2019թ. մայիսի 23-ին ԵՊՀ ԻՄ-ի ֆրանսերենի ուսուցման սրահում «Հայ-ֆրանսիական բարեկամություն և փոխանակում» կազմակերպության անդամներ Ջոս Միլիները,  Ֆիլիպ Դրոմզեն, Լորանս Դրոմզեն կրթաթոշակ հանձնեցին «Ֆրանսերեն լեզու և գրականություն» մասնագիտության ուսանողուհիներ Էմմա Շահնազարյանին և Վարսիկ Իսախանյանին:

Ֆրանսիական պատվիրակության ներկայացուցիչները նշեցին, որ իրենց կազմակերպությունը գոհ է մեկ կիսամյակի ընթացքում ուսանողուհիների կատարած հետազոտական աշխատանքներից, որոնց համար նրանց տրամադրվել է կրթաթոշակ:

ԵՊՀ ԻՄ-ի ֆրանսերեն լեզվի և գրականության ամբիոնի վարիչի պաշտոնակատար Ա.Մարդանյանը ներկայացրեց հայ-ֆրանսիական բարեկամության պատմությունը և շնորհակալություն հայտնեց կազմակերպության նախագահ տիկին Պոլետ Կուտանին:

Շնորհակալական խոսքով հանդես եկան ԵՊՀ ԻՄ-ի հումանիտար գիտությունների ֆակուլտետի դեկանի պաշտոնակատար Կարինե Պողոսյանը, Արտաքին կապերի բաժնի վարիչ Արման Եգանյանը, ով տնօրենության կողմից հյուրերին հանձնեց մի գեղեցիկ գոբելեն՝ Կիրառական արվեստի ֆակուլտետի ուսանողների աշխատանքներից մեկը:

Հիշեցնենք, որ յուրաքանչյուր տարի կազմակերպության կողմից տրամադրվում է կրթաթոշակ «Ֆրանսերեն լեզու և գրականություն» մասնագիտության վճարովի ուսուցման համակարգում սովորող ուսանողներին՝ նրանց կատարած աշխատանքներին համապատասխան: Այս տարի լրացավ նաև «Հայ-ֆրանսիական բարեկամություն և փոխանակում» կազմակերպության հիմնադրման 20-ամյակը, որի առթիվ կազմակերպված միջոցառմանը ներկա էին ԵՊՀ ԻՄ-ի դասախոսներ, աշխատակիցներ, քաղաքապետարանի ներկայացուցիչներ, ուսանողներ:

 2019թ. մայիսի 23-ին ԵՊՀ Իջևանի մասնաճյուղի գրադարանում տեղի ունեցավ կանանց և աղջիկների շախմատի մասնաճյուղային առաջնություն, որին մասնակցեցին տարբեր մասնագիտությունների 7 ուսանողուհիներ:

Այն կազմակերպվել էր ԵՊՀ ԻՄ-ի ուսանողական գիտական ընկերության կողմից, մրցավարն էր ՈՒԳԸ անդամ, «ԻԿՄ» մասնագիտության 3-րդ կուրսի ուսանող Գերասիմ Ալավերդյանը:

Առաջնությունն ընթացավ շրջանաձև մրցակարգով (6 տուր):

«ԻԿՄ» 1-ին կուրսի ուսանողուհի Սոնա Վիրաբյանը և «ԻԿՄ» 3-րդ կուրսի ուսանողուհի Սյուզաննա Միրզոյանը հավաքեցին հավասար (5-ական) միավորներ:

Անձնական խաղերի արդյունքներով հաղթող ճանաչվեց Սյուզաննա Միրզոյանը, իսկ 2-րդ հորիզոնականն զբաղեցրեց Սոնա Վիրաբյանը:

3-րդ հորիզոնականն զբաղեցրեց «ՏՄՄ» 2-րդ կուրսի ուսանողուհի Զինա Ոսկանյանը:

Մրցանակային տեղեր զբաղեցնողները պարգևատրվեցին պատվոգրերով:

Մասնաճյուղում առաջին անգամ սահմանվեց կանանց և աղջիկների շախմատի առաջնության փոխանցիկ գավաթ, որը տրվեց Սյուզաննա Միրզոյանին:

Առաջնության մրցավար Գերասիմ Ալավերդյանին տրվեց շնորհակալագիր:

Պարգևները հանձնեց մասնաճյուղի ՈՒԳԸ փոխնախագահ, «Պատմություն» մասնագիտության 3-րդ կուրսի ուսանող Շիրակ Գասպարյանը:

 2019թ. մայիսի 22-ին ԵՊՀ Իջևանի մասնաճյուղում կայացավ կուտակային կենսաթոշակային ֆոնդերի վերաբերյալ սեմինար-քննարկում, որին մասնակցում էին ԵՊՀ ԻՄ-ի ուսանողներ և աշխատակիցներ:

Քննարկումը վարեցին «Ֆինանսներ» մասնագիտության 1-ին կուրսի ուսանողուհի Իրա Վարդանյանը, նույն մասնագիտության 2-րդ կուրսի ուսանողուհիներ Լիանա Մանուչարյանը և Անուշ Նազինյանը, «Տնտեսագիտություն» մասնագիտության 3-րդ կուրսի ուսանողուհի Լիանա Խաչատրյանը:

Մայիսի 6-ին և 7-ին ՈԻԽ-ի նախաձեռնությամբ ԵՊՀ ԻՄ-ի ուսանողները, ինչպես նաև Իջևանի ավագ դպրոցի ու Իջևանի վարժարանի մի քանի աշակերտներ հանդիպել էին “Amundi Acba Asset Management” և “C-Quadrat Ampega Asset Management Armenia” կուտակային կենսաթոշակային ֆոնդերի ներկայացուցիչների հետ: Հանդիպումների ընթացքում յուրաքանչյուր ֆոնդ ներկայացրել էր իր գումարային ակտիվների քանակը, ֆոնդի եկամտաբերության դինամիկան և ռիսկայնությունը, իր գործընկերներին ու համասեփականատերերին, սեփական մրցակցային առավելությունները:

ԵՊՀ ԻՄ-ում կայացած սեմինար-քննարկման նպատակն էր հանդիպումների ընթացքում ստացած տեղեկատվությունը փոխանցել համալսարանականներին:

Ուսանողները ներկայացրին երկու ֆոնդերը, ինչպես նաև պարզաբանեցին կուտակային կենսաթոշակային ֆոնդերի վերաբերյալ մարդկանց ունեցած որոշ կարծրատիպեր:

Սեմինար-քննարկման վերջում մասնակիցները ստացան ֆոնդերի եկամտաբերության, ռիսկայնության և աշխատանքի բնույթի վերաբերյալ իրենց հետաքրքրող հարցերի պատասխանները:

 2019թ. մայիսի 22-ին ԵՊՀ Իջևանի մասնաճյուղում կայացավ «Կիրառական արվեստ» մասնագիտության ուսանողների ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր «Տերյան» մշակութային կենտրոնի տնօրեն, ՀՀ ՆՄ և ՀՀ ԴՄ անդամ, արվեստագիտության թեկնածու Լիլիթ Մելիքյանը:

Պաշտպանությանը ներկա էին ոչ միայն ԵՊՀ ԻՄ-ի և Կիրառական արվեստի ֆակուլտետի վարչական ու պրոֆեսորադասախոսական անձնակազմի անդամներ, ուսանողներ, այլև ծնողներ, հյուրեր, արվեստասեր հասարակության ներկայացուցիչներ:

Ձևավորված ավանդույթի համաձայն՝ աշխատանքներն ունեին թեմատիկ, ժանրային և ոճական բազմազանություն:

Պաշտպանությունն անցավ հաճելի մթնոլորտում՝ մասնակիցներին պատճառելով գեղագիտական հաճույք:

Ամփոփիչ ատեստավորման հանձնաժողովը «գերազանց» գնահատեց Հովհաննես Չոբանյանի («Խոտհունձ», գեղանկար, ղեկավար՝ Համլետ Ասատրյան), Արփինե Շահնազարյանի (Հավաքածու, դեկորատիվ նկարչություն կտորի վրա, ղեկավար՝ Անուշ Չիբուխչյան), Աշխեն Մելքումյանի («Հայկական եկեղեցիներ», մանրանկարչություն, ղեկավար՝ Լիլիթ Ֆլջյան) աշխատանքները:

«Լավ» գնահատվեցին Կարեն Գոգինյանի («Ամբերդ», ասեղային գոբելեն, ղեկավար՝ Մհեր Ստեփանյան), Նարեկ Ղազարյանի (Ժամացույց, փայտի փորագրություն, ղեկավար՝ Սերգեյ Հովհաննիսյան), Մերի Եգանյանի («ԵՊՀ 100», կոլաժ, ղեկավար՝ Արևիկ Խաչատրյան) աշխատանքները:

Վերջում ֆակուլտետի վարչական ու պրոֆեսորադասախոսական անձնակազմի ներկայացուցիչները բակալավրի որակավորում ստանալու կապակցությամբ շնորհավորեցին իրենց շրջանավարտներին՝ նրանց մաղթելով մասնագիտական ու անձնական մեծ հաջողություններ:

Պաշտպանության բոլոր լուսանկարները տե՛ս Պատկերասրահում: