2019թ. ապրիլի 8-13-ը ԵՊՀ Իջևանի մասնաճյուղում (առկա ուսուցման համակարգում) անցկացվում են 2018-19 ուստարվա II կիսամյակի 1-ին ընթացիկ քննություններն ու ստուգումները, ավարտական կուրսերի քննությունները:

ԵՊՀ ԻՄ-ի ուսումնամեթոդական վարչության պետ Արկադի Դավթյանի խոսքով՝ քննություններն իրականացվում են սահմանված կարգի (Բակալավրի կրթական ծրագրով ուսումնական գործընթացի կազմակերպման կարգի) համաձայն՝ նախատեսված կիսամյակի 9-րդ շաբաթում:

Սահմանված կարգի համաձայն՝ քննությունների, ընթացիկ քննությունների և ստուգումների հարցաշարերը նախապես տրամադրվում են ուսանողներին, իսկ կազմված տոմսերը, տարբերակները, թեստերը ստորագրվում են ամբիոնի վարիչի, կնքվում ֆակուլտետի դեկանի կողմից, այնուհետև ծրարավորվում են, ըստ այդմ էլ անցկացվում են քննությունները:

Գրավոր ընթացիկ քննություններն ու ստուգումներն անցկացվում են տեսախցիկներով կահավորված լսարաններում:

Յուրաքանչյուր քննությունից կամ ստուգումից հետո դասախոսը ուսանողների հետ իրականացնում է քննարկում:

Բանավոր և թեստային ձևով անցկացված քննությունները գնահատվում են անմիջապես տեղում (լսարանում), իսկ գրավոր քննությունները 7 օրվա ընթացքում ստուգվում են դասախոսի կողմից և քննարկվում ուսանողների հետ:

Քննական գործընթացի թափանցիկությունն ու հրապարակայնությունն ապահովվում է ԵՊՀ ԻՄ-ի պաշտոնական կայքէջում քննությունների արդյունքները հրապարակելու միջոցով:

Ընթացիկ քննությունների և ստուգումների արդյունքները քննարկվում են ֆակուլտետների գիտական  խորհուրդների և ամբիոնների նիստերում:

Քննությունների բոլոր լուսանկարները տե՛ս Պատկերասրահում:

 2019թ. ապրիլի 6-ին ԵՊՀ Իջևանի մասնաճյուղում տեղի ունեցավ «Աշխարհագրություն», «Ես և շրջակա աշխարհը» դասագրքերի համահեղինակ, Տուրիզմի կառավարման և մշակութաբանության ամբիոնի վարիչի պաշտոնատար Գ.Հովհաննիսյանի հանդիպումը Իջևանի Ս.Սարգսյանի անվան թիվ 1 և Մ.Մարտիրոսյանի անվան թիվ 5 հիմնական դպրոցների 2-4-րդ դասարանների ուսուցիչների հետ:

Բանախոսությունը վերաբերում էր  «Ես և շրջակա աշխար­հը» դասագրքերի թեմատիկային:

Գ.Հովհաննիսյանը պատասխանեց ուսուցիչների հարցերին, ընդհանուր կերպով ներկայացրեց իր տեսակետներն ու մտահոգությունները:

Նա ընդգծեց, որ նման հանդի­պումները նպատակ ունեն ինչպես վերհանել դասավանդ­ման ընթացքում ուսուցիչների առջև ծառացած խնդիրները, այնպես էլ նրանց ցուցաբերել մեթոդական և մասնագիտական օգնություն:

Ուսուցիչները ողջունեցին նախաձեռնությունը և առաջարկեցին այդպիսի հանդիպումներ կազմակերպել հաջորդ ուսումնա­կան տարվա սկզբին իրենց կողմից նախապես ներկայացված առաջարկների ու դիտողությունների քննարկման ձևաչափով:

 2019թ. ապրիլի 5-ին և 6-ին ԵՊՀ Իջևանի մասնաճյուղ այցելեցին Հովքի միջնակարգ և Իջևանի ավագ դպրոցների աշակերտները:

Հյուրերին դիմավորեց ԵՊՀ ԻՄ-ի մասնագիտական կողմնորոշման և պրակտիկայի բաժնի տեսուչ Սլավիկ Ալավերդյանը, ներկայացրեց մասնաճյուղի պատմությունը, նրանց ծանոթացրեց ֆակուլտետներին, լսարաններին, արվեստանոցներին և լաբորատորիաներին:

Հովքի միջնակարգ դպրոցի աշակերտները մասնակցեցին Կիրառական արվեստի և Հումանիտար գիտությունների ֆակուլտետներում ընթացող որոշ դասերի:

Իջևանի ավագ դպրոցի աշակերները ներկա եղան քիմիայի դիտարժան փորձերի, որոնք իրականացրին ԵՊՀ անօրգանական և անալիտիկ քիմիայի ամբիոնի դոցենտ, ք.գ.թ. Ռոբերտ Ադամյանը, ԵՊՀ ԻՄ-ի ընդհանուր մաթեմատիկայի և բնագիտության ամբիոնի վարիչի պաշտոնակատար, ք.գ.թ., դոցենտ Գևորգ Սիմոնյանը և նույն ամբոնի դոցենտ, ք.գ.թ. Հմայակ Իսախանյանը:

Փորձերից հետո ԵՊՀ ԻՄ-ի գրադարանում տեղի ունեցավ Ռոբերտ Խաչիկի Ադամյանի «Անօրգանական քիմիա: Անցումային շարքի տարրեր» գրքի առաջին հատորի (2 գրքով) ներկայացումը: Գիրքը ներկայացրին և ելույթ ունեցան ԵՊՀ ԻՄ-ի տնօրենի պաշտոնակատար, ֆ.մ.գ.թ., դոցենտ Ա.Ցուցուլյանը, Գ.Սիմոնյանը, Հ.Իսախանյանը և ուրիշներ:

Բոլոր լուսանկարները տե՛ս  Պատկերասրահում:

 2019թ. ապրիլի 5-ին ԵՊՀ ԻՄ-ի հեռակա ուսուցման համակարգի  «Զբոսաշրջություն» մասնագիտության առաջին կուրսի ուսանողները անգլերենով ներկայացրին «Հայաստանի տեսարժան վայրերը» թեմայով զեկուցումներ:

Դաս-միջոցառումը նախաձեռնել և կազմակերպել էր Անգլերեն լեզվի և գրականության ամբիոնի  ասիստենտ,  բ.գ.թ. Աննա Կարապետյանը:

Ուսանողները շնորհանդեսների ուղեկցությամբ ներկայացրին  Հայաստանի մի քանի տեսարժան վայրեր, որոնք մեծ հետաքրքրություն են ներկայացնում  Հայաստան այցելող զբոսաշրջիկների շրջանում:

Մասնավորապես խոսվեց Տավուշի մարզի Գոշ գյուղի մոտ գտնվող հրաշալի  Գոշ լճի մասին, որի երկարությունը 100 մետր է, լայնությունը` 80մ, առավելագույն խորությունը՝ 8մ, ամռանը ջրի ջերմաստիճանը հասնում է ընդամենը 14°C-ի: Հատկանշվեց, որ այդ տարածքում կարելի է հանդիպել անձեռակերտ տարատեսակ հուշարձանների` ժայռային տարբեր գոյացությունների, հանքային աղբյուրների և այլն: 

Ներկայացվեց Լաստիվերը, որը  դրախտային մի վայր է՝ խիտ անտառներով, քարանձավներով, գեղեցիկ ջրվեժներով և գետով: Զբոսաշրջիկների  հատուկ ուշադրությանն են արժանանում ձորում գտնվող քարանձավները, որտեղ  հասնելու համար մարդիկ կառուցել են սանդուղք: Եվ քանի որ այդ աստիճանն ավելի շատ նման է լաստի, այս վայրը ստացել է Լաստիվեր անունը:

Ուսանողները նաև խոսեցին Գեղարքունիքի մարզում՝ Սևանի թերակղզու  վրա գտնվող Սևանավանք հայկական վանական համալիրի մասին, որը հիմնադրվել է 305թ. Գրիգոր Ա Լուսավորչի կողմից: Կղզին բերդապարիսպով ամրացված է եղել դեռևս բրոնզի դարում:

«Զբոսաշրջություն» մասնագիտության 1-ին կուրսի ուսանողները ներկայացրին նաև Սևանա լիճը  և մի քանի այլ ուշագրավ վայրեր:

Նրանք շատ ոգևորված և հուզված էին, քանի որ առաջին անգամ էին զեկուցումներ ներկայացնում անգլերենով, և ցանկություն հայտնեցին հաճախակի մասնակցել նման դաս-միջոցառումերի:

 2018-2019 ուստարվա երկրորդ կիսամյակում ԵՊՀ ԻՄ-ում իրականացվում է մասնաճյուղի պրոֆեսորադասախոսական կազմի որակավորման բարձրացման կրթագիտական ծրագրի «Տեղեկատվական  և  հաղորդակցական  տեխնոլոգիաներ» մոդուլում ներառված «Աշխատանք վիրտուալ  կրթական  միջավայրում»  դասընթացը, որը վարում  է բուհի աշխատակից Աննա Մանուչարյանը:

Դասընթացում ընդգրկված  են  մասնաճյուղի  14  դասախոսներ:

«Աշխատանք վիրտուալ  կրթական  միջավայրում» դասընթացի  նպատակն  է ունկնդիր դասախոսներին ծանոթացնել առցանց ուսուցման Մուդլ (Moodle) համակարգին, գիտելիքները  էլեկտրոնային  տիրույթում  ներկայացնելու  եղանակներին  և  վիրտուալ  տիրույթում  ուսանող-ուսանող և դասախոս-ուսանող  փոխգործակցության կանոններին:

Համակարգ մուտք գործող ուսանողը կարող  է ամբողջական  տեղեկատվություն  ստանալ դասընթացի  ընդհանուր  նկարագրի, անհրաժեշտ  գրականության մասին, տրված առաջադրանքների և դրանց կատարման համար սահմանված ժամկետների վերաբերյալ:

Moodle համակարգը  հեշտացնում  է  ուսանողների  հետ  աշխատանքը, քանի  որ այդտեղ հստակ երևում է յուրաքանչյուրի անհատական  աշխատանքը: Բացի  այդ,  հարթակում ուսանողները հնարավորություն են ունենում հարցեր առաջադրելու  դասախոսին  և  ստանալու  դրանց  պատասխանները, կազմակերպելու  քննարկումներ իրար միջև:

Դասընթացի ավարտին ունկնդիր դասախոսները կկարողանան առցանց ուսուցման համակարգում ստեղծել տարբեր տիպի ուսումնական ռեսուրսներ, վերահսկել ուսանողների աշխատանքը համակարգում,  ունենալ առցանց ուսուցման համակարգում աշխատելու  կարողություն, նախագծել ամբողջական էլեկտրոնային դասընթաց: