2019թ. դեկտեմբերի 5-ին ԵՊՀ Իջևանի մասնաճյուղում կայացավ Պատմաբանի օրվան նվիրված միջոցառում, որը կազմակերպել էին «Պատմություն» մասնագիտության 1-ին կուրսի ուսանողները:

Ներկա էին Հումանիտար գիտությունների ֆակուլտետի դեկանի պաշտոնակատար Կ.Պողոսյանը, Հայոց պատմության և հասարակագիտության ամբիոնի պրոֆեսորադասախոսական անձնակազմի ներկայացուցիչներ, «Պատմություն» մասնագիտության բարձր կուրսերի ուսանողներ:

Միջոցառման նպատակն էր ևս մեկ անգամ վերհանել պատմաբանի դերն ու նշանակությունը, ընդգծել տվյալ մասնագիտության կարևորությունը:

«Պատմություն» մասնագիտության առաջին կուրսի ուսանողները Պատմաբանի օրվա առթիվ հանդես եկան զեկուցումներով:

Թամարա Ջանվելյանը ներկայացրեց «Հայոց այբուբենի ստեղծումը» թեմայով զեկուցում՝ խոսելով գրերի ստեղծման հանգամանքների և Հայաստանում տվյալ շրջանում տիրող իրավիճակի մասին:

Մեդորա Ասիլյանը հանդես եկավ «Հայաստանի առաջին հանրապետություն» թեմայով զեկուցմամբ՝ անդրադառնալով վերջինիս ստեղծմանը, կառուցվածքին և բացառիկ նշանակությանը:

Իննա Մարտիոսյանը ներկայացրեց Արցախյան պատերազմի մասին՝ խոսելով ռազմական գործողությունների և պատերազմում սփյուքահայերի մասնակցության վերաբերյալ:

Վերջում ելույթ ունեցավ Հումանիտար գիտությունների ֆակուլտետի դեկանի պաշտոնակատար Կ.Պողոսյանը՝ ողջունելով ուսանողների նախաձեռնությունը, ուսումնական գործընթացում կարևորելով նման միջոցառումները և շնորհակալություն հայտնելով միջոցառման մասնակիցներին ու կազմակերպիչներին:

 2019թ. դեկտեմբերի 2-ին ԵՊՀ Իջևանի մասնաճյուղում կայացավ ԱԻՆ Տավուշի մարզային փրկարարական վարչության ԲՊԲ գլխավոր մասնագետ Արմեն Մելքումյանի,  ՃԿԿ ավագ հրահանգիչ Էդգար Քամալյանի և առաջին օգնության ավագ հրահանգիչ Մարինե Սարիբեկյանի հանդիպումը բուհի տարբեր մասնագիտությունների ուսանողների և վարչական անձնակազմի մի քանի ներկայացուցիչների հետ:

Հանդիպման նպատակն էր Սպիտակի երկրաշարժի 31-րդ տարելիցին ընդառաջ մասնաճյուղի ուսանողներին և աշխատակիցներին ներկայացնել երկրաշարժի (դրա ուժգնության, տևողության, ծանր հետևանքների, մարդկային ու նյութական կորուստների) վերաբերյալ մանրամասներ և հատկապես երկրաշարժից պաշտպանվելու կանոններն ու արդյունավետ միջոցները:

Տավուշի մարզային փրկարարական վարչության աշխատակիցները հանդիպման ընթացքում անդրադարձան երկրաշարժի հիմնական և առավելագույն երկարությանը, ցնցումների միջև ընթացքի տևողությանը, այդ ժամանակ իրականացվող գործողություններին:

Համալսարանականներին ներկայացվեցին երկրաշարժից պաշտպանվելու, տուժածներին առաջին օգնություն ցուցաբերելու հիմնական կանոնները: Գործնականորեն ցուցադրվեցին բաց և փակ կոտրվածքների, գիտակցության կորստի դեպքում առաջին բուժօգնության քայլերը:

Հանդիպումը եզրափակվեց երկրաշարժի վերաբերյալ ֆիլմի դիտումով։

ԱԻՆ աշխատակիցներից հանդիպման մասնակիցներն իմացան, թե ինչ պետք է անել երկրաշարժի ժամանակ և դրանից հետո՝ նյութական, մարդկային և բարոյահոգեբանական կորուստները նվազագույնի հասցնելու համար:

 2019թ. նոյեմբերի 30-ին ԵՊՀ Իջևանի մասնաճյուղի ուսանողական գիտական ընկերության նախաձեռնությամբ կայացավ բանավեճի առաջնության 1/4 եզրափակչի երկրորդ խաղը, որին մասնակցում էին «ԻՄ ՈՒԽ» և «Օմեգա թիմերը»:

Խաղի դատավորներն էին Արտաքին կապերի բաժնի վարիչ Արման Եգանյանը, ՈՒԳԸ նախագահ Հրանտ Ղարագյոզյանը և ՈՒԳԸ փոխնախագահ Շիրակ Գասպարյանը (գլխավոր դատավոր):

Բանավեճը «Կյանքին վտանգ սպառնացող սպորտաձևերը պետք է արգելվեն» թեմայով էր:

Կողմ դիրքորոշմամբ հանդես եկավ «ԻՄ ՈՒԽ» թիմը, դեմ դիրքորոշմամբ՝ «Օմեգա» թիմը:

Դեմ դիրքորոշմամբ թիմը ներկայացրեց տարբեր պնդումներ, օրինակներ, փաստեր, որոնց առանցքում այն գաղափարն էր, որ նման սպորտաձևերի արգելումը դեմ է մարդու իրավունքներին և ազատություններին:

Դրան հակառակ, վկայակոչելով, որ կյանքը բարձրագույն արժեք է՝ կողմ թիմը նշեց, որ այդ կերպ կտրուկ կնվազեն սպորտի ընթացքում մահացության դեպքերը:

Համառ պայքարից հետո 52-54 հաշվով հաղթեց «Օմեգա» թիմը:

Շնորհավորում ենք հաղթող թիմին՝ մաղթելով նոր հաջողություններ:

 2019թ. նոյեմբերի 30-ին ԵՊՀ ԻՄ-ի տնտեսագիտության ֆակուլտետում կայացավ «Փողերի լվացման և ահաբեկչության ֆինանսավորման դեմ պայքար» թեմայով սեմինար-քննարկում, որը կազմակերպվել էր Դիլիջանի ուսումնահետազոտական կենտրոնի Տնտեսական հետազոտությունների վարչության տնտեսագետ Արթուր Ղալթախչյանի և ԵՊՀ ԻՄ-ի տնտեսագիտության ֆակուլտետի ուսանողական խորհրդի համագործակցությամբ:

Այն վարեց ՀՀ կենտրոնական բանկի ֆինանսական դիտարկումների մասնագետ Գևորգ Գրիգորյանը:

Բովանդակալից սեմինար-քննարկման ընթացքում ներկայացվեց փողերի լվացման և ահաբեկչության ֆինանսավորման դեմ պայքարի համակարգը (ՓԼ/ԱՖ)՝ միջազգային փաստաթղթերը, միջազգային կազմակերպությունները, իրավական համակարգը:

Խոսվեց ֆինանսական հետախուզության մարմինների և ֆինանսական դիտարկումների կենտրոնի (ՖԴԿ) կառուցվածքի ու գործառույթների մասին: ՖԴԿ գործառույթների շրջանակում ներկայացվեց, թե որոնք են իրավասու մարմինները, հաշվետու անձինք, ինչպես են իրականացվում վերահսկողությունը և համագործակցությունը վերահսկող մարմինների և օտարերկրյա մարմինների հետ:

Անդրադարձ կատարվեց նաև ՓԼ/ԱՖ տիպային սխեմաներին, կրիպտոակտիվներին և ՓԼ/ԱՖ նոր սպառնալիքներին:

Ներկայացվեց ՀՀ կենտրոնական բանկի հայտարարությունը կրիպտոակտիվների հետ կապված գործարքների բարձր ռիսկային լինելու վերաբերյալ: Ընդգծվեց, որ կրիպտոարժույթները զուրկ են ապահովվածությունից և խիստ անկայուն են, վերջիններիս կիրառությամբ սխեմաների մեծ մասում գոյություն չունեն իրավաբանորեն պատասխանատու սուբյեկտներ, կրիպտոարժույթներով գործարքները հաճախ կարող են մաս կազմել ՓԼ/ԱՖ սխեմաների, քանի որ հնարավորություն են տալիս կատարել անանուն և անդրսահմանային գործարքներ, որոնց վերադարձը հնարավոր չէ ապահովել:

Նյութն ավարտելուց հետո ներկայացվեցին այնպիսի առցանց աղբյուրներ, որոնք կօգնեն ուսանողներին ավելի խորը ծանոթանալ այս ոլորտին:

Քննարկման վերջում Գևորգ Գրիգորյանը պատասխանեց Ընդհանուր տնտեսագիտության ամբիոնի դասախոս Ա.Ալեքսանյանի բլից և սեմինարի մասնակիցների այլ հարցերին:

 2019թ. նոյեմբերի 30-ին ԵՊՀ Իջևանի մասնաճյուղում տեղի ունեցավ ԳՏՏԿ գործադիր տնօրեն, «Ձեռնարկատիրությունների ինկուբատոր» հիմնադրամի մարզային ծրագրերի ղեկավար Ամալյա Եղոյանի և «Digitain» ընկերության բաց նորարարության և մարքեթինգային հաբի ղեկավար Մարիամ Փաշինյանի հանդիպումը ԳՏՏԿ Տավուշի և ԵՊՀ ԻՄ-ի ուսանողների հետ:

Ներկա էին ԵՊՀ ԻՄ-ի տնօրենի պաշտոնակատար Ա. Հ. Մակարյանը, մասնաճյուղի վարչական և պրոֆեսորադասախոսական անձնակազմի, շահագրգիռ կողմերի ներկայացուցիչներ:

Հանդիպման ընթացքում քննարկվեցին մարզում տեղեկատվական տեխնոլոգիաների խթանման, զարգացման հնարավոր ուղիները, վերհանվեցին ԳՏՏԿ ծրագրավորման դասընթացների արդյունքները:

Ընդգծվեց մարզում ձեռներեցության, ստարտափների ձևավորման և իրականացման կարևորությունը, խոսվեց «ԴիջիԹաուն» նախագծի մասին:

Ներկայացվեց նաև, որ Մարիամ Փաշինյանը նոյեմբերի 23-24-ին տեղի ունեցած «Մարզերի հզորացումը բարձր տեխնոլոգիաների խթանմամբ» համաժողովի շրջանակներում դարձել է բարի կամքի դեսպան (Goodwill ambassador)՝ աջակցելու EIF-ին, GITC-ին՝ մարզերում տեխնոլոգիաների զարգացման և տեխնոլոգիական առաջընթացը Երևանից, Գյումրիից դեպի մարզեր ուղղորդելու համար:

Այնուհետև Մ.Փաշինյանը և Ա.Եղոյանը պատասխանեցին հանդիպման մասնակիցներին հետաքրքրող հարցերին, քննարկեցին նրանց ներկայացրած առաջարկները:

ԳՏՏԿ գործադիր տնօրեն Ամալյա Եղոյանը նաև ուսանողներին ուրախությամբ հայտնեց, որ դասընթացն ավարտելուց հետո ԳՏՏԿ ուսանողները հնարավորություն կունենան հենց Իջևանում անցնել ինթերնշիփեր` համագործակցելով ոլորտի խոշորագույն ընկերությունների հետ: