Հիմնական

featured

Անհատական ցուցահանդես Իջևանի պատկերասրահում

Ս.թ. մայիսի 13-ին՝ ժամը 14:00-ին, Իջևանի պատկերասրահում տեղի կունենա ԵՊՀ Իջևանի մասնաճյուղի կիրառական արվեստի ֆակուլտետի 3-րդ կուրսի ուսանողուհի ՇՈՒՇԱՆ ԲԱՂԴԱՍԱՐՅԱՆԻ աշխատանքների անհատական ցուցահանդեսի հանդիսավոր բացումը: Ներկայացված կլինեն 40-ից ավել գունանկարներ, 5-ից ավել քանդակներ և 40-ից ավելի ճեպանկարներ:

Ցուցահանդեսը կտևի 2 շաբաթ:

Մուտքն ազատ է:

Տեղի ունեցավ ամբիոնների համատեղ նիստ

2013թ. ապրիլի 30-ին մասնաճյուղում հրավիրվեց Հայոց լեզվի և գրականության ու Օտար լեզուների ամբիոնների համատեղ նիստ` ԵՊՀ հայ բանասիրության ֆակուլտետի դասախոսների այցի կապակցությամբ:

Նիստին ներկա էին ԵՊՀ հայ բանասիրության ֆակուլտետի դեկան, բան. գիտ. դոկտոր, պրոֆեսոր Ա.Ավագյանը, Հայ գրականության ամբիոնի վարիչ, բան. գիտ. դոկտոր, պրոֆեսոր Ս.Մուրադյանը, նույն ամբիոնի դասախոս, բան.գիտ. թեկն., դոցենտ Ս.Սրապիոնյանը, Ընդհանուր լեզվաբանության ամբիոնի դասախոս, բան.գիտ. թեկն., դոցենտ Ա.Աբրահամյանը, ԵՊՀ ԻՄ-ի տնօրեն Ս.Առաքելյանը, Հումանիտար գիտությունների ֆակուլտետի դեկան Վ.Ալեքսանյանը, վարչական և պրոֆեսորադասախոսական անձնակազմի ներկայացուցիչներ, ուսանողներ:

Քննարկվեցին մայր բուհում ու մասնաճյուղում հայոց լեզվի և գրականության ուսումնական գործընթացն առավել արդյունավետ կազմակերպելու վերաբերյալ մի շարք հարցեր:

ԵՊՀ ԻՄ-ի տնօրեն Ս.Առաքելյանը նշեց, որ մասնաճյուղն ամբողջովին առաջնորդվում է մայր բուհի ուսումնական պլաններով (բացառությամբ սփյուռքահայ գրականության): Շարունակվում է մասնաճյուղը տեղացի որակյալ կադրերով ապահովելու գործընթացը:

ԵՊՀ հայ բանասիրության ֆակուլտետի դեկան Ա.Ավագյանը կարծիք հայտնեց, որ Իջևանի մասնաճյուղը ԵՊՀ-ի անբաժանելի մասն է: «Մասնաճյուղը կարևորագույն առաքելություն ունի. այն ոչ միայն մանկավարժական կադրերի դարբնոց է, կրթական, մշակութային կենտրոն, այլև գիտական: Գնահատելի է տնօրենի նվիրվածությունը բուհն ավելի ուժեղ դարձնելու գործում»,-հավելեց Ա.Ավագյանը:

Նիստում դիտարկվեց գրավոր ընթացիկ քննությունների անարդյունավետության հարցը: Այդ կապակցությամբ Ս.Առաքելյանը տեղեկացրեց, որ մասնաճյուղում փոխվել է 2 գրավոր ընթացիկ քննությունների կարգը, դրանցից մեկը փոխարինվել է թեստային համակարգով, մյուսը` բանավոր քննությամբ:

Քննարկվեց նաև այն հարցը, թե կրկնությունից խուսափելու և առարկան լավ յուրացնելու համար որ ուսումնական կիսամյակում է առավել նպատակահարմար ընդգրկել գրականության և լեզվի տեսության առարկաները:

Փետրագնդակի Երևան քաղաքի բաց առաջնություն

Ապրիլի 29-ից մայիսի 1-ը Երևանում տեղի ունեցավ փետրագնդակի բաց առաջնություն, որին մասնակցում էին Գյումրիի, Վանաձորի, Իջևանի և Երևանի տարբեր մարզադպրոցների 56 մարզիկ-մարզուհիներ:

Իջևանից մասնակցում էր 5 հոգի, որոնցից 4-ը մարզադպրոցի սաներ էին, 1-ը` ԵՊՀ Իջևանի մասնաճյուղի «Սերվիս» մասնագիտության 1-ին կուրսի ուսանողուհի Անի Դավթյանը, որը հայտնվեց լավագույն տասնյակում:

Մարզադպրոցի սան Աննա Մանուչարյանը անհատական մրցաձևից գրավեց 4-րդ տեղը և զուգախաղերում ընկերակցելով Սվետա Բախչիգյուլյանի հետ` զբաղեցրեց դարձյալ 4-րդ տեղը:

Այժմ թիմը պատրաստվում է մայիսի 7-9-ը Երևանում կայանալիք փետրագնդակի առաջնությանը:

Մասնաճյուղում ակնարկային դասախոսություններ կարդացին ԵՊՀ-ի անվանի դասախոսները

2013թ. ապրիլի 30-ին մայր բուհի հետ համագործակցության շրջանակներում մասնաճյուղում կազմակերպվել էր հերթական հադիպումը ԵՊՀ-ի Հայ բանասիրության ֆակուլտետի անվանի դասախոսների` ֆակուլտետի դեկան, բան. գիտ. դոկտոր, պրոֆեսոր Ա.Ավագյանի, Հայ գրականության ամբիոնի վարիչ, բան. գիտ. դոկտոր, պրոֆեսոր Ս.Մուրադյանի, նույն ամբիոնի դասախոս, բան.գիտ. թեկն., դոցենտ Ս.Սրապիոնյանի և Ընդհանուր լեզվաբանության ամբիոնի դասախոս, բան.գիտ. թեկն., դոցենտ Ա.Աբրահամյանի հետ:

Մասնաճյուղի հումանիտար գիտությունների ֆակուլտետի ուսանողների համար ԵՊՀ-ի փորձառու դասախոսները կարդացին ակնարկային դասախոսություններ:

Ա.Ավագյանը կարդաց դասախոսություն` «Հայ գրականության զարգացման փուլերը», «Սփյուռքահայ գրականության սկզբնավորումը, խնդիրները, առանձնահատկությունները» թեմաներով:

Ս.Մուրադյանի դասախոսության թեման էր «20-րդ դարասկզբի գրական ուղղությունները հայ գրականության մեջ»:

Ս.Սրապիոնյանը դասախոսություն կարդաց «20-րդ դարասկզբի գրական ուղղությունները և Դ.Վարուժանը», «Մեծ եղեռնի զոհ գրողներ (Սիամանթո)» թեմաներով:

Ա.Աբրահամյանը կարդաց դասախոսություն` «Լեզվի նշանագիտական վերլուծության սկզբունքները», «Լեզվական միավորների հարաբերությունների տեսակները» թեմաներով:

Ուսանողները շատ տպավորված էին, արտահայտեցին իրենց խորին գոհունակությունը` ակնկալելով, որ նմանօրինակ հանդիպումները կլինեն հաճախակի:

Գեղխորհրդի նիստում

2013թ. ապրիլի 29-ին Կիրառական արվեստի ֆակուլտետում տեղի ունեցավ Գեղխորհրդի նիստ` Լ.Լաչիկյանի նախագահությամբ:

Նիստին մասնակցում էին ֆակուլտետի գեղխորհրդի անդամները, հրավիրված էր Դեկորատիվ կիրառական արվեստի ամբիոնի դասախոս Ա.Դիլբարյանը:

Լ.Լաչիկյանը գեղարվեստական խորհրդի անդամներին ներկայացրեց խորհրդի գործառույթները:

Նիստում քննարկվեցին օրակարգով նախատեսված հարցերը:

2013-2017 ուստարիների ուսումնական աշխատանքային պլանի առարկայացանկի և առարկաների գնահատման ձևերի մասին զեկուցեց ֆակուլտետի դեկան Կ.Այվազյանը: Նա տեղեկացրեց, որ նոր ուսումնական պլանի համար հիմք է ընդունվել 2008-2012 ուստարիների ուսումնական պլանը, որի մեջ գեղխորհրդի անդամների քվեարկությամբ կատարվեցին մի շարք փոփոխություններ: Մասնավորապես` ուսումնական պլանից հանվեցին «Ֆրանսերեն լեզու-3», «Անգլերեն լեզու-3» առարկաների կամընտրական բլոկը և ուսումնառության 7-րդ կիսամյակում նախատեսված կուրսային աշխատանքը:

Գեղխորհրդի անդամների կողմից առաջարկվեցին.

  • Ամբիոնների նիստերում քննարկել մասնագիտական առարկաների ուսումնական ծրագրերը և այդ ծրագրերի բարեփոխված տարբերակները ներկայացնել գեղխորհրդի հաստատմանը:
  • «Գծանկար, գունանկար» ամբիոնին հանձնարարել յուրաքանչյուր շաբաթվա երեքշաբթի և ուրբաթ օրերը համարել պլեներային նկարչության օրեր և դասապրոցեսը կազմակերպել պլեներում:
  • «Գծանկար, գունանկար» ամբիոնի «Գծանկարչություն» և «Գունանկարչություն» առարկաների ուսումնական ծրագրերում զետեղել պլեներային նկարչության դասաժամեր:
  • Ընթացիկ քննության ժամանակ ուսանողը ներկայացնի առաջադրանք` արվեստանոցային և պլեներային նկարչությունից:
Սկիզբ...589590591592593594595596597598...Վերջ

Հայտարարություն

Նորություններ