Սիրելի՛ համալսարանականներ, ջերմորեն շնորհավորում եմ Գիտելիքի և դպրության օրվա, նոր՝ 2024-2025 ուսումնական տարվա մեկնարկի կապակցությամբ, ցանկանում եմ մասնագիտական ձեռքբերումներ և առաջընթաց, ուսանողներին՝ մեծ կամք և նպատակասլացություն գիտելիքների ամբարման ճանապարհին, դասախոսներին՝ անսպառ եռանդ և հետևողականություն ուսուցման գործընթացում:

Այսօր մեծ տոն է բոլոր համալսարանականներիս՝ դասախոսների և ուսանողների, ուսուցիչների և աշակերտների, կրթության և գիտության ոլորտի բոլոր աշխատողների և հատկապես առաջին դասարանցիների ու կուրսեցիների համար, ովքեր նոր են ձեռք բերելու կրթության՝ բոլոր դռները բացող բանալին, նոր են մուտք գործելու կրթական հաստատություն:

Սիրելի՛ առաջին կուրսեցիներ, բարի գալուստ մեր հարազատ կրթօջախ՝ Երևանի պետական համալսարանի Իջևանի մասնաճյուղ, թո՛ղ բարի լինի ձեր մուտքը և ուսումնառության հետագա ամբողջ ընթացքը մեր համալսարանում, եղե՛ք ուսումնատենչ, նախաձեռնող ու նպատակասլաց….

Գաղտնիք չէ, որ յուրաքանչյուր հասարակություն առաջընթաց է ապրում ու զարգանում գերազանցապես ձե՛ր՝ երիտասարդների շնորհիվ: Ինչպես գրավոր լեզվի միջոցով մարդկությունը հաղորդակցվում է իրենից առաջ կերտված պատմությանն ու մշակույթին և հետագա սերունդներին փոխանցում իր ստեղծած մշակույթն ու արժեքները, այնպես էլ կրթության, գիտության, ազգային ինքնաճանաչողության միջոցով երիտասարդ սերունդը, հանդես գալով որպես անցյալը, ներկան ու ապագան իրար կապող կարևորագույն օղակ, ապահովում է հասարակության առաջխաղացումը….  Ուրեմն, սիրելի՛ ուսանողներ, եղեք ջերմեռանդ կրողն ու տարածողը նորարար գաղափարների ու հետաքրքիր մտահղացումների և իհարկե շարունակողն ու պահպանողը ձևավորված լավագույն ավանդույթների, ազգային և համամարդկային արժեքների:

Վստահեցնում եմ ձեզ (շուտով առաջին կուրսեցիներն էլ դրանում կհամոզվեն), որ մեր հեղինակավոր բուհում՝ ԵՊՀ Իջևանի մասնաճյուղում, որակյալ կրթություն ստանալու, բարձր մրցունակությամբ և աշխատաշուկայում պահանջված մասնագետներ դառնալու համար ստեղծված են անհրաժեշտ պայմաններ ու միջավայր՝ առաջնակարգ պրոֆեսորադասախոսական, պատասխանատու և հոգատար ուսումնաօժանդակ և վարչական կազմերով, ուսանողակենտրոն միջավայրով, նյութատեխնիկական ռեսուրսներով և կահավորմամբ:

Դարձյալ շնորհավորում եմ բոլորիս Գիտելիքի և դպրության օրվա առթիվ՝ մաղթելով բարի ուսումնական տարի, բեղուն և արդյունավետ գործունեություն:

ԵՊՀ Իջևանի մասնաճյուղի տնօրենի պաշտոնակատար,

ֆիզ.մաթ. գիտ. թեկն., դոցենտ Անուշավան Մակարյան

Հարգելի՛ ուսուցիչներ, դպրոցների տնօրեններ, հանրակրթության ոլորտի մասնագետներ, սիրով տեղեկացնում ենք, որ ՀՀ կրթության, գիտության, մշակույթի և սպորտի նախարարի հրամանների համաձայն՝ ԵՊՀ Իջևանի մասնաճյուղն ընդգրկվել է հերթական ատեստավորման ենթակա ուսուցչին վերապատրաստող կազմակերպությունների և ուսուցիչների առարկայական պարտադիր վերապատրաստման ծրագրերի ու վերապատրաստող երաշխավորված կազմակերպությունների ցանկում:
Մասնաճյուղը հերթական ատեստավորման ենթակա ուսուցիչների համար կազմակերպելու է վերապատրաստումներ երկրորդ (ձեռնահասություն) մակարդակի բոլոր՝ 11 բաժիններով.
1. դասընթացների և դասերի պլանավորում,
2. դասավանդման մեթոդներ, ռազմավարություններ և ներառակայական կապեր,
3. ռեսուրսների կառավարում,
4.տեղեկատվական և հաղորդակցական տեխնոլոգիաների կիրառումը ուսումնական գործընթացում,
5. 21-րդ դարի հմտությունների խթանում,
6. սովորողների կարիքների բացահայտում,
7. ուսումնառության գնահատում,
8.ուսումնական գործընթացի համընդհանուր ներառականությունն ու մասնակցությունն ապահովող կարողություններ,
9. մասնագիտական զարգացման համար պատասխանատվության ստանձնում,
10. կրթության ոլորտի օրենսդրություն և պրակտիկայի իմացություն,
11. մասնագիտական բարեվարքություն, ժողովրդավարական և քաղաքացիական կարողունակություն:

Առարկայական պարտադիր վերապատրաստումը նախատեսված է միայն առարկայական գիտելիքի իմացության կարիք ունեցող և նախորդ տարիներին կամավոր ատեստավորումը չհաղթահարած ուսուցիչների համար:
Այն կիրականացվի հետևյալ առարկաներից՝
1. հայոց լեզու,
2. ֆրանսերեն,
3. ռուսերեն,
4. անգլերեն,
5. հայ գրականություն,
6. պատմություն,
7. աշխարհագրություն,
8. քիմիա,
9. ֆիզիկա,
10. կենսաբանություն,
11. մաթեմատիկա,
12. տարրական դասարաններ,
13. ինֆորմատիկա,
14. ՆԶՊ (նախնական զինվորական պատրաստականություն),
15. կերպարվեստ,
16. ֆիզկուլտուրա,
17. հասարակագիտություն,
18. տեխնոլոգիա:

Վերապատրաստումներին առնչվող այլ մանրամասների վերաբերյալ ԵՊՀ ԻՄ պաշտոնական կայքի և ֆեյսբուքյան էջի միջոցով լրացուցիչ կտեղեկացնենք: