2015թ. նոյեմբերի 21-ին ԵՊՀ Իջևանի մասնաճյուղում տեղի ունեցավ Հոգեբանի օրվան նվիրված միջոցառում, որը կազմակերպվել էր Ուսանողական գիտական ընկերության ու «Մանկավարժություն և հոգեբանություն» մասնագիտության ուսանողների համատեղ ջանքերով:

«Ջանասիրաբար քայլիր առաջ` հաղթահարելով բոլոր դժվարությունները» կարգախոսը կրող միջոցառմանն ակտիվորեն մասնակցեցին ոչ միայն ուսանողները, այլև Հումանիտար գիտությունների ֆակուլտետի դասախոսները, դեկանատի աշխատակիցները:

Մասնակիցներն ուսանողներին բաժանեցին թռուցիկ խոսքեր և հոգեբանության խորհրդանիշ «ψ» (փսի) տառը քաղցրավենիքի տեսքով հյուրասիրեցին բոլորին:

Հոգեբանի օրվա կապակցությամբ կազմակերպվել էր նաև ֆլեշմոբ «Նկարիր ψ», որին ակտիվ մասնակցություն ունեցան Կիրառական արվեստի ֆակուլտետի ՈՒԳԸ-ի անդամները և ուսանողները:

2015թ. նոյեմբերի 19-20-ը ԵՊՀ Իջևանի մասնաճյուղում տեղի ունեցավ շախմատի մասնաճյուղային առաջնություն, որին մասնակցում էր ԵՊՀ ԻՄ-ի տարբեր ֆակուլտետներից 8 ուսանող:

Խաղերն անցկացվեցին երկու ենթախմբով:

Ամեն ենթախմբի առաջին տեղ գրավողները մրցեցին իրար հետ:

Եզրափակիչում հանդիպեցին առկա ուսուցման համակարգի «Անգլերեն լեզու և գրականություն» մասնագիտության 2-րդ կուրսի ուսանող Հայկ Դանիելյանը և հեռակա ուսուցման համակարգի «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանող Դերենիկ Սահակյանը:

Հաղթեց Հայկ Դանիելյանը, ով տնօրենության կողմից պարգևատրվեց հուշանվերով:

2015թ. նոյեմբերի 20-ին ԵՊՀ ԻՄ-ի հումանիտար գիտությունների ֆակուլտետում տեղի ունեցավ ինտելեկտուալ խաղ, որը կազմակերպել էր «Տավուշ» ռազմահայրենասիրական ակումբի հումանիտար հոսքը` համակարգող Մերի Գասպարյանի գլխավորությամբ:

Այն նպատակ ուներ էլ ավելի հագեցնելու ակումբականների առօրյան, զարգացնելու նրանց միտքն ու հարստացնելու գիտելիքները:

Խաղին մասնակցում էին «Հայոց լեզու և գրականություն», «Պատմություն», «Ֆրանսերեն լեզու և գրականություն» մասնագիտությունների ուսանողներից կազմված երկու թիմեր:

Ինտելեկտուալ խաղի ընթացքում հնչեցին տարբեր բնագավառների առնչվող շուրջ հիսուն հետաքրքրաշարժ և ուսուցողական հարցեր` պատմական, գրական, լեզվաբանական, տրամաբանական և այլն։

Թիմերն իրենց լավ դրսևորեցին` տալով սպառիչ պատասխաններ։ 37:35 հաշվով I թիմը հաղթեց II-ին:

«Տավուշ» ռազմահայրենասիրական ակումբի կողմից նման միջոցառումների կազմակերպումը դարձել է ավանդույթ և կրելու է շարունակական բնույթ:

2015թ. նոյեմբերի 19-ին ԵՊՀ ԻՄ-ի «Մանկավարժություն և հոգեբանություն» մասնագիտության 2-րդ և 4-րդ կուրսերի ուսանողները կատարեցին ուսումնաճանաչողական այց ԵՊՀ-ի փիլիսոփայության և հոգեբանության ֆակուլտետի փորձարարական հոգեբանության, անձի և մասնագիտական գործունեության հոգեբանության գիտահետազոտական լաբորատորիաներ:

Ուսումնաճանաչողական այցը կազմակերպվել էր ԵՊՀ ԻՄ-ի տնօրենության աջակցությամբ ու Մանկավարժության և հոգեբանության ամբիոնի նախաձեռնությամբ:

Փորձարարական հոգեբանության լաբորատորիայի գիտաշխատողներ Լ.Ստեփանյանը և Է.Ասիրյանը ուսանողներին ներկայացրին լաբորատորիայի սարքավորումները և նրանց հետ փորձեր իրականացրին:

Անձի և մասնագիտական գործունեության հոգեբանության լաբորատորիայի գիտաշխատող Դ.Սարգսյանը ուսանողներին ծանոթացրեց լաբորատորիայի գիտահետազոտական աշխատանքներին, մասնագիտական հարուստ գրականությանը (ինչպես ժամանակակից, այնպես էլ մատենագիր), հոգեբանության դասագրքերին (հայերեն և օտարալեզու):

Մեր ուսանողները եղան նաև Կիրառական հոգեբանության կենտրոնում, որտեղ գիտաշխատող Լ.Գևորգյանը նրանց ծանոթացրեց թրեյնինգային սենյակին, ուր իրականացվում էին խմբային և անհատական թերապևտիկ աշխատանքներ:

Վերջում ուսանողներն այցելեցին «Կանաչ սենյակ-ծիածանային պարտեզ» երեխաների սոցիալականացման կենտրոն: