2017թ. նոյեմբերի 8-ին ԵՊՀ Իջևանի մասնաճյուղում տեղի ունեցավ «Ինչպե՞ս ներկայացնել գիտական զեկուցում» խորագրով սեմինարը, որը նախաձեռնել էր մասնաճյուղի ուսանողական գիտական ընկերությունը (ՈՒԳԸ):

Ներկա էին տարբեր ֆակուլտետների ուսանողներ: Սեմինարը վարում էր ՈՒԳԸ համակարգող, Ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը:

Սեմինարավարը ներկայացրեց գիտական հետազոտության ընթացքը.

1. Ընտրված թեմայի այժմեականության հիմնավորում,
2. Հետազոտության նպատակի և խնդիրների սահմանում,
3. Հետազոտության օբյեկտի և առարկայի սահմանում,
4. Հետազոտության իրականացման մեթոդի (մեթոդիկայի) ընտրություն,
5. Հետազոտության գործընթացի նկարագրություն,
6. Հետազոտության արդյունքների վերլուծություն,
7. Ստացված արդյունքների գնահատում և հետևությունների ձևակերպում:

Այնուհետև տրվեցին որոշ հասկացությունների բացատրություններ, թվարկվեցին հետազոտության մեթոդներըը (դիտում, համեմատում, գիտափորձ, չափում, մոդելավորում, վերացարկում, ինդուկցիա, դեդուկցիա, վերլուծություն, համադրություն և այլն), գիտահետազոտական աշխատանքների տեսակները (ռեֆերատ, գիտական հոդված, կուրսային և ավարտական աշխատանքներ և այլն), դրանց կառուցվածքը (անվանաթերթ, բովանդակություն, ներածություն, հիմնական մաս, եզրակացություն, գրականության ցանկ, հավելվածներ):

Հանգամանորեն ներկայացվեց աղբյուրներից օգտվելու և հղումներ կատարելու կարգը և նշանակությունը.

1. Գրագողությունից խուսափում,
2. Ստուգելիության ապահովում,
3. Հարգանքի դրսևորում այլոց աշխատանքների հանդեպ,
4. Այլոց աշխատանքներով սեփական տեսակետի հիմնավորում,
5. Ուսումնասիրվող թեմային քաջածանոթություն:

Բացատրվեցին նաև համացանցում արդյունավետ որոնման նրբությունները (Google փնտրման օպերատորներ) և գիտական գրականություն պարունակող հիմնարար կայքերը:

Սեմինարի վերջում ներկայացվեցին համապատասխան ձեռնարկները, որոնցում մանրամասն շարադրված են գիտական աշխատանք կատարելու սկզբունքները, մասնավորապես՝ ԵՊՀ ՈՒԳԸ «Գիտահետազատական աշխատանք կատարելու հիմնական սկզբունքները» մեթոդական ցուցումները և Վազգեն Գաբրիելյանի «Գրավոր խոսք» ուսումնական ձեռնարկը:

«Ինչպե՞ս ներկայացնել գիտական զեկուցում» խորագրով սեմինարը բավականին հետաքրքիր էր և ուսանելի:

2017թ. նոյեմբերի 7-ին Հայոց լեզվի և գրականության ամբիոնի դոցենտ, ՄԿԾ-ի պատասխանատու, բ.գ.թ. Աիդա Սարհատյանը «Հայոց լեզու և գրականություն» դասընթացի շրջանակներում բաց դաս անցկացրեց «Անգլերեն լեզու և գրականություն» մասնագիտության առաջին կուրսում:

Դասին հրավիրված էին ԵՊՀ ԻՄ-ի տնօրեն Ս. Ա. Առաքելյանը, Հումանիտար գիտությունների ֆակուլտետի դեկան Ա.Ներսիսյանը, դասախոսներ:

Բաց դասը բավականին հետաքրքիր էր և բովանդակալից:

Նախ Ա.Սարհատյանը ներկայացրեց դասի թեման («Բառապաշարի դասակարգման սկզբունքները»), նպատակը և խնդիրները (ըստ համապատասխան հատկանիշների՝ ժամանակակից հայոց լեզվի բառապաշարի դասակարգումը. բառային հիմնական ֆոնդ և բառային կազմ, փոխառություններ, հնաբանություններ, նորաբանություններ, դիպվածային բառեր, օտարաբանություններ, ժարգոնային բառեր, տերմիններ և այլն):

Ինչպես հայոց լեզվի և գրականության յուրաքանչյուր դասի, այնպես էլ այս բաց դասի համար տիկին Սարհատյանը մշակել էր համապատասխան մեթոդներ ու ձևեր, որոնք նպաստում են թե՛ ուսանողների գիտելիքների հարստացմանն ու գիտական նյութի յուրացմանը, թե՛  նրանց աշխարհայացքի ու մտահորիզոնի զարգացմանը, թե՛ բառապաշարի հարստացմանը, ստեղծագործական մտքի ու երևակայության շարունակական ձևավորմանը, թե՛ գեղագիտական ճաշակի բարձրացմանը:

Հայտնի է, որ հայոց լեզվի ուսումնասիրությունը` հիմնված  դպրոցում ձեռք բերած գիտելիքների և լեզվական կարողությունների վրա, նպաստում է օտար լեզուների իմացության խորացմանը, օտար լեզվամտածողության ընկալմանը, մայրենի և օտար լեզուների բառապաշարային, կառուց­վածքային ընդհանրությունների ու տարբերությունների ըմբռնմանը, մայրենի լեզվի և օտար լեզուների հաղորդակցական հնարավորու­թյունների համադրմանը:

Ըստ այդմ՝ բառապաշարի շերտերի մասին դպրոցում ձեռք բերված գիտելիքները ուսանողները բաց դասի ընթացքում խորացրին ու հարստացրին իրենց արդեն ծանոթ բառարանային ու հայ դասականների ստեղծագործությունների բառապաշարի քննությանը վերաբերող ինքնուրույն հանձնարարականներով: 

Ընթերցվեցին անգլերենից հայոց լեզու անցած տասնյակ բառեր` հայերեն համարժեքներով, նորաբանությունների, հնաբանությունների,  փոխառությունների ու ժողովրդախոսակցական բառերի շերտեր:

Կարևորվեցին նաև երկու (անգլերեն և հայերեն)  լեզուների միջառարկայական ու միջմշակութային կապերն ու  փոխազդեցությունները:

Ուսանողները խմբովին կատարեցին Կոմիտասի «Կաքավիկն» ու «Հո՛վ արեք, սարեր ջան»-ը, ապա անգլիական ժողովրդական թովիչ մի սիրերգ:

Երգերի կատարմանը հաջորդեց մեծ ներշնչումով գրված ստեղծագործական շարադրությունների ընթերցումը, որոնք իրենց հուզական խորունկ լիցքերով հաճելի տպավորություն թողեցին ներկաների վրա:

Բաց դասն անցավ բուռն ու հետաքրքիր քննարկումներով, որոնց ակտիվ մասնակցություն ունեցան նաև դասին հրավիրված պարոն Առաքելյանն ու Ներսիսյանը:

Տնօրենն ու ֆակուլտետի դեկանն իրենց գոհունակությունն արտահայտեցին բարձր մակարդակով կազմակերպված, հետաքրքիր ու բովանդակալից դասի համար՝ ևս մեկ անգամ ընդգծելով մայրենի և օտար լեզուների իմացության, նրանց հաղորդակցական հնարավորու­թյունների կիրառման, միջմշակութային կապերի կարևորությունը:

2017թ. նոյեմբերի 3-ին Կիրառական արվեստի ֆակուլտետում  կայացավ Դեկորատիվ-կիրառական արվեստի և դիզայնի ամբիոնի ընդլայնված նիստը, որը վարում էր ամբիոնի վարիչ, արվեստագիտության թեկնածու Մ.Հարությունյանը:

Ընդլայնված նիստին հրավիրված էր Կիրառական արվեստի ֆակուլտետի դեկան, ֆ.մ.գ.թ., դոցենտ Ա.Մարգարյանը, մասնակցում էին ամբիոնի անդամները:

Նիստի ընթացքում ներկայացվեցին կրթական ծրագրի պատասխանատուի, ամբիոնի վարիչի հաշվետվությունները՝ 2017-18 ուստարվա առաջին կիսամյակում (սեպտեմբեր-հոկտեմբեր ամիսներին) իրականացված աշխատանքների վերաբերյալ:

Ամբիոնի վարիչ Մարտին Հարությունյանը ներկայացրեց ըստ 2017-18 ուստարվա աշխատանքային պլանի իրականացված հետևյալ աշխատանքները.

• Մշակվել են պորտֆոլիոներն ու առարկայական ծրագրերը ըստ նոր՝ 2017-2021 ուսումնական պլանի, ուշադրություն է դարձվել 1-ին կուրսի դասընթացների փաթեթներին, քանի որ առկա են մի քանի նոր առարկաներ, որոնք կկիրառվեն առաջիկա տարիներին ևս:
• Ամբիոնի նիստերին և նիստերից դուրս պարբերաբար կազմակերպվել են առարկայական ծրագրերի, դասավանդման մեթոդների վերաբերյալ քննարկումներ, հետևելով աշխատանքային պլանին՝ իրականացվել են համապատասխան դասալսումներ:
• Հաստատվել են ավարտական և կուրսային աշխատանքների թեմաները, ղեկավարների և ուսանողների հանդիպումների ժամանակացույց է սահմանվել:
• Պարբերաբար իրականացվում են «Դիզայն» մասնագիտության առարկաների վերաբերյալ մանրամասն քննարկումներ ամբիոնի դասախոսների հետ:
• Ամբիոնի դասախոսներից 3-ը (Ք.Մխիթարյանը, Ա.Չիբուխչյանը և Դ.Չիբուխչյանը) աստիճանաբար ներգրավվում են «Դիզայն» մասնագիտության դասավանդման գործընթացում:

• ՄԿԾ-ի պատասխանատուի հետ պարբերաբար իրականացվում են աշխատանքներ նոր ՄԿԾ-ի ներդրման համար:
• Ամբիոնի ասիստենտ, մ.գ.թ. Լ.ֆլջյանի՝ դոցենտի գիտական կոչման հայցման համար պատրաստվել և հանձնվել են համապատասխան փաստաթղթերը:
• Իրականացվում է համապատասխան աշխատանք «Դիզայն» մասնագիտության 3-րդ կուրսի ուսանողների ամառային արտադրական պրակտիկան արդյունաբերական դիզայնի ճյուղ ներկայացնող որևէ արտադրական ընկերությունում անցկացնելու համար:
• Ամբիոնի 4 դասախոսների 7 գիտական հոդվածներ տպագրվել են հայաստանյան և միջազգային գիտական ամսագրերում:

Նիստի ընթացքում ելույթներով և մի շարք հետաքրքիր առաջարկներով հանդես եկան ֆակուլտետի դեկան Ա.Մարգարյանը, դասախոսներ Դ.Չիբուխչյանը, Տ.Բագամյանը և ուրիշներ:

Ամբոնի վարիչի առաջարկով միաձայն ընդունվեց, որ «Դիզայն» մասնագիտության ավարտական աշխատանքները լինեն միայն դիզայնի արդյունաբերական ճյուղ ներկայացնող որևէ ոլորտից, իսկ «Դիզայն» մասնագիտության ուսումնական գործընթացում աստիճանաբար ներդրվի արդյունաբերական դիզայնը:

Մ.Հարությունյանը ներկայացրեց նաև առաջիկա անելիքները.

• Ամբիոնի դասախոսների կողմից կցուցաբերվի ակտիվություն ՄԿԾ-ի մշակման համար:
• Ամբիոնը կհետևի ավարտական աշխատանքների իրականացմանը՝ փուլերի ճիշտ կատարմանն ու վերջնարդյունքների հստակությունը:
• Կկազմակերպվեն հետաքրքիր և մոտիվացնող պրակտիկաներ:
• Ամբիոնի հաջորդ նիստերին դասախոսներին կներկայացվի Բիոնիկայի ուսումնամեթոդական ձեռնարկի նախնական տարբերակը՝ քննարկման համար (հեղ.՝ Մարտին Հարությունյան):
• Կիրականացվեն ակտիվ աշխատանքներ ամբիոնի դասախոսական կազմը անհրաժեշտ մասնագետներով (դիզայներ, հագուստի գեղարվեստական ձևավորման, համակարգչային եռաչափ մոդելավորման և մակետավորման մասնագետներ) համալրելու համար: