«Իջևանի հասարակական-մշակութային կյանքը առօրեականության համատեքստում 1920-1970-ական թվականներին» թեմայով դրամաշնորհային ծրագրի իրականացման շրջանակներում ԵՊՀ ԻՄ-ի հայոց պատմության և հասարակագիտության ամբիոնի դասախոսների և ուսանողների մասնակցությամբ տեղի ունեցավ կլոր սեղան-քննարկում:

Քննարկման առանցքում Իջևանի քաղաքային տարածության ձևավորման առանձնահատկություններին նվիրված ուսումնասիրության արդյունքների ամփոփումն ու հանրայնացումն էր, որի ընթացքում բանախոսները ներկայացրին քաղաքային միջավայրի և համակեցության ձևավորման իջևանյան առանձնահատկությունները, խորհրդային և ազգային գաղափարների ազդեցությունը Իջևանի քաղաքային միջավայրի վրա:

Բանախոսներից Վ.Պողոսյանը մասնավորապես նշեց, որ Խորհրդային Հայաստանի գոյության առաջին տարիներին Իջևանը փոքր` մոտ 2200 բնակչով գյուղ էր՝ մոտակա գյուղերի կենտրոնը: Խորհրդային առաջին տարիների քաղաքաշինական «շքերթը» Իջևան «չհասավ», բայց հետագայում քաղաքաշինական և ճարտարապետական ոճավորման վրա ունեցավ հստակ ազդեցություն: Մինչև Հայրենական պատերազմը Իջևանում փողոցները խճապատված չէին, միայն «երեսնական թվականներին հիմնված գյուղատնտեսական տեխնիկումի համալիրի շրջապատն էր, որ իջևանցիները քաղաք են անվանել, հավանաբար հաշվի առնելով, որ Իջևանի միակ ասֆալտապատ հատվածն էր և նաև գործում էր ներքին  սանսպասարկման համակարգ»: Ինչպես պատմում են տեղաբնակները` գյուղի գլխավոր փողոցի սալապատման աշխատանքներն իրականացրել են գերմանացի ռազմագերիները հավանաբար 1945-46 թվականներին: Մնացած առումներով Իջևանի քաղաքային կյանքի ցուցիչները շատ քիչ էին` մայրուղու անմխիթար շենք-շինությունները, շուկան, ճաշարանը, «հատակն ու դռները համարյա փտած ունիվերմագը», ծառայողական կենտրոնը` «փայտե երկար պատշգամբներով երկհարկանի շենքով», որտեղ  տեղակայված էին շրջանային իշխանությունները:

Ներկայացվեց, որ արդեն հետպատերազմյա շրջանում սկսեց իր դիմագիծը ձևավորել այժմյան Իջևանը, ինչը պայմանավորված էր նաև հանրապետական իշխանությունների վարած քաղաքականությամբ: Հետպատերազմյան առաջին տարիներին հանրապետության կենտրոնական իշխանությունների նախաձեռնությամբ սկսվեց շրջանային կենտրոնների հատակագծման և զարգացման հեռանկարների որոշակիացման գործընթացը:

1948թ. ճարտարապետներ Հ.Դավթյանի, Պ.Թումանյանի և Պ.Մանուկյանի կողմից կազմվեց Իջևանի առաջին հատակագիծը, որտեղ ամփոփվեցին ուղղահայաց, միմյանց հատվող փողոցների, ճարտարապետական անսամբլային ոճավորման մոտեցումները: Միևնույն ժամանակ հետպատերազմյան շրջանի շինարարությունն իրականցվում էր ոչ միայն լայն մասշտաբայնությամբ, այլև կոնկրետացված հատակագծային հիմքերով` հաշվի առնելով բնակավայրերի զարգացման հեռանկարները: Իջևանի հատակագծման հեղինակները փորձեցին համադրել խորհրդահայ ճարտարապետական մտքի զարգացման արդյունքները:

Բնակչության կրկնակի աճը, արդյունաբերական նոր համալիրների կառուցման հեռանկարները անհրաժեշտություն ստեղծեցին վերանայել քաղաքի՝ 1948թ. հատակագիծը, և 1963թ. պատրաստվեց նոր հատակագիծ 25 հազար բնակիչ ունեցող քաղաքի համար, որը վերանայվեց 1965 թվականին: Նոր նախագծով, որի քննարկմանը մասնակցում էին հանրապետության լավագույն ճարտարապետները, նախատեսվում էր Իջևանը դարձնել շինարարական կենտրոն, արագ իրականացնել քաղաքաշինական ծավալման գործընթացները, ձևավորել նոր թաղամասեր և միկրոշրջաններ: 1960-ական թթ. վերջին խնդիր դրվեց մոնումենտալ տեսք հաղորդել Իջևանի երկու մուտքերին` քաղաքի մշակութային ներկապնակի ձևավորման համար կարևորել խորհրդային և հայկական խորհրդանիշների ամբողջացումը: Եվ այս շրջանում կառուցվեցին մեզ հայտնի ու անհայտ բազմաթիվ շինություններ, որոնք այժմյան Իջևանի քաղաքային կյանքի առանցքն ու հիմնաքարն են:

Կլոր-սեղան քննարկումն ամփոփելով՝ բանախոսները նշեցին, որ հետազոտության արդյունքները տպագրման փուլում են և տպագրությունից հետո կներկայացվեն գիտասեր և իջևանասեր հասարակության դատին:

  2023թ. ապրիլի 1-ին ԵՊՀ Իջևանի մասնաճյուղում կայացավ Մայր բուհի կողմից ս.թ. մարտի 22-ին իրականացված «Լաւագոյն գրաբարագէտ» խորագրով օլիմպիադայի մեր մասնակիցների շնորհակալագրերի և խրախուսական պարգևների հանձնման արարողությունը, որին մասնակցում էին Հայոց լեզվի և գրականության ամբիոնի վարիչի պաշտոնակատար, բ.գ.թ. դոցենտ Վ.Ավագյանը և ամբիոնի դասախոսներ:

«Լաւագոյն գրաբարագէտ» օլիմպիադան կազմակերպվել էր ԵՊՀ հայոց լեզվի պատմության և ընդհանուր լեզվաբանության ամբիոնի, ԵՊՀ հայ բանասիրության ֆակուլտետի ուսանողական գիտական ընկերության, «Դասական դպրոց» հիմնադրամի և Արարատյան Հայրապետական թեմի համատեղ գործակցությամբ:

Օլիմպիադայի նպատակն էր արժևորել տալ հին հայերենը, նոր սերնդին մոտեցնել ոսկեղենիկ հայերենին:

Անվանակարգերը երկուսն էին (տեքստի՝ աշխարհաբարից գրաբար փոխադրում և «Երկիր Նաիրի Հայաստանս» գրաբարով շարադրություն):

Օլիմպիադային մասնակցում էին ուսանողներ Երևանի պետական համալսարանից, ԵՊՀ-ին առընթեր Արտաշես Շահինյանի անվան ֆիզիկամաթեմատիկական հատուկ դպրոցից, Գևորգյան հոգևոր ճեմարանից, Խաչատուր Աբովյանի անվան հայկական պետական մանկավարժական համալսարանից, Արցախի պետական համալսարանից և այլ կրթական հաստատություններից:

ԵՊՀ Իջևանի մասնաճյուղից «Լաւագոյն գրաբարագէտ» օլիմպիադային մասնակցեցին «Հայոց լեզու և գրականություն» կրթական ծրագրի երկրորդ կուրսի ուսանողուհիներ Ռիմա Եգանյանը և Գոհար Վիրաբյանը, ովքեր արժանացան շնորհակալագրերի և խրախուսական պարգևների:

 2023թ. մարտի 28-ին ԵՊՀ Իջևանի մասնաճյուղի մարզադահլիճում տեղի ունեցավ սեղանի թենիսի մասնաճյուղային առաջնություն, որին մասնակցում էին երկու տասնյակ ուսանողներ և դասախոսներ:

Առաջնությունն անցկացվեց օլիմպիական մրցակարգով. պարտվողը դուրս էր մնում հետագա պայքարից:

Աղջիկների մրցապայքարում 1-ին տեղը գրավեց «Ինֆորմատիկա և կիրառական մաթեմատիկա» մասնագիտության երկրորդ կուրսի ուսանողուհի Անի Գրիգորյանը, 2-րդ տեղը գրավեց «Ֆինանսներ» մասնագիտության երկրորդ կուրսի ուսանողուհի Անի Թիրաբյանը, 3-րդ տեղը՝ «Զբոսաշրջություն» մասնագիտության երրորդ կուրսի ուսանողուհի Լիլիթ Քոչարյանը:

Տղաների մրցապայքարում 1-ին տեղը գրավեց «Ինֆորմատիկա և կիրառական մաթեմատիկա» մասնագիտության երկրորդ կուրսի ուսանող Դանիել Մինասյանը, 2-րդ տեղը՝ «Պատմություն» մասնագիտության առաջին կուրսի ուսանող Դավիթ Ալեքսանյանը, 3-րդ տեղը՝ Արտակարգ իրավիճակների, մարմնակրթության և սպորտի ամբիոնի դասախոս Վալերի Դավթյանը:

Հաղթողները տնօրենության կողմից ստացան հավաստագրեր:

 2023թ. մարտի 28-ին ԵՊՀ Իջևանի մասնաճյուղում հյուրընկալվել էին ԱԻՆ սեյսմիկ պաշտպանության տարածքային ծառայության հյուսիսային տարածաշրջանային կենտրոնի բնակչության հետ տարվող աշխատանքների բաժնի աշխատակիցները՝ բաժնի պետ Ե․Սեխպոսյանը և դասախոս-հրահանգիչ Հ․Մանվելյանը: 

Նախ կայացավ ԵՊՀ Իջևանի մասնաճյուղի փոխտնօրեն Մ.Օթարյանի հետ ԵՊՀ ԻՄ-ի քաղաքացիական պաշտպանության շտաբի պետ Գ.Գուլակյանի և հյուրերի հանդիպումը, որի ընթացքում քննարկվեցին այցելության նպատակին, Սեյսմիկ պաշտպանության տարածքային ծառայության հյուսիսային տարածաշրջանային կենտրոնի հետ մասնաճյուղի համագործակցությանը վերաբերող հարցեր:

Ելնելով Սպիտակի երկրաշարժի մեծամասշտաբ զոհերի և ավերածությունների պատճառներից՝ այցելության հիմնական նպատակն էր բարձրացնել ուսանողների և աշխատակիցների իրազեկվածության մակարդակը երկրաշարժից պաշտպանվելու հիմնական կանոնների վերաբերյալ:

ԵՊՀ ԻՄ-ի կիրառական արվեստի ֆակուլտետի դահլիճում կայացավ հանդիպում-քննարկում, որի ընթացքում մասնակիցներին ներկայացվեցին սեյսմապաշտպանական վարքականոնները, մասնավորապես՝ ինչ պետք է անել երկրաշարժից առաջ, դրա ընթացքում և երկրաշարժից հետո՝ նյութական, մարդկային և բարոյահոգեբանական կորուստները նվազագույնի հասցնելու համար:

Ցուցադրվեց ուսուցողական տեսաֆիլմ, որից հետո հանդիպման մասնակիցները մասնագետներից ստացան իրենց հետաքրքրող հարցերի պատասխանները:

Իրականացվեց նաև տարհանում:

Վերջում քննարկվեցին տարհանման ընթացքում նկատված թերությունները, ձեռք բերվեց պայմանավորվածություն՝ հետագա համագործակցության համար: