2017թ. մարտի 23-ին ամփոփվեցին Երևանի պետական համալսարանի կողմից անցկացվող դպրոցականների օլիմպիադայի 2-րդ փուլի արդյունքները, որոնց համաձայն՝ Տավուշի մարզի 15 աշակերտներ հաղթող ճանաչվեցին և կստանան համապատասխանաբար I, II, III կարգի դիպլոմներ ու պատվոգրեր:

Այս տարի Տավուշի մարզից օլիմպիադային մասնակցեց 24 միջնակարգ, 4 ավագ դպրոցների և 2 վարժարանի 300 աշակերտ, որոնցից շուրջ 60 աշակերտ հաղթահարեցին 1-ին փուլի արգելքը և մասնակցեցին 2-րդ փուլին:

«Հայոց լեզու և գրականություն» առարկայից I կարգի դիպլոմի է արժանացել Կողբի թիվ 2 միջնակարգ դպրոցի XII դասարանի աշակերտուհի Մարուսյա Ղարախանյանը:

«Ստեղծագործական աշխատանք»-ից I կարգի դիպլոմի է արժանացել Իջևանի ավագ դպրոցի XII դասարանի աշակերտուհի Անի Մարգարյանը:

Ստեղծագործական աշխատանք»-ից II կարգի դիպլոմի է արժանացել Բերդավանի միջնակարգ դպրոցի X դասարանի աշակերտուհի Վիկտորյա Ղազարյանը:

«Կենսաբանություն» առարկայից II կարգի դիպլոմի է արժանացել Արճիսի միջնակարգ դպրոցի XII դասարանի աշակերտուհի Արփինե Մինասյանը:

«Հայոց լեզու և գրականություն» առարկայից III կարգի դիպլոմի են արժանացել Կողբի թիվ 2 միջնակարգ դպրոցի XII դասարանի աշակերտուհի Լիդա Քոչարյանը և Իջևանի ավագ դպրոցի XII դասարանի աշակերտուհի Գոհար Մխիթարյանը:

«Աշխարհագրություն» առարկայից պատվոգրի է արժանացել Աչաջրի միջնակարգ դպրոցի XII դասարանի աշակերտ Տիգրան Գասպարյանը:

«Կենսաբանություն» առարկայից պատվոգրի են արժանացել Աչաջրի միջնակարգ դպրոցի XII դասարանի աշակերտ Ադամ Փիրումյանը և  Բերդավանի միջնակարգ դպրոցի XII դասարանի աշակերտուհի Աննա Թանդիլյանը:

«Հայ ժողովրդի պատմություն» առարկայից պատվոգրի է արժանացել Կողբի թիվ 2 միջնակարգ դպրոցի XII դասարանի աշակերտուհի Նելլի Մուրադյանը:

«Ֆիզիկա» առարկայից պատվոգրի է արժանացել Բերդավանի միջնակարգ դպրոցի XII դասարանի աշակերտ Սուրեն Մելքոնյանը:

«Հայոց լեզու և գրականություն» առարկայից պատվոգրի են արժանացել Կողբի թիվ 2 միջնակարգ դպրոցի XII դասարանի աշակերտուհի Լիլիթ Մուրադյանը, Իջևանի ավագ դպրոցի XII դասարանի աշակերտուհի Էդիտա Օթարյանը և Վերին Ծաղկավանի XII դասարանի աշակերտուհիներ Մարիա Հովսեփյանն ու Մերի Խալաթյանը:

Հարկ է նշել, որ  ԵՊՀ-ի ամենամյա օլիմպիադայում 1-3-րդ տեղերը զբաղեցրած աշակերտները վճարովի ուսուցման համակարգով ԵՊՀ ընդունվելու դեպքում առաջին կուրսում կստանան ուսման վարձի զեղչ՝ համապատասխանաբար 50, 40 և 30%-ով:

2017թ. մարտի 22-ին «Էթիկա» դասընթացի շրջանակներում ԵՊՀ ԻՄ-ի բնական գիտությունների ֆակուլտետի «Ինֆորմատիկա և կիրառական մաթեմատիկա» մասնագիտության առաջին կուրսի ուսանողներն այցելեցին Իջևանի Սբ. Ներսես Շնորհալի եկեղեցի՝ դասախոս Լևոն Լաչիկյանի գլխավորությամբ:

Եկեղեցու հոգևոր հովիվ Տեր Սիմեոն քահանա Առաքելյանը նրանց համար անցկացրեց «Մեծ պահքի խորհուրդը մեր կյանքում» թեմայով բաց դաս:

Օրը պատահական չէր ընտրված. մարտի 22-ն այս տարի Միջինք էր, որով կիսվում է Մեծ պահքի շրջանը: 

Բանախոսը ուսանողներին հանգամանորեն ներկայացրեց Մեծ պահքի խորհուրդը, որ այն ոչ թե սոսկ կենդանական կերակուրներից հրաժարվելու, այլ նախ և առաջ խոկումի, ինքնաքննության, զանազան վայելքներից հրաժարվելու, աղոթքների և Սբ. Գրքի ընթերցանության շրջան է:

Ուսանողները միաժամանակ իմացան մեր եկեղեցական պաշտոնների ու կոչումների, եկեղեցու սպասավորներին դիմելու ձևերի և ընդհանրապես եկեղեցու ներսում ճիշտ պահելաձևի վերաբերյալ շատ մանրամասներ:

Տեր Սիմեոնն անդրադարձավ նաև Իջևանի Սբ. Ներսես Շնորհալի եկեղեցու կառուցման պատմությանը՝ մասնավորապես նշելով, որ այն վերանորոգվել է 1997-ին և օծվել 1998-ին:

Բաց դասի վերջում հոգևոր հովիվն օրհնեց համալսարանականներին և հղեց իր բարեմաղթանքները:

2017թ. մարտի 21-ին ԵՊՀ Իջևանի մասնաճյուղում տեղի ունեցավ կանանց տոնին նվիրված սպորտլանդիայի մասնաճյուղային առաջնություն:

Առաջնությանը մասնակցում էր չորս թիմ՝ «Հայոց լեզու և գրականություն»-I, «Տարրական մանկավարժություն և մեթոդիկա»-I, «Սերվիս»-I և «Կիրառական արվեստ»-IV կուրսերի ուսանողուհիները:

Մասնակիցները մրցեցին հինգ խաղային ձևերով՝ օձաձև անցում, օլիմպիական խորհրդանիշի հավաքում, թենիսի գնդակների տեղափոխություն, վարժություն մարմնամարզական օղակներով և խաղային փոխանցավազք օղակներով:

Հանդիպեցին  «ՏՄՄ»-I և «ՀԼԳ»-I,  «Ս»-I և «ԿԱ»-IV կուրսերի ուսանողուհիները:

Եզրափակիչ դուրս եկան «Կիրառական արվեստ»-IV և «Տարրական մանկավարժություն և մեթոդիկա»-I թիմերը: 

Կանանց տոնին նվիրված մասնաճյուղային սպորտլանդիայում հերթական անգամ հաղթեցին Կիրառական արվեստի ֆակուլտետի ուսանողուհիները («Կիրառական արվեստ»-IV կուրսի թիմը):

Հաղթողները տնօրենության կողմից պարգևատրվեցին հուշանվերներով:

2016-17 ուստարվա երկրորդ կիսամյակում ԵՊՀ ԻՄ-ի «ԻԿՄ», «ՀԼԳ», «ՄՀ» 3-րդ և «ԱԼԳ», «ՖԼԳ», «ՄՀ» մասնագիտությունների 4-րդ կուրսերի ուսանողները Տավուշի և Գեղարքունիքի մարզերի հանրակրթական դպրոցներում անցկացրին իրենց մանկավարժական պրակտիկան:

Վերջինս պրակտիկանտ-ուսանողներին գործնականում հնարավորություն է տալիս փորձարկելու ուսման տարիներին ձեռք բերած իրենց մասնագիտական գիտելիքներն ու հմտությունները, ցուցադրել դասավանդման և ուսումնառության ժամանակակից  մեթոդների կիրառման իրենց ունակությունները, տեղեկատվական տեխնոլոգիաներին տիրապետելու կարողությունները:

Այդ մասին են վկայում «Ինֆորմատիկա և կիրառական մաթեմատիկա» մասնագիտության 3-րդ կուրսի և ընդհանրապես մասնաճյուղի ուսանողների մեծ մասի ակտիվ մանկավարժական պրակտկայի արդյունքները:

Ուսանողները տարբեր դպրոցներում ակտիվ աշխատել են մանկավարժների հետ, նրանց հետ քննարկել յուրաքանչյուր դասի պլանավորման և կազմակերպման, ուսումնական նյութի ամբողջական և համակարգված մատուցման, երեխաների հետ աշխատելու  մանկավարժական մոտեցումները:

Հատկանշական է, որ նրանք դասերի մեծ մասն իրականացրել են  համապատասխան շնորհանդեսների օգնությամբ, աշակերտներին ներգրավել են ակտիվ  թիմային աշխատանքի մեջ, կազմակերպել են ինտելեկտուալ խաղ-դասեր: Աշակերտների ձեռքբերումները գնահատելու, նրանց ոգևորելու և խթանելու նպատակով նրանց տրամադրել են իրենց կողմից ձևավորված հավաստագրեր:

Այդ մասին «ԻԿՄ» 3-րդ կուրսի ուսանողները 2017թ. մարտի 18-ին հաշվետվություն են ներկայացրել Բնական գիտությունների ֆակուլտետի Ծրագրավորման և ինֆորմացիոն տեխնոլոգիաների ամբիոնի վարիչ Ա.Հովակիմյանին, պրակտիկայի ղեկավար Ք.Օթարյանին, կրթական ծրագրի պատասխանատու Ա.Սիմոնյանին:

Ուսանողները, խոսելով իրենց պրակտիկ գործունեության մասին, գոհունակություն են արտահայտել, որ  դպրոցների ուսուցիչներն իրենց լիարժեք ինքնադրսևորվելու հնարավորություն են տվել, աջակցել և պայմաններ են ստեղծել պրոֆեսիոնալ-մանկավարժական հմտությունների ձևավորման համար:

2017թ. մարտի 17-ին ԵՊՀ Իջևանի մասնաճյուղում կայացավ ՄԱԿ-ի զարգացման ծրագրի և ՌԴ կողմից ֆինանսավորվող «Գյուղական Զբոսաշրջության Ինտեգրացված Զարգացում» նախագծի, նրա բաղադրիչը կազմող «Երիտասարդների առաջխաղացման արահետ» ծրագրի ներկայացուցիչների (ծրագրի օգնական Ռուզաննա Հայրապետյան, համակարգող Լիանա Դոյդոյան) հետ հանդիպում, որին մասնակցում էին ԵՊՀ ԻՄ-ի տարբեր ֆակուլտետների բարձր կուրսերի ուսանողներ: 

 Հանդիպման նպատակն էր ուսանողներին ներկայացնել «Գյուղական Զբոսաշրջության Ինտեգրացված Զարգացում» նախագիծը, մարզի զբոսաշրջության զարգացմամբ հետաքրքվող, բարձրագույն կրթություն ունեցող երիտասարդներին ընդգրկել ՄԱԿ-ի զարգացման ծրագրի կողմից իրականացվող «Երիտասարդների առաջխաղացման արահետ» ծրագրում:

Հանդիպման ընթացքում ծրագրի համակարգողները ներկայացրին Տուրիզմի հետազոտական և զարգացման կենտրոնի նպատակն ու խնդիրները, պրակտիկայի մասնակիցների ընտրության չափանիշները, պատասխանեցին ուսանողներին հետաքրքրող հարցերին:

Հատկանշվեց, որ Տավուշի մարզի 54 գյուղերից կառանձնացվի 6 գյուղ, իսկ վեցամսյա վճարովի պրակտիկայի հնարավորություն կտրվի 5 լավագույն մասնակիցներին:

Աշխատանքային պրակտիկայի մասնակիցները հնարավորություն կունենան կատարելագործել իրենց գիտելիքներն ու հմտությունները, կապեր հաստատել տուրիզմի շուկայում գործող ընկերությունների հետ, մշակել և իրականացնել բիզնես ծրագրեր: 

 Ուսանողները ներկայացրին մարզի զբոսաշրջության զարգացման վերաբերյալ իրենց առաջարկներն ու գաղափարները:

Վերջում հանդիպման մասնակիցները լրացրին Կարողությունների և կարիքների գնահատման հարցաշար, որը «Երիտասարդների առաջխաղացման արահետ» ծրագրի շրջանակներում նախատեսված էր նպաստելու Տավուշի մարզում հետազոտական և զարգացման կենտրոնի գործարկմանը:

Այն նպատակ ունի պարզելու մարզում տուրիզմի զարգացմանն ուղղված՝ երիտասարդների հետաքրքրության աստիճանը, մասնագիտական կարողությունները, նորարարական գաղափարների և մոտեցումների հնարավորությունները: