2018թ. հունիսի 15-ին ԵՊՀ Իջևանի մասնաճյուղում կայացավ «Դասախոս Restart» նախաձեռնող խմբի ներկայացուցիչներ պ.գ.թ., դոցենտ Դ.Թինոյանի և հ.գ.թ., դոցենտ Ա.Կոբելյանի հետ հանդիպում:

Ներկա էին մասնաճյուղի աշխատակիցներ՝ տնօրենի ԺՊ Ա. Վ. Ցուցուլյանի գլխավորությամբ:

Դ.Թինոյանը, ներկայացնելով նախաձեռնող խմբի կատարած աշխատանքը, նշեց, որ մեկ ամսվա ընթացքում կազմակերպվել են տարբեր բուհերի դասախոսների և ղեկավարությունների հետ հանդիպումներ, “Facebook” սոցիալական ցանցում քննարկումներ, որոնց շնորհիվ խմբավորվել են կրթական հաստատություններում առկա համակարգային հիմնախնդիրները:

Ա.Կոբելյանը ներկայացրեց բուհական համակարգի առողջացման համար նախաձեռնության մշակած նախնական ծրագիրը, որը ներկայացվելու է «Կրթության մասին նոր օրենքով» նախատեսվող փոփոխությունների ժամանակ՝ պրոֆեսորադասախոսական անձնակազմի կարծիքը հաշվի առնելու նպատակով.

1. Ֆինանսական և կադրային աուդիտ: Ֆինանսական աուդիտը թույլ կտա բացահայտել բուհերի ֆինանսական միջոցների օգտագործման արդյունավետությունը, իսկ կադրային աուդիտի միջոցով կբարձրանա գործի արդյունավետությունը և որակյալ կադրերի ընտրությունը, մասնավորապես՝ դասախոսների մասնագիտական շիֆրերի և դասավանդվող առարկաների համապատասխանությունը, պաշտոնի աձնագրերի առկայությունը և այլն:
2. Դրույքաչափերի նվազեցում և ուսումնական բեռնվածության հաշվարկի նորմերի բարձրացում: Օրենքով նախատեսված դրույքաչափի ժամային տատանումը չպետք է լինի 700-1080 ժամ, այլ դրույքաչափը պետք է տատանվի 600-700 ժամի սահմաններում: Ուսումնական բեռնվածության հաշվարկի նորմերի բարձրացումը թույլ կտա տեղավորվել վերը նշված ժամային սահմաններում, որպես դրույք: Մասնավորապես պետք է ավելացնել կուրսային և ավարտական աշխատանքներին տրվող ժամաքանակը, դասախոսի ծանրաբեռնվածությունը հաշվարկել ոչ թե աշխատասենյակում գտնվելու ժամանակով կամ աշխատանքային օրերով, այլ ըստ կատարած աշխատանքի:
3. Աշխատավարձերի բարձրացում: Ֆինանսական ու կադրային աուդիտի արդյունքում կավելանան հավելյալ միջոցներ, որոնց հաշվին էլ կբարձրանան աշխատավարձերը: Ըստ այդմ՝ պրոֆեսորադասախոսական ու վարչական անձնակազմը կկարողանա լուծել կենցաղային խնդիրներ և աշխատել առավել արդյունավետ ու արժանապատիվ:
4. Պաշտոնավարման ժամկետների կրճատում: Վիճակագրությունը ցույց է տալիս, որ այսօր բուհական համակարգում կարևոր պաշտոնները զբաղեցված են նույն անձանց կողմից տասնամյակներ շարունակ, որի արդյունքում կորչում է հետաքրքրությունը, ընկնում է աշխատանքի արդյունավետությունը, իրավիճակը խոչընդոտում է նոր կադրերի կայացմանը և երիտասարդ ռեսուրսների իրացմանը:
5. Կառավարման համակարգի փոփոխություն: Կարևոր վարչական պաշտոնների և կարգերի վերանայում, երիտասարդացում:

Ներկաները համամիտ էին նախաձեռնության կողմից առաջ քաշված խնդիրներին, նշեցին որ ԵՊՀ ԻՄ-ում արդեն սկսվել են մասնաճյուղի բարելավմանն ուղղված աշխատանքները, և մասնաճյուղը հաճույքով կհամագործակցի «Դասախոս Restart» նախաձեռնության հետ:

Մասնաճյուղի աշխատակիցները նաև ներկայացրին իրենց առաջարկները, մասնավորապես առաջարկեցին ավելացնել ինքնուրույն աշխատանքների թիվը, խրախուսել գիտական և հասարակական ակտիվությունը (աշխատանք խորհուրդների, հանձնաժողովների կազմում, բուհից դուրս)՝ կադրային աուդիտի ժամանակ հաշվի առնելով ոչ միայն դասախոսների որակավորումը, այլև վերջին տարիներին կատարած և տպագրած աշխատանքները:

2018թ. հունիսի 14-ին ԵՊՀ Իջևանի մասնաճյուղում կայացավ մարզպետ Վահե Ղալումյանի առաջին հանդիպումը համալսարանականների հետ:

Հանդիպմանը մասնակցում էին ԵՊՀ ԻՄ-ի տնօրենի ԺՊ Ա. Վ. Ցուցուլյանը, վարչական և պրոֆեսորադասախոսական անձնակազմի ներկայացուցիչներ, «Սերվիս» մասնագիտության առկա և հեռակա ուսուցման համակարգերի շրջանավարտներ, Տավուշի տուրիզմի զարգացման և հետազոտության կենտրոնի աշխատակիցներ, «Ինտեգրված գյուղական զբոսաշրջության զարգացում» ծրագրի համակարգող Արման Վալեսյանը, ՀՀ Տավուշի մարզպետարանի աշխատակազմի զարգացման ծրագրերի, զբոսաշրջության և վերլուծության բաժնի վարիչ Գուրգեն Հարությունյանը, մարզպետարանի այլ աշխատակիցներ, շահագրգիռ անձինք, ԶԼՄ-ների ներկայացուցիչներ:

Հանդիպման նպատակն էր ԵՊՀ ԻՄ-ի «Սերվիս» մասնագիտության լավագույն շրջանավարտների հետ քննարկել Տավուշի մարզում զբոսաշրջության զարգացման հիմնախնդիրները, լսել այդ ուղղությամբ նոր, հետաքրքիր և համարձակ գաղափարներ, ընդունել իննովացիոն նախագծերի առաջարկներ:

Երիտասարդները ներկայացրին իրենց կազմակերպած արշավների, մարզում հայտնաբերած քարանձավների ու բերդերի մասին, առաջարկեցին դրանցում զբոսաշրջիկներին ներգրավելու վերաբերյալ թարմ գաղափարներ:

Մարզպետը հանդիպման մասնակիցների ուշադրությունը հրավիրեց զբոսաշրջիկին Դիլիջանից Իջևան և Բերդի տարածաշրջան ներգրավելու ծրագրերի վրա:

Իրենց նախագծերը, տեսակետները, կարծիքներն ու առաջարկությունները ներկայացրին ՄԱԿ-ի Զարգացման ծրագրի կողմից իրականացվող «Ինտեգրված գյուղական զբոսաշրջության զարգացում» ծրագրի համակարգող Արման Վալեսյանը, ՀՀ Տավուշի մարզպետարանի աշխատակազմի զարգացման ծրագրերի, զբոսաշրջության և վերլուծության բաժնի վարիչ Գուրգեն Հարությունյանը, Տնտեսագիտության ֆակուլտետի դեկան Նելլի Խուդավերդյանը, Տավուշի տուրիզմի զարգացման և հետազոտության կենտրոնի համակարգող, մասնաճյուղի շրջանավարտ Սյուզաննա Պետրոսյանը և ուրիշներ:

Ա.Վալեսյանը խոսեց մասնավորապես Բերդ համայնքի Չինչին բնակավայրին վերաբերող նախագծի մասին:

Ն.Խուդավերդյանը որպես մարզում տուրիզմի զարգացմանը խոչընդոտող գործոններ մատնանշեց թերզարգացած ենթակառուցվածքները, ճանապարհների վատ վիճակը և նման խնդիրներ, որոնք քայլ առ քայլ լուծելու դեպքում բոլոր ծրագրերը կյանքի կկոչվեն:

Հանդիպման վերջում պարոն Ղալումյանն ընդգծեց, որ համալսարանականների հետ նման հանդիպումները հաճախակի կլինեն, քանզի ինքը շատ կարևորում է նրանց հետ համագործակցությունը, երիտասարդների կողմից առաջարկվող հետաքրքիր գաղափարներն ու նոր լուծումները:

Այնուհետև Տավուշի նորանշանակ մարզպետին ընդունեցին մասնաճյուղի տարածքում գործող Տավուշի տուրիզմի զարգացման և հետազոտության կենտրոնում, որտեղ մասնաճյուղից ամեն տարի ընտրված 5-ական ուսանող աշխատում է որպես վճարովի պրակտիկանտ:

Կենտրոնում Վ.Ղալումյանը մոտիկից ծանոթացավ մարզում տուրիզմի զարգացմանն ուղղված ծրագրերին և կատարված աշխատանքներին:

2018թ. հունիսի 4-29-ին ԵՊՀ Իջևանի մասնաճյուղում ընթանում է առկա ուսուցման համակարգի՝ 2017-2018 ուստարվա II կիսամյակի քննաշրջանը՝ ստուգարքները, եզրափակիչ գնահատմամբ և հանրագումարային քննությունները:

Հեռակա ուսուցման համակարգում 2017-2018 ուստարվա II կիսամյակի քննաշրջանը կտևի մինչև հունիսի 20-ը:

ԵՊՀ Իջևանի մասնաճյուղի ուսումնամեթոդական վարչության պետ Արկադի Դավթյանը նշեց, որ քննաշրջանն անցկացվում է սահմանված կարգով, հաստատված ժամանակացույցների համաձայն:

Նա հավաստեց, որ դասախոսները և ուսանողները քննություններին մոտենում են ամենայն պատասխանատվությամբ:

Պարոն Դավթյանը ուսանողներին ցանկացավ հաջողություն՝ քննությունների ընթացքում իրենց գիտելիքներն առավելագույնս դրսևորելու համար, իսկ դասախոսներին՝ հետևողականություն, որ ուսանողների գնահատականները հնարավորինս լիարժեք արտացոլեն նրանց գիտելիքները:

Քննության դրական շեմը չապահոված ուսանողները կկարողանան այն հանձնել լուծարքային շրջանում, որը կանցկացվի երկու փուլով և կտևի սեպտեմբերի 1-24-ը:

2018թ. հունիսի 12-ին ԵՊՀ ռեկտոր Ա. Հ. Սիմոնյանի՝ №107§88 (12.06.2018) հրամանով ԵՊՀ Իջևանի մասնաճյուղի տնօրենի ժամանակավոր պաշտոնակատար է նշանակվել Արտակ Վոլոդյայի Ցուցուլյանը:

Ա.Ցուցուլյանը ԵՊՀ Իջևանի մասնաճյուղում աշխատում է 1998 թվականից՝ զբաղեցնելով դասախոսական, ուսումնագիտական և վարչական տարբեր պաշտոններ:

1998-2001 թվականներին աշխատել է Բարձրագույն մաթեմատիկայի և բնագիտության ամբիոնում որպես դասախոս, 2001-2003-ին՝ որպես ասիստենտ:

2002թ. պաշտպանել է թեկնածուական ատենախոսություն՝ ստանալով ֆիզիկամաթեմատիկական գիտությունների թեկնածուի գիտական աստիճան:

2003  թվականից  նույն ամբիոնում զբաղեցրել է դոցենտի պաշտոն:

2004-2014 թվականներին աշխատել է որպես Բնական գիտությունների ֆակուլտետի դեկան:

2014 թվականից մինչև 2018թ. մայիսի 23-ը ղեկավարել է ԵՊՀ ԻՄ-ի ընդհանուր մաթեմատիկայի և բնագիտության ամբիոնը:

2015թ. հունվարից մինչև օգոստոս ղեկավարել է Մասնագիտական կրթության որակի ապահովման (ՄԿՈԱ) բաժինը:

2017թ. հունիսի 9-ին ՀՀ ԲՈՀ-ի կողմից Ա.Ցուցուլյանին շնորհվել է դոցենտի գիտական կոչում:

2018թ. մայիսի 24-ից նշանակվել է ԵՊՀ ԻՄ-ի փոխտնօրեն, հունիսի 12-ից՝ տնօրենի ԺՊ:

ԵՊՀ Իջևանի մասնաճյուղը տնօրենի պաշտոնում նշանակվելու կապակցությամբ շնորհավորում է Ա. Վ. Ցուցուլյանին, մաղթում աշխատանքային արդյունավետ գործունեություն, հաջողություններ ու ձեռքբերումներ բուհի առաջընթացին միտված բոլոր ծրագրերում ու ձեռնարկումներում:

2018թ. հունիսի 9-ին ԵՊՀ Իջևանի մասնաճյուղում կայացավ «Դիզայն» 3-րդ կուրսի ուսանողների լուսանկարչական աշխատանքների ցուցադրությունը «Գեղարվեստական լուսանկարչություն» դասընթացի շրջանակներում:

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ, հյուրեր:

Ցուցադրության բացումն ուղեկցվում էր դասական երաժշտությամբ:

Բացման խոսքով հանդես եկավ «Գեղարվեստական լուսանկարչություն» դասընթացի դասավանդող,  Դեկորատիվ-կիրառական արվեստի և դիզայնի ամբիոնի դասախոս Արթուր Աղաբաբյանը՝ ողջունելով ցուցադրության բոլոր այցելուներին ու մասնակիցներին, ներկայացնելով ցուցադրության կազմակերպման շարժառիթը, նպատակը, բնութագրելով աշխատանքները. «Քանի որ շատ հաջող, ընդունակ խումբ էր, որոշեցի, որ նրանց աշխատանքները պիտի ցուցադրվեն: Այդ աշխատանքները գեղարվեստական առումով բարձր մակարդակի են, դրանք մեծ մասամբ արված են հեռախոսով, բայց իրենց որակական ու տեխնիկական հատկանիշներով չեն զիջում ժամանակակից պրոֆեսիոնալ լուսանկարիչների աշխատանքներին: Նման ցուցադրությունների կազմակերպումը  ուսանողների համար կարող է մոտիվացիա ծառայել այդ ուղղությամբ մասնագիտանալու»:

Նախաձեռնությունը ողջունեց և ուսումնական գործընթացում նման միջոցառումների կազմակերպումը կարևորեց ԵՊՀ ԻՄ-ի փոխտնօրեն Ա. Վ. Ցուցուլյանը՝ հույս հայտնելով, որ մասնաճյուղում այդպիսի ցուցադրությունները կկրեն պարբերական և ավելի լայնամասշտաբ բնույթ:

Իրենց տպավորություններն արտահայտեցին Կիրառական արվեստի ֆակուլտետի դասախոսներից և ցուցադրության այլ այցելուներից:

Ցուցադրությանը ներկայացված էր յուրաքանչյուր ուսանողից 5-ական աշխատանք, որոնք դասախոսի և ուսանողի կողմից համատեղ ընտրվել էին «Գեղարվեստական լուսանկարչություն» դասընթացի շրջանակներում արված բազմաթիվ լուսանկարներից:

Ներկայացված աշխատանքները հիմնականում գեղարվեստական լուսանկարչության ժանրի էին, որոնցում շեշտը դրված էր կոմպոզիցիայի և ստեղծագործական մտքի ճիշտ կառուցման վրա:

Կային նաև ռեպորտաժային լուսանկարներ, որոնցում պատկերված էին առօրյա կյանքում հանդիպող իրավիճակներ, կենցաղային ուշագրավ դրվագներ:   

 Ցուցադրությունը մեծապես տպավորեց համալսարանականներին՝ նրանց համակելով լուսանկարների բովանդակությունից բխող մտորումներով: