2016թ. ապրիլի 14-ին Իջևանի քաղաքային պատկերասրահում տեղի ունեցավ ԵՊՀ ԻՄ-ի կիրառական արվեստի ֆակուլտետի դասախոսների, ուսանողների և դպրոցականների (ավագ, միջին և կրտսեր սերնդի ներկայացուցիչների) աշխատանքների՝ «Երեք սերունդ» խորագրով ցուցահանդեսի հանդիսավոր բացումը:

Ցուցահանդեսի բացմանը մասնակցում էին ԵՊՀ Իջևանի մասնաճյուղի տնօրեն Ս.Առաքելյանը, Իջևանի քաղաքային պատկերասրահի տնօրեն Ս.Մելքումյանը, մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ, արվեստագետներ, ուսուցիչներ, աշակերտներ և քաղաքացիներ:

Ցուցահանդեսը  մեկնարկեց մեկ րոպե լռությամբ՝ ի հիշատակ օրերս Ադրբեջանի կողմից սանձազերծված մարտական գործողությունների հետևանքով զոհված քաջ հայորդիների:

Բացման խոսքով հանդես եկան ցուցահանդեսի գլխավոր կազմակերպիչ, Գծանկարի, գունանկարի և քանդակի ամբիոնի  դոցենտ,  ՀՆՄ վարչության անդամ Հ.Ասատրյանը, մասնաճյուղի տնօրեն Ս.Առաքելյանը, Իջևանի քաղաքապետարանի մշակույթի բաժնի վարիչ Լ.Ղալումյանը:

«Նմանատիպ ցուցահանդեսների կազմակերպումը մի յուրատեսակ հաշվետվություն է ինչպես արվեստասեր հասարակության, այնպես էլ բուհի առջև: Արվեստագետ դառնալու ճանապարհին ավագ ընկերների կողքին ցուցադրվելով՝ ուսանողությունը և մատաղ սերունդն իրենց ավելի անկաշկանդ են զգում ճիշտ կողմնորոշվելու և ինքնուրույնություն ձեռք բերելու խնդիրներում»- մասնավորապես նշեց պարոն Ասատրյանը:

«Զարմանալի ժողովուրդ ենք այն առումով, որ մեր մեջ ամեն ինչ եռասերունդ է, հայկական ընտանիքի հիմքն էլ է եռամիասնության մեջ: Մարտի դաշտում էլ այսօր մեր եռասերունդ բանակն է կռվում, այնտեղ էլ ենք եռասերունդ, այսօրվա ցուցահանդեսի մեջ էլ ենք եռասերունդ. սա է կյանքի օրգանական շարունակությունը, մեկս մյուսից ենք սովորում: Մեր ավագ սերնդի ներկայացուցիչներն էլ, տեսնելով մատաղ սերնդի աշխատանքները, կարող են նոր ոգի, նոր շունչ դնել իրենց գործերում: Կրտսեր սերնդի ներկայացուցիչների համար էլ մեծ պատիվ է մեր մեծերի կողքին հանդես գալը, որոնք բոլորն էլ արվեստի յուրօրինակ աշխարհի ներկայացուցիչներ են, յուրաքանչյուրն իր հետքն ու վրձինն է թողել արվեստի պատմության մեջ» – իր խոսքում ընդգծեց պարոն Առաքելյանը:

Ցուցահանդեսն իր բնույթով բազմաժանր է. ընդգրկում է տարբեր ժանրերի շուրջ 70 աշխատանք (գրաֆիկա, բատիկա, ստիլիզացված դիմանկարներ, կենդանական և բուսական աշխարհի սիմվոլիկաներով ստեղծված կոմպոզիցիաներ, կոլաժներ, ֆլորիստիկա, գեղանկարչական գործեր, քանդակ, գոբելեն և այլն):

Ներկայացված ստեղծագործությունների աշխարհագրությունը, թեմատիկան բավականին լայն էր, բովանդակությանն ու թեմային համապատասխան՝ հերթագայում էին տաք ու սառը գույները, սակայն ավելի գերակշռող էին պայծառ երանգները:

Ցուցահանդեսի այցելուները գեղագիտական հաճույքով ու մեծ հետաքրքրությամբ էին դիտում ցուցադրված նկարները և անձամբ հեղինակներից պարզում իրենց հետաքրքրող նկարներին առնչվող հարցերը:

Ցուցահանդեսը կտևի երկու շաբաթ: Մուտքն ազատ է:

2016թ. ապրիլի 14-ին ԵՊՀ ԻՄ-ի ծրագրավորման և ինֆորմացիոն տեխնոլոգիայի  ամբիոնի վարիչի տեղակալ, տեխնիկական գիտությունների թեկնածու, ասիստենտ Աննա Սիմոնյանը  Բնական գիտությունների ֆակուլտետում  կարդաց «Նոբելյան օրեր Երևանում» գիտական միջոցառմանը նվիրված զեկուցում:

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ:

Մասնակցելով ապրիլի 11-ից Երևանում կազմակերպված «Ոգեշնչվի՛ր և ստեղծի՛ր» խորագրով  միջոցառմանը՝  իր ստացած գիտելիքներն ու տպավորությունները Ա.Սիմոնյանը զեկուցման ձևով (շնորհանդեսի ուղեկցությամբ) ներկայացրեց ուսանողներին: 

Ապրիլի 11-16-ը, ինչպես հայտնի է, Հայաստանում հյուրընկալվել և բժշկությանը վերաբերող արժեքավոր զեկուցումներով հանդես են գալիս Նոբելյան հինգ մրցանակակիրներ՝

• Ահարոն Չեխանովերը՝ Իսրայելից (արժանացել է Նոբելյան մրցանակի՝ ուբիքվիտինով միջնորդավորված սպիտակուցային դեգրադացիայի հայտնագործության համար),
• Ադա Յոնաթը՝ Իսրայելից (արժանացել է Նոբելյան մրցանակի քիմիայի՝ բյուրեղագիտության ոլորտում արած հայտնագործության համար),
• Դեն Շեխտմանը՝ Իսրայելից (արժանացել է Նոբելյան մրցանակի քիմիայի ոլորտում),
• Ջոն Ռոբին Ուորենը՝ Ավստրալիայից (արժանացել է Նոբելյան մրցանակի ֆիզիոլոգիայի բնագավառում),
• Էյ–իչի Նեգիշին՝ Ճապոնիայից (արժանացել է Նոբելյան մրցանակի՝ քիմիայի բնագավառում):

Մասնաճյուղում ներկայացրած իր զեկույցում Ա.Սիմոնյանն անդրադարձավ հատկապես «Գիտական կրթության խթանումը» թեմայով Դեն Շեխտմանի զեկուցմանը, որտեղ կարևորվում էր գիտական կրթության և այդ կրթությունը տարածողների դերը պետության զարգացման մեջ, ինժեների և ինֆորմացիոն տեխնոլոգիաների մասնագետների դերը տնտեսության զարգացման գործում, նորարարական գաղափարների ձևավորման մեջ ընդգծվում էր ինքնավստահության, համարձակության և հետաքրքրասիրության գործոնների կարևորությունը:

 Դասավանդողներին կոչ էր արվում «պայծառ», պրպտուն մտքով օժտված սաներին առանձնացնել և նրանցից նորարար մասնագետներ պատրաստել:

Զեկույցից հետո ծավալվեց քննարկում:

2016թ. ապրիլի 13-ին ԵՊՀ Իջևանի մասնաճյուղի մարզադահլիճում տեղի ունեցավ բադմինթոնի բաց առաջնություն, որին մասնակցում էին մարզի տարբեր ուսումնական հաստատությունների սաներ:

Բադմինթոնի առաջնությունն անցկացվեց տարիքային երկու խմբերով (փոքրերի և մեծերի):

Խաղերն ընթացան օլիմպիական կարգով:

7-12 տարիքային խմբում աղջիկներից առաջին տեղը գրավեց Իջևանի 5-րդ հիմնական դպրոցի աշակերտուհի Մերի Ալեքսանյանը, երկրորդ տեղը՝ 1-ին հիմնական դպրոցի աշակերտուհի Ռուզաննա Սարուխանյանը, երրորդ տեղը՝ 5-րդ դպրոցի աշակերտուհի Սիրամարգ Մատինյանը:

Տղաներից առաջին տեղը գրավեց Էրիկ Օթարյանը (5-րդ հիմնական դպրոց), երկրորդ տեղը՝ Գուրգեն Ղալումյանը (1-ին հիմնական դպրոց), երրորդ տեղը՝ Վալերա Չապուխյանը (3-րդ հիմնական դպրոց):

Մեծահասակների ենթախմբում տղաներից հաղթող ճանաչվեց Սարգիս Խուդավերդյանը (Իջևանի ավագ դպրոց), երկրորդ տեղը գրավեց Հրաչ Ներսիսյանը (մասնաճյուղի «ԱԼԳ» մասնագիտության II կուրս), երրորդ տեղը գրավեց Դավիթ Սաքանյանը (4-րդ հիմնական դպրոց):

Աղջիկների մրցապայքարում առաջին տեղը գրավեց Էմիլիա Փայտյանը («ԱԼԳ»-1), երկրորդ տեղը գրավեց Անի Խոջումյանը (Իջևանի մարզադպրոց), երրորդ տեղը՝ Սուսաննա Սարուխանյանը («ԱԼԳ»-1):

Հաղթողները տնօրենության կողմից պարգևատրվեցին հուշանվերներով: