2016թ. փետրվարի 29-ին մասնաճյուղի տնօրեն Սամվել Առաքելյանը խորհրդակցություն անցկացրեց Հեռակա ուսուցման բաժնի աշխատակիցների հետ:

Խորհրդակցության ընթացքում ամփոփվեցին 2015-2016 ուստարվա երկրորդ կիսամյակի դասերի նախապատրաստական աշխատանքները:

Մասնավորապես նշվեց, որ բոլոր մասնագիտությունների գծով կազմվել են դասացուցակներ, որոնցում ամբողջությամբ արտացոլված է ողջ կիսամյակային ծանրաբեռնվածությունը: Հստակեցված է ողջ լսարանային ֆոնդը: Ուսանողների հաճախումների վերաբերյալ կազմվել են համապատասխան ցուցակներ:

Բաժնի համապատասխան աշխատակիցներին հանձնարարվել է, որ հետևողական լինեն ուսանողական զեղչերի դիմումների, ուսանողների շարժի, ավարտական կուրսերում ամփոփիչ ատեստավորման քննությունների հարցաշարերի և ընդհանրապես այս կիսամյակի ուսումնական գործընթացը պատշաճ մակարդակով իրականացնելու վերաբերյալ բոլոր հարցերում:

Ամփոփելով 2015-2016 ուստարվա երկրորդ կիսամյակի դասերի նախապատրաստական աշխատանքները՝ դրանք գնահատվեցին բավարար:

2016թ. փետրվարի 26-ին ԵՊՀ ԻՄ-ի «Հայոց լեզու և գրականություն» մասնագիտության առաջին կուրսի ուսանողները ներկայացրին Տավուշի մարզի տարբեր շրջանների վերաբերյալ իրենց հավաքած բանահյուսական նյութերը:  

Հայոց լեզվի և գրականության ամբիոնի վարիչ, բան. գիտ. թեկնածու, դոցենտ Վաչագան Ավագյանի հանձնարարությամբ նրանք կատարել էին բանահավաքչական աշխատանք՝ տարբեր ասացողներից գրի առնելով իրենց հայրենի բնաշխարհին, գյուղին առնչվող, Տավուշի տարածաշրջանին բնորոշ հետաքրքիր ավանդազրույցներ, լեգենդներ, ավանդություններ,  օրհնանքներ, անեծքներ և այլն: 

Ներկա էին Հայոց լեզվի և գրականության ամբիոնի պրոֆեսորադասախոսական անձնակազմի ներկայացուցիչները, նույն  մասնագիտության տարբեր կուրսերի ուսանողներ:

Նախաձեռնությունը նպատակաուղղված էր ոչ միայն հայտնաբերելու, մոռացության ծովից փրկելու Տավուշի տարածածրջանին վերաբերող բանահյուսական գեղեցիկ պատառիկներ, այլև խթանելու մարզում բանահավաքչական աշխատանքի տարածումը:  

«Հայոց լեզու և գրականություն» մասնագիտության առաջին կուրսի ուսանողները հանդես եկան Բերքաբերի, Ակնաղբյուրի, Այգեհովիտի, Սևքարի, Դովեղի, Խաշթառակի, Ղազանուչանի մասին հետաքրքրաշարժ պատմություններով ու ավանդություններով:

  Ներկայացվեցին նաև օրհնանքներ և անեծքներ, չարախափան ծիսակատարությունների վերաբերյալ նյութեր, որոնց շուրջ ծավալվեց աշխույժ քննարկում:  

Նախաձեռնության վերաբերյալ ներկաներն արտահայտեցին դրական կարծիքներ և համոզմունք հայտնեցին, որ այն կկրի շարունակական բնույթ:    

2016թ. փետրվարի 25-ին ԵՊՀ Իջևանի մասնաճյուղում կայացավ վոլեյբոլի մասնաճյուղային առաջնություն, որի նպատակն էր ի հայտ բերել լավագույններին՝ մասնաճյուղի հավաքական թիմ կազմելու համար:

 Առաջնությանը մասնակցում էր վեց թիմ (Հումանիտար և Բնական գիտությունների ֆակուլտետներից երկուական թիմ, Տնտեսագիտության և Կիրառական արվեստի ֆակուլտետներից մեկական թիմ):

Պարտվող թիմը դուրս էր մնում մրցապայքարից:

Գեղեցիկ խաղով աչքի ընկան «Քարտեզագրություն և կադաստրային գործ» մասնագիտության առաջին կուրսի ուսանողները:

Եզրափակիչ դուրս եկան «Տնտեսագիտության տեսություն» մասնագիտության երկրորդ ու «Քարտեզագրություն և կադաստրային գործ» մասնագիտության առաջին կուրսերի ուսանողներից բաղկացած թիմերը:

2:1 հաշվով հաղթեց «Տնտեսագիտության տեսություն» մասնագիտության 2-րդ կուրսի թիմը, որը տնօրենության կողմից պարգևատրվեց գավաթով:

Երկրորդ տեղ գրաված «ՔԿԳ» մասնագիտության 1-ին կուրսի թիմը պարգևատրվեց հուշանվերով:

Վոլեյբոլի մասնաճյուղային առաջնությունում լավագույն խաղացող ճանաչվեց նույն թիմի անդամ Վարդան Դովլաթբեկյանը, ով նույնպես պարգևատրվեց հուշանվերով: