2023թ. հուլիսի 1-2-ն ընկած ժամանակահատվածում ԵՊՀ Իջևանի մասնաճյուղում տեղի ունեցան «Գծանկար» և «Կոմպոզիցիա» առարկաների ներբուհական քննությունները՝ «Դեկորատիվ-կիրառական արվեստ» և «Դիզայն» կրթական ծրագրերով ընդունելության համար:

Ըստ կրթական ծրագրերի՝ ընդունելության ներբուհական քննությունների անցկացման համար ձևավորվել էր 3 քննական կենտրոն՝ հագեցած տեսաձայնագրման սարքերով։

Յուրաքանչյուր կրթական ծրագրի ներբուհական քննություններն անցկացվեցին մեկական օրով՝ 4-ական ժամ տևողությամբ: Քննասենյակում դիմորդներն իրենց տեղերն ընտրեցին վիճակահանությամբ: «Գծանկար» առարկայի քննության ժամանակ հանձնարարվող առաջադրանքը նատյուրմորտ էր` հարթ ֆոնի վրա 3 գիպսե առարկաներից, գրաֆիտե մատիտով պարզ լուսավորությամբ` A2 ֆորմատի թղթի վրա, իսկ «Կոմպոզիցիա» առարկայի համար՝ պարզ երկրաչափական, բուսական կամ կենդանական մարմիններից կառուցված զարդանախշային հորինվածք՝ դեկորատիվ մեկնաբանությամբ՝ A3 ֆորմատի թղթի վրա։

«Դեկորատիվ-կիրառական արվեստ» կրթական ծրագրով մասնաճյուղ էր դիմել 14, իսկ «Դիզայն» կրթական ծրագրով՝ 16 դիմորդ: Հանձնաժողովի անդամները «Գծանկար» քննության գնահատման ընթացքում հաշվի էին առնում հորինվածքի գրագետ տեղադրումը թղթի մեջ, կառուցողական մոտեցումը, ծավալների տարածածավալային պատկերումը, տոնային ընկալումն ու նյութականության ստացումը, հորինվածքի եզրափակիչ մշակումը։

«Դեկորատիվ-կիրառական արվեստ» կրթական ծրագրի «Կոմպոզիցիա» առարկայի քննության ժամանակ գնահատվում էին զարդանախշերի ընտրությունը և գրագետ համադրելիությունը, կոմպոզիցիա ստեղծելու ստեղծագործական մտքի կիրառումը, զարդանախշերով միջնադաշտի և եզրային գոտիների ստեղծումը, դետալների՝ միմյանց  նկատմամբ կոմպոզիցիոն աշխատանքի ամբողջացումը, կոմպոզիցիայում զարդանախշերի չափերի ներդաշնակ համադրության առկայությունը, զարդանախշերի գունային սահուն, հակադիր, կտրուկ անցումների, տոնայնության արտացոլումը, զարդանախշերի հստակ սահմանազատման առկայությունը գունային տոների միջոցով, տաք և սառը գույների համադրության և ստեղծագործական մտքի առկայությունը։

«Դիզայն» կրթական ծրագրի «Կոմպոզիցիա» առարկայի քննության դեպքում գնահատվում էին երկրաչափական ծավալային մարմինների գրագետ համադրելիությունը, կոմպոզիցիա ստեղծելու ստեղծագործական մտահղացումը, երկրաչափական մարմիններով կոմպոզիցիոն հորինվածքի դինամիկ ամբողջացումը (սկիզբ, հասունացում, ավարտ), կոմպոզիցիոն հորիվածքում մարմինների չափերի ներդաշնակ համադրության առկայությունը, գունային սահուն, հակադիր, կտրուկ անցումների տոնայնության արտացոլումը, երկրաչափական ծավալային մարմինների հստակ սահմանազատման առկայությունը գույների տոների միջոցով:

Սիրով շնորհավորում ենք «Դեկորատիվ-կիրառական արվեստ» և «Դիզայն» կրթական ծրագրերով մասնաճյուղ ընդունված դիմորդներին՝ մաղթելով նրանց հաջողություններ և ձեռքբերումներ նոր ուսումնական տարում։ 

«Գծանկար» և «Կոմպոզիցիա» առարկաների ներբուհական քննությունների արդյունքներին կարող եք ծանոթանալ այստեղ։

2023թ. հունիսի 28-ին Կրթական բարեփոխումների և դասախոսների վերապատրաստման բաժինը բուհի պրոֆեսորադասախոսական և ուսումնաօժանդակ անձնակազմի համար իրականացրեց «ԵՊՀ ԻՄ-ի ուսումնական գործընթացի կազմակերպման կարգի կիրառման առանձնահատկությունները» թեմայով վերապատրաստում, որը վարեց ԿԲԴՎ բաժնի վարիչ, պ.գ.թ., դոցենտ Ն.Գրիգորյանը:

Դասընթացին մասնակցեց ավելի քան 30 աշխատակից:

Ն.Գրիգորյանը ներկայացրեց ԵՊՀ ԻՄ-ի ուսումնական գործընթացի կազմակերպման կարգը (30.04.2022, ԳԽ թիվ 59 նիստ), որն ուժի մեջ է մտել 2022թ. սեպտմբերի 1-ից և տարածվում է 2022-2023 ուստարում և դրանից հետո ԵՊՀ ԻՄ ընդունված բակալավրիատի և մագիստրատուրայի ուսանողների վրա:

Շեշտվեց, որ կարգի փոփոխման նպատակներն են ուսանողների գնահատման բազմագործոն համակարգ ներդնելը, դասախոսի ազատության աստիճանը մեծացնելը, դրական արդյունարար գնահատական միայն մեկ բաղադրիչով չձևավորելը:

Այս գործող կարգի համաձայն՝ գնահատման դրական նվազագույն շեմը սահմանվում է 10 միավորը: Գնահատման արդյունարար միավորը բաշխվում է հետևյալ կերպ.

• 0-9 միավոր՝ անբավարար,
• 10-13 միավոր՝ բավարար,
• 14-17 միավոր՝ լավ,
• 18-20 միավոր՝ գերազանց:

Այնուհետև Ն.Գրիգորյանը ներկայացրեց գնահատման բաղադրիչներն ու դրանց հատկացվող միավորները ըստ գնահատման ձևերի՝ եզրափակիչ գնահատումով, առանց եզրափակիչ գնահատման և առանց ընթացիկ քննությունների գնահատման դասընթացների համար:

Նշվեց, որ եզրափակիչ գնահատումով դասընթացի գնահատման պարտադիր բաղադրիչներն են 2 ընթացիկ և եզրափակիչ քննությունները, իսկ մյուս բաղադրիչներից (ընթացիկ ստուգումներ, ինքնուրույն աշխատանք, մասնակցություն) առնվազն մեկն ընտրում է դասավանդող դասախոսը:

Առանց եզրափակիչ գնահատման դասընթացի գնահատման պարտադիր բաղադրիչներն են 2 ընթացիկ քննությունները, իսկ մյուս բաղադրիչներից (ընթացիկ ստուգումներ, ինքնուրույն աշխատանք, մասնակցություն) առնվազն երկուսն ընտրում է դասավանդող դասախոսը:

Առանց ընթացիկ քննությունների գնահատման դասընթացի գնահատման պարտադիր բաղադրիչ է եզրափակիչ քննությունը, իսկ մյուս բաղադրիչներից (ընթացիկ ստուգումներ, ինքնուրույն աշխատանք, մասնակցություն) առնվազն երկուսն ընտրում է դասավանդող դասախոսը:

ԿԲԴՎ բաժնի վարիչը նաև հավելեց, որ ըստ կարգի 61-րդ կետի՝ կիսամյակի առաջին երկու շաբաթվա ընթացքում դասախոսն ուսանողներին պետք է տեղեկացնի ուսուցման ձևերի, հարցաշարերի և ժամկետների, ինչպես նաև գնահատման մեթոդների ու չափանիշների մասին:

Ապա դասընթացավարն անդրադարձավ գնահատման գործընթացի կազմակերպմանը, քննության վերահանձնման և դասընթացի կրկնման ընթացակարգերին:

 2023թ. հունիսի 10-27-ն ընկած ժամանակահատվածում ԵՊՀ Իջևանի մասնաճյուղում անցկացվեց 2022-2023 ուսումնական տարվա հեռակա ուսուցման շրջանավարտների ամփոփիչ ատեստավորումը՝ 7 կրթական ծրագրով ավարտական աշխատանքների պաշտպանությունները:

Հունիսի 10-ին կայացավ «Տարրական մանկավարժություն և մեթոդիկա» կրթական ծրագրով շրջանավարտների ավարտական աշխատանքների պաշտպանությունը: Ամփոփիչ ատեստավորման հանձնաժողովը նախագահում էր Խ.Աբովյանի անվան հայկական պետական մանկավարժական համալսարանի մանկավարժության ամբիոնի վարիչ, մ.գ.թ., պրոֆեսորի պաշտոնակատար Արուսյակ Վաչագանի Հովհաննիսյանը:

Ամփոփիչ ատեստավորմանը մասնակցում էր 15 շրջանավարտ. 3-ը ստացավ «գերազանց», 11-ը՝ «լավ», 1-ը՝ «բավարար»:

Ըստ հանձնաժողովի նախագահի՝ ամփոփիչ ատեստավորման քննությունն անցել է բավականին հաջող: Գնահատելի է, որ ուսանողներն անդրադարձել են կրթության ժամանակակից խնդիրներին: Բոլոր ուսանողներն էլ լավ էին տիրապետում իրենց ավարտական աշխատանքներին՝ հստակ ներկայացնելով իրենց կողմից իրականացված ինչպես տեսական-վերլուծական, այնպես էլ հետազոտական աշխատանքները: Մասնագետների պատրաստման որակի հետագա բարելավման ուղղությամբ առաջարկվել է հստակեցնել աշխատանքների նպատակն ու խնդիրները, թեմաների վերնագրերը, ուշադրություն դարձնել հետազոտության մեթոդների ընտրությանը:

Հունիսի 17-ին կայացան «Հոգեբանություն», «Ֆինանսներ (ըստ ոլորտի)» և «Զբոսաշրջություն» կրթական ծրագրերով շրջանավարտների ավարտական աշխատանքների պաշտպանությունները:

«Հոգեբանություն» կրթական ծրագրի ամփոփիչ ատեստավորման հանձնաժողովը նախագահում էր ՀՀ պետական կառավարման ակադեմիայի հոգեբանության և քաղաքագիտության ամբիոնի վարիչ, հ.գ.թ., դոցենտ Լաուրա Համբարձումի Պետրոսյանը:

Ամփոփիչ ատեստավորմանը մասնակցում էր 6 շրջանավարտ. 1-ը ստացավ «գերազանց», 3-ը՝ «լավ», 2-ը՝ «բավարար»:

Հանձնաժողովի նախագահը մասնագետների պատրաստման որակի հետագա բարելավման ուղղությամբ առաջարկել է կատարելագործել հետազոտական աշխատանքների թեմաների ընտրությունը, ուսանողների հետազոտական կարողությունները, հոգեբանական կիրառական հմտությունները:

«Ֆինանսներ (ըստ ոլորտի)» կրթական ծրագրի ամփոփիչ ատեստավորման հանձնաժողովը նախագահում էր Հայաստանի պետական տնտեսագիտական համալսարանի ֆինանսական հաշվառման ամբիոնի վարիչ, տ.գ.դ., պրոֆեսոր Հայկ Գերասիմի Մնացականյանը:

Ամփոփիչ ատեստավորմանը մասնակցում էր 19 շրջանավարտ. 1-ը ստացավ «գերազանց», 2-ը՝ «լավ», 16-ը՝ «բավարար»:

Հետագա բարելավման ուղղությամբ հանձնաժողովի նախագահն առաջարկել է, որ աշխատանքների թեմաների ընտրության ժամանակ հաշվի առնվի տվյալների հասանելիության հանգամանքը, իսկ աշխատանքը ներկայացնելիս առավել ընդգծվի ուսանողի կատարած ինքնուրույն վերլուծությունը: Նախագահի կողմից նաև կարևորվել է, որ կատարված եզրակացությունները և առաջարկությունները լինեն հստակ ու հասցեական:

«Զբոսաշրջություն» կրթական ծրագրի ամփոփիչ ատեստավորման հանձնաժողովը նախագահում էր ՀՀ էկոնոմիկայի նախարարության զբոսաշրջության կոմիտեի մարքեթինգի և խթանման վարչության խորհրդական, տ.գ.թ., դոցենտ Անահիտ Զարզանդի Ոսկանյանը:

Ամփոփիչ ատեստավորմանը մասնակցում էր 10 շրջանավարտ. 2-ը ստացավ «գերազանց», 4-ը՝ «լավ», 4-ը՝ «բավարար»:

Հանձնաժողովի նախագահի կարծիքով՝ ավարտական աշխատանքներում տեսական հատվածը գերակշռում էր վերլուծական, հետազոտական պրակտիկ ուսումնասիրություններին: Առաջարկվել է տեղային-գործնական ծավալուն հատված ներառել ավարտական աշխատանքներում, գրախոսություններում տալ հստակ դիտարկումներ աշխատանքի թերությունների մասին, օգտագործել ժամանակակից գրականություն ուսումնասիրությունների համար:

Հունիսի 23-ին, 24-ին և 27-ին կայացան համապատասխանաբար «Պատմություն», «Բնապահպանություն և բնօգտագործում», «Ինֆորմատիկա և կիրառական մաթեմատիկա» կրթական ծրագրերով շրջանավարտների ավարտական աշխատանքների պաշտպանությունները:

«Պատմություն» մասնագիտության ամփոփիչ ատեստավորման հանձնաժողովը նախագահում էր Խ.Աբովյանի անվան հայկական պետական մանկավարժական համալսարանի հայոց պատմության ամբիոնի պրոֆեսոր, պ․գ․թ․ Ավետիս Հմայակի Հարությունյանը:

Ամփոփիչ ատեստավորմանը մասնակցում էր 7 շրջանավարտ. 2-ը ստացավ «լավ», 5-ը՝ «բավարար»:

Ըստ հանձնաժողովի նախագահի՝ ցանկալի կլիներ, որ ավարտական աշխատանքների թեմաների ընտրության ժամանակ հաշվի առնվեին պատմական ժամանակահատվածների համամասնական բաժանումները: Արդյունավետության տեսանկյունից նախընտրելի է թեմաներ ընտրել ոչ միայն միջնադարից, այլև հնագույն, հին, նոր, նորագույն ժամանակներից:

«Բնապահպանություն և բնօգտագործում» կրթական ծրագրի ամփոփիչ ատեստավորման հանձնաժողովը նախագահում էր Երևանի քաղաքապետարանի «Կանաչապատում և շրջակա միջավայրի պահպանություն» համայնքային ոչ առևտրային կազմակերպության գլխավոր դենդրոլոգ, կ.գ.թ., դոցենտ Արծվի Արտաշեսի Գրիգորյանը:

Ամփոփիչ ատեստավորմանը մասնակցում էր 20 շրջանավարտ. 2-ը ստացավ «գերազանց», 5-ը՝ «լավ», 13-ը՝ «բավարար»:

Հետագա բարելավման ուղղությամբ հանձնաժողովի նախագահն առաջարկել է, որ ավարտական աշխատանքների թեմաները լինեն ոչ թե ընդհանրական, այլ առնչվեն կոնկրետ տարածաշրջանին կամ ոլորտին, լինեն ավելի առարկայական, ուսանողների համար համեմատաբար դյուրին և երկրի համար արդյունավետ:

«Ինֆորմատիկա և կիրառական մաթեմատիկա» կրթական ծրագրի ամփոփիչ ատեստավորման հանձնաժողովը նախագահում էր «Հայաստանի ազգային պոլիտեխնիկական համալսարան» հիմնադրամի ալգորիթմական լեզուների և ծրագրավորման ամբիոնի վարիչ, ֆ.մ.գ.թ., դոցենտ Արևշատ Գուրգենի Պողոսյանը:

Ամփոփիչ ատեստավորմանը մասնակցում էր 18 շրջանավարտ. 13-ը ստացավ «լավ», 5-ը՝ «բավարար»: Հետագա բարելավման ուղղությամբ հանձնաժողովի նախագահն անհրաժեշտ է համարել մասնագիտական կիրառական թեմաների ապահովումը:

ԵՊՀ ԻՄ-ի ղեկավարության և ողջ անձնակազմի անունից բակալավրի որակավորում ստանալու առթիվ սիրով շնորհավորում ենք ամփոփիչ ատեստավորում անցած մեր շրջանավարտներին՝ նրանց մաղթելով անձնական և մասնագիտական մեծ հաջողություններ ու ձեռքբերումներ:

 2023թ. հունիսի 20-ին ԵՊՀ Իջևանի մասնաճյուղում տեղի ունեցավ Ուսանողական խորհրդի նախագահի ընտրություն:

Ուսանողական խորհրդի նախագահի թեկնածու էր առաջադրվել «Պատմություն» մասնագիտության 1-ին կուրսի ուսանող Էռնեստ Խանումյանը: Ընտրական հանձնաժողովի նախագահը մասնաճյուղի տնօրենի պաշտոնատար Ա.Մակարյանն էր, քարտուղարը` Ա.Մարգարյանը:

Ներկայացնելով իր նախընտրական ծրագիրը՝ Էռնեստ Խանումյանն ընդգծեց, որ Ուսանողական խորհուրդը ոչ միայն կրթագիտական, մշակութային հարթակ է, այլև երիտասարդական լավագույն կենտրոն, որտեղ ինքնակրթվում և ինքնակատարելագործվում են, ինքնազարգանում և ինքնադրսևորվում են:

Նախընտրական ծրագրի ներկայացումից հետո ելույթ ունեցավ ԵՊՀ Իջևանի մասնաճյուղի տնօրենի պաշտոնակատար Անուշավան Մակարյանը: Պարոն Մակարյանը նախ շնորհակալություն հայտնեց Ուսանողական խորհրդի նախկին նախագահ Գառնիկ Խաչատրյանին և նախագահության նախկին կազմին` իրենց կատարած աշխատանքի համար: Նա շեշտեց ուսանողների և մարզի երիտասարդության համար Ուսանողական խորհրդի կազմակերպած հետաքրքիր միջոցառումների կարևորությունը, ինչպես նաև համալսարանական կյանքում ունեցած դերակատարումը՝ մասնավորապես նշելով, որ Ուսանողական խորհուրդը համալսարանի կարևոր ինստիտուտներից մեկն է և լուրջ դեր ունի ուսանողների իրավունքների պաշտպանության գործում:

11 կողմ և 1 դեմ ձայներով Էռնեստ Խանումյանը ընտրվեց ԵՊՀ Իջևանի մասնաճյուղի ուսանողական խորհրդի նոր նախագահ:

Վերջում Ա.Մակարյանը նորընտիր նախագահին և ուսխորհրդականներին մաղթեց բեղուն և արդյունավետ գործունեություն:

______________________________________________________

Էռնեստ Խանումյանը ծնվել է 2004 թվականի դեկտեմբերի 10-ին Տավուշի մարզի Խաշթառակ գյուղում: Այժմ սովորում է ԵՊՀ Իջևանի մասնաճյուղի հումանիտար գիտությունների ֆակուլտետի «Պատմություն» մասնագի-տության 1-ին կուրսում:

Էռնեստն ակտիվ ներգրավված է երիտասարդական ու քաղ-հասարակական աշխատանք-ներում: Նա «ԻջևանԻնֆոՏուն» ՀԿ-ում  իրականացրել է հա-մայնքային կայքերի մշտադի-տարկում, ղեկավարել է երիտասարդական ու համայնքային զարգացման ծրագրեր, թղթակցել է Հայաստանի հանրային ռադիոյի «Իմ ռադիո» երիտասարդական ցանցին: Ավելի քան 2 տարի է, ինչ Էռնեստն աշխատում է «Տավուշ» հեռուստաընկերությունում՝ որպես հեռուստահաղորդավար-լրագրող: