2018թ. դեկտեմբերի 14-ին ԵՊՀ ԻՄ-ի մարզադահլիճում կայացավ «Ազդակ» սպորտային միջոցառումը, որով ամփոփվեց հաշմանդամություն ունեցող անձանց իրավունքների պաշտպանության միամսյակին (նոյեմբերի 15-ից դեկտեմբերի 15-ը) նվիրված՝ «Հավասար հնարավորություններ, հավասար իրավունքներ» խորագիրը կրող միջոցառումների շարքը: Այն կազմակերպվել էր «Հույսի կամուրջ» հասարակական կազմակերպության Իջևանի մասնաճյուղի, ԵՊՀ ԻՄ-ի Այգեհովիտի համայնքային զարգացման կամավորական խմբի և Տավուշի թեմի «Արևիկ» սոցիալ-կրթական կենտրոնի համագործակցությամբ:

Միջոցառմանը մասնակցում էին Գանձաքարի, Սևքարի, Ծաղկավանի միջնակարգ դպրոցների, «Հույսի կամուրջ» ՀԿ ԻՄ-ի, «Արևիկ» սոցիալ-կրթական կենտրոնի սաները՝ թվով 40 մասնակից:

Ներկա էին ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, վարչական աշխատակիցներ, ուսանողներ, «Արևիկ» սոցիալ-կրթական կենտրոնի տնօրեն Մ.Առաքելյանը, «Հույսի կամուրջ» ՀԿ ԻՄ-ի և դպրոցների մանկավարժներ:

Միջոցառումը վարեցին ԵՊՀ ԻՄ-ի արտակարգ իրավիճակների, մարմնակրթության և սպորտի ամբիոնի վարիչի պաշտոնակատար Ա.Վանեսյանը, ամբիոնի դասախոսներ Վ.Պողոսյանը և Պ.Կարապետյանը:

«Ազդակ» միջոցառման ընթացքում իրականացվեցին տարբեր վարժաձևեր (օձաձև անցում, վարժություն մարմնամարզական օղակներով, անցում պարկի միջով, օլիմպիական օղակի տեղափոխություն և այլն):

Հաղթեց «Հույսի կամուրջ» հասարակական կազմակերպության Իջևանի մասնաճյուղի սաների թիմը:

Միջոցառման վերջում մասնակիցներն արժանացան շնորհակալագրերի և խրախուսական նվերների, իսկ հաղթող թիմը՝ նաև պատվոգրի և գավաթի:

Միջոցառման բոլոր լուսանկարները տե՛ս Պատկերասրահում:

 2018թ. դեկտեմբերի 12-ին IAB Բիզնեսի Միջազգային Ակադեմիայում ԵՊՀ ԻՄ-ի դասախոսների համար անցկացվեց «Բիզնես հմտություններ» թեմայով՝ դասընթացավարների վերապատրաստման դասընթաց, որին մասնակցում էին Տնտեսագիտության ֆակուլտետի դեկանի պաշտոնակատար, Ընդհանուր տնտեսագիտության ամբիոնի դոցենտ, տ.գ.թ. Գայանե Ավետիսյանը, նույն ամբիոնի ասիստենտ Անժելա Ալեքսանյանը, դասախոսներ Հռիփսիմե Հայրապետյանը, Արփինե Եգանյանը և Մարիետտա Աթաբեկյանը, Ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը:

IAB Բիզնեսի Միջազգային Ակադեմիայի տնօրեն Թամարա Հովհաննիսյանը ներկայացրեց «Կոկա-Կոլա Հելլենիկ Բոթլինգ Քամփնի Արմենիա» ընկերության «Երիտասարդների զարգացում» ծրագրի շրջանակներում նախատեսված «Բիզնես հմտություններ» դասընթացի կառուցվածքը, մոդուլները (Նախագծերի կառավարում, Ժամանակի կառավարում, Բանակցություններ, Բիզնես պլան, Ֆինանսների կառավարում, Վաճառքի հմտություններ), անհրաժեշտ դիդակտիկ և բաշխվող նյութերը, նախատեսված վարժությունները և խմբային աշխատանքները:

Այնուհետև նույն ակադեմիայի աշխատակից, «Սիներջի Հայաստան» ընկերության HR մենեջեր Աննա Կոնջորյանն անցկացրեց «Արդյունավետ դասավանդման հմտությունները» թեմայով դասընթաց:

Վերջում դասընթացի մասնակիցները ստացան հավաստագրեր:

Ս.թ. դեկտեմբերի 13-14-ին, ինչպես նաև 2019թ. հունվարին նշված դասընթացավարները կվարեն Տավուշի մարզի երիտասարդների համար «Երիտասարդների զարգացում» ծրագրի շրջանակներում նախատեսված դասընթացները:

 2018թ. դեկտեմբերի 12-ին ԵՊՀ Իջևանի մասնաճյուղում տեղի ունեցավ   հանդիպում Դիլիջանի կենտրոնական դպրոցի տնօրենի և աշխատակիցների հետ:

Հանդիպման նպատակն էր ԵՊՀ ԻՄ-ի ուսանողների և աշխատակիցների հետ իրականացնել քննարկում, նրանց հետ ձեռք բերել պայմանավորվածություն Դիլիջանի կենտրոնական դպրոցում ուսումնական պրակտիկաներ կազմակերպելու վերաբերյալ:

Քննարկումը վարում էր Դիլիջանի կենտրոնական դպրոցի գործադիր տնօրեն Նաիրա Դալուզյանը:

Հանդիպման ընթացքում ներկայացվեցին Դիլիջանի կենտրոնական դպրոցի գործունեության ոլորտները, առաքելությունը, խնդիրները, դպրոցում գործող բաժինները և այլն:

Քննարկման մասնակիցները դպրոցի ներկայացուցիչներին ուղղեցին իրենց հետաքրքրող հարցերը և ստացան պատասխաններ:

 2018թ. դեկտեմբերի 12-ին ԵՊՀ  Իջևանի մասնաճյուղում կայացավ բադմինթոնի մասնաճյուղային (աղջիկների) առաջնություն:

Առաջնությանը մասնակցում էին Բնական գիտությունների ֆակուլտետի «Քարտեզագրություն և կադաստրային գործ», «Ինֆորմատիկա և կիրառական մաթեմատիկա» և Տնտեսագիտության ֆակուլտետի «Ֆինանսներ» և  «Զբոսաշրջություն» մասնագիտությունների 2-րդ կուրսերից 16 ուսանողներ:

Խաղերը կայացան օլիմպիական ձևով. պարտվողը դուրս էր մնում հետագա մրցակցությունից:

Կիսաեզրափակիչ դուրս եկած Ռուզաննա Քամալյան («Ֆինանսներ» II) – Անուշ  Նազինյան («Ֆինանսներ» II), Իննա Սողոմոնյան («ԻԿՄ» II) – Մարիաննա Ասատրյան («Զբոսաշրջություն» II) զույգերը պայքարեցին  եզրափակիչ դուրս գալու համար:

Հաղթողի կոչման համար մրցեցին  Ռուզաննա Քամալյան («Ֆինանսներ» II)  և Մարիաննա Ասատրյան («Զբոսաշրջություն» II) զույգերը:

Համառ պայքարում հաղթեց Մարիաննա Ասատրյանը:

Մարիաննա Ասատրյանը և Ռուզաննա Քամալյանը տնօրենության կողմից պարգևատրվեցին պատվոգրերով:

 2018թ. դեկտեմբերի 4-11-ին 2018-2019 ուստարվա ուսումնական պլանով նախատեսված ուսումնական պրակտիկայի շրջանակներում ԵՊՀ ԻՄ-ի «Պատմություն» մասնագիտության հեռակա ուսուցման IV կուրսի ուսանողները պրակտիկայի ղեկավար, Հայոց պատմության և հասարակագիտության ամբիոնի դասախոս Ա.Մկրտումյանի ուղեկցությամբ ճանաչողական այցեր կատարեցին Իջևանի և Դիլիջանի տարբեր պատմամշակութային և այլ հաստատություններ:

Դեկտեմբերի 4-ին նրանք այցելեցին Իջևանի պատմաերկրագիտական թանգարան: Ուսումնական պրակտիկայի շրջանակներում ուսանողները ծանոթացան թանգարանի գործունեությանը, նմուշների հավաքագրմանը և առկա ցուցանմուշներին, իրենց հետաքրքրող հարցերն ուղղեցին թանգարանի գիտաշխատողին:

Դեկտեմբերի 5-ին նույն կուրսի ուսանողները ճանաչողական այց կատարեցին ՀՀ ազգային արխիվի Տավուշի մարզի մասնաճյուղ: Նրանք ծանոթացան արխիվի պատմությանը, ֆոնդերին և արխիվի վարիչ պարոն Ռ.Վարդումյանից ստացան իրենց հետաքրքրող հարցերի պատասխանները:

Դեկտեմբերի 6-ին և 7-ին «Պատմություն» մասնագիտության IV կուրսի ուսանողները նույն պրակտիկայի շրջանակներում այցելեցին համապատասխանաբար Իջևանի Սուրբ Ամենափրկիչ և Սուրբ Ներսես Շնորհալի եկեղեցիներ, ծանոթացան եկեղեցիների պատմությանը, եկեղեցական տոներին և ծիսակարգին:

Դեկտեմբերի 11-ին նույն կուրսի ուսանողներն այցելեցին Դիլիջանի Հ.Շարամբեյանի անվան ժողովրդական արվեստի թանգարան և Դիլիջանի երկրագիտական թանգարան: Նրանք նախ տեղեկացան թագարանների ստեղծման պատմութուններին, գործունեությանը, այնուհետև շրջեցին բաժիններով և ծանոթացան թանգարաններում տեղ գտած իրերին ու նկարներին:

Նույն օրը ուսանողներն այցելեցին նաև Հաղարծին և Գոշավանք եկեղեցական համալիրներ: Բանահյուսական նյութերին և դրանց ստեղծման պատմություններին ծանոթանալուց հետո ուսանողները շրջեցին եկեղեցական համալիրների տարածքներով և ծանոթացան դրանց ճարտարապետական առանձնահատկություններին: