2017թ. սեպտեմբերի 29-ին ԵՊՀ ԻՄ-ում կայացավ «Տավուշ» ռազմահայրենասիրական ակումբի անդամների հետ մասնաճյուղի տնօրեն Ս.Առաքելյանի հանդիպումը:

Հանդիպման հիմնական նպատակն էր «Տավուշ» ռազմահայրենասիրական ակումբի նոր նախագահի նշանակումը:

Նախ` ակումբի գործող նախագահ Լազր Ափինյանն անդրադարձավ կառույցի գլխավոր առաքելությանը, խնդիրներին, կատարված աշխատանքներին, մարզի տարբեր ոլորտների (ռազմական, ուսումնական, հասարակական) ներկայացուցիչների, հաստատությունների ու կազմակերպությունների  հետ համագործակցությանը:

Ելույթ ունեցավ մասնաճյուղի տնօրեն Ս. Ա. Առաքելյանը, ևս մեկ անգամ ընդգծեց մատաղ սերնդի (հատկապես արական սեռի ներկայացուցիչների) ռազմահայրենասիրական դաստիարակության կարևորությունը, մեկնեց ազգ-պետություն-բանակ եռամիասնության խորհուրդը: Տնօրենն ընդհանուր առմամբ իր գոհունակությունն արտահայտեց ակումբի և մասնավորապես նրա նախագահ Լազր Ափինյանի` մարզում երիտասարդների ռազմահայրենասիրական ոգին բարձրացնելուն ուղղված գործունեությունից (բուհի, քաղաքի և մարզի մասշտաբով տարբեր միջոցառումներ, սեմինարներ, այցելություններ զորամասեր, ուխտագնացություններ պատմամշակութային վայրեր և այլն): Միայն հավելեց, որ ամեն փոփոխություն (այդ թվում` ակումբի նախագահի) պիտի տանի դեպի առաջընթաց, գերազանցի նախորդին. այդ իմաստով շեշտվեց ՀՀ զինված ուժերում ծառայած ուսանողներին ակումբում առավելագույնս ընդգրկելու,  նրանց ներուժը, փորձն ու հմտությունները կիրառելու անհրաժեշտության, գործնական դասընթացներ կազմակերպելու հնարավորության մասին:

Այնուհետև «Տավուշ» ռազմահայրենասիրական ակումբի նոր նախագահ նշանակվեց «Տնտեսագիտության տեսություն» մասնագիտության երկրորդ կուրսի ուսանող Արեն Թամրազյանը, ով շնորհակալություն հայտնեց վստահության համար և խոստացավ պատվով իրականացնել իրեն վստահված այդ պատասխանատու գործը:

Ակումբի նորանշանակ նախագահին շնորհավորեցին մասնաճյուղի տնօրեն Ս.Առաքելյանը և ակումբի նախկին նախագահ Լազր Ափինյանը` նրան մաղթելով ակտիվ և արդյունավետ գործունեություն, հաջողություն իր նոր ձեռնարկումներում:  

2017թ. սեպտեմբերի 28-ին ԵՊՀ Իջևանի մասնաճյուղում կայացավ «Բանավեճի տեխնիկա» թեմայով սեմինարը, որը նախաձեռնել էր ՈՒԽ-ի գիտակրթական հանձնաժողովը:

Սեմինարը վարեց «Տնտեսագիտություն» մասնագիտության երկրորդ կուրսի ուսանող Հրանտ Ղարագյոզյանը:

Նախ ներկայացվեց, թե ինչ է բանավեճը, ինչ կտա այդ թեմայով սեմինարն ուսանողներին, ստացված գիտելիքները որտեղ և ինչպես նրանք կարող են օգտագործել:

Ապա սեմինարավարն ընդգծեց, որ բանավեճում հաղթանակ տանելու համար քիչ է լինել լավ հռետոր, մասնագետ, գիտնական կամ փաստաբան, պետք է նաև ջանք, եռանդ, փորձառություն և լուրջ նախապատրաստական աշխատանք: Բանավեճի ելույթի յուրաքանչյուր դրույթը պետք է լավ կառուցված, հիմնավորված ու ազդեցիկ լինի:

Անդրադարձ կատարվեց նաև Քոլին Ֆլինի տված խորհուրդներին, թե ինչպես պետք է կառուցել բանավիճային ելույթները:

Բանավեճը դիտարկելով արվեստի տեսանկյունից՝ առանձնացվեցին այն հատկանիշները, որ պետք է ունենա բանավիճող անձը.

• կիրք,
• պատրաստվածություն,
• հավասարակշռություն և ինքնավստահություն,
• ներկայացում:

Հանգամանորեն ներկայացվեց հիմնավորումների կառուցվածքն ու առանցքը:

Սեմինարը եզրափակվեց բանավեճի էթիկային վերաբերող հետևյալ դրույթներով.

• Մի՛ գողացիր ուրիշի մտքերը. նշի՛ր աղբյուրը:
• Մի՛ ընդհատիր դիմացինիդ:
• Լսի՛ր դիմացինիդ:
• Բանավիճի՛ր տեսակետների/դիրքորոշման հետ, ոչ թե մարդու արժեքների:
• Բոլորս տարբեր ենք. յուրաքանչյուրն ունի իր կարծիքը:
• Որքան էլ տեսակետները տարբեր են, անհրաժեշտ է համերաշխություն պահպանել:

2017թ. սեպտեմբերի 28-ին ԵՊՀ Իջևանի մասնաճյուղի ուսանողական խորհրդի  նախաձեռնությամբ առաջին կուրսեցիների հետ կայացավ «Ինչպե՞ս ճիշտ կազմակերպել ուսանողական առօրյան» թեմայով քննարկում:

Քննարկմանը մասնակցում էին ԵՊՀ ԻՄ-ի տարբեր մասնագիտությունների ավագ կուրսերի բարձր առաջադիմությամբ  ուսանողներ, ովքեր իրենց դրական փորձը փոխանցեցին կրտսեր ընկերներին:

Նախ ներկայացվեցին բուհում սովորելու առանձնահատկությունները, այդ համատեքստում ընդգծվեց, որ բուհում, ի տարբերություն դպրոցի, գիտելիքների ու մասնագիտական հմտությունների մեծ մասն ուսանողները ձեռք են բերում ինքնուրույն աշխատանքի միջոցով:

Առաջին կուրսեցիներին կոչ արվեց լինել նպատակասլաց, ուսումնատենչ, ակտիվ և նախաձեռնող, երբևէ չտրվել ծուլությանը:

«Մանկավարժություն և հոգեբանություն» մասնագիտության ավագ ուսանողները առաջին կուրսեցիներին տվեցին ժամանակը արդյունավետ օգտագործելու, ուսումնառության ընթացքը ճիշտ կազմակերպելու վերաբերյալ օգտակար խորհուրդներ.

• Ճիշտ կազմակերպել ինքնուրույն պարապմունքները. 50 րոպե աշխատելուց հետո ընդմիջել 5-10 րոպե, իսկ 3 ժամ աշխատելուց հետո՝ 20-25 րոպե:
• Մտավոր աշխատանքի հոգնածությունը թոթափելու համար կատարել ֆիզիկական վարժություններ, քանի որ մտավոր և ֆիզիկական պարապմունքների հերթագայումը վերականգնում է աշխատունակությունը:
• Դասախոսություններից առաջ կարդալ գրառումները և վերհիշել նախորդ դասախոսությունը:
• Դասախոսության գրառումները համեմատել ձեռնարկի համապատասխան թեմայի հետ՝ կատարելով անհրաժեշտ լրացումներ:
• Գրառման մեջ նշել կարևոր հատվածները:
• Տվյալ նյութին բանավոր լավ չտիրապետելու դեպքում կազմել շարադրվող նյութի պլան, բայց ոչ համառոտ պատասխաններ, հակառակ դեպքում մեխանիկորեն կընթերցվի նյութը:
• Սեմինար կամ քննություն պատասխանելիս չհուզվել, խոսքը կառուցել հստակ և հաղթահարել լսարանի առջև ելույթ ունենալու բարդույթը, համարձակ մասնակցել բանավեճերի, իսկ սխալվելու դեպքում երբեք չհուսահատվել:

Ներկայացվեցին մի քանի հնարքներ, որոնցով կարելի է մարզել հիշողությունը:

Կարևոր խորհուրդը, որ տրվեց ուսանողներին, յուրաքանչյուր օրվա ընթացքում դասերին ժամանակ հատկացնելն էր, հետևողականորեն սովորելը՝ քննաշրջանին լիարժեք մասնակցելու նպատակով: Քննաշրջանի ընթացքում ուսանողներին խորհուրդ տրվեց.

• Քննության նախորդ գիշերը չպարապել և հանգիստ քնել:
• Շուտ գալ քննության, որպեսզի անցնի նախնական հուզվածությունը:
• Քննատոմսը վերցնել՝ առանց երկար մտածելու:
• Թղթի վրա ազատ տեղեր թողնելով՝ կազմել առաջին հարցի պատասխանի մոտավոր սխեման. երբ սխեման պատրաստ լինի, ազատ տեղերում գրառել առավել համառոտ պլանը:
• Առաջին հարցն ավարտելու դեպքում անցնել հաջորդ հարցին:
• Ժամանակատար հարցին անդրադառնալ վերջում:
• Պատասխանել միայն բուն հարցին և այլն:

Վերջում ելույթ ունեցան տարբեր կուրսերի ուսանողներ՝ ներկայացնելով, թե ուսումնառության ընթացքում ինչպիսի դժվարությունների են հանդիպել և ինչպես են դրանք հաղթահարել:

2017թ. սեպտեմբերի 28-ին ԵՊՀ ԻՄ-ի դեկորատիվ-կիրառական արվեստի և դիզայնի ամբիոնի վարիչ, արվեստագիտության թեկնածու Մարտին Հարությունյանը Հայ-ռուսական համալսարանում մասնակցեց “Development of approaches to harmonization of comprehensive internationalization strategies in higher education, research and innovation at EU and Partner Countries” աշխատանքային կոնֆերանսին, որը կազմակերպվել էր ԵՄ ERASMUS+ ծրագրի օժանդակությամբ:

Համաժողովը, որի աշխատանքային լեզուն անգլերենն էր, նվիրված էր Բարձրագույն կրթության միջազգայնացման խնդիրներին:

Ելույթներով հանդես եկան Հայաստանի, Բելոռուսի, Ռուսաստանի, Մեծ Բրիտանիայի տարբեր բուհերի միջազգային հարաբերությունների բաժնի աշխատակիցները, ՀՀ ԿԳՆ և ERASMUS+ ծրագրի հայաստանյան ներկայացուցիչները:

Ներկայացվեցին և ցուցադրվեցին մի շարք նյութեր, որոնք վերաբերում էին բուհերի միջազգային ծրագրերի ընդլայնմանն ու ՀՀ բարձրագույն կրթության միջազգայնացման խնդիրներին, մասնավորապես՝

• պրոֆեսորադասախոսական և վարչական անձնակազմի միջազգային գործուղումների կարևորությանը,
• ՀՀ բուհերի դասախոսների անգլերենի ցածր իմացությանը,
• HARMONY և ERASMUS+ ծրագրերիկարևորությանը,
• Աշխատակիցների մասնագիտական կարողությունների կատարելագործման հնարավորություններին,
• բուհերի միջազգային կապերի բաժինների արդյունավետ աշխատանքին ու թերություններին,
• միջազգային փոխանակման ծրագրերին ուսանողների առավել ակտիվ մասնակցությանը,
• բուհերի կայքերի անգլերեն տարբերակների կարևորությանն ու դրանց պարբերաբար թարմացմանը,
• միջազգային, ինչպես նաև տեղական շուկաներում դիպլոմների ճանաչմանը,
• արտասահմանցի ուսանողներին խրախուսելուն և նրանց պատշաճ կրթաթոշակ նշանակելուն և այլն:

Ներկայացվեցին նաև միջազգային ծրագրերին ՀՀ բուհերի մասնակցությանը, ուսանողների փոխանակման ծրագրերին և մի շարք խնդիրների հնարավոր լուծմանը վերաբերող տարբեր վերլուծություններ:

Կոնֆերանսի աշխատանքներն արդյունավետ էին և ուսանելի:

2017թ. սեպտեմբերի 25-ին ԵՊՀ Իջևանի մասնաճյուղում կայացավ «Ֆոլքները «Շառաչ և ցասում» վեպի հեղինակ» խորագրով գրական միջոցառումը (անգլերեն)` նվիրված գրականության Նոբելյան մրցանակակիր, ամերիկացի գրող Ուիլյամ Ֆոլքների (սեպտեմբերի 25, 1897−հուլիսի 6, 1962) ծննդյան 120-ամյակին: Այն կազմակերպել էր «Անգլերեն լեզու և գրականություն» մասնագիտության կրթական ծրագրի պատասխանատու Աստղիկ Սիմոնյանը:

Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ և ուսանողներ:

Նախ ցուցադրվեց Ֆոլքների և նրա գրական գործունեության մասին վավերագրական ֆիլմ:

Այնուհետև դասախոսություններով հանդես եկան Անգլերեն լեզվի և գրականության ամբիոնի դասախոսներ Ջեմմա Միլիտոնյանը, Աստղիկ Սիմոնյանը և Շուշանիկ Գրիգորյանը:

Ֆոլքների կենսագրության որոշ հարցերի վերաբերյալ մեկնաբանությամբ (“On Faulkner’s Biography”) հանդես եկավ Ջ.Միլիտոնյանը:

«Շառաչ և ցասում» վեպի առանցքային թեմաները (“The Themes in W. Faulkner’s “The Sound and the Fury” in a Nutshell”) ներկայացրեց  Ա.Սիմոնյանը:

Նշվեց, որ «Շառաչ և ցասում»-ը (1929), որի վերնագիրը  վերցված է շեքսպիրյան «Մակբեթից»,  Ֆոլքների չորրորդ վեպն է: Սկզբում այն հաջողություն չէր ունենում, հայտնի է դարձել միայն լույս տեսնելուց երկու տարի անց՝ Ֆոլքների մյուս վեպի տպագրումից հետո, բայց առաջին 16 տարիների ընթացքում տպագրվեց միայն 3000 տպաքանակով։ Այն ժամանակ, երբ Ֆոլքներն արժանացավ Նոբելյան մրցանակի (1949-ին), «Շառաչ և ցասում»-ն արդեն ուներ ժամանակակից գրականության դասական վեպի վարկանիշ։

«Բանականության հոսքի տեխնիկան Ֆոլքների «Շառաչ և ցասում» վեպում» թեմայով դասախոսություն (“The Stream of Consciousness Technique in Faulkner’s “The Sound and the Fury”) կարդաց Շ.Գրիգորյանը:

Նախաձեռնությունը բավականին հետաքրքիր էր, ուսանելի և գոհունակությամբ ընդունվեց ներկաների կողմից: