2017թ. ապրիլի 13-ին ԵՊՀ Իջևանի մասնաճյուղում կայացավ բադմինթոնի բաց առաջնություն, որին մասնակցում էին ԵՊՀ ԻՄ-ի, Իջևանի մարզադպրոցի տարբեր տարիքային խմբերի սաներ:

Բադմինթոնի առաջնությունն անցկացվեց փոքրիկների  տարիքային (7-12) խմբում շրջանաձև կարգով, 14-ից բարձր տարիքային խմբում՝ օլիմպիական կարգով:

Փոքրիկների խմբում աղջիկներից առաջին տեղը գրավեց Ռուզաննա Սարուխանյանը (թիվ 1 հիմնական դպրոց), երկրորդ տեղը գրավեց Սիրամարգ Մատինյանը (թիվ 5 հիմնական դպրոց), երրորդ տեղը զբաղեցրեց Լիլիթ Բրուտյանը (թիվ 4 հիմնական դպրոց):

Տղաներից մրցանակային տեղեր գրավեցին Արշավիր Թադևոսյանը (թիվ 1 հիմնական դպրոց), Վալերի Չապուխյանը (թիվ 3 հիմնական դպրոց) և Դավիթ Բալինյանը (թիվ 1 հիմնական դպրոց):

14-ից բարձր տարիքային խմբում աղջիկներից հաղթեց «Անգլերեն լեզու և գրականություն» մասնագիտության երկրորդ կուրսի ուսանողուհի Էմիլիա Փայտյանը:

Երկրորդ և երրորդ տեղերը զբաղեցրին թիվ 1 հիմնական դպրոցի սաներ Դիանա Ասատրյանը և Լինա Էդիլյանը:      

Տղաներից հաղթեց «Անգլերեն լեզու և գրականություն» մասնագիտության երրորդ կուրսի ուսանող Հրաչ Ներսիսյանը:

Հաղթողները տնօրենության կողմից պարգևատրվեցին հուշանվերներով:

7-18 տարեկան հաղթողները կմասնակցեն ս.թ. մայիսի 8-10-ը Երևանում կայանալիք բադմինթոնի ՀՀ պատանեկան առաջնությանը:  

2017թ. ապրիլի 12-ին մասնաճյուղում կայացավ հայրենասիրության թեմայով միջոցառում՝ ԵՊՀ ԻՄ-ի «Տավուշ» ռազմահայրենասիրական ակումբի անդամների մասնակցությամբ:

Միջոցառմանը հրավիրված էին բուհի վարչական և պրոֆեսորադասախոսական անձնակազմի ներկայացուցիչներ՝ տնօրեն Ս. Ա. Առաքելյանի գլխավորությամբ,  ԵԿՄ Տավուշի մարզային խորհրդի անդամներ, ուսանողներ, հյուրեր:

Նախ՝ միջոցառմանը մասնակցող պատանի երկրապահները իրենց շորհակալական խոսքն ուղղեցին ավագ սերնդի երկրապահներին՝ իրենց համար հայրենասիրության վառ օրինակ ծառայելու, ազգանվեր գործունեության համար:

Ապա հանդես եկան ազգային-հայրենասիրական երգերով, բանաստեղծություններով ու պարային կատարումներով:

Միջոցառման ընթացքում ելույթ ունեցան և ԵԿՄ անդամներից՝ երիտասարդների մեջ տեսնելով իրենց գործի արժանի շարունակողներին, ավելին՝  համոզմունք արտահայտելով, որ ներկայիս սերունդը եկել է գերազանցելու ավագ սերնդի ներկայացուցիչներին:

Վերջում «Տավուշ» ռազմահայրենասիրական ակումբի մի քանի անդամներ պարգևատրվեցին Երկրապահ կամավորականների միության հուշամեդալներով  ու պատվոգրերով:

Հուշամեդալներ ստացան ԵՊՀ ԻՄ-ի «Տավուշ» ռազմահայրենասիրական ակումբի նախագահ Լազր Ափինյանը, անդամներ Սուրեն Չոբանյանը և Արմեն Շամամյանը:

Պատվոգրեր տրվեցին ակումբի անդամներ Մերի Գասպարյանին, Լիլիթ Ֆարմազյանին, Էրինե Ղարայանին, Սյուզի Այվազյանին, Մերի Դարբինյանին:

Մասնագիտական կրթության որակի ապահովման ազգային կենտրոնը (ՈԱԱԿ) դարձել է Բարձրագույն կրթության որակի ապահովման եվրոպական ցանցի (ENQA) լիիրավ անդամ: Այս մասին այսօր «Հենարան» մամուլի ակումբում լրագրողների հետ հանդիպման ժամանակ հայտարարեցին ՈԱԱԿ հոգաբարձուների խորհրդի նախագահ Վարուժան Ավետիքյանը և տնօրեն Ռուբեն Թոփչյանը:

«Այս անդամակցությունը նշանակում է, որ ՈԱԱԿ-ի կողմից իրականացվող հավատարմագրումները համապատասխանում են  եվրոպական չափանիշներին,  նույնական են եվրոպական գործընթացների հետ և  ճանաչելի են  Բարձրագույն կրթության որակի ապահովման եվրոպական ցանցի կողմից»,- ասաց ՈԱԱԿ հոգաբարձուների խորհրդի նախագահ Վարուժան Ավետիքյանը:

ՈԱԱԿ-ի տնօրեն Ռուբեն Թոփչյանը նշեց, որ կառույցը դեռ 2009-ից ENQA-ի նախնական անդամ էր. «Իրենք հետևում էին մեր գործունեությանը, սակայն  մեր արդյունքները Ցանցում չէին երևում որպես ճանաչված»: Թոփչյանը նշեց, որ անցած տարիների ընթացքում ՈԱԱԿ-ը մեծածավալ աշխատանք է իրականացրել՝ Բարձրագույն կրթության որակի ապահովման եվրոպական ցանցին ցույց տալու, որ աշխատում է նույն չափանիշներով ու սկզբունքներով, ինչ եվրոպական գործակալությունները:

Անդրադառնալով հարցին, թե ENQA անդամակցությունն ինչպես իրենց վրա կզգան արտերկրում սովորելու ցանկություն ունեցող ուսանողները, Թոփչյանն ասաց. «Երբ որևէ բուհ փորձում է պայմանագիր կնքել  եվրոպական բուհի հետ  ուսանողների փոխանակման համար, Եվրոպայում նախ և առաջ դիտարկում են՝ հավատարմագրվա՞ծ է արդյոք այդ բուհը և ո՞ւմ կողմից է հավատարմագրված: Այժմ ՈԱԱԿ-ի կողմից հավատարմագրված լինելը համարժեք է եվրոպական հավատարմագրմանը: Այս պարագայում պայմանագրի կնքման և արդյունքների ճանաչման հնարավորությունները մեծանում են»:

«ՈԱԱԿ-ի կողմից հավատարմագրված բուհը  նաև մեր միջոցով դառնում է եվրոպական բուհական ընտանիքի անդամ, ինչն էականորեն բարձրացնում է նրանց վարկանիշը որպես կրթություն մատուցող կառույց»,- ասաց Ավետիքյանը:

Պարոն Ավետիքյանը և պարոն Թոփչյանը կարևորեցին Հայաստանում ինստիտուցիոնալ հավատարմագրումների առաջին շրջափուլի հաջողությամբ իրականացումը. ներկա դրությամբ երկրում գործող բոլոր պետական բուհերը կամ արդեն հավատարմագրվել են, կամ հավատարմագրման գործընթացում են: Մասնավոր բուհերից դեռևս հավատարմագրվել են երեքը:

Նրանք կարևորեցին, որ հավատարմագրման արդյունքում ուսանողը գիտի՝ իր բուհը ոչ միայն համապատասխանում է որակի որոշակի չափանիշների, այլ նաև կամավոր պարտավորություն է ստանձնել շարունակաբար բարելավել իր կողմից մատուցվող կրթական ծառայությունների որակը:

Խոսելով հավատարմագրումների և ՈԱԱԿ գործողությունների՝ բուհական համակարգի վրա ազդեցության մասին՝ պարոն Թոփչյանը նշեց, որ ներկայում բոլոր հավատարմագրված բուհերում բարեփոխումներ են իրականացվում. վերանայվում են կրթական  ծրագրերի վերջնարդյուքնները, փորձում են փոխել դասավանդման մեթոդները:

Նա նշեց, որ բուհերը  մեծ ուշադրություն են դարձնում  միջազգայնացմանը և կրեդիտների ճանաչմանը երկրի ներսում և արտերկրում: «Հաճախ մեր կարգերը, օրենքները խանգարում են ուսանողների շարժունությանը երկրի ներսում: Հավատարմագրման միջոցով բուհերը կարող են ճանաչել ու վստահել միմյանց»,- ասաց Ռ. Թոփչյանը:

«Նպատակն է հասնել  նրան, որ բուհերը միմյանց հետ համագործակցելով կարողանան ապահովել ուսանողների շարժունությունը: Այսինքն՝  ուսանողն  ուսումնառության տարիների ընթացքում կարողանա իր նախընտրած առարկաներն ուսումնասիրի ցանկացած  այլ բուհում, որը գուցե այդ ուղղությամբ է մասնագիտացած, կամ որտեղ ավելի հեղինակավոր դասախոս է դասավանդում տվյալ առարկան, և ստացած կրեդիտներն իր բուհ բերի: Հավատարմագրումը նպաստելու է, որ հասնենք այս նպատակի իրագործմանը»,– ասաց Վ. Ավետիքյանը:

Ավետիքյանը շեշտեց, որ ՈԱԱԿ նպատակն է օգնել բուհերին մշտապես բարելավվել. «Հավատարմագրումը կամ որակի ապահովումը մեկանգամյա գործընթաց չէ, սա մշտական պրոցես է: Աշխարհի լավագույն բուհերում էլ մշտապես ընթանում է բարելավման գործընթաց»:

Լրագրողները հետաքրքրվեցին նաև, թե հավատարմագրումն ինչպես է նպաստելու  շուկայի պահանջներին համապատասխան մասնագետներ պատրաստելուն: Պարոն Թոփչյանը նշեց, որ ինստիտուցիոնալ հավատարմագրման ժամանակ դիտարկվում է բուհի համագործակցությունը գործատուների հետ: Ուսումնասիրությունների արդյուքնում նաև դուրս են բերվել ոլորտի առաջնահերթ խնդիրները, որոնց մեծ ուշադրություն կհատկացվի արդեն ծրագրային հավատարմագրման ժամանակ:

«Ուսանողներն, օրինակ, կարևորում են, որ դասախոսների մի մասը երիտասարդներ լինեն՝ համարելով, որ նրանք առավել պրակտիկ գիտելիքներ են տալիս: Այսօր շրջանավարտը  հաճախ դժվարանում է բուհում ստացած տեսական գիտելիքն աշխատավայրում կիրառել: Դրա համար այդ գիտելիքը դեռ բուհում պետք է պրակտիկի վերածվի»,- ասաց պարոն Թոփչյանը: Նա նաև նշեց, որ ներկայում գործող կարգերը խոչընդոտ են այս առումով: 

«Պահանջվում է, որ բուհի  դասախոսների 50 տոկոսը լինի մշտական աշխատող: Բայց եթե նայենք  գործատուների կողմից ճանաչված և հաջողության հասած բուհերին, այնտեղ այդ չափանիշը պահպանված չէ: Այսինքն գործատուն է, որ պետք է գա ու պրակտիկ կրթություն մատուցի՝ չլինելով բուհի մշտական աշխատակից:  Հետևաբար նորմատիվները պետք է փոխվեն»,– ասաց պարոն Թոփչյանը:

«Մեր աշխատանքը նաև միտված է դրան, որպեսզի խրախուսենք գործատու-բուհ կապը: Դրանով է պայմանավորված լինելու, թե մեր ուսանողն ավարտելիս որքանով պատրաստ կլինի աշխատաշուկայում աշխատելուն:  Դրանով է նաև պայմանավորված, որ մեր հոգաբարձուների խորհրդում կան գործատուների տարբեր միությունների անդամներ, որոնք իրենց մտահոգություններն են բարձրաձայնում  և փորձում ենք դրանց անդրադառնալ»,- ասաց պարոն Ավետիքյանը:

Աղբյուրը՝ http://www.anqa.am

2017թ. ապրիլի 12-ին ԵՊՀ ԻՄ-ի ուսանողական խորհրդի նախաձեռնությամբ մասնաճյուղում կայացավ «Ինչպե՞ս գրել ռեզյումե և ներկայանալ հարցազրույցի» թեմայով սեմինար, որը վարում էր ՈՒԽ-ի անդամ, «ԱԼԳ» մասնագիտության երկրորդ կուրսի ուսանողուհի Արինա Պարոնյանը:

Սեմինարն իր բնույթով ինտերակտիվ էր, մասնակցում էին տարբեր կուրսերի ու մասնագիտությունների ուսանողներ:

Նախ նշվեց սեմինարի նպատակը, խնդիրները, ընդգծվեց թեմայի կարևորությունը: Շեշտվեց, որ մեր ժամանականերում յուրաքանչյուր մարդ պետք է ունենա համապատասխան հմտություններ իր անձն ու մասնագիտական ունակությունները առավելագույնս ներկայացնելու համար:  

Ապա ներկայացվեցին ռեզյումե կազմելու նրբությունները, թե ինչպիսի կառուցվածք ու բովանդակություն պիտի ունենա այն, ինչին ուշադրություն դարձնել և այլն:

Այնուհետև տարբերակվեցին ոչ ճիշտ կազմված ռեզյումեների տեսակները և այդ ընթացքում հաճախակի թույլ տրվող սխալները.

• Թափթփված ու խառը ռեզյումե,
• Ռեզյումե, որի անունն է «Ռեզյումե»,
• Անհաջող լուսանկար,
• Միակ ռեզյումեն տարբեր բնագավառների գործատուներին ներկայացնելու համար,
• Սիրելի սպորտաձև, զբաղմունք, անձնական կարգավիճակ, երեխաների քանակ և այլն,
• Հմտություններ, որոնք ունեն բոլորը,
• Աշխատատեղերը փոխելու խոշոր դադարների մասին,
• Սոցիալական ցանցերի հաշիվների աններդաշնակությունը ռեզյումեի հետ,
• Չափազանց կարճ կամ չափազանց երկար ռեզյումե,
• 15 տարվա հնեցման աշխատանքային փորձ:

Տեսական գիտելիքներին զուգահեռ՝ բերվեցին օրինակելի ռեզյումեների օրինակներ:

Սեմինարի երկրորդ մասը վերաբերում էր աշխատանքային հարցազրույցին ճիշտ ներկայանալու նորմերին:

Նշվեց, թե ինչպես պետք է պատրաստվել հարցազրույցին, ինչին պետք է ուշադրություն դարձնել, ինչ քայլեր կան, որ հնարավոր է հիասթափեցնեն գործատուին և  այլն:

Ստացած գիտելիքներն ամրապնդելու նպատակով ուսանողները  դերերով խաղ խաղացին՝ փորձելով կերպարանավորել լավ ու վատ գործատուներին և գործատուներին  ճիշտ ու սխալ ներկայացողներին:

Վերջում սեմինարի մասնակիցներն իրենց գոհունակությունն արտահայտեցին Ուսանողական խորհրդին՝ հետաքրքիր և ուսանելի նախաձեռնության համար: