրագրի մանրամասները:

Նախ Տավուշի մարզպետարանում կայացավ Տավուշի մարզպետ Հայկ Չոբանյանի, «Գյումրիի տեղեկատվական տեխնոլոգիաների կենտրոն» գիտակրթական հիմնադրամի գործադիր տնօրեն Ամալյա Եղոյանի և ԵՊՀ Իջևանի մասնաճյուղի տնօրենի պաշտոնակատար Արտակ Ցուցուլյանի համատեղ մամուլի ասուլիսը, որին ներկա էր նաև ՀՀ ԱԺ պատգամավոր Սոֆյա Հովսեփյանը:

Մամուլի ասուլիսի ընթացքում ներկայացվեց Տավուշի մարզում մեկնարկող տեխնոլոգիական կրթական ծրագիրը, ընդգծվեց բարձր տեխնոլոգիական ոլորտի երկարաժամկետ ռազմավարական նշանակությունը Տավուշի մարզի համար:

«Մարզերում բարձր տեխնոլոգիաների զարգացումը դառնալու է դրանց հզորացմանը նպաստող լուրջ քայլ: Սա իրական հնարավորություն է աշխատատեղեր ստեղծելու ՏՏ ոլորտով հետաքրքրված երիտասարդների համար՝ այդպիսով կանխելով նրանց արտագաղթը մարզից և առհասարակ Հայաստանից»,-ասուլիսի ընթացքում շեշտեց ՀՀ Տավուշի մարզպետ Հայկ Չոբանյանը:

Այնուհետև ԵՊՀ Իջևանի մասնաճյուղում կայացավ տեղեկատվական հանդիպում, որի ժամանակ ներկայացվեցին Գյումրիի տեղեկատվական տեխնոլոգիաների կենտրոնի (ԳՏՏԿ) կողմից Տավուշի մարզում նախատեսված տեխնոլոգիական կրթական ծրագրի մանրամասները:

Հանդիպմանը ներկա էին Տավուշի մարզպետ Հայկ Չոբանյանը, ԵՊՀ ԻՄ-ի տնօրենի պաշտոնակատար Արտակ Ցուցուլյանը, ԳՏՏԿ-ի տնօրեն Ամալյա Եղոյանը, ՀԱԵ Տավուշի թեմի առաջնորդ Տեր Բագրատ եպիսկոպոս Գալստանյանը, ՀՀ ԱԺ պատգամավոր Սոֆյա Հովսեփյանը, դասախոսներ, ուսանողներ, ուսուցիչներ, աշակերտներ, լրատվամիջոցների ներկայացուցիչներ և տեխնոլոգիաներով հետաքրքրված այլ անձինք:

Ս.թ. փետրվարի 22-ին Տավուշի մարզպետարանի, ԳՏՏԿ-ի և ԵՊՀ ԻՄ-ի միջև ստորագրվել էր եռակողմ հուշագիր, որով կողմերը համաձայնության էին եկել միավորել իրենց ջանքերը՝ նպաստելու Տավուշի մարզում տեղեկատվական և հաղորդակցական տեխնոլոգիաների ոլորտի զարգացման գործընթացին: Դրանով ազդարարվել է Իջևանում ԳՏՏԿ-ի կրթական ծրագրի մեկնարկը, որը կիրականացվի Հայ օգնության ֆոնդի համաֆինանսավորմամբ:

ԵՊՀ ԻՄ-ում կայացած հանդիպման ժամանակ Ա.Ցուցուլյանը շնորհակալություն հայտնեց ներկաներին ցուցաբերած հետաքրքրության համար, ներկայացրեց ծրագրի նպատակը, ԵՊՀ Իջևանի մասնաճյուղի ունեցած հնարավորությունները, կոչ արեց ակտիվորեն մասնակցել ծրագրին, ապա խոսքը փոխանցեց Տավուշի մարզպետին:

Հ.Չոբանյանը նշեց, որ ինքը պատրաստ է աջակցել մարզի զարգացմանը նպաստող ծրագրերի իրականացմանը, կարևորեց տեղեկատվական տեխնոլոգիաների դերը, շեշտեց Տավուշի սահմանամերձ լինելու առավելությունը, որը պետք է ստիպի ստեղծել մասնավորապես անվտանգության ապահովման կիրառական տեխնոլոգիաներ, շնորհակալություն հայտնեց ԳՏՏԿ-ին Տավուշի մարզում գործունեություն սկսելու համար:

Ս.Հովսեփյանն իր խոսքում նշեց, որ թեև Շիրակի մարզից է, բայց հաճախ է լինում Տավուշում (մասնավորապես «Աջակցենք սահմանամերձ բնակավայրերին» նախաձեռնության շրջանակներում) և դրական լիցքեր է ստանում այստեղից ու այլ մարզերում ներկայացնում Տավուշի առավելություններն ու հաջողությունները:

Ա.Եղոյանը ներկայացրեց ԳՏՏԿ-ի և Գյումրու տեխնոլոգիական կենտրոնի (ԳՏԿ) հաջողված փորձը Գյումրիում և Վանաձորում, նշեց, որ ծրագրի նպատակը տավուշեցիներին հայրենի բնակավայրում պահելը և արժանապատիվ աշխատանքային միջավայր ստեղծելն է, հույս հայտնեց, որ ծրագրի հաջողության դեպքում ներդրումներ կլինեն մարզում, և կստեղծվի տեխնոլոգիական կենտրոն:

Տեր Բագրատ եպիսկոպոս Գալստանյանը գնահատանքի խոսք ասաց ծրագրի ակունքներում կանգնած բոլոր մարդկանց և օրհնեց ծրագրի մեկնարկը:

Այնուհետև Ա.Եղոյանը ներկայացրեց դասընթացների կառուցվածքը, ներկաներին ծանոթացրեց ծրագրի համակարգող, ԵՊՀ ԻՄ-ի «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանողուհի Լիանա Ներսիսյանի հետ:

ԳՏՏԿ-ի ուշադրությունը դեպի Տավուշ ուղղելու համար նա շնորհակալություն հայտնեց և խոսքը փոխանցեց ԵՊՀ ԻՄ-ի դասախոս Սլավիկ Ալավերդյանին: Վերջինս նշեց, որ մասնակցել է «Մարզերի հզորացումը բարձր տեխնոլոգիաների խթանմամբ»  ՏՏ համապետական երկու համաժողովներին, որոնցից առաջինի շրջանակներում 2017թ. նոյեմբերի 17-ին ներկայացրել է տեխնոլոգիական ոլորտի զարգացման համար Տավուշի մարզի ունեցած ներուժը, և այժմ ուրախ է, որ ընդամենը մեկուկես տարի անց մեկնարկում է այս ծրագիրը, հավելեց, որ ինքը ևս կմասնակցի դասընթացին և կոչ արեց ակտիվորեն ներգրավվել ծրագրում:

Ելույթ ունեցավ նաև նույն համաժողովների մասնակից, Դիլիջանի պետական քոլեջի դասախոս և «Արմաթ» խմբակավար Նարինե Դանելյանը, ով ևս ողջունեց ծրագիրը, նշեց, որ տեղեկանալուն պես անմիջապես գրանցվել է դասընթացին և կոչ արեց Դիլիջանի և մարզի այլ համայնքների բնակիչներին մասնակցել դասընթացին՝ մեջբերելով Տավուշի մարզպետի խոսքը, որ անհրաժեշտության դեպքում մարզպետարանը լուծի մասնակիցների տրանսպորտային խնդիրը:

Վերջում Ամալյա Եղոյանը պատասխանեց ներկաներին հուզող տարաբնույթ հարցերին, նշեց, որ առաջիկայում կլինի ծրագրի տեխնիկական մանրամասների վերաբերյալ հանդիպում և հորդորեց ուշադիր լինել նորություններին:

Դասընթացներին ծանոթանալու և գրանցվելու համար անհրաժեշտ է անցնել հետևյալ հղումով, իսկ հարցերի դեպքում զանգահարել 077-65-99-55 հեռախոսահամարով:

Դիմումների ընդունման վերջնաժամկետն է 2019թ. մարտի 25-ը ներառյալ, դասընթացը կմեկնարկի 2019թ. ապրիլի 1-ից: 

 2019թ. մարտից սկսվել են Տավուշի մարզի հանրակրթական դպրոցների աշակերտների ճանաչողական այցերը ԵՊՀ Իջևանի մասնաճյուղ:

Մարտի 13-ին մասնաճյուղի հյուրերը Աչաջրի Հրանտ Թամրազյանի անվան միջնակարգ դպրոցի 12-րդ դասարանի աշակերտներն էին: Այցը նախաձեռնել էր Աչաջրի համայնքային զարգացման կամավորական խմբի ղեկավար, «ՏՄՄ» 3-րդ կուրսի ուսանողուհի Դիանա Սարդարյանը:

Մարտի 14-ին ԵՊՀ ԻՄ այցելեցին Իջևանի վարժարանի 11-րդ դասարանի աշակերտները՝ ֆիզիկայի ուսուցչուհի Նառա Խաչատրյանի ուղեկցությամբ:

ԵՊՀ ԻՄ-ի մասնագիտական կողմնորոշման և պրակտիկայի կազմակերպման բաժնի տեսուչ Սլավիկ Ալավերդյանը հյուրերին ներկայացրեց մասնաճյուղի պատմությունը և մասնագիտությունները, ծանոթացրեց գրադարանին, լսարաններին, համակարգչային սրահներին, Անգլերենի ռեսուրս կենտրոնին, մարզադահլիճին, Կիրառական արվեստի ֆակուլտետի արվեստանոցներին և բուհի պատերը զարդարող արվեստի գործերին:

Աչաջրի դպրոցի աշակերտները եղան նաև Տավուշի տուրիզմի զարգացման և հետազոտության կենտրոնում, որի ներկայացուցիչները նրանց համար կազմակերպեցին քաղաքային տուր:

Վարժարանի աշակերտներն էլ ներկա եղան ֆիզիկայի դիտարժան փորձերի, որոնք իրականացրին ԵՊՀ ԻՄ-ի ընդհանուր մաթեմատիկայի և բնագիտության ամբիոնի ասիստենտ, ֆ.մ.գ.թ. Ալեքսան Մարգարյանը և նույն ամբոնի դասախոս Գեղամ Գուլակյանը:

Բոլոր լուսանկարները տե՛ս Պատկերասրահում: