2023թ. հունվարի 28-ը Հայոց բանակի կազմավորման 31-րդ տարեդարձի օրն է:

Հայոց բանակը ստեղծվել է Արցախյան ազատամարտի բովում` երկրապահ-կամավորական ջոկատների հիմքի վրա` դառնալով մեր պատմության նշանակալի ձեռքբերումներից մեկը, հայրենիքի պաշտպանության ու անվտանգության երաշխավորը:

1990 թվականին` Անկախության հռչակագրի ընդունումից հետո, կազմավորվեց Երևանի հատուկ գունդը, Արարատում, Գորիսում, Վարդենիսում, Իջևանում ու Մեղրիում ձևավորվեցին վաշտեր:

1991թ. կառավարության որոշմամբ ստեղծվեց նախարարների խորհրդին առընթեր Պաշտպանության պետական կոմիտեն:

1992թ. հունվարի 28-ին Կառավարությունը ընդունեց որոշում` «Հայաստանի Հանրապետության պաշտպանության նախարարության մասին»:

1992-1993 թթ. երկրապահ կամավորական ջոկատների և բանակ զորակոչված զինակոչիկների միավորումով ստեղծվեց շարժունակ և կարգապահ բանակ:

1994թ. հունիսից վերջնականապես ընթացք ստացան բանակաշինության, կայուն զարգացման, զորքերի մարտունակության բարձրացման, կարգապահության ամրապնդման, միջին և բարձր սպայական անձնակազմի պատրաստման ու վերապատրաստման աշխատանքները:

2001 թվականին օրը դարձավ տոն, երբ Տոների և հիշատակի օրերի մասին օրենքում ամրագրվեց որպես Բանակի օր:

Հայոց բանակի կազմավորման 31-րդ տարեդարձի կապակցությամբ ԵՊՀ ԻՄ-ի ղեկավարության, ողջ անձնակազմի և ուսանողության անունից սիրով շնորհավորում ենք հայ ազգին, մաղթում համազգային միասնություն, ուժ և իմաստնություն, մեր բանակին՝ հզորացում, բարձր մարտունակություն և հաղթանակներ, մեր քաջարի զինվորներին՝ դժվարությունները հաղթահարելու անսասան կամք և տոկունություն, անփորձանք ծառայություն և բարի տունդարձ:

Խորին խոնարհում և շնորհակալություն մեր բոլոր հերոսներին, ազատամարտիկներին, հայրենի հողի սուրբ պաշտպաններին, մեր բոլոր զինծառայողներին և զինվորական համալսարանականներին, ովքեր աննկուն պայքար մղեցին հանուն հայրենիքի, հանուն մեր կյանքի, սեփական հողի վրա ազատ ապրելու և արարելու մեր իրավունքի…

Շնորհավո՜ր տոնդ, Հայո՛ց 31-ամյա բանակ, փառք ու պատիվ ձե՛զ՝ Հայոց բանակի արծի՛վ տղաներ….

 Ելնելով ԵՊՀ ԻՄ-ի՝ 2022-2026 թթ. զարգացման ռազմավարական ծրագրի 1.1.4 խնդրի (Բարձրորակ մարդկային ռեսուրսներ) 3-րդ գործողության պահանջներից՝ 2023թ. հունվարի 24-30-ը ԵՊՀ ԻՄ-ի կրթական բարեփոխումների և դասախոսների վերապատրաստման բաժինն իրականացնում է «Տեղեկատվական և հաղորդակցական տեխնոլոգիաների կիրառումը աշխատանքային գործընթացում» թեմայով՝ 10 ակադեմիական ժամ տևողությամբ վերապատրաստումը:

Դասընթացը վարում է Ուսումնամեթոդական վարչության ուսումնական գործընթացի կազմակերպման բաժնի աշխատակից Աննա Մանուչարյանը:

ԵՊՀ ԻՄ-ի ֆակուլտետների դեկանների, աշխատակազմի գործավարների, դեկանների աշխատակազմի օպերատորների և ամբիոնների լաբորանտների համար նախատեսված վերապատրաստմանը մասնակցում են մոտ 2 տասնյակ աշխատակիցներ:

Դասընթացի նպատակն է մասնակիցների մեջ զարգացնել տեղեկատվական հաղորդակցության տեխնոլոգիաների կիրառման հմտությունները աշխատանքային գործընթացում, օժանդակել բազմաբնույթ էլեկտրոնային փաստաթղթերի և աղյուսակների ձևավորմանը, նրանց ծանոթացնել տեղեկատվության փոխանակման ձևերին և մեթոդներին:

Վերապատրաստման ընթացքում մասնակիցներին կներկայացվեն Windows օպերացիոն համակարգի միջավայրը, այդ միջավայրում ֆայլերի հետ աշխատանքը, Ms Word տեքստային խմբագրի միջավայրում փաստաթղթերի ստեղծումը, խմբագրումը, ձևավորումը և պահպանումը, Microsoft Excel էլեկտրոնային աղյուսակների համակարգը, համացանցից օգտվելու կանոնները և այլն:

Դասընթացի ավարտին մասնակիցներն ունակ կլինեն՝

• տեղեկատվությունն ինքնուրույն որոնելու, ընտրելու, հավաքելու, ուսումնասիրելու և դասակարգելու,
• ընտրելու ոճեր, շրիֆտատեսակներ, շաբլոններ, word տեքստային խմբագրով փաստաթղթեր ձևավորելու,
• վերարտադրելու և ստեղծելու էլեկտրոնային աղյուսակ,
• կատարելու իրենց թղթավարությունը Microsoft Word տեքստային խմբագրիչով,
• էլեկտրոնային աղյուսակով կատարելու հաշվարկային աշխատանքներ՝ կիրառելով ստանդարտ ֆունկցիաներ և տրամաբանական գործողություններ:

«ՏՀՏ-ի կիրառումը աշխատանքային գործընթացում» թեմայով վերապատրաստման դասընթացը կավարտվի ստուգարքով:

 2023թ. հունվարի 19-ին «Դիլիջանի կենտրոնական դպրոց» կրթական հիմնադրամի գործադիր տնօրեն Նաիրա Դալուզյանի հրավերով մասնաճյուղի տնօրենի պաշտոնակատար Ա.Մակարյանը և փոխտնօրեն Մ.Օթարյանը այցելեցին դպրոց և դպրոցին կից գործող ֆաբլաբ:

Դպրոցի և ֆաբլաբի ռեսուրսներին ծանոթացումից հետո տեղի ունեցած հանդիպման ընթացքում քննարկվեցին երկկողմ համագործակցության հեռանկարներն ու ծրագրերը, որոնց համատեքստում առանձնակի ուշադրություն դարձվեց ֆաբլաբի հնարավորությունների օգտագործմանը մասնաճյուղի ուսանողների կողմից՝ ինքնուրույն հետազոտական և գիտական թեմաների իրականացման տեսակետից:

«Ֆաբ Լաբ» ծրագիրը, ինչպես հայտնի է, մեկնարկել է Մասաչուսեթսի տեխնոլոգիական ինստիտուտի Media Lab-ում: Ֆաբլաբը (fabrication laboratory, «արտադրական» լաբորատորիա) տեխնիկական նախատիպերի պատրաստման հարթակ է նորարարության և գյուտերի համար, որը խթանում է տեղական ձեռներեցությունը:

Դիլիջանի ֆաբլաբը կահավորված է համակարգչային թվային հսկողությամբ լազերային կտրող սարքերով և ֆրեզերային հաստոցներով, որոնց շնորհիվ կարելի է մշակել փայտե և ակրիլե մասեր, եռաչափ տպիչներով, վինիլային կտրիչներով, կաղապարների պատրաստանյութերով, տպման ներկերով և այլ արտադրական հարմարանքներով:

Պայմանավորվածություն ձեռք բերվեց, որ դպրոցում տարատեսակ պրակտիկաների կազմակերպումից բացի՝ ֆաբլաբը մեր ուսանողներին և երիտասարդ գիտնականներին կտրամադրի համապատասխան միջոցներ և միջավայր, որոնց շնորհիվ կյանքի կկոչվեն նրանց մտահղացումները և գիտատեխնիկական մշակումները: Նորարարության նկատմամբ հետաքրքրությունը խրախուսելու նպատակով Դիլիջանի ֆաբլաբում իրականացվող մասնագիտական դասընթացներում կներգրավվեն նաև ԵՊՀ ԻՄ-ի ուսանողները:

Քննարկումներն ամփոփվեցին ԵՊՀ Իջևանի մասնաճյուղի և «Դիլիջանի կենտրոնական դպրոց» կրթական հիմնադրամի միջև համագործակցության հուշագրի կնքումով՝ ի դեմս տնօրենի պաշտոնակատար Անուշավան Մակարյանի և գործադիր տնօրեն Նաիրա Դալուզյանի:

Կնքված հուշագրով որպես փոխհամագործակցության ուղղություններ են ընտրվել՝

• ուսանողների պրակտիկաների կազմակերպումը և անցկացումը,
• ուսանողների մասնակցությամբ կլոր սեղանների, թեմատիկ քննարկումների կազմակերպումը,
• համատեղ ծրագրերի իրականացումը,
• մասնաճյուղի և դպրոցի գործունեության լուսաբանման նպաստումը,
• ծրագրերի իրականացմանն ուղղված երիտասարդների հավաքագրմանը, տեխնիկական միջոցների տրամադրմանը, տեղեկատվության տարածմանը աջակցումը,
• ԵՊՀ ԻՄ-ի ուսանողների և շրջանավարտների ներառումը դպրոցի կադրային բազայում,
• հուշագրի շրջանակներում այլ գործողությունների իրականացումը:

Հուշագրի կնքումից հետո ԵՊՀ ԻՄ-ի տնօրենի պաշտոնակատար Ա.Մակարյանը Կիրառական արվեստի ֆակուլտետի ուսանողների աշխատանքներից մեկը մասնաճյուղի անունից նվիրեց Դիլիջանի կենտրոնական դպրոցին:  

 Գյումրիի ռուսական տան հետ համատեղ ԵՊՀ Իջևանի մասնաճյուղում 2023թ. հունվարի 18-ին կայացավ գիտության և կրթության ոլորտում համագործակցության վերաբերյալ առցանց հանդիպում:

ԵՊՀ Իջևանի մասնաճյուղից հանդիպմանը մասնակցում էին տնօրենի պաշտոնակատար Անուշավան Մակարյանը, գիտական քարտուղար Մհեր Աթոյանը, Օտար լեզուների ամբիոնի պրոֆեսոր Սվետլանա Մինասյանը, նույն ամբիոնի դոցենտ, Գյումրիում Ռուսաստանի գիտության և մշակույթի կենտրոնի Իջևանի մասնաճյուղի ղեկավար Մարատ Զուրաբյանը: Հանդիպմանը Գյումրիի ռուսական տան ներկայացուցիչն էր ռուսաց լեզվի և բարձրագույն կրթության առաջատար մասնագետ Սվետլանա Կարենի Հովհաննիսյանը:

Ղրիմի դաշնային համալսարանը ներկայացնում էին Ուսումնամեթոդական վարչության կրթական գործունեության բաժնի վարիչ Նատալյա Օլեգի Սիմագինան և նույն վարչության կրթական գործունեության մեթոդական աջակցության և որակի վերահսկման բաժնի վարիչ Եվգենյա Նիկոլայի Կուչերը:

Ողջույնի խոսքով հանդես եկավ ԵՊՀ ԻՄ-ի տնօրենի պաշտոնակատար Ա.Մակարյանը, ելույթ ունեցան Ն.Սիմագինան, Ս.Հովհաննիսյանը, Ս.Մինասյանը և Մ.Զուրաբյանը:

Առցանց հանդիպման ընթացքում կողմերը պայմանավորվածություն ձեռք բերեցին փոխհամագործակցել հետևյալ ուղղություններով.

• կրթական նախագծերի մշակում, պրոֆեսորադասախոսական կազմի ակադեմիական փոխանակումների կազմակերպում, օտարերկրյա նորարարական փորձի ուսումնասիրություն,
• համատեղ միջազգային ծրագրերի մշակում, համատեղ հոդվածների, մենագրությունների, ձեռնարկների հրատարակում, գիտաժողովների, սեմինարների, բաց դասերի կազմակերպում,
• պրակտիկայի կամ որակավորման բարձրացման նպատակով դասավանդողների, ասպիրանտների, մագիստրոսների, բակալավրի ուսանողների փոխանակում, ինչպես նաև մասնագետների փոխանակում՝ դասախոսությունների, գիտական հետազոտությունների, խորհրդատվությունների անցկացման համար,
• տեղեկատվության և գիտական տվյալների, ուսումնամեթոդական նյութերի, հրապարակումների փոխանակում, գիտական աշխատությունների պատրաստում, գիտակրթական գրականության, մենագրությունների գրախոսում:

Առաջին համատեղ միջոցառումը կլինի ապրիլին նախատեսվող «Սոցիալ-մանկավարժական նորարարությունները կրթության մեջ» միջազգային գիտագործնական 2-րդ համաժողովի կազմակերպման աշխատանքներին Ղրիմի դաշնային համալսարանի ներկայացուցիչների ներգրավումը:

Պայմանավորվածություն ձեռք բերվեց նաև սեղմ ժամկետներում անհրաժեշտ փաստաթղթերի ստորագրման և համագործակցությունը պաշտոնապես մեկնարկելու վերաբերյալ:

 2023թ. հունվարի 17-ին «Երևանի պետական համալսարան» հիմնադրամի Իջևանի մասնաճյուղը՝ ի դեմս տնօրենի պաշտոնակատար Անուշավան Մակարյանի, և «LT Coding» ՍՊԸ-ն՝ ի դեմս տնօրեն Լիանա Ծատուրյանի, կնքեցին համագործակցության հուշագիր:

Մինչև հուշագրի ստորագրումը տեղի ունեցավ երկկողմ համագործակցության ծրագրերին ու հեռանկարներին վերաբերող քննարկում, որին մասնակցեց նաև ԵՊՀ ԻՄ-ի պրակտիկայի կազմակերպման և շահակիցների հետ համագործակցության բաժնի վարիչ Լիաննա Բեգինյանը:

Կնքված հուշագրով կողմերն ամրագրեցին իրենց պատրաստակամությունը համագործակցելու հետևյալ ուղղություններով.

• ուսանողների պրակտիկաների կազմակերպում և անցկացում,
• ԵՊՀԻՄ-ի ուսանողների ներառումը ՍՊԸ կադրային բազայում,
• ուսանողների մասնակցությամբ կլոր սեղանների, թեմատիկ քննարկումների կազմակերպում,
• համատեղ ծրագրերի իրականացում,
• ԵՊՀ ԻՄ-ի և ՍՊԸ գործունեության լուսաբանման նպաստում,
• ծրագրերի իրականացմանն ուղղված երիտասարդների հավաքագրմանը, տեխնիկական միջոցների տրամադրմանը, տեղեկատվության տարածմանը աջակցում,
• հուշագրի շրջանակներում այլ գործողությունների իրականացում:

Ընկերության տնօրեն Լիանա Ծատուրյանը, ով նաև ԵՊՀ ԻՄ-ի շրջանավարտ է և Ծրագրավորման և ինֆորմացիոն տեխնոլոգիաների ամբիոնի հրավիրված դասախոս, մեզ հետ զրույցում նշեց, որ «LT Coding»-ը Իջևանում գործող նորաստեղծ հայկական տեխնոլոգիական ընկերություններից մեկն է, որը նորարար լուծումներ է առաջարկում միջազգային և տեղական շուկաներում:

Ընկերությունն իր գործունեությունը սկսել է 2021թ․ մոտիվացված պրոֆեսիոնալների փոքր թիմով՝ իր առջև խնդիր դնելով անհատական գիտելիքներն ու փորձը վերածել թիմայինի: Նշանակալի փաստ է, որ ընկերության ղեկավարը և թիմի լավագույն անդամները ԵՊՀ ԻՄ-ի բնական գիտությունների ֆակուլտետի շրջանավարտները և ուսանողներն են:

Ընկերության առաջնային նպատակներից է Հայաստանում տեխնոլոգիական ոլորտի համաչափ զարգացմանը մասնակցություն բերելը: Մյուս առաջնահերթությունը համընդհանուր տեխնոլոգիական կիրառականություն ունեցող արտադրանքների ստեղծումն է՝ արդի աշխարհի ու հասարակության պահանջներին համահունչ: