2021թ. մայիսի 20-ին լրանում է Տավուշի թեմի առաջնորդ Գերաշնորհ տեր Բագրատ եպիսկոպոս Գալստանյանի ծննդյան 50-ամյակը:

Բագրատ Սրբազան… ոչ թե պատահականության ծնունդ, այլ Ստեղծագործություն, Առաջնորդ, Ընկեր, Մարդ, Զինվորական, Մտավորական … կոչումով՝ Տավուշեցի, ով Տավուշ եկավ հիրավի «ոչ թե պատահականությամբ, այլ Աստվածային նախախնամությամբ և Տավուշեցու կոչումը նույնացրեց մեծագույն սիրո, պատվի ու պատասխանատվության հետ…»:

ԵՊՀ Իջևանի մասնաճյուղի ղեկավարության, ամբողջ անձնակազմի և ուսանողության անունից սիրով և երախտագիտությամբ շնորհավորում ենք Բագրատ Սրբազանի 50-ամյա հոբելյանը, ցանկանում, որ Աստծո ամենակարող աջը միշտ զորավիգ ու պահապան լինի և իր օրհնությամբ, սիրով ու բարեհաճությամբ առաջնորդի նրան իր հայրենանվեր գործունեության մեջ՝ ուղղված Հայոց և Տավուշ աշխարհի բարօրությանը, զորացմանն ու բարգավաճմանը:

Տեր Բագրատ եպիսկոպոս Գալստանյան

Հայ Առաքելական Եկեղեցու Գերագույն հոգևոր խորհրդի անդամ, Տավուշի թեմի առաջնորդ։

Ծնվել է 1971թ. մայիսի 20-ին Գյումրիում:

1978 – 1988 թթ. սովորել է Երևանի թիվ 156 դպրոցում։

1988 – 1994 թթ. ուսանել է Գևորգյան Հոգևոր Ճեմարանում:

1994թ. Անանիա եպիսկոպոս Արաբաջյանի կողմից ձեռնադրվել է սարկավագ։

1994թ. գերազանց առաջադիմությամբ ավարտել է հոգևոր ճեմարանը՝ պաշտպանելով «Խոսրով եպիսկոպոս Անձևացու Ժամակարգության մեկնությունն ու աստուածաբանությունը (նորագյուտ ձեռագրերով և մատենագիտական ուսումնասիրությամբ)» ավարտաճառը:

1995թ․ Ամենայն Հայոց Կաթողիկոս Գարեգին Ա-ի ձեռամբ ձեռնադրվել է կուսակրոն քահանա։

1996թ. նշանակվել է Մայր Աթոռ Սուրբ Էջմիածնի «Էջմիածին» պաշտոնական ամսագրի գլխավոր խմբագիր։ Միաժամանակ նշանակվել է նաև ՔԴՔԿ փոխտնօրեն։

1998-2000 թթ. սովորել է Անգլիայի Լիդսի համալսարանում, Մըրֆիլդի Սուրբ Հարության Աստվածաբանական քոլեջում:

2000-2003 թթ. եղել է Սևանի Վազգենյան դպրանոցիշ տեսուչը։

2002թ. պաշտպանել է վարդապետական թեզ՝ «Հիվանդաց Օծման խորհուրդի խնդիրը Հայ Եկեղեցում» վերտառությամբ։

2002թ. նշանակվել է նաև Մայր Աթոռի Մամուլի, լրատվության և Հասարակական կապերի գրասենյակի տնօրեն, եղել է «Շողակաթ» հեռուստաընկերության տնօրենների խորհրդի նախագահ։

2002թ. նշանակվել է Արագածոտնի թեմի առաջնորդական տեղապահ։

2003-2013 թթ. եղել է Կանադայի Հայոց թեմի առաջնորդը։

2012թ․ Մոնրեալի Կոնկորդիայի համալսարանում պաշտպանել է աստվածաբանության և կենսաբարոյագիտության մագիստրոսական թեզ (MA)` «Հայաստանի Առողջապահական Համակարգը. պատմական, սոցիալական և աստվածաբանական եզրաշերտը, անցյալը, ներկան և ապագայի զարգացման հեռանկարը» թեմայով:

2013-2019 թթ. վարել է Մայր Աթոռ Սուրբ Էջմիածնի Եկեղեցական հայեցակարգային հարցերի գրասենյակի տնօրենի պաշտոնը։

2015թ․ նշանակվել է Տավուշի թեմի առաջնորդ:

2017 թ․ -ից Գերագույն հոգևոր խորհրդի անդամ է:

Արժանացել է Անգլիայի Թագուհի Եղիսաբեթ Բ-ի «Ադամանդյա հոբելյանի» մեդալի, «Հայրենիքին մատուցած ծառայությունների համար» նախագահական 2-րդ աստիճանի մեդալի, ՀՀ Պաշտպանության նախարարության «Անդրանիկ Օզանյան» շքանշանի։

«Մոնթե Մելքոնյան» ռազմաուսումնական վարժարանի, «Սիթի օֆ Սմայլ» բարեգործական հիմնադրամի հոգաբարձուների խորհրդի անդամ է, 2019թ. «Ավրորա» ֆորումի Բարի կամքի դեսպան, դասավանդում է Գևորգյան հոգևոր ճեմարանում և Երևանի Կոմիտասի անվան պետական կոնսերվատորիայում:

Բագրատ Սրբազանի քահանայական ձեռնադրության 25 և Տավուշի թեմի առաջնորդության 5-ամյակին նվիրված ֆիլմը հասանելի է հետևյալ հղումով՝ https://www.facebook.com/tahuys/videos/2390316957942560/:

2021թ. մայիսի 17-ին Կիրառական արվեստի ֆակուլտետի դասախոսները, II և III կուրսի ուսանողները ճանաչողական այց կատարեցին Կողբի գեղարվեստի դպրոց:

Այցի նպատակն էր ծանոթանալ դպրոցի ստեղծագործական անձնակազմին, կատարվող աշխատանքներին, քննարկել համատեղ ծրագրեր:

Սահմանամերձ Կողբ գյուղի գեղարվեստի դպրոցը հիմնադրվել է 1999թ.: Իր գոյության երկու տասնամյակի ընթացքում դպրոցի մեծաթիվ շրջանավարտներ իրենց կրթությունը շարունակել են մասնաճյուղում, դարձել ոլորտի լավագույն մասնագետներ: Ինչպես ԵՊՀ ԻՄ-ի կիրառական արվեստի ֆակուլտետում, այնպես էլ Կողբի գեղարվեստի դպրոցում առաջնային է համարվում մայրաքաղաքից հեռու գտնվող մարզում մշակութային կյանքն աշխուժացնելը, համապատասխան ստեղծագործական միջավայր ստեղծելը, տարածաշրջանի շնորհալի երիտասարդներին բացահայտելը և կրթելը:

Այցի ընթացքում ուսանողները շրջեցին արվեստանոցներում, ցուցասրահներում, ծանոթացան կատարված աշխատանքներին:

Այնուհետև դպրոցի նկարիչ-մանկավարժ Արա Ղուլիջանյանը դասախոսություն կարդաց համակարգչային ZBrush ծրագրի հիմնական գործիքների, հնարավորությունների և կիրառման առանձնահատկությունների մասին: Դասախոսությունը հագեցած էր և հետաքրքիր: Ժամանակի սղության պատճառով հնարավոր չէր ամբողջական պատկերացում կազմել ծրագրի հնարավորությունների մասին: Պայմանավորվածություն ձեռք բերվեց հանդիպումները դարձնել շարունակական՝ հետաքրքրվողների համար կազմակերպելով գործնական ուսուցման դասեր:

Հագեցած օրվա վերջում համալսարանականներն այցելեցին Կողբի հոգևոր և պատմամշակութային վայրեր: Նրանք եղան գյուղի պատմության թանգարանում, որն իր տեսակով եզակի է Տավուշի մարզում: Այնտեղ հնարավորինս ներկայացված է գյուղի անցյալը, կենցաղը, կյանքը: Ցուցասրահում մեծ թիվ են կազմում նաև կիրառական արվեստի նմուշներ՝ սկսած բրոնզեդարյան ժամանակաշրջանից, ինչը մեծ հետաքրքրություն առաջացրեց: Ուշագրավ էին նաև ցուցադրված մետաղադրամները, Կողբ գյուղի եկեղեցիների մակետները, ձեռագործերը:

2021թ. մայիսի 15-ից ԵՊՀ Իջևանի մասնաճյուղում մեկնարկել է 2020-2021 ուսումնական տարվա առկա ուսուցման շրջանավարտների ամփոփիչ ատեստավորումը՝ 9 մասնագիտության գծով ավարտական աշխատանքների պաշտպանությունները:

ԵՊՀ ԻՄ-ը, ելնելով համավարակի տարածման կանխարգելումից և հետևելով Մայր բուհի օրինակին, 2021թ. ավարտական աշխատանքների նախապաշտպանություններն իրականացրել է գլխավորապես առցանց եղանակով, իսկ պաշտպանությունները նախատեսել է կազմակերպել առցանց և առկա (հակահամաճարակային կանոնները պահպանելով) ձևերի համադրությամբ:

Ընդ որում՝ տեղում չգտնվող ղեկավարները, գրախոսները, ամբիոնի դասախոսները միասնական Zoom հարթակի միջոցով հնարավորություն ունեն մասնակցելու առկա եղանակով կազմակերպվող պաշտպանությանը:

Վարչական համապատասխան ստորաբաժանումների (ՈՒՄՎ, ֆակուլտետներ) ղեկավարների հավաստմամբ՝ պաշտպանությունները կանցկացվեն հաստատված ժամանակացույցների համաձայն, ամփոփիչ ատեստավորման հանձնաժողովների, ուսանողների ու ավարտական աշխատանքների ղեկավարների պատասխանատու մոտեցմամբ:

2021թ. մայիսի 15-ին մեկնարկեց «Պատմություն» մասնագիտության շրջանավարտների ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր Խ.Աբովյանի անվան հայկական պետական մանկավարժական համալսարանի հայոց պատմության ամբիոնի պրոֆեսոր, պատմ. գիտ. դոկտոր Սամվել Անդրանիկի Պողոսյանը:

Ամփոփիչ ատեստավորմանը մասնակցում էր 8 շրջանավարտ. 4-ը ստացավ «գերազանց», 1-ը՝ «լավ», 3-ը՝ «բավարար»:

Հանձնաժողովի նախագահի կարծիքով՝ համավարակի պայմաններում ԵՊՀ ԻՄ-ի ղեկավարությունն ու մասնագիտական ամբիոնը պատշաճ ձևով և բարձր մակարդակով էին կազմակերպել ավարտական աշխատանքների պաշտպանությունը: Պահպանված էին ավարտական աշխատանքների համար նախատեսված չափորոշիչները: Մասնագետների պատրաստման որակի հետագա բարելավ­ման ուղղութ­յամբ հանձնաժողովի նախագահն առաջարկել է, որ ավարտական աշխատանքներում շրջանառվի առավել ընդգրկուն գրականություն:

Մայիսի 18-ին կկայանա «Հայոց լեզու և գրականություն» մասնագիտության շրջանավարտների ավարտական աշխատանքների պաշտպանությունը, մայիսի 20-21-ին՝ «Տարրական մանկավարժություն և մեթոդիկա», մայիսի 22-ին՝ «Օտար լեզու և գրականություն», «Ինֆորմատիկա (համակարգչային գիտություն)» մասնագիտությունների պաշտպանությունները:

Մայիսի 29-ին տեղի կունենան «Աշխարհագրություն», «Ֆինանսներ», «Զբոսաշրջություն» և «Դիզայն» մասնագիտությունների շրջանավարտների ավարտական աշխատանքների պաշտպանությունները: 

Բակալավրի որակավորում ստանալու առթիվ ԵՊՀ ԻՄ-ի վարչական ու պրոֆեսորադասախոսական անձնակազմի անունից սիրով շնորհավորում ենք «Պատմություն» մասնագիտության մեր շրջանավարտներին, նրանց մաղթում անձնական և մասնագիտական մեծ ձեռքբերումներ, նպատակների իրականացում, ամենայն բարիք, ավարտական կուրսերի մեր մյուս ուսանողներին ցանկանում ենք ամփոփիչ ատեստավորման հաջող ընթացք: