ԵՊՀ Իջևանի մասնաճյուղում նոր ուսումնական տարվա մեկնարկին ընդառաջ կայացավ տնօրենության նիստ՝ Ա. Մակարյանի նախագահությամբ:

Տնօրենության անդամների կողմից առաջարկված փոփոխություններով հանդերձ՝ նիստում հաստատվեցին ԵՊՀ ԻՄ տնօրենության տարեկան աշխատանքային պլանը, ԵՊՀ Իջևանի մասնաճյուղի ֆակուլտետի գրասենյակի վարչարարության մասնագետի պաշտոնի անձնագիրը:

Քննարկվեցին նոր՝ 2024-2025 ուստարվա նախապատրաստական աշխատանքներին, 2024-25 ուստարվա առկա ուսուցման ընդունելության արդյունքներին և խնդիրներին, 2023-24 ուստարվա 2-րդ կիսամյակի բակալավրի առկա և բակալավրի ու մագիստրատուրայի հեռակա ուսուցման 2-րդ կիսամյակի քննաշրջանի ամփոփմանը, 2024-25 ուստարվա 1-ին կիսամյակի անվանական կրթաթոշակների տրամադրմանը (Վազգեն Սարգսյան, Մոնթե Մելքոնյան) վերաբերող հարցեր:

Նոր՝ 2024-2025 ուստարվա նախապատրաստական աշխատանքների առնչությամբ ներկայացվեց, որ կատարվել են անհրաժեշտ աշխատանքներ՝ պրոֆեսորադասախոսական կազմի անհատական բեռնվածության, դասացուցակների, դասամատյանների, ըստ կուրսերի և խմբերի՝ լսարանային ֆոնդի բաշխման և այլնի հետ կապված: Հաստատված դասացուցակները տեղադրվել են ԵՊՀ ԻՄ պաշտոնական կայքէջում: Տնօրենը հանձնարարեց նաև հետևել, որ դրանք ուղարկված լինեն դասախոսների էլեկտրոնային հասցեներին: Ըստ այդմ՝ նշվեց, որ մասնաճյուղը պատրաստ է նոր ուսումնական տարվան:

2024-25 ուստարվա  առկա ուսուցման ընդունելության արդյունքների և խնդիրների հարցի մասին նշվեց, որ տվյալ ուստարում մասնաճյուղ է դիմել 216 դիմորդ, որոնցից ընդունվել է 182-ը (1-ին փուլի մրցույթի արդյունքների համաձայն՝ 176, թափուր մրցույթի արդյունքների համաձայն՝ 6 դիմորդ): Նախորդ տարվա համեմատ մոտ 14%-ով ավելացել է մասնաճյուղ ընդունված դիմորդների թիվը (160 / 182 դիմորդ): Բոլոր անվճար տեղերը համալրվել են: Ընդհանուր առմամբ նկատելի է դրական դինամիկա: Ընդունելության ամենաբարձր ցուցանիշներըը գրանցվել են «Ֆինանսներ (ըստ ոլորտի)» (35 դիմորդ), «Անգլերեն լեզու և գրականություն» (27), «Պատմություն» (20) կրթական ծրագրերում: Ցուցանիշները մտահոգիչ են «Հոգեբանություն» (7 դիմորդ), «Տարրական մանկավարժություն և մեթոդիկա» (6 դիմորդ), «Հայոց լեզու և գրականություն» (5 դիմորդ) կրթական ծրագրերում:

2023-24 ուստարվա 2-րդ կիսամյակի բակալավրի առկա և բակալավրի ու մագիստրատուրայի հեռակա ուսուցման 2-րդ կիսամյակի քննաշրջանն ամփոփելիս նշվեց, որ 2023-2024 ուստարվա 2-րդ կիսամյակի քննաշրջանին մասնակցել են առկա ուսուցման 481 և հեռակա ուսուցման 365 ուսանողներ: Քննաշրջանի արդյունքների համաձայն՝ մասնաճյուղից հեռացվում է 14 ուսանող (առկա ուսուցման համակարգի 1 և հեռակա ուսուցման 13): Մինչև 12 կրեդիտ ակադեմիական պարտքեր է կուտակել 42 ուսանող (1-ը՝ առկա, 41-ը՝ հեռակա ուսուցմամբ սովորող): Դասընթացի կրկնություն է անցնելու 18 ուսանող (առկա ուսուցման 6 և հեռակա ուսուցման 12):  

2024-25 ուստարվա 1-ին կիսամյակի անվանական կրթաթոշակների տրամադրման (Վազգեն Սարգսյան, Մոնթե Մելքոնյան) հարցի կապակցությամբ ֆակուլտետների կողմից առաջարկված թեկնածություններից «Վազգեն Սարգսյան» անվանական կրթաթոշակի համար հավանության արժանացավ Հումանիտար գիտությունների ֆակուլտետի «Ռուսաց լեզու և գրականություն» կրթական ծրագրի 4-րդ կուրսի ուսանողուհի Մարիամ Հարությունի Դարբինյանի թեկնածությունը, իսկ «Մոնթե Մելքոնյան» անվանական կրթաթոշակի համար՝ Տնտեսագիտության ֆակուլտետի «Ֆինանսներ (ըստ ոլորտի)» կրթական ծրագրի 3-րդ կուրսի ուսանողուհի Շուշանիկ Մեսրոպի Շահնազարյանի թեկնածությունը:

Ընթացիկ հարցերից էր 2024 թ. մայիսի 4-ին ԵՊՀ ԻՄ գիտխորհրդի որոշմամբ հաստատված ԵՊՀ ԻՄ ներքին կարգապահական կանոններում (նոր խմբագրությամբ) աշխատողների աշխատաժամանակին առնչվող հարցը: Շեշտվեց, որ ԵՊՀ Իջևանի մասնաճյուղի պրոֆեսորադասախոսական կազմի և գիտական աշխատողների աշխատաժամանակը սահմանվում է 9.15-19.00-ն ընկած ժամանակահատվածում՝ պահպանելով օրվա ծանրաբեռնվածությունը: Մասնաճյուղի մյուս աշխատողների աշխատանքային օրվա սկիզբը երեքշաբթիից ուրբաթ օրերին սահմանվում է 9.00-ին, ավարտը՝ 16.45-ին, իսկ շաբաթ օրվա սկիզբը սահմանվում է 9.00-ին, ավարտը՝ 16.30-ին: Ընդմիջման ժամ է սահմանվում 13.00-13.30-ն ընկած ժամանակահատվածը:

Նիստի վերջում ԵՊՀ ԻՄ տնօրենի պաշտոնակատար Ա. Մակարյանը համալսարանականներին շնորհավորեց նոր ուստարվա մեկնարկի կապակցությամբ՝ մաղթելով հաջող և արդյունավետ ուսումնական տարի:

2024 թ. մայիսի 23-ին ԵՊՀ Իջևանի մասնաճյուղում տեղի ունեցավ տնօրենության նիստ՝ Ա. Մակարյանի նախագահությամբ:

Նիստում քննարկվեցին դասապրոցեսին ուսանողների մասնակցությանը, Տավուշի մարզում «ԵՊՀ օլիմպիադա 2024»-ի անցկացմանը, վճարովի համակարգում սովորող ուսանողների վարձավճարների զեղչերի արդյունքներին, դասախոսների և ուսանողների կրթական և այլ կարիքների վերհանմանը, մատուցվող ծառայություններից նրանց բավարարվածության գնահատմանը, 2023-24 ուստարվա 2-րդ կիսամյակի 2-րդ ընթացիկ քննությունների, ստուգումների, ստուգարքների և քննաշրջանի կազմակերպմանը, մինչև 12 կրեդիտ կուտակած ակադեմիական պարտքերի վերահանձնման գործընթացին, մասնաճյուղ ճանաչողական այցերի կազմակերպմանը, ԵՊՀ ԻՄ-ից ուսանողների հեռացմանը վերաբերող հարցեր:

Առաջին հարցի՝ դասապրոցեսին ուսանողների մասնակցության վերաբերյալ զեկուցեց ԵՊՀ Իջևանի մասնաճյուղի փոխտնօրեն Մ. Օթարյանը: Ներկայացվեց 2023-2024 ուստարվա 2-րդ կիսամյակի դասապրոցեսին ուսանողների մասնակցության պատկերը՝ ըստ կուրսերի: Առանձնակի ուշադրություն դարձվեց այն կուրսերին, որոնցում կային բացակայությունների թույլատրելի սահմանը հատած (կամ դրա շեմին հայտնված), նկատողություն ստացած ուսանողներ, որոնց մեջ գերակշռող էին առաջին կուրսեցիները:

Դասապրոցեսին ուսանողների մասնակցության վիճակն առավել վերահսկելի դարձնելու և թույլատրելի սահմանի խախտումները կրճատելու նպատակով առաջարկվեց և տնօրենի կողմից դեկաններին հանձնարարվեց ուսանողների բացակայությունների վերաբերյալ հաշվետվություններ ներկայացնել ոչ թե ամսվա, այլ շաբաթվա կտրվածքով:

ԵՊՀ-ի հետ համատեղ Տավուշի մարզի դպրոցների ա­վար­տական դասարանների աշակերտների համար հանրակրթական տար­բեր առարկաների գծով ամե­նամյա օլիմպիա­դաներն անցկացնելու հարցի մասին զեկուցեց ԵՊՀ ԻՄ-ում այդ գործընթացի պատասխանատու Վ. Աղաբաբյանը: Նշվեց, որ 2024 թ. ապրիլի 6-ին ԵՊՀ Իջևանի մասնաճյուղն Իջևանի՝ Սպարտակ Սարգսյանի անվան թիվ 1 հիմնական դպրոցում իրականացրել է ԵՊՀ-ի հետ համատեղ անցկացվող 2024 թ. դպրոցական օլիմպիադայի 1-ին փուլը: Օլիմպիադան նախատեսված էր անցկացնել հանրակրթական («Մաթեմատիկա», «Ֆիզիկա», «Քիմիա», «Կենսաբանություն», «Աշխարհագրություն», «Հայոց պատմություն», «Հայոց լեզու և գրականություն», «Ռուսաց լեզու», «Անգլերեն», «Գերմաներեն», «Ֆրանսերեն», «Ինֆորմատիկա») և լրացուցիչ կրթական առարկաներից («Հայոց եկեղեցու պատմություն», «Տրամաբանություն», «Սոցիոլոգիա», «Պետություն և իրավունքի հիմունքներ», «Էկոլոգիա և կայուն զարգացման հիմունքներ», «Տնտեսագիտություն»): «Ինֆորմատիկա» առարկայից օլիմպիադան նախատեսված էր իրականացնել մեկ փուլով:

Այս տարի Տավուշի մարզի հանրակրթական ուսումնական հաստատություններից օլիմպիադային 11 առարկայից մասնակցել է 30 դպրոցի 11-րդ և 12-րդ դասարանի 153 աշակերտ: Նրանցից I փուլը  հաղթահարել է 10 դպրոցի 29 աշակերտ:

Օլիմպիադայի II փուլը տեղի է ունեցել ապրիլի 20-ին Երևանի պետական համալսարանում: Տավուշի մարզի մասնակիցները հաջող են հանդես եկել, և 2 աշակերտ ստացել է I կարգի դիպլոմ, 5 աշակերտ՝ գովասանագիր:

Զեկուցողը ներկայացրեց հաղթողներին՝ ըստ առարկաների․

• «Աշխարհագրություն».
• Թևոսյան Մաքսիմ – I կարգ – Դիլիջանի ավագ դպրոց,
• Աղաջանյան Վահագ – գովասանագիր – Դիլիջանի ավագ դպրոց,
• Մուսայելյան Իգոր – գովասանագիր – Աղավնավանքի միջնակարգ դպրոց:
• «Հայոց լեզու և գրականություն».
• Առաքելյան Թամարա – I կարգ – Իջևանի ավագ դպրոց,
• Կալեյան Նելլի – գովասանագիր – Դիլիջանի ավագ դպրոց:
• «Գերմաներեն».
• Սիմոնյան Մերի – գովասանագիր – Այրումի միջնակարգ դպրոց:
• «Ֆրանսերեն».
• Դավթյան Ջուլիետա – գովասանագիր – Իջևանի ավագ դպրոց:

Իբրև ամփոփում՝ նշվեց, որ ԵՊՀ-ի հետ համատեղ անցկացվող 2024 թ. դպրոցական օլիմպիադայի 1-ին փուլը ևս մասնաճյուղը կազմակերպել է բարձր մակարդակով, որի կապակցությամբ բուհի ղեկավարությունը շնորհակալություն հայտնեց օլիմպիադայի բոլոր կազմակերպիչներին և պատասխանատուներին, առանձնապես՝ Վ. Աղաբաբյանին:

Վճարովի ուսուցման համակարգում սովորող ուսանողների վարձավճարների զեղչերի արդյունքների հարցի վերաբերյալ զեկուցեց փոխտնօրեն Մ. Օթարյանը: Մասնավորապես նշվեց, որ 2023-2024 ուստարվա 2-րդ կիսամյակում ուսանողական նպաստի ձևով ուսման վարձի մասնակի փոխհատուցում ստանալու համար ԵՊՀ ԻՄ մանդատային հանձնաժողովին դիմում է ներկայացրել 45 ուսանող (առկա ուսուցման համակարգի 26 և հեռակա ուսուցման համակարգի 19 ուսանող):

Ուսանողների վարձավճարների զեղչում է իրականացվել ոչ միայն ԵՊՀ ԻՄ մանդատային հանձնաժողովին, այլև անմիջապես տնօրենին ուղղված դիմումների հիման վրա (տնօրենին դիմում են ներկայացրել առկա ուսուցման համակարգի 32 և հեռակա ուսուցման համակարգի 33 ուսանողներ):

Ընդհանուր առմամբ այս կիսամյակում առկա ուսուցման համակարգում իրականացվել է ԵՊՀ ԻՄ ուսանողների ուսման վարձավճարների մասնակի փոխհատուցում՝ 6 միլիոն 410 հազար ՀՀ դրամի չափով, հեռակա ուսուցման համակարգում՝ 2 միլիոն 392 հազար ՀՀ դրամի չափով:

Դասախոսների և ուսանողների կրթական և այլ կարիքների վերհանման, մատուցվող ծառայություններից նրանց բավարարվածության գնահատման հարցի մասին զեկուցեց Մասնագիտական կրթության որակի ապահովման (ՄԿՈԱ) բաժնի վարիչ Մ. Ճաղարյանը: Ներկայացվեց, որ ՄԿՈԱ բաժնի կողմից 2022-23 ուստարում տարբեր մեխանիզմներով վերհանվել են դասախոսների և ուսանողների մի շարք խնդիրներ և կարիքներ:

Բաժնում այդ խնդիրները տրոհվել են ըստ ուղղությունների (ստացվել է խնդիրների 34 խումբ), ապա առանձնացվել են ըստ պատասխանատվության և ընթացիկ ուստարում ուղարկվել են բոլոր ստորաբաժանումներին, որով ստորաբաժանումները կազմել են ներառված խնդիրների լուծման իրենց ծրագրերը՝ նշելով խնդիրների լուծման իրենց քայլերը, ակնկալիքները և ժամկետները:

Այդ խնդիրների պատճառների հստակեցման, դրանց հնարավոր լուծման համար պատասխանատու ստորաբաժանումները կազմակերպել են հանդիպում-քննարկումներ ուսանողների և դասախոսների հետ:

Նիստում զեկուցողն անդրադարձավ վերհանված հիմնական խնդիրներին և դրանց լուծման համար իրականացված գործընթացներին՝ ըստ կատարված ուսումնասիրության աղբյուրների․

1. ուսանողների նշած խնդիրներ՝ կապված հետազոտական աշխատանքների իրականցման և գնահատման հետ, դասավանդման որակի և արդյունավետության հետ,
2. շրջանավարտների նշած խնդիրներ,
3. ամփոփիչ ատեստավորման հանձնաժողովների նախագահների նշած խնդիրներ,
4. պրակտիկանտ-ուսանողների վերաբերյալ արտաքին շահակիցների բարձրաձայնած խնդիրներ,
5. Դասախոսական կազմի բարձրաձայնած խնդիրներ:

2023-2024 ուստարվա առկա և հեռակա ուսուցման 2-րդ կիսամյակի 2-րդ ընթացիկ քննությունների, ստուգումների, ստուգարքների և 2-րդ կիսամյակի բակալավրի ու մագիստրատուրայի քննաշրջանի կազմակերպման հարցի մասին զեկուցեցին ֆակուլտետների դեկանները և Ուսումնամեթոդական վարչության պետ Ա. Դավթյանը: Մասնավորապես նշվեց, որ առկա ուսուցման 2-րդ կիսամյակի 2-րդ ընթացիկ քննությունները, ստուգումները և ստուգարքները տեղի կունենան ս.թ. մայիսի 29-ից հունիսի 4-ն ընկած ժամանակահատվածում, հեռակա ուսուցմանը՝ մայիսի 25-ից հունիսի 1-ը: 2023-24 ուստարվա առկա ուսուցման քննաշրջանը կիրականացվի ս.թ. հունիսի 11-29-ը, հեռակա ուսուցման (բակալավրի և մագիստրատուրայի) քննաշրջանը՝ հունիսի 4-29-ը: Կատարվել են անհրաժեշտ նախապատրաստական աշխատանքներ՝ քննաշրջանը պատշաճ կերպով իրականացնելու համար:

Մինչև 12 կրեդիտ կուտակած ակադեմիական պարտքերի վերահանձնման գործընթացի ամփոփման հարցի վերաբերյալ զեկուցեց ՈՒՄՎ ուսումնական գործընթացի պլանավորման և վերահսկման բաժնի վարիչ Ն. Առուշանյանը: Մասնավորապես նշվեց, որ մինչև 12 կրեդիտ կուտակած ակադեմիական պարտքերը վերահանձնելու համար դիմել էր 11 ուսանող: Դիմումների ընդունելության գործընթացը տեղի է ունեցել ս.թ. ապրիլի 4-10-ը, քննությունների հանձնումը՝ ապրիլի 25-ից մայիսի 2-ն ընկած ժամանակահատվածում: 11 ուսանողից 1-ը Բնական գիտությունների ֆակուլտետից էր (հեռակա ուսուցում), 10-ը՝ Տնտեսագիտության ֆակուլտետից (առկա ուսուցման 4 և հեռակա ուսուցման 6 ուսանող, այդ թվում՝ 1-ը՝ մագիստրատուրայից): Դիմած 11 ուսանողներն էլ քննությունները դրական են հանձնել:

Ավագ դպրոցներում և քոլեջներում սովորողների համար ամենամյա «Բաց դռների օրեր» և ճանաչողական այցեր մասնաճյուղ կազմակերպելու հարցի վերաբերյալ զեկուցեց ԵՊՀ ԻՄ պրակտիկայի կազմակերպման և շահակիցների հետ համագործակցության (ՊԿՇՀ) բաժնի վարիչ Լ. Բեգինյանը:

Զեկուցողը նշեց, որ ըստ ԵՊՀ ԻՄ 2022-26 թթ․ զարգացման ռազմավարական ծրագրի՝ 2024 թվականին նախատեսված էր կազմակերպել ԵՊՀ Իջևանի մասնաճյուղ 5 ճանաչողական այց, որոնցից 4-ը (Աչաջրի (2 այց), Հովքի և Խաշթառակի միջնակարգ դպրոցների սաների այցերը) արդեն իրականացվել է, իսկ 1-ը՝ «Տավուշի Պատրիկ Տէվէճեան տարածաշրջանային քոլեջ» հիմնադրամի այս տարվա շրջանավարտների այցը, կիրականացվի հաջորդ շաբաթ:

Աշակետրները շրջայց են կատարել ԵՊՀ Իջևանի մասնաճյուղում, ծանոթացել են համալսարանական առօրյային, ֆակուլտետներին, իրականացվող կրթական ծրագրերին, բուհում կրթությունը շարունակելու հնարավորություններին, ստացել են տեղեկատվություն մասնաճյուղում գործող ուսումնագիտական կենտրոնների (Տավուշի մարզի Գիտելիքի նորարարական հաբ, «Ամերիկյան գրադարան և դասընթացների կենտրոն» և այլն), ուսանողական կառույցների մասին:

Ելնելով իրենց հետաքրքրություններից՝ Խաշթառակի միջնակարգ դպրոցի աշակերտները համալսարանում նաև մասնակցել են դասերի՝ «Պատմություն», «Հայոց լեզու և գրականություն», «Ֆրանսերեն լեզու և գրականություն», «Ֆինանսներ (ըստ ոլորտի)» կրթական ծրագրերում ընդգրկված դասընթացների շրջանակներում:

Տնօրենը նշեց մասնաճյուղի կողմից դպրոցների հետ մշտապես սերտ կապ պահելու անհրաժեշտության մասին՝ տարբեր միջոցառումների և նախաձեռնությունների («Բաց դռների օրեր», ճանաչողական այցեր, ակնարկային դասախոսություններ, ինտելեկտուալ խաղեր և այլն) միջոցով: Գործընթացի արդյունավետության առումով պարոն Մակարյանը կարևորեց գործողությունների հստակ ու մանրակրկիտ պլանավորումը և դրանց հետևողական իրականացումը:

Ընթացիկ՝ մասնաճյուղից ուսանողների հեռացման հարցի վերաբերյալ նշվեց, որ ԵՊՀ ԻՄ ներքին կարգապահական կանոնները խախտելու, մասնավորապես՝ բացակայությունների թույլատրելի սահմանը հատելու պատճառով ֆակուլտետների կողմից 5 ուսանող ներկայացվել է հեռացման: 5 ուսանողից 3-ը առկա ուսուցման (Կիրառական արվեստի, Տնտեսագիտության ֆակուլտետ), 2-ը հեռակա ուսուցման (Տնտեսագիտության ֆակուլտետ) ուսանողներ են:

Մագիստրատուրայի 1 ուսանող էլ ենթակա էր հեռացման՝ ընթացակարգով սահմանված ժամկետներում դասընթացը կրկնելու համար չդիմելու պատճառով:

Նշված 6 ուսանողները հեռացվեցին մասնաճյուղից:

ԵՊՀ Իջևանի մասնաճյուղում Ա. Հ. Մակարյանի նախագահությամբ կայացավ տնօրենության նիստ, որի ընթացքում քննարկվեցին 2023-2024 ուստարվա 2-րդ կիսամյակի 1-ին ընթացիկ ստուգումների և քննությունների նախապատրաստման ընթացքին, մինչև 12 կրեդիտ կուտակած ակադեմիական պարտքերի վերահանձնման գործընթացի կազմակերպմանը, 2-րդ կիսամյակում հետազոտական աշխատանքների կազմակերպման ընթացքին, կամընտրական դասընթացների կազմակերպման խնդիրներին, 2023-24 ուստարվա առկա ուսուցման 1-ին կիսամյակի լուծարքային շրջանի ամփոփմանը, մասնաճյուղից ուսանողների հեռացմանը, ուսանողի իրավունքների վերականգնմանը վերաբերող հարցեր:

Առաջին հարցի մասին նշվեց, որ 2023-24 ուստարվա 2-րդ կիսամյակի 1-ին ընթացիկ ստուգումները և քննությունները կազմակերպվել են՝ համաձայն ժամանակացույցի: Քննաշրջանը կիրականացվի 2024 թ. ապրիլի 3-10-ն ընկած ժամանակահատվածում: Ամբիոններում քննարկումներից հետո ֆակուլտետների դեկանները Ուսումնամեթոդական վարչություն են ներկայացրել ընթացիկ ստուգումների և քննությունների կազմակերպման ժամանակացույցները: Դրանք տեղադրվել են ԵՊՀ ԻՄ պաշտոնական կայքում, և դրանց մասին իրազեկվել են դասախոսները և ուսանողները: Ֆակուլտետներին են տրամադրվել քննությունների համար նախատեսված տետրերը: Իրականացվել են նախապատրաստական այլ աշխատանքներ, և ԵՊՀ Իջևանի մասնաճյուղը պատրաստ է քննաշրջանի իրականացմանը:

Երկրորդ հարցի կապակցությամբ նշվեց, որ մինչև 12 կրեդիտ ակադեմիական պարտքերի վերահանձնման գործընթացին մասնակցել է հեռակա ուսուցման 11 ուսանող, որոնցից դրական է ստացել 10-ը: 2023-2024 ուստարում ունեցել ենք դասընթացը կրկնող 7 ուսանող (6-ը՝ Բնական գիտությունների ֆակուլտետի առկա ուսուցման համակարգից, 1-ը՝ Տնտեսագիտության ֆակուլտետի հեռակա ուսուցման համակարգից), ովքեր ստացել են դրական:

2023-24 ուստարվա 2-րդ կիսամյակում հետազոտական աշխատանքների կազմակերպման ընթացքի վերաբերյալ նշվեց, որ հաշվետու կիսամյակում առկա ուսուցման համակարգում հետազոտական բաղադրիչ պարունակող դասընթացների ընդհանուր թիվը 31 է, հեռակա ուսուցման համակարգում՝ 15: Ըստ կարգի՝ ամբիոններում երրորդ շաբաթվա ընթացքում հաստատվել են հետազոտական աշխատանքների թեմաները, և դրանք ներկայացվել են ուսանողներին:

Ապա ներկայացվեց, որ 2024-2025 ուսումնական տարվա կամընտրական դասընթացների ընտրությունն ուսանողների կողմից իրականացվելու  է էլեկտրոնային կառավարման համակարգով՝ «Registrar»-ով: Դասընթացների ընտրության գործընթացը կավարտվի ս.թ. ապրիլի 6-ին, որից հետո, ըստ նորմատիվների, կձևավորվեն խմբերը:

Մյուս հարցի վերաբերյալ նշվեց, որ 2023-24 ուստարվա առկա ուսուցման 1-ին կիսամյակի քննաշրջանի արդյունքներից ելնելով՝ ունենք հեռացման ենթակա 3 ուսանող և մինչև 12 կրեդիտ ակադեմիական պարտքեր կուտակած 4 ուսանող:

Նույն ուստարվա 1-ին կիսամյակի հեռակա ուսուցման քննաշրջանի արդյունքներն ամփոփելով՝ ունենք հեռացման ենթակա 10 ուսանող, մինչև 12 կրեդիտ ակադեմիական պարտքեր  կուտակած 12 ուսանող (2-ը՝ մագիտրատուրայից, 10-ը՝ բակալավրիատից) և դասընթացը կրկնող 21 ուսանող (1-ը՝ մագիտրատուրայից, 20-ը՝ բակալավրիատից):

Ըստ այդմ՝ 13 ուսանող (3-ը՝ առկա ուսուցման, 10-ը՝ հեռակա) հեռացվեց մասնաճյուղից ակադեմիական անբավարար առաջադիմության (նաև ուսման վարձը չվճարելու), 120 ժամ և ավելի անհարգելի բացակայության պատճառներով:

Հաջորդիվ ներկայացվեց, որ ԵՊՀ Իջևանի մասնաճյուղի առկա ուսուցման համակարգի «Ընդհանուր մանկավարժություն» մասնագիտության «Տարրական մանկավարժություն և մեթոդիկա» բակալավրի կրթական ծրագրի II կուրսի 1 նախկին ուսանողուհի դիմել է իր ուսանողական իրավունքները վերականգնելու նույն կրթական ծրագրի հեռակա ուսուցման համակարգում: Որոշվեց ԵՊՀ ԻՄ նախկին ուսանողուհուն թույլատրել վերականգնելու իր ուսանողական իրավունքները:

Տնօրենության նիստերի որոշումների կատարողականի ներկայացման ժամանակ անդրադարձ կատարվեց մասնավորապես 2023-24 ուստարվա ընթացքում «E-learning» և «Registrar» համակարգերում ծագած խնդիրների լուծման ընթացքին և ավարտական աշխատանքների կատարման ընթացքի մասին ամբիոններում առկա մատյանները ղեկավարների և ուսանողների կողմից լրացվելուն, և արձանագրվեց, որ դրանք իրականացվում են:

2024 թ. փետրվարի 23-ին ԵՊՀ Իջևանի մասնաճյուղում տեղի ունեցավ տնօրենության նիստ՝ Ա. Հ. Մակարյանի նախագահությամբ:

Նիստում քննարկվեցին 2023-24 ուստարվա 1-ին կիսամյակի առկա ուսուցման քննաշրջանի արդյունքներին (առանց լուծարքային շրջանի), 2-րդ կիսամյակի անվանական կրթաթոշակների տրամադրմանը (ներառյալ՝ Վազգեն Սարգսյան, Մոնթե Մելքոնյան), 2024 թ. բակալավրի կրթական ծրագրով ամփոփիչ ատեստավորման հանձնաժողովների նախագահների թեկնածուներին, 2023-24 ուստարվա ընթացքում «E-learning» և «Registrar» համակարգերում ծագած խնդիրներին, ավարտական աշխատանքների կատարման ընթացքին, ուսանողների իրավունքների վերականգնման գործընթացին, հեռակա ուսուցման բակալավրի և մագիստրատուրայի՝ 2023-24 ուստարվա 2-րդ կիսամյակի ուսումնական պարապմունքների կազմակերպմանը վերաբերող օրակարգային հարցերը:

2023-24 ուստարվա 1-ին կիսամյակի առկա ուսուցման քննաշրջանի (առանց լուծարքային շրջանի) արդյունքներն ամփոփելիս նշվեց, որ ըստ հաստատված ժամանակացույցի՝ քննաշրջանն իրականացվել է 2024 թ. հունվարի 10-30-ն ընկած ժամանակահատվածում: Այն անցկացվել է սահմանված կարգով, բողոքարկումներ չեն եղել: Քննաշրջանին մասնակցել է 656 ուսանող: 2023-24 ուստարում ուսանողների ընդհանուր առաջադիմությունը կազմել է 73.3 % (նախորդ ուստարում՝ 71.4 %):

Տնօրենության անդամների կողմից հավանության արժանացան 2023-24 ուստարվա 2-րդ կիսամյակի անվանական կրթաթոշակների համար ֆակուլտետների կողմից առաջարկված թեկնածությունները: Մասնաճյուղում մրցութային կարգով տրվող անվանական կրթաթոշակների համար ֆակուլտետների կողմից ներկայացված թեկնածուների ընդհանուր ցանկից, ըստ կարգի, ընտրվեցին ամենաբարձր առաջադիմությամբ ուսանողները:

Մյուս հարցի կապակցությամբ քննարկվեցին դեկանների կողմից ըստ մասնագիտությունների ներկայացված 2024 թ. բակալավրի կրթական ծրագրով ամփոփիչ ատեստավորման հանձնաժողովների նախագահների թեկնածությունները: Պարոն Մակարյանը դեկաններին հանձնարարեց առաջադրված թեկնածուների հետ ձեռք բերել վերջնական պայմանավորվածություն՝ սեղմ ժամկետներում նրանց թեկնածությունները հաստատման ներկայացնելու նպատակով:

2023-24 ուստարվա ընթացքում «E-learning» և «Registrar» համակարգերում ծագած խնդիրների մասին զեկուցեցին Տեղեկատվական համակարգերի սպասարկման և զարգացման բաժնի վարիչը և Ուսումնամեթոդական վարչության պետը՝ անդրադառնալով այդ համակարգերում աշխատանքի ընթացքում առաջացած տեխնիկական ու ծրագրային խնդիրներին և խոչընդոտներին, դրանց արդեն տրված կամ առաջարկվող լուծումներին:

2023-24 ուստարվա ավարտական աշխատանքների կատարման ընթացքի վերաբերյալ զեկուցեցին ֆակուլտետների դեկանները: Նրանք ըստ կուրսերի ներկայացրին աշխատանքների կատարման ընթացքը՝ նշելով, որ թե՛ առկա և թե՛ հեռակա ուսուցման համակարգերում աշխատանքները պատշաճ կերպով իրականացվում են, ուսանողները համապատասխան ցուցումների, խորհրդատվության և շտկումների համար հանդիպում են ղեկավարների հետ: Աշխատանքների իրականացման ընթացքը զեկուցողները բավարար համարեցին:

Տնօրենը դեկաններին հանձնարարեց նաև հետևողական լինել, որ աշխատանքների կատարման ընթացքի մասին ամբիոններում առկա մատյանները ղեկավարների և ուսանողների կողմից պատշաճ լրացվեն:

Հաջորդիվ ներկայացվեց, որ իրենց ուսանողական իրավունքները վերականգնելու համար դիմել են ԵՊՀ Իջևանի մասնաճյուղի 6 նախկին ուսանողներ, որոնցից 1-ը առկա ուսուցման համակարգից է, 5-ը՝ հեռակա (այդ թվում՝ 1-ը՝ մագիստրատուրայից):

Ուսումնամեթոդական վարչության կողմից ստուգվել է ուսանողների ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին, որի համաձայն՝ նրանց թույլատրվում է վերականգնել իրենց ուսանողական իրավունքները: Որոշվեց ԵՊՀ ԻՄ 6 նախկին ուսանողներին թույլատրել վերականգնելու իրենց ուսանողական իրավունքները:

Հեռակա ուսուցման բակալավրի և մագիստրատուրայի՝ 2023-24 ուստարվա 2-րդ կիսամյակի ուսումնական պարապմունքների կազմակերպման ընթացքի մասին մասին զեկուցեցին ֆակուլտետների դեկանները և Ա. Դավթյանը: Մասնավորապես նշվեց, որ 2024 թ. մարտի 12-ից կմեկնարկի այս կիսամյակի հեռակա ուսուցման ուսումնական գործընթացը, որի համար իրականացվել են դասացուցակների, դասամատյանների, ըստ կուրսերի և խմբերի՝ լսարանային ֆոնդի բաշխման և այլնի հետ կապված անհրաժեշտ նախապատրաստական աշխատանքներ: Ըստ այդմ՝ մասնաճյուղը պատրաստ է սկսելու 2023-24 ուստարվա 2-րդ կիսամյակի հեռակա ուսուցման բակալավրի և մագիստրատուրայի դասերը:

Նիստում ներկայացվեցին ԵՊՀ ԻՄ-ում ներհամալսարանական փորձնակության ծրագիր (ինտերնշիփ) իրականացնելու հնարավորության, «Վիքիմեդիա Հայաստան»-ի հետ անցկացվող պրակտիկաների փորձի մասին ընթացիկ հարցերը:

ԵՊՀ ԻՄ-ում ներհամալսարանական փորձնակության ծրագիր (ինտերնշիփ) իրականացնելու հնարավորության հարցի վերաբերյալ նշվեց, որ ԵՊՀ զարգացման և նորարարության գծով պրոռեկտոր Մ. Հովհաննիսյանի՝ ստորաբաժանումների ղեկավարներին ուղղված շրջաբերականի համաձայն՝ ԵՊՀ-ն մեկնարկում է ներհամալսարանական փորձնակության ծրագիր, որի նպատակն է ուսանողներին ներգրավել համալսարանի համար կարևոր նախաձեռնությունների և ընթացիկ աշխատանքների իրականացման գործընթացներում: Ծրագրի իրականացման համար անհրաժեշտ է, որ մինչև ս.թ. մարտի 1-ը ԵՊՀ բոլոր ստորաբաժանումների ղեկավարները ներկայացնեն իրենց ստորաբաժանումներում առկա փորձնակության հնարավորությունների վերաբերյալ տեղեկատվություն:

ԵՊՀ ԻՄ տնօրենի պաշտոնակատար Ա. Մակարյանը Մասնագիտական կրթության որակի ապահովման բաժնի վարիչին հանձնարարեց ստորաբաժանումների ղեկավարներին ուղարկել բաժնի կողմից մշակված ԵՊՀ ԻՄ-ում լրացուցիչ պրակտիկաների իրականացման աշխատակարգը, որպեսզի դրանից ելնելով՝ ստորաբաժանումների ղեկավարներն ուսումնասիրեն առկա հնարավորությունները և սեղմ ժամկետներում ներկայացնեն համապատասխան առաջարկություններ:

«Վիքիմեդիա Հայաստան»-ի հետ իրականացվող պրակտիկաների փորձի մասին նշվեց, որ ԵՊՀ Իջևանի մասնաճյուղի և «Վիքիմեդիա Հայաստան» գիտակրթական հասարակական կազմակերպության միջև կնքված համագործակցության հուշագրի շրջանակներում 2021-22 ուստարվանից իրականացվում է «Պատմություն» կրթական ծրագրի մասնագիտական պրակտիկան:

2021-22 ուստարում մասնագիտական պրակտիկայի ժամանակ ուսանողները պատրաստել են 8-ական հոդված՝ հայոց պատմության և պատմական աշխարհագրության թեմաներով: 2022-23 ուստարում «Վիքիմեդիա Հայաստան»-ի հետ են իրենց պրակտիկան իրականացրել ոչ միայն «Պատմություն», այլև «Հայոց լեզու և գրականություն» կրթական ծրագրի ուսանողները, որի ընթացքում նրանք պատրաստել են 6-ական հոդված՝ հայ ժողովրդի պատմության և հայ գրականության տարաբնույթ թեմաներով:

2023-24 ուստարում իրենց պրակտիկան «Վիքիմեդիա Հայաստան»-ի հետ անցկացնում են Հումանիտար գիտությունների ֆակուլտետի 4 կրթական ծրագրերի («Պատմություն», «Հայոց լեզու և գրականություն», «Անգլերեն լեզու և գրականություն», «Ֆրանսերեն լեզու և գրականություն») ուսանողները:

«Անգլերեն լեզու և գրականություն», «Ֆրանսերեն լեզու և գրականություն» կրթական ծրագրերի ուսանողները կատարելու են թարգմանություններ համապատասխանաբար անգլերենից և ֆրանսերենից, «Հայոց լեզու և գրականություն» կրթական ծրագրի ուսանողները պատրաստելու են 6-ական հոդված հայ նշանավոր գրողների ու նրանց ստեղծագործությունների վերաբերյալ:

«Պատմություն» կրթական ծրագրի մասնագիտական պրակտիկայի ծրագիրն ավելի հագեցված է. պրակտիկայի շրջանակներում ուսանողներն իրականացնելու են մի քանի տեսակ աշխատանքներ: Օրինակ՝ բազմազանացվել է թեմատիկան, ընտրվել են թեմաներ հիմնական ուղղություններից. եթե նախորդ 2 տարիներին ուսանողները հոդվածներ են գրել հայոց պատմության շրջանակներում, ապա այս տարի գրելու են և՛ հայոց պատմությունից, և՛ ազգագրությունից, հնագիտությունից, Ռուսաստանի պատմությունից, համաշխարհային պատմությունից: Զեկուցող Ն. Գրիգորյանը նաև տվեց «Պատմություն» կրթական ծրագրի մասնագիտական պրակտիկայի հիմնավորումը՝ ներկայացնելով, թե այն ինչ կրթական վերջնարդյունքներ է ձևավորելու: