Երևանի պետական համալսարանի Իջևանի մասնաճյուղի (ի դեմս ԵՊՀ ԻՄ-ի տնօրենի պաշտոնակատար Անուշավան Մակարյանի) և Հայաստանի Հանրապետության կադաստրի կոմիտեի (ի դեմս ղեկավար Սուրեն Թովմասյանի) միջև կնքվել է ուսանողների վերապատրաստման և մասնագիտական որակավորման բարձրացման գործընթացն իրականացնելու մասին համագործակցության հուշագիր:

Կնքված հուշագրի նպատակն է ապահովել Կոմիտեում Համալսարանի ուսանողների (այսուհետ՝ պրակտիկանտներ) վերապատրաստումը և մասնագիտական որակավորման բարձրացումը:

Կողմերը համագործակցության շրջանակներում կիրականացնեն մի շարք միջոցառումներ:

Կոմիտեն՝

1. կիրականացնի պրակտիկանտների վերապատրաստման, մասնագիտական որակավորման բարձրացման գործընթացներ՝ անշարժ գույքի նկատմամբ իրավունքների և սահմանափակումների գրանցման, դրա վերաբերյալ տեղեկատվության տրամադրման, անշարժ գույքի գնահատման, դրա հաշվառման (չափագրման), հողաշինարարության, գեոդեզիայի և քարտեզագրության ոլորտներում,
2. կկազմակերպի ուսումնական պլաններին համապատասխան գործնական պարապմունքներ Կոմիտեի աշխատակիցների (քաղաքացիական ծառայողների և այլ մասնագետների) և Համալսարանի մասնագիտական ամբիոնների դասախոսների հետ համատեղ Կոմիտեի վարչական շենքում (հասցեն՝ ՀՀ, ք. Երևան, Արշակունյաց 7),
3. կիրականացնի ուսումնական, արտադրական և նախաավարտական պրակտիկաներ, ինչպես Կոմիտեի վարչական շենքում, այնպես էլ սպասարկման գրասենյակներում ու տարածքային ստորաբաժանումներում (ըստ անհրաժեշտության),
4. կկազմակերպի սեմինարներ, դասընթացներ և այլ քննարկումներ,
5. կապահովի Կոմիտեի աշխատակիցների մասնակցությունը Համալսարանի բակալավրիատի ավարտական աշխատանքների պատրաստման և գնահատման գործընթացներին:

Համալսարանը՝

1. կաջակցի Կոմիտեի կողմից իրականացվող՝ ուսանողների արտադրական պրակտիկայի և ուսումնական դասընթացների կազմակերպմանը,
2. կիրականացնի խորհրդատվություն Կոմիտեի աշխատակիցների համար՝ գիտահետազոտական և մասնագիտական գործունեության իրականացման վերաբերյալ,
3. օրենսդրությամբ սահմանված կարգով կաջակցի Կոմիտեին՝ համակարգը երիտասարդ մասնագետներով համալրելու գործընթացում:

   Կողմերի փոխհամաձայնությամբ կարող են իրականացվել նաև կնքված հուշագրի նպատակներից բխող այլ միջոցառումներ:

Երևանի պետական համալսարանի Իջևանի մասնաճյուղի (ի դեմս ԵՊՀ ԻՄ-ի տնօրենի պաշտոնակատար Ա. Հ. Մակարյանի) և ՀՀ գիտությունների ազգային ակադեմիայի գիտակրթական միջազգային կենտրոնի (ի դեմս ՀՀ ԳԱԱ ԳԿՄԿ տնօրեն Ա. Ա. Սարգսյանի) միջև կնքվել են համագործակցության հուշագիր և կենտրոնի մագիստրանտների պրակտիկաների կազմակերպման վերաբերյալ պայմանագիր ու համաձայնագիր:

Հուշագրի կնքումը, որի նպատակը Կողմերի միջև կրթական և գիտահետազոտական ոլորտներում գործընկերային հարաբերությունների հաստատումն է, հուշագրով նախատեսված մի շարք ուղղություններով համագործակցության ծրագրերի իրականացումը, նախաձեռնել է ԵՊՀ ԻՄ-ի արտաքին կապերի բաժինը:

Համագործակցության հիմնական ուղղություններն են.

ա) ՀՀ ԳԱԱ ԳԿՄԿ-ում և ԵՊՀ ԻՄ-ում իրականացվող կրթական ծրագրերի մասին տեղեկությունների տրամադրում, համատեղ կամ կրկնակի որակավորմամբ կրթական ծրագրերի իրականացմանն ուղղված աշխատանքների քննարկում և կազմակերպում,

բ) ՀՀ ԳԱԱ ԳԿՄԿ-ում և ԵՊՀ ԻՄ-ում մշակված առարկայական ծրագրերի, կրթական ծրագրերի արտաքին փորձագիտական գնահատման աշխատանքների իրականացում,

գ) սովորողների և պրոֆեսորադասախոսական կազմի անդամների ակադեմիական շարժունության իրականացում՝ նախապես հաստատելով փոխանակման պայմանները, ֆինանսավորումը,

դ) կրթական ծրագրերի և/կամ առանձին դասընթացների համատեղ մշակում՝ սովորողների համար հնարավորություններ ստեղծելով կրթություն ստանալու նաև հեռաուսուցման միջոցով,

ե) սովորողների և դասախոսների մասնագիտական վերապատրաստումների, վարպետության դասերի, կլոր սեղանների, թեմատիկ բանավեճերի կազմակերպում,

զ) գիտահետազոտական համատեղ ծրագրերի իրականացում,

է) ՀՀ ԳԱԱ ԳԿՄԿ-ի և ԵՊՀ ԻՄ-ի գիտական ամսագրերում ուսումնագիտական համատեղ հետազոտությունների արդյունքների հրատարակում,

ը) Կողմերի ուսանողների գիտահետազոտական, գիտամանկավարժական, ուսումնական, արտադրական պրակտիկաների փոխադարձ կազմակերպում,

թ) սովորողների ավարտական աշխատանքների, մագիստրոսական թեզերի փոխադարձ ղեկավարում և գրախոսում, գիտակրթական ն մեթոդական գրականության ու մասնագիտական զարգացմանը նպաստող էլեկտրոնային աղբյուրների տրամադրում, գիտական աշխատությունների, դասագրքերի, ուսումնական նյութերի, ուսումնամեթոդական ձեռնարկների մշակում և խմբագրում,

ժ) հանրապետական և միջազգային համատեղ գիտաժողովների կազմակերպում,

ժա) կրթական, գիտական ուղղվածության դրամաշնորհային համատեղ ծրագրերի իրականացում,

ժբ) մյուս Կողմին արտաքին ֆինանսավորմամբ իրականացվող ծրագրերում որպես գործընկեր ներգրավում,

ժգ) Կողմերի իրականացրած կրթական, գիտական, մշակութային այլ ծրագրերին, կազմակերպած միջոցառումներին մասնակցություն:

Կողմերն իրավունք ունեն հանդես գալու հուշագրով նախատեսված միջոցառումների կազմակերպման ու անցկացման նախաձեռնողի դերում:

Համագործակցության նպատակով, հուշագրի հիման վրա, Կողմերը պարտավորվում են.

ա) ժամանակին միմյանց փոխանցել համապատասխան տեղեկատվություն, որը վերաբերում է հուշագրով նախատեսված համատեղ ծրագրերի ու միջոցառումների անցկացմանը,

բ) անվճար հիմունքներով խորհրդատվություն տրամադրել ծրագրի ու միջոցառումների կազմակերպման ու անցկացման հարցերում,

գ) ապահովել անհրաժեշտ նյութական բազա և պայմաններ համատեղ ծրագրեր իրականացնելու և միջոցառումներ անցկացնելու համար,

դ) նախօրոք տեղեկացնել միմյանց համագործակցության ընթացքում առաջացող խնդիրների մասին և համատեղ ուժերով ապահովել դրանց լուծումը:

Կողմերի միջև կնքված մեկ այլ փաստաթղթի՝ ՀՀ ԳԱԱ գիտակրթական միջազգային կենտրոնի մագիստրանտների պրակտիկայի կազմակերպման մասին պայմանագրի համաձայն՝ կենտրոնի մագիստրանտները հնարավորություն կունենան անցնելու գիտահետազոտական կամ զիտամանկավարժական պրակտիկա ԵՊՀ Իջևանի մասնաճյուղում:

ԵՊՀ ԻՄ-ի կողմից կստեղծվեն անհրաժեշտ պայմաններ պրակտիկայի ծրագրով նախատեսված հանձնարարությունների իրականացման համար, պրակտիկայի ղեկավարներ կնշանակվեն համապատասխան մասնագիտական հմտություններ ունեցող առաջատար մասնագետները:

2021թ. ապրիլի 8-ին Երևանի պետական համալսարանի Իջևանի մասնաճյուղի (ի դեմս տնօրենի պաշտոնակատար Անուշավան Մակարյանի) և Հայաստանյայց Առաքելական Սուրբ Եկեղեցու Տավուշի թեմի (ի դեմս առաջնորդ Տեր Բագրատ  եպիսկոպոս Գալստանյանի) միջև կնքվեց համագործակցության հուշագիր:

Հուշագրի կնքումը, որի նպատակը երկու կողմերի միջև գործընկերային հարաբերությունների հաստատումն է և համագործակցության ծրագրերի իրականացումը, նախաձեռնել է ԵՊՀ ԻՄ-ի արտաքին կապերի բաժինը:

ԵՊՀ Իջևանի մասնաճյուղի և Հայաստանյայց Առաքելական Սուրբ Եկեղեցու Տավուշի թեմի համագործակցության հիմնական ուղղություններն են.

1. Ուսանողական աշխատանքային խմբի ձևավորում՝ Առաջնորդարան-մասնաճյուղ կապ հաստատելու համար,
2. Ուսանողների և հոգևոր դասի ներկայացուցիչների միջև պարբերաբար հանդիպումների կազմակերպում,
3. Ուխտագնացությունների միջոցով գիտաճանաչողական համատեղ արշավների կազմակերպում,
4. Ազգային երգի և պարի դասընթացների կազմակերպում,
5. Ուսանողական խորհրդի և Ուսանողական գիտական ընկերության ակումբների նախաձեռնած դասընթացների կազմակերպում Առաջնորդարանում,
6. Մասնաճյուղի երիտասարդ կամավորական ներուժի օգտագործում,
7. ՀՀ Տավուշի մարզի միայնակ, առավել խոցելի տարեցների, երեխաների ու երիտասարդների, անհայտ կորածների ընտանիքների, անապահով ընտանիքների, խոցելի համայնքների այցերի իրականացում,
8. Սույն Հուշագրի շրջանակներում այլ գործողությունների իրականացում:

Կողմերի համագործակցության հիմնական սկզբունքներն են.

• փոխադարձ վստահություն,
• պատասխանատվություն,
• պարտաճանաչություն,
• որակի վերահսկում,
• փոխըմբռնում և փոխզիջում,
• թափանցիկություն,
• համագործակցություն:

2021թ. ապրիլի 6-ին Երևանի պետական համալսարանի Իջևանի մասնաճյուղը (ի դեմս տնօրենի պաշտոնակատար Անուշավան Մակարյանի) և «Վիքիմեդիա Հայաստան» գիտակրթական հասարակական կազմակերպությունը (ի դեմս ՀԿ նախագահ Սուսաննա Մկրտչյանի) կնքեցին համագործակցության հուշագիր՝

• կարևորելով Հայաստանի Հանրապետությունում կրթության ոլորտում 21-րդ դարի հմտությունների ներդրումն ու տարածումը,
• խթանելով դասախոսների և ուսանողների շրջանում ազատ և արդի գիտելիքի և դրա ստեղծման հանդեպ հետաքրքրության բարձրացումը,
• գիտակցելով, որ համագործակցությունը հնարավորություն կընձեռի կրթության ոլորտում ներմուծել ժամանակակից մոտեցումներ և կհարստացնի վիքի հարթակներում որակյալ բովանդակության ստեղծումն ու տարածումը,
• նպատակ ունենալով ուսանողներին հնարավորություն տալ տեսական գիտելիքներին զուգահեռ ձեռք բերել նաև գործնական հմտություններ:

Կնքված հուշագրով կողմերը պարտավորվեցին՝

1. համագործակցել Հայաստանում Վիքիմեդիա նախագծերում բովանդակության ստեղծման և զարգացման գործում,
2. ապահովել Վիքիմեդիա բովանդակությունից օգտվելու և Վիքի գործիքները կրթական գործընթացում ներդնելու գործում:

Համագործակցության շրջանակներում կողմերի պատասխանատվությամբ կիրականացվեն մի շարք աշխատանքներ:

Մասնավորապես ԵՊՀ Իջևանի մասնաճյուղը պարտավոր է՝      

1. Աջակցել հայերենով որակյալ բովանդակության ստեղծմանն ու ազատ գիտելիքի տարածմանը համացանցում:
2. Խրախուսել վիքինախագծերի ներդրումն ուսումնական պրոցեսում և դասախոսների ու ուսանողների ակտիվ մասնակցությունը Վիքիմեդիա Հայաստանի կողմից իրականացվող ծրագրերին:
3. Ուսումնական գործընթացի ազդեցության գնահատման մեջ օգտագործել վիքիմեդիա նախագծերում ուսանողների արձանագրած արդյունքների վերաբերյալ Վիքիմեդիա Հայաստանի վիճակագրական տվյալները:
4. Վիքիպեդիան ու մյուս նախագծերը ուսումնական գործընթացում կիրառելը ներառել դասախոսների գնահատման կարգի մեջ:
5. Ուսանողների ուսումնական պրակտիկան կազմակերպել նաև Վիքիմեդիա Հայաստան կազմակերպությունում:
6. Տարածել Վիքիմեդիա Հայաստանի կողմից իրականացվող միջոցառումների մասին տեղեկատվություն համալսարանի ուսանողների և շրջանավարտների շրջանում:
7. Վիքիմեդիա Հայաստանի ներկայացուցիչներին հրավիրել մասնակցելու համալսարանի կողմից իրականացվող այն նախաձեռնություններին, որոնք կօգնեն տարածել ագատ գիտելիքի գաղափարն ու Վիքիմեդիա նախագծերում խմբագրելու սկզբունքները:

Վիքիմեդիա Հայաստանը պարտավոր է՝

1. Պարբերաբար և ըստ անհրաժեշտության կազմակերպել դասախոսների վերապատրաստում Վիքիմեդիա նախագծերը ուսումնական գործընթացում կիրառելու վերաբերյալ և հընթացս տրամադրել խորհրդատվություն:
2. Աջակցել դասավանդման գործընթացում Վիքիմեդիա նախագծերի և գործիքների օգնությամբ ուսումնական առաջադրանքների մշակմանը:
3. Պարբերաբար կազմակերպել ուսանողների՝ վիքիխմբագրման գործիքների վերապատրաստում և, ըստ անհրաժեշտության, տրամադրել մասնագիտական աջակցություն:
4. Համալսարանի դասախոսների հետ համատեղ կազմել մասնագիտական տարբեր ոլորտներից խմբագրման ենթակա հոդվածների ցանկը:
5. Համալսարանի կողմից իրականացվող մասնագիտական կողմնորոշման դասընթացներում ներառել Վիքիմեդիա շարժման և վիքիխմբագրման մասին բաղադրիչ և աջակցել դրա ներկայացմանը աշակերտների հետ հանդիպումների ժամանակ:
6. Համալսարանի ուսանողներին ընձեռել Վիքիմեդիա Հայաստանում վերապատրաստվելու և ուսումնական պրակտիկա անցնելու հնարավորություն:
7. Համալսարանին տրամադրել Վիքիմեդիա նախագծերում ուսանողների կատարած աշխատանքների ծավալի վերաբերյալ վիճակագրական մանրամասն տվյալներ:

«Երևանի պետական համալսարան» հիմնադրամի Իջևանի մասնաճյուղի (ի դեմս տնօրենի պաշտոնակատար Անուշավան Մակարյանի) և «Նաիրի ինշուրանս» ապահովագրական ընկերության (ի դեմս տնօրեն Մանե Մարտիրոսյանի) միջև 2021թ. մարտի 11-ին կնքված պայմանագրի համաձայն՝ ԵՊՀ ԻՄ–ի հիմնական աշխատակիցները կարող են օգտվել առողջության ապահովագրությունից: 

Պայմանագիրը գործում է մինչև 2021թ. դեկտեմբերի 30-ը, և այդ ժամանակահատվածում մասնաճյուղի աշխատակիցները կարող են օգտվել մի շարք անվճար բժշկական ծառայություններից: 

Նախօրոք զանգահարելով «Նաիրի ինշուրանս» ընկերություն (հեռ. 098 277 277, 098 277 288, 060 50 00 60)՝ ընկերության աշխատակցի կողմից նրանք կստանան անհրաժեշտ ուղղորդում, թե որ բուժհաստատություն կարելի է դիմել համապատասխան բժշկական ծառայությունից օգտվելու համար: Որոշ ծառայությունների իրականացումը կհամակարգվի ԵՊՀ ԻՄ-ի տնօրենության կողմից, որոնց մասին աշխատակիցները կտեղեկացվեն առանձին:

Պայմանագրով նախատեսված են հետևյալ բժշկական ծառայությունները.

1. Տարեկան պարտադիր հետազոտություններ՝մասնաճյուղի կողմից ընտրված բժշկական հաստատությունում մեկանգամյա ֆլյուրոգրաֆիա և թերապևտիկ զննում:
2. Տարեկան կանխարգելիչ հետազոտություն՝մասնաճյուղի կողմից ընտրված բժշկական հաստատությունում (առնվազն 4 բժշկական կենտրոններում)՝

• PAP թեստ 35-ից բարձր տարիքի կանանց համար,
• Կրծքագեղձի ուլտրաձայնային հետազոտություն, բժշկի նշանակման դեպքում մամոգրաֆիական հետազոտություն 35-ից բարձր տարիքի կանանց համար,
• PSA թեստ 45-ից բարձր տարիքի տղամարդկանց համար,
• Որովայնի խոռոչի, փոքր կոնքի օրգանների և վահանաձև գեղձի ուլտրաձայնային հետազոտություն,
• Էլեկտրասրտագրություն (ԷՍԳ),
• Տեսողության ստուգում,
• Արյան ընդհանուր քննություն լեյկոբանաձևով,
• Կանանց համար գինեկոլոգի խորհրդատվություն կամ տղամարդկանց համար ուռոլոգի խորհրդատվություն:

3. Շտապ և անհետաձգելի բուժօգնություն.

• Շտապօգնության խմբի այց, այդ թվում՝ մասնագիտացված,
• Անհետաձգելի ախտորոշիչ-բուժական միջոցառումների իրականացում,
• Անհետաձգելի բուժման դեղորայքի ապահովում:

4. Ամբուլատոր բուժօգնություն.

• Թերապևտի և նեղ-մասնագետների խորհրդատվություն, բուժման նշանակում,
• Թերապևտիկ և վիրաբուժական հիվանդությունների բուժում ամբուլատոր պայմաններում,
• Լաբորատոր ախտորոշում՝ ըստ բժշկի նշանակման,
• Գործիքային ախտորոշում՝ ըստ բժշկի նշանակման:

5. Ստացիոնար բժշկական օգնություն.

• Դժբախտ պատահարների հետևանքով հոսպիտալացում և բուժում,
• Թերապևտիկ և վիրաբուժական հիվանդությունների բուժում,
• Ստացիոնար պայմաններում բուժում պահանջող հիվանդությունների բուժում (այրվածք, վնասվածք, թունավորու մ և այլն),
• Ինտենսիվ թերապիա և ռեանիմացիոն միջոցառումներ պահանջող անհետաձգելի վիճակների բուժում,
• Լաբորատոր և գործիքային ախտորոշիչ հետազոտությունների իրականացում: Անգիոգրաֆիկ հետազոտությունները, այդ թվում` կորոնարոգրաֆիա հետազոտության, հատուցում նույնիսկ այն դեպքում, երբ այդ հետազոտությանը չի հաջորդում ծրագրով նախատեսված վիրահատական միջամտություն,
• Վիրահատությունների ժամանակ կիրառվող մետաղական կոնստրուկցիաների հատուցում,
• Սրտանոթային վիրահատություններ և միջամտություններ,
• Անոթային և նյարդավիրաբուժական վիրահատություններ և միջամտություններ,
• Չարորակ ուռուցքային հիվանդությունների վիրահատական բուժում,
• Անհատական հիվանդասենյակի արժեքի հատուցում օրական 10,000 (տասը հազար) ՀՀ դրամ՝ անկախ օրերի քանակից:

6. Քրոնիկ հիվանդությունների բուժում.

• Ամբուլատոր բուժում պահանջող յուրաքանչյուր քրոնիկ հիվանդության սրացման անսահմանափակ քանակի բուժում,
• Ստացիոնար բուժում պահանջող յուրաքանչյուր քրոնիկ հիվանդության սրացման սահմանակ բուժում,
• Պլանային բուժում պահանջող հիվանդությունների վիրաբուժություն և/կամ միջամտություն:

7. Հղիության հսկողություն:
8. Ակնաբուժություն.

• Ախտորոշում,
• Աչքի տարատեսակ վնասվածքների և հիվանդությունների բուժում թերապևտիկ և վիրաբուժական եղանակներով:

9. Դեղորայք.

• Նշանակված ղեղորայքի ձեռքբերման ծախսերի հատուցում,
• Համագործակցող դեղատներից նշանակված դեղորայքը անվճար/ուղեգրով ձեռք բերելու հնարավորություն:

10. Պլանային վիրաբուժություն՝ պլանային բուժում պահանջող հիվանդությունների վիրաբուժություն և/կամ միջամտություն:

Պայմանագրի ներքո կարող են ապահովագրվել միայն ԵՊՀ ԻՄ-ի հիմնական աշխատողները և պայմանագրով ապահովագրված աշխատողների ընտանիքի անմիջական անդամները` մինչև 65 տարեկան ամուսին/կին, մինչև 18 տարեկան զավակ: Ընտանիքի անդամների համար, ըստ տարիքային խմբերի (0-17, 18-40, 41-65), սահմանված են ապահովագրավճարներ:

Յուրաքանչյուր ապահովագրված անձի համար որպես ապահովագրական գումար է սահմանվում 6,000,000 (վեց միլիոն) ՀՀ դրամը:

Ոչ պայմանական չփոխհատուցվող գումար չի կիրառվում:

Ապահովագրված անձ-աշխատողների նկատմամբ տարիքային սահմանափակում չի կիրառվում:

Ապահովագրությունը գործում է Հայաստանի Հանրապետության և Լեռնային Ղարաբաղի Հանրապետության տարածքում:

Նշանակված դեղորայքը կամ ախտորոշիչ հետազոտությունները հատուցվում են միայն այն հիվանդությունների կապակցությամբ, որոնք ներառված են ծրագրում:

Այլ մանրամասներ կարող եք ձեռք բերել «Նաիրի ինշուրանս» ընկերության աշխատակիցներից: