2015թ. մարտի 17-ին ԵՊՀ ԻՄ-ի կիրառական արվեստի ֆակուլտետի դահլիճում տեղի ունեցավ Կանանց տոնին նվիրված միջոցառում, որը նախաձեռնել և կազմակերպել էր մասնաճյուղի ուսանողական խորհուրդը:

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ, հյուրեր:

Միջոցառման ընթացքում ԵՊՀ ԻՄ-ի շնորհալի ուսանողները հանդես եկան լուսափթիթ գարնան, «կենաց ծառը մշտադալար պահող» կանանց ու մայրերի, «մայրամուտի շողից պոկված, արշալույսի ցողով օծված» չքնաղ հայուհիների մասին ներբող-բանաստեղծություններով ու երգերով («Մայր բառն ասելիս» /Մելինե Իսկանդարյան/, «Մայրիկ» /Մերի Ներսիսյան/, «Հայաստանի աղջիկները» /Գոհար Գրիգորյան/, «Պատրանքի թևով» /Լուսինե Սահակյան/, «Կգամ» /Նարինե Ամիրխանյան/, «Ես լսեցի մի անուշ ձայն» /Մերի Բարսեղյան/, «Ով սիրուն, սիրուն» /Ռուդիկ Դովլաթյան և Վանուհի Վանեսյան/, «Մի կյանք արժե մի համբույրը աղջկա» /Սոնա Ղևոնդյան/, «Շիրազի գովքը» /Ռուդիկ Դովլաթյան/):

Բեմի վրա ալիքվեց քնքշանուշ նաիրուհու հեզաճկուն պարը հայոց /Մարիամ Մարգարյան/, գալարվեց վալսը խելահեղ` իր շրջապտույտի մեջ առնելով պարող զույգերին:

Այնուհետև ելույթ ունեցավ մասնաճյուղի տնօրեն Սամվել Առաքելյանը` գեղեցիկ միջոցառման համար շնորհակալություն հայտնելով Ուսանողական խորհրդի անդամներին, Կանանց տոնի կապակցությամբ ջերմորեն շնորհավորելով մեր սիրելի մայրերին և քույրերին, կին դասախոսներին և ուսանողուհիներին.
«Մարդու ամենամեծ ուրախությունը թերևս երեխայի զգացողությունը չկորցնելն է, որը պահպանվում է այնքան ժամանակ, քանի դեռ ունենք մայր. սիրե՛նք, փայփայե՛նք մեր մայրերին, որոնք մեր մեծագույն գանձն են, հույսն ու ապավենը կյանքում: Շնորհավորենք և շնորհակալություն հայտնենք մեր ա՛յն մայրերին, որոնց զավակները մեր սահմաններն են պաշտպանում, թո՛ղ նրանք երբևէ արցունք չթափեն, իսկ եթե պիտի արցունքոտվեն նրանց աչքերը, ապա այդ արցունքները լինեն միմիայն երջանկության արցունքներ:
Շնորհավորենք մեր կին դասախոսներին, ովքեր սահմանամերձ մարզում մեծ առաքելություն են կատարում. իրենց անձնական վարքագծով, մտավոր ու հոգևոր կարողություններով ջանք ու եռանդ չեն խնայում մեր սերնդի կրթության ու դաստիարակության գործում: Շնորհավորենք նաև մեր այն աղջիկներին, ուսանողուհիներին, ովքեր դեռ մեծ առաքելություն ունեն իրականացնելու կյանքում` մայրանալու, և տա Աստված, որ իսկապես մի օր էլ իրենց երեխաները մոմ վառեն իրենց համար, ինչպես իրենք` իրենց մայրերի»:

Միջոցառման վերջում մասնակիցներն այցելեցին Մայրության և գեղեցկության տոնի առթիվ Կիրառական արվեստի ֆակուլտետի կողմից կազմակերպված ցուցահանդես, որը գեղագիտական մեծ հաճույք ու բավականություն պատճառեց այցելուներին` առավել ամբողջական դարձնելով նրանց տոնական տրամադրությունը:

Միջոցառման մյուս լուսանկարները տե՛ս այստեղ:

2015թ. մարտի 14-ին ԵՊՀ մինչհամալսարանական կրթության վարչության կողմից հանրակրթական 15 առարկաներից կազմակերպվեց օլիմպիադա, որը վարչությունն անցկացնում է 2009 թվականից ի վեր, և որի նպատակն է շնորհալի ու ստեղծագործական կարողություններ ունեցող երեխաների հայտնաբերումը, նրանց հետ անհատական աշխատանքի կազմակերպումը:

Տավուշի մարզում օլիմպիադայի աշխատանքներն իրականացրեց ԵՊՀ Իջևանի մասնաճյուղի մասնագիտական կողմնորոշման և պրակտիկայի կազմակերպման բաժինը:

Տավուշի մարզի 54 միջնակարգ և 4 ավագ դպրոցներից օլիմպիադային մասնակցեց 27 միջնակարգ և 4 ավագ դպրոցների 320 աշակերտ` հանրակրթական հետևյալ առարկաների գծով.
• մաթեմատիկա,
• մարդու իրավունքներ և ժողովրդավարություն,
• ֆիզիկա,
• հայոց լեզու և գրականություն,
• քիմիա,
• ռուսաց լեզու,
• ինֆորմատիկա,
• անգլերեն,
• կենսաբանություն,
• ֆրանսերեն,
• աշխարհագրություն,
• գերմաներեն,
• հայ ժողովրդի պատմություն,
• ստեղծագործական աշխատանք,
• հայ եկեղեցու պատմություն:

Օլիմպիադան տևեց 4 ժամ:

Օլիմպիադայի փակման և պարգևատրման արարողությունը տեղի կունենա մարտի 27-ին` ժամը 15:00-ին, ԵՊՀ մեծ դահլիճում (կենտրոնական մասնաշենք, 3-րդ հարկ): Հաղթողները կստանան 1-ին, 2-րդ և 3-րդ կարգի դիպլոմներ, գովասանագրեր, ինչպես նաև Մայր բուհի կողմից կպարգևատրվեն գրքերով ու դիմորդի ուղեցույցներով:

Արդյունքների մասին կարող եք տեղեկանալ ԵՊՀ Իջևանի մասնաճյուղի պաշտոնական կայքի միջոցով

2015թ. մարտի 12-ին ԵՊՀ ԻՄ-ի տնտեսագիտության ֆակուլտետի օնլայն լսարանում տեղի ունեցավ մասնաճյուղի ուսանողական գիտական ընկերության նախագահի ընտրություն, որին առաջադրվել էր Հումանիտար գիտությունների ֆակուլտետի «Մանկավարժություն և հոգեբանություն» մասնագիտության առաջին կուրսի ուսանող Ալբերտ Զուրաբյանի թեկնածությունը։

Ընտրությանը մասնակցում էին ՈՒԳԸ-ի անդամները, ներկա էին մասնաճյուղի ուսանողական կառույցների համակարգող Սլավիկ Ալավերդյանը և ուսանողական խորհրդի նախագահ Ռազմիկ Հովսեփյանը։

Ընտրությանը քվեարկելու իրավունք ունեին միայն ՈՒԳԸ-ի անդամները:
Այն անցկացվեց կողմ կամ դեմ քվեարկությամբ։

19 կողմ և 4 դեմ ձայների հարաբերակցությամբ ԵՊՀ Իջևանի մասնաճյուղի ուսանողական գիտական ընկերության նոր նախագահ ընտրվեց Ալբերտ Զուրաբյանը։

Մասնաճյուղը շնորհավորում է ՈՒԳԸ-ի նորընտիր նախագահին` ակնկալելով ակտիվ գործունեություն և նվիրվածություն։

2015թ. մարտի 9-ին տեղի ունեցավ ԵՊՀ ԻՄ-ի ուսանողների հետ հանդիպում, որին մասնակցում էին ՀՀ ոստիկանության Տավուշի մարզային վարչության Իջևանի բաժնի պետ, ոստիկանության գնդապետ Կարեն Հակոբյանը, նույն բաժնի պետի ծառայության գծով տեղակալ Գարիկ Միրզոյանը, ԵՊՀ ԻՄ-ի տնօրեն Սամվել Առաքելյանը, Տավուշի մարզպետի խորհրդական, ՀԵՀ Տավուշի մարզային կենտրոնի համակարգող Կարեն Իսկանդարյանը և ուսանողներ:

Հանդիպման առաջին մասում տեղի ունեցավ Հայաստանի երիտասարդական հիմնադրամի կազմակերպած ուսման վարձի փոխհատուցման մրցույթում հաղթող ճանաչված ուսանողների հավաստագրերի հանձնումը:

ՀԵՀ Տավուշի մարզային կենտրոնի համակարգող Կարեն Իսկանդարյանը ներկայացրեց, որ կրթաթոշակ տրամադրելիս հաշվի են առնվել սոցիալապես անապահով, հեռավոր կամ սահմանամերձ գյուղերի բնակիչ, ծնողազուրկ լինելու, օրինակելի վարք, հասարակական ակտիվություն, բարձր առաջադիմություն և հաշմանդամություն ունենալու հանգամանքները:

Այնուհետև ՀԵՀ կենտրոնի համակարգողը հանձնեց հավաստագրերը կրթաթոշակի արժանացած հետևյալ ուսանողներին.

1. Մելիքբեկյան Մինավարդ Գագիկի

2. Մկրտումյան Արսեն Արթուրի

3. Սարգսյան Դիանա Արթուրի

4. Դավթյան Արինա Վաչագանի

5. Հախվերդյան Նազելի Հարությունի

6. Հարությունյան Թեհմինե Լևոնի

7. Սարուխանյան Գուրգեն Մկրտիչի

8. Բադալյան Կարինե Աշոտի

9. Սարգսյան Ալվարդ Ալեքսանի

10. Սարիբեկյան Շարմաղ Սամվելի

11. Թամրազյան Լիլիթ Սամվելի

12. Ափինյան Նարինե Արծվիկի

13. Գրիգորյան Գեղեցիկ Արմենի:

Հանդիպման երկրորդ հատվածում մասնաճյուղի տնօրենը խոսեց հասարակություն-ոստիկանություն կապի ամրապնդման, մարզի հասարակական կարգի պահպանության գործում ուսանողության դերի մասին:

Ուսանողները Իջևանի ոստիկանապետ Կ.Հակոբյանին ուղղեցին հասարակական կարգին, երթևեկության անվտանգությանը, բնապահպանական նորմերին և ընդհանրապես ոստիկանության համակարգին վերաբերող հարցեր:

Նրանց առաջադրած խնդիրներին առավել լիարժեք պատասխան և լուծում տալու համար որոշվեց կազմակերպել եռակողմ (քաղաքապետ-ոստիկանապետ-ուսանողներ) հանդիպում:

Վերջում ոստիկանապետ Կ.Հակոբյանը հանդիպմանը ներկա բոլոր ուսանողուհիներին շնորհավորեց Կանանց տոնի կապակցությամբ, նվիրեց վարդեր:

Մասնաճյուղի կողմից Կ.Հակոբյանին նվիրվեց Կիրառական արվեստի ֆակուլտետի ուսանողների աշխատանքներից մեկը (վիտրաժային նկարչություն):