2019թ. մայիսի 16-ին ԵՊՀ ԻՄ-ի տնտեսագիտության ֆակուլտետի «Սերվիս» մասնագիտության առաջին կուրսում կայացավ բաց դաս, որը վարեց Անգլերեն լեզվի և գրականության ամբիոնի դասախոս Շուշանիկ Գրիգորյանը:

Ներկա էին Տնտեսագիտության ֆակուլտետի դեկանի պաշտոնակատար տ.գ.թ., դոցենտ Գայանե Ավետիսյանը, Տուրիզմի կառավարման և մշակութաբանության  ամբիոնի ասիստենտ Պավել Ասիլբեկյանը, դասախոս Սվետա Սաֆարյանը, ուսանողներ, դիմորդներ:

«Սերվիս» մասնագիտության 1-ին կուրսի ուսանողները անգլերենով ներկայացրին Տավուշի մարզի տեսարժան վայրերը (Մորո Ձորո եկեղեցին, Վարդան Մամիկոնյանի ծառը, «Լաստիվեր ռեզորթ» հյուրանոցային համալիրը, Իջևանի գինու և կոնյակի գործարանը, դենդրոպարկը և այլն):

Դասի ընթացքում հնչեցին “Rag’n’Bone Man-Human”, “People Help” երգերը:

Ուսանողները նաև իրենց պատրաստած  վիդեոհոլովակի միջոցով ներկայացրին Իջևան քաղաքի պատմությունը, Իջևանի թանգարանը, «Գետահովիտ ռեզորթ»-ը:

Շուշանիկ Գրիգորյանը, նշելով, որ չէին կարող չանդրադառնալ մեծն Հովհ. Թումանյանի ծննդյան 150-ամյակին, հանդես եկավ նրա գրական վաստակի արժևորման խոսքով, ապա ուսանողներն անգլերենով ներկայացրին «Հայոց վիշտը» բանաստեղծությունը:

Այնուհետև դասի մասնակիցները միմյանց շնորհավորեցին Մայր բուհի՝ Երևանի պետական համալսարանի հիմնադրման 100-ամյակի առթիվ՝ ընդգծելով ԵՊՀ-ի անգնահատելի դերն ու ավանդը ՀՀ կրթագիտական և մշակութային կյանքում:

Տնտեսագիտության ֆակուլտետի դեկանի պաշտոնակատար Գ.Ավետիսյանը գոհունակություն ու շնորհակալություն հայտնեց կազմակերպված բաց դասի համար՝ ընդգծելով, որ ողջունելի է նաև դիմորդների ներկայությունը նմանատիպ միջոցառումներին:

   2019թ. մայիսի 16-ին ԵՊՀ ԻՄ-ի հումանիտար գիտությունների ֆակուլտետում կայացավ Երևանի պետական համալսարանի հիմնադրման 100-ամյակին նվիրված դաս-քննարկում, որը կազմակերպել էին Հայոց պատմության և հասարակագիտության ամբիոնի դասախոսներ պ.գ.թ., դոցենտ Նաթելլա Գրիգորյանը և ասիստենտ Արա Ազատյանը՝ «Պատմություն» մասնագիտության ուսանողների հետ համատեղ:

Դաս-քննարկմանը ներկա էին Հումանիտար գիտությունների ֆակուլտետի դեկանի պաշտոնակատար բ.գ.թ., դոցենտ Կ.Պողոսյանը, փոխդեկան բ.գ.թ., դոցենտ Վ.Աղաբաբյանը, ամբիոնի դասախոսներ Ա.Մատինյանը, Ա.Մկրտումյանը, ուսանողներ, հյուրեր:

Հայոց պատմության և հասարակագիտության ամբիոնի դասախոսները հանդես եկան բացման խոսքով՝ ընդգծելով, որ ԵՊՀ-ի հիմնադրումը շրջադարձային իրադարձություն էր ՀՀ  կրթամշակութային կյանքում. «Անշուշտ մեծ է եղել համալսարանի դերը հայոց պետականության և մշակույթի զարգացման գործում: Ներքին և արտաքին լարված իրավիճակում գոյատևող Առաջին հանրապետության նախարարների խորհուրդը 1919թ. մայիսի 16-ին Երևանում համալսարան հիմնելու վերաբերյալ որոշում ընդունեց, իսկ 1920թ. հունվարի 31-ին Ալեքսանդրապոլի առևտրական դպրոցում մեծ հանդիսավորությամբ բացվեց համալսարանը. շենքային պայմանների անհարմարավետության պատճառով մեկ կիսամյակ ուսումնական պարապմունքներն իրականացնելուց հետո այն տեղափոխվեց Երևան»:

Դաս-քննարկման ընթացքում ընդհանուր գծերով ներկայացվեցին ԵՊՀ հիմնադրման պատմությունը, ԵՊՀ պատմաբան ռեկտորների (մասնավորապես՝ Հակոբ Մանանդյանի, Մկրտիչ Ներսիսյանի, Արամ Սիմոնյանի) ծավալած գործունեությունը, Պատմության ֆակուլտետի ունեցած տեղն ու դերը համալսարանի կյանքում, ԵՊՀ թանգարանի դերը, Հայագիտական հետազոտությունների ինստիտուտի հիմնումը և ծավալած գիտական գործունեությունը:

Այս թեմաների շուրջ զեկուցումներ ներկայացրին «Պատմություն» մասնագիտության երրորդ կուրսի ուսանողներ Մհեր Ղալումյանը, Լարիդա Ղազումյանը, Դիանա Սայանը, Շիրակ Գասպարյանը, Դիանա Յարալյանը և Իննա Մխիթարյանը:

Այնուհետև տեղի ունեցավ բուռն քննարկում:

Հնչեցին փոխադարձ շնորհավորանքներ: Դասի մասնակիցները վստահեցրին բարձր պահել համալսարանականի վեհ անունը:

Վերջում տեղի ունեցավ հյուրասիրություն:

   2019թ. մայիսի 16-ին հարցազրույց ունեցանք ԵՊՀ Իջևանի մասնաճյուղի՝ 2010թ. շրջանավարտ, ԵՊՀ ԻՄ-ի ընդհանուր մաթեմատիկայի և բնագիտության ամբիոնի դոցենտ, ֆ.մ.գ.թ. Կարեն Հայկի Հովսեփյանի հետ:

– Խնդրում եմ՝ նշեք Ձեր ծննդյան թիվը և վայրը:

– Ծնվել եմ 1989թ. հունվարի 4-ին Տավուշի մարզի Սևքար գյուղում:

– Պատմեք, խնդրում եմ, Ձեր ընտանիքի մասին:

– Ապրում եմ ավանդական հայկական ընտանիքում` ծնողներիս, եղբորս, կնոջս ու աղջկաս հետ, ով մեկ ամիս առաջ է ծնվել: Կինս և եղբայրս նույնպես ԵՊՀ ԻՄ-ի շրջանավարտներ են:

– Փոքր հասակում ի՞նչ եք երազել դառնալ:

– Հիշում եմ` առաջին դասարանում շարադրություն էի գրել «ի՞նչ եմ ուզում դառնալ, երբ մեծանամ» թեմայով: Նշել էի օդաչուի մասնագիտությունը:

– Ի՞նչ կրթություն եք ստացել:

– 2006-2010 թթ. սովորել եմ ԵՊՀ ԻՄ-ի բնական գիտությունների ֆակուլտետի «Մաթեմատիկա, ֆիզիկա և ինֆորմատիկա» մասնագիտության բակալավրիատում: 2010-2012 թթ. ուսումս շարունակել եմ ԵՊՀ մագիստրատուրայում՝ ստանալով մաթեմատիկայի մագիստրոսի աստիճան: 2012-2015 թթ. սովորել եմ Կազանի պետական էներգետիկայի համալսարանի բարձրագույն մաթեմատիկայի ամբիոնում` որպես ասպիրանտ: 2015թ. ստացել եմ ֆիզ.մաթ. գիտությունների թեկնածուի գիտական աստիճան: 2019 թվականին ՀՀ ԲՈԿ-ի կողմից ստացել եմ դոցենտի գիտական կոչում:

– Ի՞նչ դեր է խաղացել ԵՊՀ ԻՄ–ում ստացած կրթությունը Ձեր կյանքում:

– ԵՊՀ ԻՄ-ում ստացած կրթությունն ուրույն տեղ ունի իմ կյանքում: Այստեղ իմ մեջ ամրապնդվել է սերը ուսման նկատմամբ, ինչի շնորհիվ էլ հետագայում շարունակել եմ ուսումս այլ բուհերում:

– Ի՞նչ աշխատանքային փորձ ունեք:

Աշխատանքային փորձս սկսվել է 2013 թ.-ից, երբ ԿՊԷՀ-ի ասպիրանտուրայում սովորելուն զուգահեռ սկսեցի դասավանդել «Հավանականությունների տեսություն», «մաթեմատիկական անալիզ» առարկաները: Որպես աշխատանքային փորձ կարող եմ նշել նաև ասպիրանտուրայում սովորելու տարիներին մասնակցությունս բազմաթիվ գիտական սեմինարների և կոնֆերանսների`ՌԴ-ում, ՀՀ-ում, որոնք հնարավորություն են տվել մինչ այժմ զբաղվել գիտական գործունեությամբ:

ԵՊՀ ԻՄ-ում սկսել եմ աշխատել 2015թ. սեպտեմբերի 1-ից՝ որպես Ընդհանուր մաթեմատիկայի և բնագիտության ամբիոնի ասիստենտ, այժմ նույն ամբիոնի դոցենտ եմ:

– Ո՞րն է Ձեր ամենասիրելի գիրքը:

– Սիրելի գրքեր շատ ունեմ, բայց այս պահին հիշեցի Ալեքսեյ Տոլստոյի «Князь Серебряный» գիրքը:

– Ո՞րն է Ձեր կարդացած վերջին գիրքը:

– Jack London – ,,White Fung’’:

– Ի՞նչ երաժշտություն եք նախընտրում, և ո՞րն է Ձեր սիրած երգը:

– Սիրում եմ լսել տարբեր ոճերի երաժշտություն՝ մեր հայկական ժողովրդականից մինչև ժամանակակից:

– Ո՞րն է Ձեր սիրած ֆիլմը:

– Ամենաշատ տպավորված ֆիլմերից այս պահին հիշում եմ ,,Мирный воин” ֆիլմը:

– Ունե՞ք նախընտրելի մարզաձև:

– Սպորտաձևերից հետաքրքրվում և միշտ հետևում եմ ֆուտբոլի, հոկեյի և թենիսի առաջնություններին:

– Ո՞րն է Ձեր սիրած վայրը Հայաստանում և արտերկրում:

– Հայաստանն իմ հայրենիքն է, և սիրված վայրեր Հայաստանում շատ կան: Ինչ-որ վայր սիրելու համար, կարծում եմ, անհրաժեշտ է ապրել այդտեղ:

Արտերկրում սիրածս վայրը քաղաք Կազանն է՝ արդեն հարազատ և սիրված վայր:

– Ո՞ր հատկանիշներն եք գնահատում մարդկանց մեջ:

– Մարդկանց մեջ գնահատում եմ անկեղծությունը, բարեկրթությունը, անմիջականությունը և հումորի զգացումը:

– Ունե՞ք նախընտրած ասույթ կամ կարգախոս, որով առաջնորդվում եք:

– Արա՛ այն, ինչ պետք է անես, և թո՛ղ լինի այն, ինչ լինելու է:

– Ի՞նչ երբեք չեք անի:

– Երբեք մի՛ ասա երբեք:

– Ինչի՞ց եք վախենում:

– Բոլոր մարդիկ էլ իհարկե ունեն վախեր. ես աշխատում եմ դրանց մասին չմտածել:

– Ինչի՞ համար եք ափսոսում:

– Կարծում եմ, որ ոչ մի բանի համար ափսոսալու կարիք չկա, որովհետև եթե նույնիսկ ինչ-որ տեղ սխալվում ես, դու ձեռք ես բերում փորձ, որը հաջորդ անգամ քեզ կօգնի ճիշտ որոշում կայացնել:

– Ի՞նչն է օգնում Ձեզ որոշում կայացնել դժվարին իրավիճակներում:

– Ցանկացած իրավիճակ տարբեր տեսանկյուններից դիտարկելը:

– Ի՞նչն եք համարում Ձեր կյանքի ամենամեծ ձեռքբերումը:

– Կյանքում իհարկե ունեմ ձեռքբերումներ` ընտանիքս, աշխատանքս, ընկերներս: Ինձ համար ձեռքբերում է նաև կյանքն արժևորելը:

– Ո՞րն է  հաջողության հասնելու Ձեր բանաձևը:

– Որպես մաթեմատիկոս՝ փորձեմ ձևակերպել հաջողության իմ բանաձևը. աշխատասիրությունը, կամքի ուժը, նպատակին անվերապահորեն հավատալը և ոչ մի հանգամանքում ոչ մի վայրկյան հաջողությանը չկասկածելը = հաջողություն:  

– Ո՞րն է Ձեր ստացած ամենաթանկ խորհուրդը:

– Երբեք մի՛ վարվիր դիմացինիդ հետ այնպես, ինչպես չես ցանկանա, որ քեզ հետ վարվեն:

– Ո՞րն է այն հիմնական խորհուրդ–պատգամը, որ Դուք կտաք երիտասարդներին (մասնավորապես՝ ԵՊՀ ԻՄ-ի ուսանողներին):

– ԵՊՀ ԻՄ-ի ուսանողներին, երիտասարդներին խորհուրդ եմ տալիս լինել ավելի նախաձեռնող, ժամանակի մեծ մասը տրամադրել սովորելուն:

Համալսարանական կրթությունը մասնագետ դառնալու համար անհրաժեշտ, բայց ոչ բավարար նախապայման է, իսկ բավարար նախապայմանը համալսարանում ստացած գիտելիքները համալրելն է ինքնուրույն աշխատանքի միջոցով:

Ինձ՝ ԵՊՀ ԻՄ-ի նախկին ուսանողիս, ուսման ընթացքում շատ է օգնել դասախոսների հետ աշխատելը դասերից դուրս: Այլ բուհերի հետ համեմատելով՝ հասկացել եմ, որ ոչ բոլոր համալսարաններում դա կարելի է տեսնել: Ուստի խորհուրդ եմ տալիս մեր ուսանողներին չբավարարվել միայն դասի ընթացքում ստացած գիտելիքներով, անհրաժեշտության դեպքում դասից դուրս մոտենալ իրենց դասախոսներին և ստանալ այն հարցերի պատասխանները, որոնց իմացությունն անհրաժեշտ է:

– Շնորհակալ ենք անմիջական հարցազրույցի համար:

Հարցազրույցը վարեց ԵՊՀ ԻՄ-ի հասարակայնության հետ

կապերի և մամուլի պատասխանատու Հասմիկ Վանյանը: