2017թ. սեպտեմբերի 23-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը Մարդկային ռեսուրսների կառավարման և վերապատրաստման բաժնի աշխատակիցների հետ:

Հիշենք, որ նոր ուսումնական տարում մասնաճյուղում կատարվել էր կառուցվածքային փոփոխություն. Անձնակազմի կառավարման բաժինը վերակազմավորել էր Մարդկային ռեսուրսների կառավարման և վերապատրաստման բաժնի` իր խնդիրներով ու գործառույթներով:

 Հանդիպման նպատակն էր վերակազմավորված բաժնի գործառույթների ու խնդիրների, աշխատանքի արդյունավետության բարձրացման ուղիների քննարկումը:

Ներկայացվեց, որ Մարդկային ռեսուրսների կառավարման և վերապատրաստման բաժնի գործունեությունը մասնավորապես ընդգրկում է ԵՊՀ ԻՄ-ի աշխատողների աշխատանքի ընդունման և ազատման գործընթացը, նրանց անձնական տվյալների վարումը, համապատասխան հրամանների, պայմանագրերի և այլ փաստաթղթերի ձևակերպումը, պաշտոնի անձնագրերի, աշխատանքի նկարագրության և աշխատողի պարտականություններն ու իրավասությունը սահմանող իրավական այլ ակտերի նախապատրաստումն ու ընդունումը և այլն:

Հատուկ ուշադրություն դարձվեց բաժնի կողմից իրականացվելիք մասնագիտական զարգացման գործընթացին (կարիքների գնահատում, վերապատրաստումներ, զարգացման այլ միջոցառումներ), աշխատանքի վարձատրության, պարգևատրման, պաշտոնեական առաջխաղացման, արձակուրդների ձևակերպման, աշխատանքից ազատման հետ կապված խնդիրների լուծմանը, աշխատանքի արդյունավետության գնահատման, ատեստավորման իրականացման, աշխատողների խրախուսման ու նրանց նկատմամբ կարգապահական տույժերի կիրառման գործընթացներին:

2017թ. սեպտեմբերի 21-ին ԵՊՀ Իջևանի մասնաճյուղում տեղի ունեցավ ՀՀ անկախության 26-ամյակին նվիրված միջոցառում, որը կազմակերպել էր Ուսանողական խորհուրդը:

Միջոցառմանը ներկա էին ԵՊՀ ԻՄ-ի վարչական և պրոֆեսորադասախոսական անձնակազմի ներկայացուցիչներ, ուսանողներ, հյուրեր:

Անկախության տոնին նվիրված միջոցառումը բացվեց համայն հայությանն ուղղված շնորհավորական խոսքով, հարատևության, ամուր կամքի ու տոկունության մաղթանքով:

Ապա տրվեց տոնի վերաբերյալ պատմական համառոտ ակնարկ, թե ինչպես 1991թ. սեպտեմբերի 21-ին հայ ժողովուրդը համազգային հանրաքվեում միասնաբար քվեարկեց ԽՍՀՄ կազմից դուրս գալու և Հայաստանի անկախ պետություն ստեղծելու օգտին: 

Տոնի նախապատմությանը հաջորդեցին մասնաճյուղի շնորհալի ուսանողների գեղեցիկ կատարումները:

Միջոցառման ընթացքում ներկայացվեցին հայրենասիրական ոգեշունչ երգեր, հայի հաղթական ոգին մարմնավորող  ազգային խրոխտ պարեր:

ՀՀ անկախության 26-ամյակին նվիրված միջոցառումը եզրափակվեց մասնաճյուղի տնօրեն, պ.գ.թ., դոցենտ Ս. Ա. Առաքելյանի ելույթով: Այս համազգային տոնի առթիվ  տնօրենը շնորհավորեց բոլորին, ընդգծեց  անկախության գաղափարի կարևորությունն ու անհրաժեշտությունը հայ ժողովրդի հարատևության, հայոց պետականության ամրապնդման ու երկրի հզորացման գործում: Պարոն Առաքելյանը հավելեց, որ մեր երկրի ապագան հուսալի ձեռքերում է, քանզի ունենք հրաշալի երիտասարդ սերունդ, որ ավագ սերնդի արժանավոր հետնորդն է, նրա հայրենանվեր գործը պատվով շարունակողը:

2017թ. սեպտեմբերի 21-ին` Հայաստանի Հանրապետության անկախության  26-րդ տարեդարձին, ԵՊՀ Իջևանի մասնաճյուղի վարչական անձնակազմի ներկայացուցիչները և ուսանողները՝ տնօրեն Սամվել Առաքելյանի գլխավորությամբ, այցելեցին Իջևանի Ազատամարտիկների հրապարակ:

Իջևանում ՀՀ անկախության 26-ամյակին նվիրված միջոցառումների շարքը մեկնարկեց Տավուշի մարզպետարանին հարակից Սահմանադրության հրապարակից, որտեղ մարզի ղեկավարության կողմից նախ իրականցվեց Աշոտ Երկաթ թագավորի արձանի հանդիսավոր բացումը:

Այնուհետև Սահմանադրության հրապարակից Տավուշի մարզի տարբեր ոլորտների բարձրաստիճան ներկայացուցիչների, զինվորական նվագախմբի, բազում քաղաքացիների ուղեկցությամբ համալսարանականները շարժվեցին դեպի Ազատության հրապարակ, հարգանքի տուրք մատուցեցին, ծաղկեպսակներ դրեցին Իջևանում գտնվող` Զոհված ազատամարտիկների անունը հավերժացնող հուշարձանին:

Այդտեղ շնորհավորանքի ու օրհնանքի խոսք ասաց Տավուշի թեմի առաջնորդ Տեր Բագրատ եպիսկոպոս Գալստանյանը՝ հնչեցնելով Տերունական ու Խաղաղության աղոթք:

ՀՀ անկախության 26-ամյակին նվիրված միջոցառումների շարքը եզրափակվեց Իջևանի մշակույթի տանը կազմակերպված տոնական համերգով:

_________________________________

1991թ. սեպտեմբերի 21-ին, ՀՀ Գերագույն խորհրդի՝ 1991 թ. մարտի 1-ի որոշմամբ, Հայաստանի Հանրապետությունում անցկացվեց հանրաքվե հետևյալ հարցադրմամբ՝ «Համաձայն ե՞ք, որ Հայաստանի Հանրապետությունը լինի անկախ ժողովրդավարական պետություն, ԽՍՀՄ կազմից դուրս»:  

Հայ ժողովուրդը միասնաբար (99% ձայների մեծամասնությամբ) «Այո» ասաց անկախությանը: Հայաստանի պատմության մեջ հաստատվեց երրորդ հանրապետության շրջանը. ՀԽՍՀ-ն վերանվանվեց Հայաստանի Հանրապետություն: Որպես հանրապետության դրոշ հաստատվեց եռագույնը, այնուհետև ընդունվեց զինանշանը:

Գերագույն խորհրդի կողմից անկախության հռչակումից հետո տասնյակ պետություններ ճանաչեցին Հայաստանի Հանրապետությունը: Առաջինը Լիտվան էր, որը մինչև անկախության հռչակումը դեռևս 1991 թ. օգոստոսի 14-ին ճանաչել էր Հայաստանի Հանրապետության անկախությունը, իսկ արդեն հռչակագրի ընդունումից հետո՝ 1991 թվականի ընթացքում, ևս 47 պետություն ճանաչեց Հայաստանի Հանրապետության անկախությունը:

Ենթադրվում էր, որ անկախությունը նոր հնարավորություններ է բացելու Հայաստանի համար: Որպես Հանրապետություն՝ Հայաստանն արդեն ունակ էր լինելու ստեղծել սեփական դիվանագիտական կապերը տարբեր երկրներում և վարել ակտիվ քաղաքականություն:

Անկախության ձեռքբերումից ի վեր Հայաստանը փորձում է զարգացանել կապերը տարածաշրջանում: Հայաստանն այսօր վարում է սեփական ինտեգրացիոն քաղաքականություն: 2014 թվականին Հայաստանը դարձավ ԵՏՄ անդամ երկիր: Այժմ Հայաստանը փորձում է համագործակցության կապերը խորացնել Իրանի Իսլամական Հանրապետության հետ ու նաև կամուրջ է Իրանի և ԵՏՄ անդամ երկների երկխոսության համար:

Հայաստանի առջև ծառացած կարևորագույն խնդիրներից մեկը շարունակում է մնալ միջազգային ատյաններում Հայոց ցեղասպանության ճանաչմանն ու դատապարտմանը հասնելը: Մինչև Այսօր Հայոց ցեղասպանությունը ճանաչել ու դատապարտել է 26 պետություն:

Անկախ Հայաստանի համար օրակարգային խնդիր է նաև հայ-ադրբեջանական սահմանի և ղարաբաղա-ադրբեջանական հակամարտ զորքերի շփման գծում լարվածության հարցը, որը պարբերաբար քննարկվում է ՀԱՊԿ-ում, գտնվում է ԵԱՀԿ Մինսկի խմբի համանախագահների ուշադրության կենտրոնում:

Այս տարիների մեծագույն նվաճումն արյան գնով Արցախյան պատերազմում տարած հաղթանակն էր, նորօրյա ապրիլյան հերոսացման ուղին: Ապրիլյան քառօրյա պատերազմից հետո անկախ Հայաստանը ցույց տվեց, որ ունի հզոր բանակ և անհրաժեշտ զինտեխնիկա՝ ամեն պահի թշնամուն հետ մղելու համար:

Անկախության պատմության մեջ ոչ պակաս կարևոր էր Սահմանադրական բարեփոխումների նախագիծը և կառավարման նախագահական համակարգից անցումը խորհրդրանականի: 

________________________________

Այսօր ողջ հայությամբ տոնում ենք մեր ազատ ու անկախ հանրապետության տոնը:

Շնորհավո՛ր տոնդ, մեր 26-ամյա Հայաստան: Թո՛ղ մեր անկախությունը երբևէ չխաթարվի, թո՛ղ բոլորիս եռանդուն մասնակցությամբ ավելի ամրապնդվի հայոց պետականությունը, բարգավաճի մեր պետությունը…