2017թ. ապրիլի 25-30-ը ԵՊՀ ռեկտոր Ա. Հ. Սիմոնյանի հրավերով Հայաստան է ժամանել Իսրայելի (ք. Թել-Ավիվ) «Շարլոտտա» երգչախումբը և Ծիծեռնակաբերդի հուշահամալիրում ու ՀՀ այլ վայրերում հանդես է գալիս ելույթներով` ի հիշատակ Հայոց ցեղասպանության անմեղ զոհերի:

Ապրիլի 26-ին հռչակավոր երգչախումբն իր համերգային ծրագիրը ներկայացրեց  ԵՊՀ-ում, ապրիլի 27-ին՝ Կամերային երաժշտության տանը, իսկ ապրիլի 28-ին` Տավուշի մարզպետարանի դահլիճում:

Համերգային ծրագրից առաջ  «Շարլոտտա» երգչախումբը հյուրընկալվել էր ԵՊՀ Իջևանի մասնաճյուղում, որտեղ ջերմ ընդունելության արժանացավ մասնաճյուղի տնօրենության, վարչական և պրոֆեսորադասախոսական անձնակազմի կողմից:

Երգչախմբի անդամների հետ հանդիպման ընթացքում քննարկվեցին հայ և հրեա ժողովուրդների պատմական ճակատագրերի ընդհանրությանը (Հայոց ցեղասպանություն և Հոլոքոստ), նրանց փոխհամագործակցմանը, զարգացման հեռանկարներին վերաբերող հարցեր:

ԵՊՀ ԻՄ-ի տնօրեն Ս. Ա. Առաքելյանը ընդհանուր գծերով հյուրերին ներկայացրեց ՀՀ հյուսիսարևելյան տարածաշրջանում կրթական և գիտամշակութային գործունեություն իրականացնող ԵՊՀ Իջևանի մասնաճյուղի առաքելությունը, նրա ֆակուլտետներն ու գործող մասնագիտությունները, խորին շնորհակալություն հայտնեց «Շարլոտտա» երգչախմբին` Հայաստանում, ի հիշատակ Հայոց ցեղասպանության անմեղ զոհերի, հյուրախաղերով հանդես գալու համար և, ի նշան երախտագիտության, երգչախմբի ղեկավար Էլի Գեֆենին նվիրեց Կիրառական արվեստի ֆակուլտետի ուսանողների աշխատանքներից մեկը:  

Տավուշի մարզպետարանում համերգային ծրագիրը մեկնարկեց կոմիտասյան «Դլե յաման»-ի հոգեցունց կատարմամբ:

Ապա ներկայացվեց համառոտ տեղեկատվություն` «Շարլոտտա» երգչախմբի ստեղծման և նրա ձեռք բերած համաշխարհային հռչակի մասին:

Նշվեց, որ Իսրայելի «Շարլոտտա» երգչախումբը ստեղծվել է 1990թ. Էլի Գեֆենի կողմից, ով մինչև օրս ղեկավարում է երգչախումբը: Հայտնի երգչախումբը հեղինակություն է ձեռք բերել իր լայն երգացանկի շնորհիվ, որն ընդգրկում է դասական և հոգևոր ստեղծագործություններ:

Երգչախումբը  ելույթներ է ունեցել Իսրայելի, ինչպես նաև արտերկրի ամենահայտնի համերգային սրահներում: Մասնավորապես համերգներով հանդես է եկել այնպիսի հայտնի բեմերում, ինչպիսիք են Լոնդոնի թագավորական Ալբերտ-հոլլը, որտեղ ներկա է գտնվել նաև Մեծ Բրիտանիայի արքայադուստրը (Բրիթթեն՝ զինվորական ռեքվիեմ), Քովենթ-Գարդեն փառատոնը (Ռոսսինիի՝ Մովսեսը Եգիպտոսից):

Իսրայելական երգչախումբն իր երգացանկն է ներկայացրել եվրոպական ամենահայտնի փառատոներում՝ Մալթայում, Մադրիդում, Պրահայում, Հռոմում, Լիսաբոնում և այլուր:  Նրանք ելույթ են ունեցել իսպանական Սևիլյայի Ալկասար թագավորական պալատում և Սան Խուան դը Դիոս Գրանադում (2007), ինչպես նաև 2008 թ.-ին Վիեննայում:

Բրատիսլավում «Սուրբ երգերի արարողությանը» նվիրված համերգի ընթացքում Բրատիսլավի Կոմենսկու անվան համալսարանի ռեկտորը երգչախմբի ղեկավար Էլի Գեֆենին պարգևատրել է «Միասնական Եվրոպայի հռչակում-Զանգերի տոն» մեդալով:

Երգչախումբը հատուկ համերգներ է կազմակերպել Հունգարիայի հայ ավետարանչական, ինչպես նաև հրեական համայնքների համար: Երգչախմբի անդամները չեն վճարվում. բոլորն էլ կամավոր են:

«Շարլոտտա»-ն Տավուշում ներկայացրեց հայ և համաշխարհային կոմպոզիտորների դասական ու հոգևոր երգեր:

Համերգային ծրագիրն ինչպես սկսվել էր, այնպես էլ եզրափակվեց Կոմիտասի ստեղծագործությամբ` «Տէր ողորմեա» երգով, որի կատարմանը, երգչախմբի ղեկավար Էլի Գեֆենի խնդրանքով, ձայնակցեց ամբողջ դահլիճը:   

Վերջում փոխադարձաբար իրենց շնորհակալությունը հայտնեցին Տավուշի մարզային իշխանությունների անունից` փոխմարզպետ Լ.Սարգսյանը` Հայոց ցեղասպանության անմեղ զոհերի հիշատակին մշակութային այդչափ բարձր մակարդակով մատուցված հարգանքի տուրքի, իսկ ամբողջ երգչախմբի անունից` նրա անդամ տիկին Սիլվի Գեֆենը` ջերմ ընդունելության, երկու (հայ և հրեա) ժողովուրդների ճակատագրերի ընդհանրության խորը գիտակցության համար:

2017թ. ապրիլի 26-ին ԵՊՀ Իջևանի մասնաճյուղում կայացավ ապրիլյան քառօրյա պատերազմի զոհերի հիշատակին նվիրված միջոցառումը, որը կազմակերպվել էր «Տավուշ» ռազմահայրենասիրական ակումբի ու Հայոց լեզվի և գրականության ամբիոնի ասիստենտ, բ.գ.թ. Ա.Հասանյանի համատեղ ջանքերով:

Գրական-երաժշտական մի գեղեցիկ հուշ-ցերեկույթ էր միջոցառումը, մեր անմահացած հերոսների սուրբ հիշատակին մատուցված մի յուրօրինակ հարգանքի տուրք` մասնաճյուղի երկու շնորհաշատ ուսանողուհիների` հեռակա ուսուցման «Հոգեբանություն» մասնագիտության երկրորդ կուրսի ուսանողուհի Լիլիա Մնացականյանի և առկա ուսուցման «Ֆրանսերեն լեզու և գրականություն» մասնագիտության երրորդ կուրսի ուսանողուհի Մերի Գասպարյանի մասնակցությամբ:

Նախ ներկաները մեկ րոպե լռությամբ հարգեցին մեր քաջարի հերոսների հիշատակը:

Ապա Հայոց լեզվի և գրականության ամբիոնի դոցենտ, բ.գ.թ. Ա.Սարհատյանի կողմից ընթերցվեց ամբիոնի հայտարարած էսսեի համահամալսարանական մրցույթում օրերս առաջին տեղ գրաված «ԱԼԳ» մասնագիտության առաջին կուրսի ուսանող Մհեր Մկրտումյանի «Նամակ զինվորին» թեմայով էսսեն (մանրամասն տե՛ս http://old-ijevan.ysu.am/20-04-2017-2/), որը ևս մեկ անգամ հուզեց ներկաներին ու հայրենասիրության շնչով ողողեց ամբողջ դահլիճը:

Այնուհետև Լիլիա Մնացականյանը` արդեն ճանաչված ու սիրված կատարող, ով հասցրել է գերել շատ ունկնդիրների սրտերը, հանդես եկավ Հայոց բանակին, մեր հերոս տղաներին նվիրված համերգային ծրագրով, որի մեջ հիմնականում ընդգրկված էին հետևյալ երգերը.

• «Թռչեի մտքով տուն»,
• «Կարմիր կակաչներ»,
• «Այս հողից ծնված»,
• «Տուն իմ հայրենի»,
• «Հենց երկու տարի»,
• «Պարոնա՛յք սպաներ»,
• «Բալլադ զինվորի մասին,
• «Խաչքար»,
• «Ես չեմ ուզում պատերազմ լինի»,
• «Քես կսպասեմ, զինվո՛ր»,
• «Զինվորի կարոտը»,
• «Իմ անունը հայ է»,
• «Հայրիկ»,
• «Մարտում»,
• «Ճերմակ աղավնի»:

Նաիրյան հեզաճկուն պարով հանդես եկավ«Սերվիս» մասնագիտության առաջին կուրսի ուսանողուհի Լուսինե Չոբանյանը:

Հատկանշական է, որ ներկայացված ռազմահայրենասիրական խրոխտ ու ոգեշունչ երգերի մեջ կային և Լիլիա Մնացականյանի ու Մերի Գասպարյանի հեղինակային գողտրիկ ստեղծագործություններից:

Հանդիսատեսի կողմից մեծ ոգևորությամբ ընդունվեց, օրինակ, նրանց համատեղ` «Խաչքարը» երգը (խոսքերի հեղինակ՝ Մերի Գասպարյան,
երաժշտության հեղինակ՝ Լիլիա Մնացականյան).

Զառամյալ, ինչպես բարի ծերունի,

Թեքվել է խաչքարն այս գյուղի ճամփին,

Թաշկինակներ են կից ծառից կապել,

Օ՜, մարդկային ցավ, էս ու՞ր ես հասել:

Կրկ. Ու այս հոգնած խաչքարը

Ի՛նչ ցավ ասես, որ չի տեսել,

Ի՜նչ աղերսներ, ի՜նչ խնդրանքներ

Թաշկինակի պես մաշել:

Օ՜, հինավու՛րց, դու ծե՛ր խաչքար,

Ինչե՜ր ասես, որ չես տեսել,

Ժանյակ ու նկարներ թոռան,

Որ ծեր տատին է կապել:

Դու՛,  մարդկայի՛ն ցավ, տանջո՛ղ, բազմաբյու՛ր,

Խաչին են փարվել թախիծ, լուռ համբույր,

Օ՜, զառամյա՛լ, լուսե՛ դու խաչքար,

Հայ հավատի մասու՛նք, սու՛րբ նշխար:

Միջոցառման վերջում ելույթ ունեցան ԵՊՀ Իջևանի մասնաճյուղի տնօրեն Սամվել Առաքելյանը և Իջևանի զորամասի հրամանատարի` անձնակազմի հետ տարվող աշխատանքների գծով տեղակալ, փոխգնդապետ Նվեր Մանգասարյանը:

Ս.Առաքելյանն իր գոհունակությունն արտահայտեց միջոցառման կազմակերպիչներին ու մասնակիցներին, ևս մեկ անգամ շեշտեց, որ, ի դեմս նրանց` երիտասարդ սերնդի, ունենք արժանի սերնդափոխություն, ներկայիս երիտասարդությունն ապացուցեց, որ ավագ սերնդի արժանավոր հետնորդն է, նրա հայրենանվեր գործը պատվով շարունակողը, ով պատրաստ է սաստելու չարկամ թշնամու ամեն  մի ոտնձգություն, անվարան պաշտպանելու հայրենի հողը և իր հուսալի ձեռքերով կերտելու երկրի ապագան:

Ն.Մանգասարյանը շնորհակալություն հայտնեց ԵՊՀ ԻՄ-ի ղեկավարությանը և ուսանողներին` բարձր մակարդակով կազմակերպված միջոցառման, բուհ-բանակ կապն ամուր պահելու համար, մարզի երիտասարդների ռազմահայրենասիրական դաստիարակության և զինվորներին քաջալերելու, իրենց սրտակցությունը հայտնելու առումով ընդգծեց նման նախաձեռնությունների կարևորությունը և համոզմունք արտահայտեց, որ երկկողմ համագործակցությունը կլինի շարունակական:

Եվ, որպես ասվածի հաստատում, մասնաճյուղի շնորհալի ուսանողներ Մհեր Մկրտումյանը, Լիլիա Մնացականյանն ու Մերի Գասպարյանը Իջևանի զորամասի հրամանատարության կողմից արժանացան պատվոգրերի:

2017թ. ապրիլի 26-ին ԵՊՀ Իջևանի մասնաճյուղում կայացավ Վիլյամ Շեքսպիրի մահվան 401-ամյակին նվիրված դասախոսությունների շարք, որը կազմակերպվել էր «Անգլերեն լեզու և գրականություն» մասնագիտության կրթական ծրագրի պատասխանատու Ա. Սիմոնյանի կողմից:

Դասախոսությունների ընթացքում անգլերենով և հայերենով անդրադարձ կատարվեց այնպիսի թեմաների, ինչպիսիք են Շեքսպիրին վերագրվող ստեղծագործությունների հեղինակային իրավունքների հարցը, նրա երկերի լեզվական և գործաբանական արժեքը, սիրո թեման, Շեքսպիրն ու իր ստեղծագործությունները հայ ժողովրդի ընկալմամբ, շեքսպիրյան թեմաների արդիականության հարցը:

Անգլերեն դասախոսություն կարդացին՝

1. Աստղիկ Սիմոնյանը («Շեքսպիրի հեղինակային իրավունքների հարցը» / “Shakespeare Authorship Question”),

   
   

2. Շուշանիկ Գրիգորյանը («Ազատ բառակապակցությունների գործաբանական կիրառությունը Վ.Շեքսպիրի «Համլետ» ողբերգության մեջ» / “The Pragmatic Effect of the Collocations in W. Shakespeare’s Hamlet”),

   
   

3. Ջեմմա Միլիտոնյանը («Սերը Շեքսպիրի ստեղծագործություններում» / “Love in Shakespeare”): 

Հայերեն դասախոսությամբ հանդես եկան՝

1. Էմմա Թեմրազյանը («Հայերի Շեքսպիրը»),

   
   

2. Նունե Դավթյանը («Շեքսպիրի այժմեականությունը»):

Ներկայացված դասախոսություններում ընդգծվեց այն գաղափարը, որ նույնիսկ չորս դար անց անգլիացի հայտնի բանաստեղծ, դրամատուրգ Վ.Շեքսպիրն ապրում է իր անմահ ստեղծագործություններով:

2017թ. ապրիլի 25-ին ԵՊՀ ԻՄ-ի «Տնտեսագիտության տեսություն» մասնագիտության առաջին կուրսի ուսանողները՝ իրենց դասախոսի՝ Հայոց լեզվի և գրականության ամբիոնի ասիստենտ, բ.գ.թ. Ա.Հասանյանի գլխավորությամբ, կազմակերպել էին Մեծ եղեռնի զոհերի հիշատակին նվիրված միջոցառում:

Այն բացվեց Պարույր Սևակի «Անլռելի զանգակատուն» պոեմից («Ղողանջ եղեռնական» գլխից) մի հատվածով:

Միջոցառման առաջին մասում ներկայացվեց Հայոց ցեղասպանության կազմակերպիչների, երիտթուրքերի վարած երկերեսանի քաղաքականության, եղեռնի իրականացման, գաղթականների, Արևմտյան Հայաստանի մտավորականության զգալի մասի ոչնչացման և հայերի վրեժի մասին տեղեկատվություն:

Հնչեցին Մեծ եղեռնի, մեր կորուսյալ հայրենիքի և ներկա սերնդի անկոտրում կամքի մասին երգեր ու բանաստեղծություններ:

Ուսանողուհիներից մեկը (Մերի Եգանյան) հանդես եկավ հայկական ժողովրդական պարով՝ «Սարերի հովին մեռնեմ» երաժշտության ներքո:

Միջոցառման երկրորդ հատվածում ներկայացվեց Մեծ եղեռնը՝ իր  անդառնալի կորուստներով  և  հետևանքներով: Ուսանողները պատմեցին ցեղասպանությանը զոհ գնացած մեր մեծերի մասին՝  Սիամանթո,  Դանիել Վարուժան,  Գրիգոր Զոհրապ, Կոմիտաս…, որը թեև զոհ չգնաց 1915 թվականին թուրքի յաթաղանին, բայց չկարողացավ ապրել՝ տեսնելով հայի այդչափ մեծ վիշտը,  հոգեկան շեղումներ ստացավ և մահացավ:

Միջոցառման երրորդ մասում խոսվեց միջազգային հանրության, մեծ մարդասերների արձագանքի մասին, որոնք խստորեն դատապարտել են թուրքի անմարդկային արարքը: Նշվեցին այն երկրները, որոնք ճանաչել են  20-րդ դարի մեծագույն ոճիրը  և սատար են կանգնել հայ ժողովրդին:

Ներկայացվեց «Նեմեսիս» (հին հունական վրեժխնդրության  աստվածուհու անունով) գործողությունը, որի նպատակն էր պատժել Հայոց ցեղասպանությունը կազմակերպող և իրականացնող երիտթուրք պարագլուխներն, 1918 թվականի Բաքվի հայկական ջարդի կազմակերպիչներին և թուրքերի հետ համագործակցած հայ դավաճաններին: Ընդգծվեց, որ այս գործողությանը մասնակցել են Արմեն Գարոն (Գարեգին Պատերմաջյան), Շահան Նաթալին, Միսաք Թորլաքյանը, Արշավիր Շիրակյանը, Արամ Երկանյանը, Արտաշես Գևորգյանը, Ստեփան Ծաղիկյանը, Սողոմոն Թեհլերյանը, որն էլ հենց սպանել է Հայոց ցեղասպանության գլխավոր կազմակերպիչներից  Թալեաթ փաշային:

Հայոց մեծ եղեռնի զոհերի հիշատակին նվիրված միջոցառումներ Ա.Հասանյանի կողմից անցկացվել էին ոչ միայն «ՏՏ»-I, այլև «ԻԿՄ»-I, «ՀԼԳ»-II կուրսերում: