2019թ. դեկտեմբերի 12-ին ԵՊՀ Իջևանի մասնաճյուղում կայացավ բանավեճի առաջնության 1/2 եզրափակչի առաջին խաղը, որին մասնակցում էին «Ալֆա» և «Օմեգա» թիմերը:

Խաղի դատավորներն էին ՈՒԳԸ փոխնախագահ Շիրակ Գասպարյանը (գլխավոր դատավոր), Տնտեսագիտության ֆակուլտետի ՈՒԽ նախագահ Լուիզա Մադաթյանը, Հայոց պատմության և հասարակագիտության ամբիոնի դոցենտ Հովսեփ Մովսեսյանը:

Բանավեճը «Թուրքական ապրանքների վաճառքը պետք է արգելվի» թեմայով էր:

Ինչպես որոշվել էր խաղից 10 օր առաջ կայացած վիճակահանությամբ, կողմ դիրքորոշմամբ հանդես եկավ «Օմեգա» թիմը, իսկ դեմ դիրքորոշմամբ՝  «Ալֆա» թիմը:

Երկու թիմերն էլ ցուցադրեցին հանդիսատեսի համար հետաքրքիր խաղ: 

 Լարված ու համառ պայքարից հետո 70-53 հաշվով հաղթեց «Ալֆա» թիմը:

Շնորհավորում ենք հաղթող թիմին՝ եզրափակչում մաղթելով հաջողություն, իսկ «Օմեգա» թիմին շնորհակալություն մասնակցելու և իրենց խաղով բանավեճի առաջնությունը գեղեցկացնելու համար:

 2019թ. դեկտեմբերի 11-ին ԵՊՀ Իջևանի մասնաճյուղի ուսանողական խորհրդի և տնօրենության համագործակցությամբ, ուսանողի տոնի առթիվ տեղի ունեցավ ուսանողական ռեկտորատ, որը հաջորդեց նոյեմբերի 29-ին կայացած պիլոտային ռեկտորատին:

Ռեկտորատի ընթացքում համալսարանը ղեկավարեցին ուսանողները, ովքեր փոխարինեցին ԵՊՀ ԻՄ-ի աշխատակիցներին՝ վարչական, պրոֆեսորադասախոսական և ուսումնաօժանդակ անձնակազմի ներկայացուցիչներին:

Այն ուներ երկու հիմնական նպատակ. առաջինը` ուսանողներին ծանոթացնել համալսարանի կառուցվածքին, երկրորդը` ուսանողներին բուհի խնդիրներին այլ դիտանկյունից նայելու հնարավորություն տալ:

Ռեկտորատի մասնակցության առցանց հայտադիմումը լրացրել էին ութսունմեկ ուսանող` բոլոր ֆակուլտետներից և բոլոր կուրսերից: Հայտադիմումը լրացրած բոլոր ուսանողներին հնարավորություն է տրվել մասնակցել ռեկտորատին:

Օրվա ընթացքում պաշտոնավարող ուսանողներն իրենց պարտականությունների շրջանականերում իրականացրին`

• դասապրոցեսի կազմակերպում,
• մասնաճյուղի ներքին կարգապահության պահպանում,
• ուսանողների կողմից դասախոսությունների վարում,
• դասալսումների կազմակերպում,
• նիստերի ու խորհրդակցությունների հրավիրում:

Թիմն աշխատում էր մեծ ոգևորությամբ և պատասխանատվությամբ:

Օրն ամփոփվեց եզրափակիչ նիստով, որին մասնակցեցին ԵՊՀ ԻՄ-ի տնօրենի պաշտոնակատար Ա. Հ. Մակարյանը և ռեկտորատի անդամները:

Նիստի ընթացքում ռեկտորատի մասնակիցները ներկայացրին իրենց կատարած աշխատանքները, ստացած տպավորությունները:

Ծրագիրը, հետաքրքիր լինելուց բացի, շատ օգտակար էր. այն նպաստեց, որ ուսանողները մոտիկից ծանոթանան բուհի կառավարմանը, նրա վարչական և պրոֆեսորադասախոսական անձնակազմի՝ որքան պատվաբեր, նույնքան էլ պատասխանատու և պարտավորեցնող աշխատանքին:

Բոլոր լուսանկարները տե´ս Պատկերասրահում:

 2019թ. դեկտեմբերի 10-ին ԵՊՀ Իջևանի մասնաճյուղում կայացավ տնօրենի պաշտոնակատար Ա. Հ. Մակարյանի հանդիպումը ինստիտուցիոնալ կարողությունների ինքնավերլուծություն իրականացնելու նպատակով ձևավորված նախնական աշխատանքային խմբի հետ:

Հանդիպման նպատակն էր իրազեկել ներկաներին ԵՊՀ ԻՄ-ում ինստիտուցիոնալ կարողությունների ինքնավերլուծություն իրականացնելու հերթական գործընթացի, դրա ընդհանուր բովանդակության ու խնդիրների մասին:

Մասնավորապես ներկայացվեց, որ ԵՊՀ ԻՄ-ն ունի ինքնավերլուծություն իրականացնելու փորձ. 2011, 2013 և 2015 թվականներին ըստ ձևաչափի պատրաստվել են ինքնավերլուծության զեկույցներ:

Ինքնավերլուծության ձևաչափը ենթադրում է ՄՈՒՀ-ի ծավալած բոլոր ոլորտների գործընթացների վերլուծություն, նրանց թույլ և ուժեղ կողմերի բացահայտում, կրթության ոլորտում նոր մոտեցումների ներդրում ու համադրում, պլանավորման երկարաժամկետ ծրագրում, անհրաժեշտ փոփոխությունների իրականացում:

Նշվեց, որ ինքնավերլուծությունը կիրականացվի ըստ 10 չափանիշների, որոնք իրենց հերթին ընդգրկում են 65 չափորոշիչ: Ներկայացվեցին աշխատանքային խմբերի անդամները՝ ըստ չափանիշների:

ՄԿՈԱ բաժնին հանձնարարվեց համակարգել գործընթացը, հետևել խմբերի աշխատանքներին՝ ըստ ժամանակացույցի, տրամադրել համապատասխան խորհրդատվություն և աջակցություն՝ ինքնավերլուծությունը պատշաճ իրականացնելու համար: