2018թ. փետրվարի 1-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը ամբիոնների վարիչների և մասնագիտությունների կրթական ծրագրերի պատասխանատուների հետ:

Հանդիպման ընթացքում քննարկվեցին ուսումնական գործընթացի շարունակական բարելավմանը, դասախոսների գիտական աշխատանքներին, էլեկտրոնային դասախոսությունների առկայությանը, կրթական ծրագրերի վերամշակմանը վերաբերող մի շարք խնդիրներ:

ՄԿԾ-ների պատասխանատուներն ու ամբիոնների վարիչները, ներկայացնելով իրենց իրականացրած աշխատանքները, մասնավորապես նշեցին, որ արդեն պատրաստ են կրթական ծրագրերի վերջնարդյունքները, ուսումնական պլանները, և հիմա դասախոսները պատրաստում են իրենց կողմից դասավանդվող առարկաների նկարագրիչները: Նրանք հավելեցին, որ բոլոր ծրագրերը պատրաստ կլինեն սահմանված ժամկետներում:

Տնօրենը կրկին շեշտեց, որ այդ աշխատանքներում անհրաժեշտ է թիմային մոտեցում, ամբիոնները պետք է ակտիվ համագործակցեն կրթական ծրագրերի պատասխանատուների հետ:

Կարևորվեց նաև այն հանգամանքը, որ ուսումնական պլաններում և դասընթացների ծրագրերում շեշտադրումը պետք է դնել գործնական կարողությունների և հմտությունների ձևավորման ու զարգացման վրա:

2018թ. հունվարի 29-ին «Իմ Հայաստան» ծրագիրը, Հայաստանի Ամերիկյան համալսարանի հետ համատեղ, մեկնարկեց մարզային զբոսավարների վերապատրաստման դասընթացի երկրորդ փուլը, որի նպատակն էր զարգացնելու Գյումրու, Իջևանի, Դիլիջանի և Սիսիանի բնակիչների, հատկապես երիտասարդների զբոսավարության հմտությունները:

«Իմ Հայաստան»-ը հնգամյա ծրագիր է, որը ֆինանսավորվում է ԱՄՆ Միջազգային զարգացման գործակալության և իրականացվում Սմիթսոնյան ինստիտուտի կողմից: 

Վերապատրաստման դասընթացին մասնակցում էին մարզային 30 զբոսավարներ, «Իմ Հայաստան» ծրագրի հետ համագործակցող զբոսաշրջության ոլորտի 10 աշխատակիցներ:

ԵՊՀ Իջևանի մասնաճյուղից վերապատրաստմանը  մասնակցեցին «Անգլերեն լեզու և գրականություն» մասնագիտության 3-րդ կուրսի ուսանող Սյուզաննա Շահնազարյանը, «Օտար լեզու և գրականություն» մասնագիտության ուսանողներ Անի Ասրյանը, Մհեր Մկրտումյանը, Իննա Մկրտումյանը և շրջանավարտներ Սյուզաննա Պետրոսյանն ու Էլինա Քոչարյանը:

Միջոցառման բացմանը ողջույնի խոսքով հանդես եկավ ԱՄՆ Միջազգային զարգացման գործակալության (ԱՄՆ ՄԶԳ / USAID) հայաստանյան առաքելության տնօրեն Դեբորա Գրիզերը: Նա նշեց, որ դասընթացը յուրահատուկ ու կենսական է մարզերում տուրիզմի զարգացման համար. «Հզորացնելով մարդկանց, հատկապես երիտասարդների՝ իրենց համայնքների զբոսավարներ ու մշակութային դեսպաններ դառնալու կարողությունները՝ մենք օգնում ենք նրանց խորը գիտելիքներ ձեռք բերել տեղի պատմության, մշակույթի և բնական ժառանգության մասին և օգտագործել դրանք այցելուների համար հետաքրքրաշարժ պատմություններ կերտելու համար: Ամենակարևորն այն է, որ դասընթացի մասնակիցները ձեռք կբերեն զբոսավարության, հաճախորդների սպասարկման, այցելուների հետ շփման և խմբերի ղեկավարման գործնական հմտություններ: Մենք ուրախ ենք փաստել, որ անցյալ տարվա մեր առաջին ուսումնական ծրագիրն օգնեց շրջանավարտներից ոմանց հիմնել իրենց սեփական բիզնեսը և այցելուներին պրոֆեսիոնալ զբոսավարի ծառայություններ մատուցել»:

«Իմ Հայաստան» ծրագրի գործընկեր Սոլիմար ինթերնեշնլի զբոսավարության ոլորտի միջազգային մասնագետների, Հայաստանի ամերիկյան համալսարանի փորձառու դասախոսների և զբոսաշրջության կայուն զարգացման ու մարքեթինգի հիմնարար մեթոդների շնորհիվ մասնակիցները ձեռք բերեցին կիրառելի գիտելիքներ՝ իրենց համայնքային պատմությունները այցելուներին յուրօրինակ ձևով մատուցելու համար:

2018թ. հունվարի 29-ից փետրվարի 28-ը ԵՊՀ Իջևանի մասնաճյուղում անցկացվում են պրոֆեսորադասախոսական, վարչական և ուսումնաօժանդակ անձնակազմի ներկայացուցիչների վերապատրաստման դասընթացներ, որոնք վարում են Ծրագրավորման և ինֆորմացիոն տեխնոլոգիաների ամբիոնի ասիստենտ Մարիետա Ճաղարյանը, դասախոս Քնար Օթարյանը, Ընդհանուր մաթեմատիկայի և բնագիտության ամբիոնի դասախոս Մելինե Մելիքյանը:

Դասախոսները վերապատրաստվում են “Microsoft Office PowerPoint Presentation” ծրագրով, իսկ վարչական և ուսումնաօժանդակ անձնակազմի անդամները՝ “Microsoft Office Excel” ծրագրով:

Վերապատրաստումների նպատակն է համակարգել այդ ծրագրերի վերաբերյալ մասնակիցների գիտելիքները, անհատական և խմբային առաջադրանքների միջոցով ձևավորել և զարգացնել դրանցով արդյունավետ աշխատելու նրանց հմտությունները, ապահովել փորձի փոխանակում տարբեր բնագավառների մասնագետների միջև:

“Microsoft Office PowerPoint Presentation” ծրագրով վերապատրաստման դասընթացի ժամանակ ներկայացվում են, թե ինչ է պրեզենտացիան (ներկայացում, շնորհանդես, սահիկաշար), որոնք են նրա տիպերը, պատրաստման փուլերը, ինչ չափանիշների պետք է բավարարի արդյունավետ պրեզենտացիան և այլն:

Դասընթացի վերջում դասախոսները կիմանան, թե ինչպես ընտրել և ներկայացնել “PowerPoint” համակարգի հնարավորությունները, կկարողանան զեկուցումների, դասընթացների համար կիրառել “PowerPoint” ծրագիրը, օգնել ուսանողներին այդ ծրագրի միջոցով ցուցադրելու կուրսային և ավարտական աշխատանքները, կկարողանան կիրառել և համադրել տեքստային ու գրաֆիկական խմբագրիչների աշխատանքները, զեկուցումների, դասընթացների ցուցադրման համար ստեղծել շնորհանդեսներ:

“Microsoft Office Excel” ծրագրով վերապատրաստման դասընթացի ժամանակ մասնաճյուղի վարչական և ուսումնաօժանդակ անձնակազմին ներկայացվում են էլեկտրոնային աղյուսակների կիրառության առանձնահատկությունները:

Դասընթացի վերջում մասնակիցները կկարողանան արդյունավետ կերպով ստեղծել, մշակել, խմբագրել և ձևավորել աղյուսակներ, բանաձևերի և որոշ կարևոր ֆունկցիաների օգնությամբ կատարել հաշվարկներ, իրականացնել տվյալների ֆիլտրացիա և կարգավորում, նախապատրաստել էլեկտրոնային աղյուսակը  տպագրության: