2019թ. մայիսի 18-ին ԵՊՀ ԻՄ-ի կիրառական արվեստի ֆակուլտետի հագուստի մոդելավորման արվեստանոցում տեղի ունեցավ «Նորաձևության զարգացման արդի միտումները» թեմայով դաս-քննարկումը, որը վարեց ՀՀ դիզայներների միության անդամ, անվանի դիզայներ Ֆաինա Հարությունյանը:

Քննարկմանը ներկա էին ԵՊՀ ԻՄ-ի և մասնավորապես Կիրառական արվեստի ֆակուլտետի վարչական և պրոֆեսորադասախոսական անձնակազմի անդամներ, ուսանողներ, հյուրեր:

Դաս-քննարկման ընթացքում Ֆաինա Հարությունյանն իր առաջավոր փորձը փոխանցեց, հաջողության իր բանաձևը ներկայացրեց ԵՊՀ ԻՄ-ի «Դիզայն» և «Կիրառական արվեստ» մասնագիտությունների ուսանողներին:  

Հայտնի դիզայներն անդրադարձավ հագուստի վաճառքի ուղիներին, ներկայացրեց, թե որտեղից կարելի է սկսել, և ինչպիսի ճանապարհ է անցել հենց ինքը:

Նա խոսեց գովազդի միջոցների մասին և խորհուրդ տվեց հասկանալ անգամ ամենաքմահաճ հաճախորդի պահանջը, բացատրեց, թե ինչ է թրենդը, որոնք են գալիք տարվա նորաձևության միտումները:

Ընդգծվեց, որ հագուստի դիզայնի մեջ հարկավոր է ճանաչել բոլոր դիզայներներին ոճով, հագուստի շարքով:

Այն հարցին, թե ինչպես է գին որոշվում, Ֆաինան պատասխանեց, որ բոլոր դիզայներներն ունեն իրենց գաղտնիքը. ինքը հագուստի գինը որոշում է այնպես, որ զեղչի ժամանակ չունենա կորուստ:

Ուսանողներին տրված նրա գլխավոր խորհուրդն այն էր, որ բաց չթողնեն առիթը սովորելու (որքան հնարավոր է շատ), աշխատեն, գծեն, ձևեն ու կարեն:

Խանդավառությամբ լեցուն Ֆաինա Հարությունյանը ոգեշնչող, վարակիչ ազդեցություն ունեցավ ուսանողների վրա, նրանց մղեց ստեղծագործելու և աշխատելու:  

 2018-2019 ուստարվա II կիսամյակում ուսումնական պլանով նախատեսված ուսումնական պրակտիկայի շրջանակներում ԵՊՀ ԻՄ-ի «Զբոսաշրջություն» մասնագիտության 1-ին և 2-րդ կուրսերի ուսանողները պրակտիկայի ղեկավարներ, Տուրիզմի կառավարման և մշակութաբանության ամբիոնի ասիստենտներ Ալինա Ուլիխանյանի և Լևոն Լաչիկյանի ուղեկցությամբ ճանաչողական այցեր կատարեցին ՀՀ մի քանի մարզերի և Երևանի տարբեր վայրեր (պատմամշակութային օբյեկտներ` եկեղեցիներ, վանքեր, թանգարաններ, բնական հուշարձաններ, զբոսաշրջային ինդուստրիան սպասարկող կազմակերպություններ՝ հյուրանոցներ, զբոսաշրջային ընկերություններ, սննդի օբյեկտներ և այլն):  

Ուսումնական պրակտիկայի ընթացքում ուսանողներն այցելեցին մասնավորապես Իջևանի, Դիլիջանի, Գյումրու, Էջմիածնի և Երևանի զբոսաշրջային տարբեր դեստինացիաներ: Նրանք նախ եղան Իջևան ու Դիլիջան քաղաքների թանգարաններում, հյուրանոցներում  ու հյուրատներում, Հաղարծին վանական համալիրում, այնուհետև այցելեցին այլ մարզեր:

Ուսանողների համար հատկապես հետաքրքիր էր  Շիրակի մարզկենտրոն Գյումրի կատարած այցելությունը: Նրանք շատ էին լսել ոչ սովորական ու խիստ հայկական այդ քաղաքի մասին, և այժմ ժամանակն էր համոզվելու դրանում: Ուսանողները ոտքով շրջեցին քաղաքի փողոցներով ու հրապարակներով, ծանոթացան պատմամշակութային կոթողներին, ապա այցելեցին  Ավ. Իսահակյանի և Հովհ. Շիրազի տուն-թանգարաններ:

Պրակտիկայի շրջանակներում  հերթական շրջագայությունն իրականացվեց Իջևան–Երևան–Էջմիածին–Զվարթնոց–Երևան–Իջևան երթուղով: Ուսանողները ծանոթացան Էջմիածնի և Երևանի զբոսաշրջային ռեսուրսներին, ինչպես նաև մասնակցեցին «Զվարթնոց» տաճարի տարածքում անցկացվող Տոլմայի փառատոնին, որը վերջին տարիներին Հայաստանում արագ զարգացող իրադարձային զբոսաշրջության  միջոցառումներից  է:

«Զբոսաշրջություն» մասնագիտության ուսումնական պրակտիկան ուսանողներին հնարավորություն ընձեռեց կատարելու ինքնուրույն հետազոտական աշխատանքներ և առաջադրանքներ, հավաքագրելու, դասակարգելու, վերլուծելու, համադրելու և գնահատելու պրակտիկայի օբյեկտներին վերաբերող մասնագիտական տեղեկույթը, նպաստեց սեփական երկրի զբոսաշրջային ռեսուրսների, սպասարկման ոլորտի, մշակույթի, պատմության, աշխարհագրության ավելի խորը ճանաչմանը:

 2019թ. մայիսի 18-ին՝ Թանգարանների միջազգային օրվա առթիվ, ԵՊՀ Իջևանի մասնաճյուղի ՈՒԳԸ և ՈՒԽ նախաձեռնությամբ իրականացվեց ճանաչողական այց Երևանի մի շարք թանգարաններ:

Մասնաճյուղի բոլոր ֆակուլտետներից 24 ուսանողներ այցելեցին «Մայր Հայաստան» զինվորական թանգարան, Միջին Արևելքի արվեստի թանգարան, Արվեստի և գրականության թանգարան, Հայաստանի պատմության պետական թանգարան, Հայստանի ազգային պատկերասրահ:

Ուսանողները ծանոթացան արվեստի տարբեր ճյուղերի հետաքրքիր ցուցանշումներին, մշտական և ժամանակավոր ցուցադրություններին՝ գործնականորեն ամրապնդելով իրենց տեսական գիտելիքները:

Թանգարանների միջազգային օրն ամենամյա տոն է, որը նշվում է մայիսի 18-ին: Այն հռչակվել է Թանգարանների միջազգային խորհրդի (ICOM – The International Council of Museums) որոշմամբ 1977թ. մայիսի 18-ին ԻԿՕՄ-ի 11-րդ գլխավոր կոնֆերանսի ընթացքում՝ ռուսաստանյան պատվիրակության առաջարկությամբ: 1978 թվականից յուրաքանչյուր տարի այս օրը նշում է աշխարհի ավելի քան 150 երկիր, այդ թվում՝ Հայաստանը: 1992 թվականից սկսած՝ ամեն տարի Թանգարանային միջազգային օրն ունենում է մի թեմա, և ԻԿOՄ-ը հրապարակում է տվյալ թեմայի հետ կապված միջոցառումները:

«Թանգարանների գիշեր» համաեվրոպական միջոցառումն այս տարի Հայաստանում անցկացվում է 16-րդ, իսկ Արցախում 7-րդ անգամ:

2019թ. Թանգարանների միջազգային օրն անցկացվում է «Թանգարանները որպես մշակութային հանգույցներ. ավանդույթի ապագան» խորագրի ներքո, որը մատնանշում է հասարակության մեջ թանգարանների փոփոխվող նոր դերը: Շարունակելով իրենց հիմնական առաքելությունը՝ այն է հավաքչություն, պահպանություն, կրթություն, հետազոտություն, ցուցադրություն, հաղորդակցում՝ թանգարաններն այսօր վերափոխվում են որպես ակտիվ մշակութային հանգույցներ՝ դառնալով ավելի համայնքակենտրոն և ճկուն՝ արձագանքելով հասարակության լայն խմբերի հետաքրքրություններին, գլոբալ տնտեսաքաղաքական մարտահրավերներին և սոցիալական խնդիրներին:

 2019թ. մայիսի 17-ին ԵՊՀ կենտրոնական մասնաշենքի բակում տեղի ունեցավ ԵՊՀ հիմնադրման 100 և ՈՒԽ 25-ամյակներին նվիրված՝ «ԵՊՀ լավագույն ուսանող» ամենամյա մրցանակաբաշխությունը, որին հաջորդեց տոնական համերգ՝ Սոնա Ռուբենյանի և Գարիկ Պապոյանի մասնակցությամբ:

«ԵՊՀ լավագույն ուսանող-2019» մրցույթում հաղթող է ճանաչվել նաև ԵՊՀ Իջևանի մասնաճյուղի հումանիտար գիտությունների ֆակուլտետի «Անգլերեն լեզու և գրականություն» մասնագիտության 4-րդ կուրսի ուսանողուհի Սյուզաննա Շահնազարյանը:

Ամենամյա մրցույթի նպատակն է խրախուսել Երևանի պետական համալսարանի բակալավրիատում և մագիստրատուրայում սովորող ուսանողների առաջադիմությունը և խթանել նրանց գիտական ու հասարակական ակտիվությունը:

Մրցույթին, ըստ կանոնակարգի, մասնակցում էին ԵՊՀ բոլոր ֆակուլտետների (այդ թվում՝ ԵՊՀ Իջևանի մասնաճյուղի) և մագիստրոսական կրթական ծրագրեր իրականացնող կենտրոնների կամ այլ ստորաբաժանումների այն ուսանողները, որոնք առնվազն 4 կիսամյակ եղել են ԵՊՀ ուսանող, վերջին երկու կիսամյակի ընթացքում ունեցել են բարձր կամ գերազանց առաջադիմություն (ՄՈԳ-ը՝ 16 և բարձր), ինչպես նաև ունեն «ԵՊՀ լավագույն ուսանող»-ին բնութագրող ձեռքբերումներ՝ առաջադիմություն, ներգրավվածություն գիտական աշխատանքներում, մասնակցություն ներհամալսարանական արտալսարանային կյանքին և արտահամալսարանական ակտիվություն` մշակույթի, սպորտի, արվեստի և այլ ոլորտներում գրանցած հաջողություններ:

Մրցույթում հաղթել են ԵՊՀ-ի տարբեր ֆակուլտետների և Իջևանի մասնաճյուղի 20 ուսանողներ, որոնց համար սահմանված է անվանական կրթաթոշակ:

ԵՊՀ ԻՄ-ից «Լավագույն ուսանող-2019» մրցույթում հաղթել  է «ԱԼԳ» մասնագիտության 4-րդ կուրսի ուսանողուհի Սյուզաննա Շահնազարյանը:

Մրցանակաբաշխությանը ԵՊՀ ռեկտորը, ողջունելով ներկաներին, նշեց, որ հոբելյանական տարին հագեցած է միջոցառումներով, որոնք անցնում են բարձր մակարդակով. «Ես նախանձով եմ նայելու այն ուսանողներին, որոնք ԵՊՀ 100-ամյակի օրերին կդառնան լավագույն ուսանող: Կարծում եմ՝ ամբողջ կյանքում կհիշեն: Ուզում եմ շնորհավորել և ասել՝ մեծագույն պատիվ է լինել համալսարանի լավագույն ուսանող և միևնույն ժամանակ շատ մեծ պարտավորություն, որովհետև մենք՝ բոլոր համալսարանականներս, ունենք այդ պարտավորությունը՝ բարձր պահելու մեր Մայր բուհի պատիվը»:

ԵՊՀ լավագույն ուսանողներին շնորհավորեցին և նրանց մրցանակները հանձնեցին ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը, ԵՊՀ ուսանողների հետ տարվող աշխատանքների կենտրոնի տնօրեն Վահագն Վարագյանը և ԵՊՀ ՈՒԽ նախագահ Դավիթ Ափոյանը (մանրամասն տե՛ս այստեղ):

Սիրով շնորհավորում ենք մրցույթի բոլոր հաղթողներին և մասնավորապես Սյուզաննա Շահնազարյանին՝ մաղթելով նորանոր ձեռքբերումներ ու հաղթանակներ մասնագիտական ոլորտում և կյանքում:

 2019թ. մայիսի 17-ին ԵՊՀ Իջևանի մասնաճյուղում տեղի ունեցավ «Ներկան և ապագան Տավուշի մարզի հնագիտության հետաքրքրությունների համատեքստում» թեմայով դաս-քննարկումը, որը վարեց ՀՀ ԳԱԱ հնագիտության և ազգագրության ինստիտուտի գիտաշխատող, հնագետ Իրենա Քալանթարյանը:

Ի.Քալանթարյանը շուրջ տասը տարի զբաղվում է Իջևանի տա­րա­ծա­շրջա­նի «Գետահովիտ-2» քարանձավի ուսումնասի­րությամբ, ղեկա­վարում հնագիտական արշավախումբը: Նա երկու տարի մարզում եղել է հայ-ֆրանսիական համատեղ արշավախմբի համաղեկավար, որն իրականացրել է հուշարձանների հայտնաբերմանն ուղղված տեղազննական աշխատանքներ:  

ԵՊՀ ԻՄ-ում կազմակերպված դաս-քննարկումը նպատակ ուներ բուհի ուսանողներին ներկայացնել, նրանց իրազեկել մարզում կատարվող հնագիտական աշխատանքների արդյունքների, գիտական աշխարհում նոր ձեռք­բե­րում­­ների վերաբերյալ:

Ի.Քալանթարյանը նախ անդրադարձավ մարզում հնագիտական ժառանգության ուսումնասիրման գործում կարևոր դերակատարություն ունեցած երախտավորներին, ապա շնորհանդեսի ուղեկցությամբ մանրամասն խոսեց «Գե­տա­հովիտ-2» քարանձավի և Դիլիջանի տարածաշրջանում գտնվող Հովքի դամ­բարա­նա­դաշտի մասին: Նա ներկայացրեց դրանց ուսումնասիրվածության աստիճանը, կարևորությունը, հուշարձանների առանձնահատկությունները, արդի խնդիրները, հայտ­նաբերված հնագիտական նյութի կարևորությունը, գիտության մեջ առաջադրվող խնդիրները, ուսումնասիրության անհրաժեշտությունը, օգտագործման հեռանկարները:

Քն­նարկ­վեցին մարզում կատարվելիք հնագիտական աշխա­տանք­ներին, պրակտիկայի շրջանակներում մասնաճյուղի ուսա­նողներին դրանց մաս­նա­կից դարձ­նելու հնարավորություններին, մարզում զբոսաշրջութ­յունը զար­գաց­նելու գործում հուշարձանների ընդգրկման հնարավորություններին և դրանց կարևորությանը վերաբերող հարցեր: Իր կողմից մշակված՝ հնագիտական հուշարձան-զբոսաշրջության այցելավայր  համակարգի քննարկումն ու դրա կարևորությունը թերևս զեկուցման ամենաշեշտադրված հատվածներն էին:

Վերջում Իրենա Քալանթարյանը և քննարկման մասնակիցներն անդրա­դարձան մարզում հնագիտական ժառանգության նկատմամբ ժամանակակից սերնդի հետաքրքրվածությանը, վարքագծի՝ առավել հաճախ հանդիպող դրսևորումներին և նմանատիպ այլ հարցերի: