Ֆակուլտետի նախասրահում շրջում ու հայ մեծանուն լեզվաբանների, գրականագետների, պատմաբանների, շրջանավարտների կենսագրություններին ու աշխատություններին էին ծանոթանում ոչ միայն բանասերներն ու պատմաբանները, այլև ԵՊՀ մյուս ֆակուլտետների դեկանները, պրոֆեսորադասախոսական կազմի և ուսանողության ներկայացուցիչները, շրջանավարտները:

ԵՊՀ ռեկտորատի, Պատմության և Հայ բանասիրության ղեկավարության նախաձեռնությամբ կազմակերպված միջոցառման մասնակիցներին նախ ողջունեց ԵՊՀ ռեկտոր Արամ Սիմոնյանը, ով նույնպես ԵՊՀ պատմության ֆակուլտետի շրջանավարտ է:

«Սիրելի՛ համալսարանականներ, 95 տարի առաջ ի կատար ածվեց մեր մտավորականության, հասարակական և քաղաքական գործիչներից շատերի երազանքը՝ ստեղծվեց Երևանի համալսարանը, որի հիմքը պատմալեզվաբանական ֆակուլտետն էր: Սոված, որբերով լեցուն ու քայքայված առաջին հանրապետության տարիներին թերևս սա ամենալուսավոր կետերից է: Չնայած բոլոր դժվարություններին՝ համալսարանը գոյատևեց և զարգացավ: Երևանի պետական համալսարանն անցել է փառավոր ուղի, որի հիմքում Մայր բուհի առաջին ֆակուլտետների պատմությունն է ընկած»,- նշեց Արամ Սիմոնյանը:

Շնորհավորանքի խոսքեր ասացին նաև Հայ բանասիրության և Պատմության ֆակուլտետների դեկանները:

«Մեր պետության համար ամենադժվարին օրերին հայ պետական այրերն ու մտավորականները, հաղթահարելով բոլոր դժվարությունները, հիմնեցին Մայր բուհը, որի պատմությունը սկսվում է Հայ բանասիրության ու Պատմության ֆակուլտետների կամ ինչպես նախկինում էր՝ պատմալեզվաբանական ֆակուլտետի պատմությունից: Մայր համալսարանի մայր ֆակուլտետի 95-ամյակը բոլորի համար է տոն, ուստի շնորհավորում եմ բոլոր համալսարանականներին ու մաղթում երկար տարիների բեղմնավոր կյանք»,- ասաց Արծրուն Ավագյանը:

Պատմության ֆակուլտետի դեկան Էդիկ Մինասյանը հակիրճ խոսեց համալսարանի հիմնադրման պատմությունից, անվանակոչեց այն երախտավորների անունները, ովքեր ջանք չեն խնայել Մայր բուհի հիմնադրման գործում, և ընդգծեց, որ նրանց գործն անգնահատելի է յուրաքանչյուր հայի համար:

«Այո՛, պատմալեզվաբանական ֆակուլտետը Մայր բուհի ողնաշարն է: Մտավորականների մի ամբողջ սերունդ է տվել այդ ֆակուլտետը, մարդիկ, ովքեր լուրջ ներդրում են ունեցել մեր երկրի բարգավաճման գործում: Եվ այսօր էլ մեր պետության կայացման ու զարգացման գործում Մայր բուհն իր ֆակուլտետներով հանդերձ մեծ դերակատարում ունի, քանի որ ոչ միայն լավ մասնագետներ է պատրաստում, այլև իսկական հայ ու քաղաքացի դաստիարակում»,- նշեց Էդիկ Մինասյանը:

Մայր բուհի առաջին ֆակուլտետների հոբելյանական միջոցառմանն իրենց սրտի խոսքն ասացին նաև դասախոսներն ու շրջանավարտները:

Հարազատ ֆակուլտետ այցելեց նաև ՀՀ նախագահ, ԵՊՀ հայ բանասիրության ֆակուլտետի շրջանավարտ Սերժ Սարգսյանը:

Աղբյուրը`  ysu.am

Միջոցառմանը ներկա էին Պատմության ֆակուլտետի դեկան Էդիկ Մինասյանը, Հայ բանասիրության ֆակուլտետի դեկան Արծրուն Ավագյանը, տարբեր ֆակուլտետների դեկաններ, պրոֆեսորադասախոսական կազմի, ուսանողական կառույցների ներկայացուցիչներ և ուսանողներ:

Պատմության ֆակուլտետի դեկան Էդիկ Մինասյանը, ներկայացնելով ֆակուլտետի 95-ամյա անցած ուղին, ձեռքբերումներն ու հաջողությունները, նշեց. «Համալսարանի անդրանիկ ֆակուլտետները Պատմության ու Հայ բանասիրության ֆակուլտետներն էին, և հենց դրանցով էլ հիմք դրվեց Հայաստանում բարձրագույն կրթությանը: Ցանկանում եմ` մեր դասախոսներն ու ուսանողները հետագայում ևս շարունակեն պահպանել Մայր բուհի առաջնեկի ավանդույթները: Այսօր մենք պարտավոր ենք հիշել նաև մեր մեծերին, բոլոր այն երախտավորներին, որոնք բուհի հիմնադրման հարցում կարևոր առաքելություն են ունեցել: Հենց նրանց շնորհիվ էլ իրականացվել է համալսարանի գործունեության կազմակերպման ամբողջ գործընթացն ու, ըստ էության, կայացել նաև գիտական և ուսումնական մի ահռելի աշխատանք: Հիշենք այն կարևոր փաստը, որ 1920-30-ական թթ-ին հենց այս երևելիների ջանքերով են բացվել ֆակուլտետային ամբիոնները ու հետագայում նաև նոր առարկաներ ներառվել ուսումնական գործընթացում»:

Համալսարանականները ծաղիկներ դրեցին Կոմիտասի անվան պանթեոնում ամփոփված հայտնի մտավորականների, մշակույթի գործիչների ու անվանի մարդկանց շիրիմներին և խոսեցին նրանց` հայ իրականության մեջ ունեցած ներդրման ու կարևոր առաքելության մասին:

Ինչպես Հայ բանասիրության ֆակուլտետի դեկան Արծրուն Ավագյանը ընդգծեց, այս պանթեոնում են ամփոփվել նաև հայտնի համալսարանականները՝ Պարույր Սևակը, Հովհաննես Շիրազն ու Սիլվա Կապուտիկյանը, իսկ դա բնավ պատահականության արդյունք չէ. «Շնորհավորում եմ համալսարանականներիս 95-ամյա հոբելյանի առթիվ: Այդ 95 տարիները եղել են բեղուն, արդյունավետ և բազում սերունդներ են կյանք ուղեկցել: Թեև մենք գտնվում ենք տխուր, բայց միևնույն ժամանակ նաև ամենալուսավոր մի հողակտորի վրա, որտեղ ամփոփված են մեր շատ ու շատ մեծերի աճյունները: Եթե մենք թերթելու լինենք մեր պատմության էջերը, ապա հարյուրավոր այսպիսի մարդկանց կտեսնենք, իսկ պատմաբանի ու բանասերի անելիքն էլ հենց դա է՝ այդ մեծերի գործը շարունակելը, ուսումնասիրելը և այդ մեծերի գրությունների, մտքերի, երազների ու տեսիլների իրականացման բացահայտումը»:

Աղբյուրը` ysu.am