2021թ. դեկտեմբերի 10-ին ԵՊՀ Իջևանի մասնաճյուղում կայացավ «Հայացք կրթությանը և դաստիարակությանը Ճապոնիայում, Ֆինլանդիայում, Ռուսաստանում և Հայաստանում. միջմշակութային ասպեկտ» թեմայով միջազգային առցանց բաց դաս՝ արտասահմանյան հետազոտությունների բաժնի պրոֆեսոր, Կիոտոյի Սանգյո համալսարանի լեզվաբանության ամբիոնի վարիչ Միցուսի Կիտաձյո-սանի, փիլիսոփայության դոկտոր, Ֆինլանդիայի Հյուսիսային համալսարանի փիլիսոփայության բաժնի օտար լեզուների և թարգմանության դեպարտամենտի ռուսաց լեզվի և թարգմանության ամբիոնի պրոֆեսոր Վ.Վ.Բույլովի, Ուրալի՝ Ռուսաստանի առաջին նախագահ Բ.Ն.Ելցինի անվան ֆեդերալ համալսարանի օտար լեզուների և թարգմանության ամբիոնի պրոֆեսոր Տ.Վ.Կուպրինայի մասնակցությամբ:

Միջոցառման նախաձեռնողն ու վարողը ԵՊՀ Իջևանի մասնաճյուղի օտար լեզուների ամբիոնի դոցենտ, մ.գ.թ., Ռուսաստանի բնական գիտությունների ակադեմիայի (РАЕ) պրոֆեսոր Սվետլանա Միխայելի Մինասյանն էր:

ԵՊՀ Իջևանի մասնաճյուղի տնօրենի պաշտոնակատար Անուշավան Մակարյանը ողջունեց բաց դասի բոլոր մասնակիցներին և խոսքը փոխանցեց արտասահմանյան գործընկերներին:

Միջազգային բաց դասի նպատակը նրա կիրառական բնույթը ցուցադրելն էր՝ մինիմում տեսություն,  մաքսիմում պրակտիկա և պատկերավոր օրինակներ: Մանկավարժական էդուտոնը նշված միջոցառման աշխատանքային հիմնական մեթոդն էր: Այն ոչ միայն արդյունավետ է, այլև դյուրընկալելի: Եկել է ժամանակը, երբ անհրաժեշտ է գտնել գործընկերներ և նախագծեր ստեղծել միջազգային մակարդակում, հեռավար ձևաչափով բազմազանեցնել դասերի տեսակները: Այսօր կրթական վիրտուալ հարթակը (միջավայրը) տալիս է մեծ հնարավորություն՝ վիրտուալ դասեր, փորձի փոխանակում, բանավեճեր և քննարկումներ, լայֆխակների (հնարամտությունների), տեխնոլոգիաների և դիզայնների մշակում:

Կիոտոյի Սանգյո համալսարանի պրոֆեսոր Միցուսի Կիտաձյո-սանը հետաքրքիր օրինակներ բերեց Ճապոնիայի կրթական համակարգից, պատմեց դաստիարակության և էթիկետի ազգային բնույթի (բնավորության) մասին, ճապոնացի ուսանողների կյանքից օրինակներ բերեց: Ընդգծեց, որ կրթության և դաստիարակության ողջ գործընթացը կենսական ստուգման երեք շրջափուլ է անցնում, և յուքանչյուր փուլում հարկավոր է լինում քննություն հանձնել:

Պրոֆեսոր Ս. Մ. Մինասյանը պատմեց, թե որն է ճապոնական «իկուձի» կրթության և դաստիարակության հաջողությունը: Որպես օրինակ ներկայացրեց պրոֆեսոր Մակադո Շիչիդայի և Մասարո Իբուկայի դաստիարակության մեթոդիկան, որն ընդհանուր առմամբ համընկնում է Հայաստանում դաստիարակության հնագույն սկզբունքներին:

Ֆինլանդիայի Հյուսիսային համալսարանի պրոֆեսոր Վ.Վ.Բույլովը նշեց, որ երկար տարիների ընթացքում Ֆինլանդիան գլխավորող դիրք է գրավել կրթական համակարգի համաշխարհային վարկանիշում: Երկրի բոլոր հատվածներում բոլոր ուսումնական հաստատությունները հրաշալիորեն հագեցած և վերազինված են: Ֆինլանդիայի համալսարաններում լայնորեն գործարկվում է ուսուցման միջդիսցիպլինար սկզբունքը: Համալսարանական ուսուցումը կրում է գիտահետազոտական բնույթ և միաժամանակ ունի գործնական մեծ ուղղվածություն: Այստեղ կողմնորոշվում են ոչ միայն ուսանողների կողմից գիտելիքների մեծ ծավալի յուրացմամբ, այլև սովորեցնում են ստացած գիտելիքները և կարողությունները կիրառել կյանքում: Դաստիարակությունը հենվում է անձնական օրինակների վրա և տարվում է կրթությանը զուգընթաց: Դասախոսները և ուսանողները չեն խախտում էթիկետի (վարվեցողության) կանոնները, հարգանքը, վստահությունը, թեև, ինչպես բոլոր երկրներում, կան դաստիարակության սեփական խնդիրները:

Պրոֆեսոր Տ.Վ.Կուպրինան ներկայացրեց միջազգային հեղինակների խմբի դասագիրքը՝ «Միջմշակութային դիդակտիկայի հիմունքները» (Ռուսաստան-Սլովակիա), և ուսումնական ձեռնարկը՝ «Տոլերանտության (հանդուրժողականության) զարգացման հինգ դաս»: Նա նշեց, որ լավագույն կրթական ծրագրերը ներառում են ոչ միայն «կոշտ» հմտությունների (hard skills), այլև «փափուկ» հմտությունների (soft skills) ձևավորման տարրեր՝ հիմնված զգայական ինտելեկտի վրա, հաշվի են առնում անհատական փոփոխությունների տեսությունը և պրակտիկան, նպատակաուղղված ուսուցման նորարարական մեթոդիկաները, միջանձնային հարաբերությունները, որոնք նպաստում են ուսուցման արդյունավետությանը, մասնավորապես՝ դասավանդողների և սովորողների լավ փոխհարաբերությանը:

Հումանիտար գիտությունների ֆակուլտետի «Ռուսաց լեզու և գրականություն» կրթական ծրագրի I կուրսի ուսանողներն ուղղեցին հարցեր, քննարկումն անցավ ինտերակտիվ ձևաչափով:

Ամփոփելով դասի արդյունքները՝ տիկին Մինասյանն արձանագրեց. «Միջազգային բաց դասը ցույց տվեց, որ քննարկելով կրթության և դաստիարակության արդի հարցեր՝ մենք դրանց տվեցինք գործնական, համեմատական բնույթ, բարձրացրինք ուսանողների մոտիվացիան, հասկացանք, որ գլոբալ փոփոխությունների պայմաններում կրթության և դաստիարակության հարցերը մնում են պահանջված, և դրանք կարելի է լուծել՝ քննարկելով առցանց ձևաչափով»:

 2021թ. դեկտեմբերի 10-ին ԵՊՀ Իջևանի մասնաճյուղում էին ՀՀ կենտրոնական բանկի կորպորատիվ ծառայությունների և զարգացման դեպարտամենտի տնօրեն Արա Չալաբյանը և ԿԲ Դիլիջանի ուսումնահետազոտական կենտրոնի ղեկավար, Մակրոտնտեսական դեպարտամենտի տնօրեն Արմեն Նուրբեկյանը:

Հանդիպմանը մասնակցում էին ԵՊՀ ԻՄ-ի տնտեսագիտության ֆակուլտետի «Ֆինանսներ» մասնագիտության ուսանողները, ԵՊՀ ԻՄ-ի տնօրենի պաշտոնակատար Ա.Մակարյանը, ֆակուլտետի դեկանի պաշտոնակատար Գ.Ավետիսյանը, ֆակուլտետի պրոֆեսորադասախոսական անձնակազմի ներկայացուցիչներ:

Հանդիպման ընթացքում ուսանողների հետ անցկացվեցին քննարկումներ մի շարք արդիական թեմաների շուրջ, ինչպիսիք էին՝ ժամանակի և ֆինանսական կառավարումը, կառավարման ոլորտում ղեկավար անձնակազմի, առաջնորդի դերակատարությունը, ինչպես նաև օպտիմալ կառավարման սկզբունքները:

Պարոն Չալաբյանն առաջադրեց ամուր և հզոր պետականություն կառուցելու իր տեսլականը, որը ենթադրում էր մեծ աշխատասիրություն և յուրաքանչյուրիս՝ որպես ՀՀ քաղաքացու պատասխանատու վարքագիծը:

Ուսանողներն էլ իրենց հերթին ներկայացրին իրենց գաղափարները, որոնք խրախուսվեցին պարոն Նուրբեկյանի կողմից: Քննարկման շրջանակներում «Ֆինանսներ» մասնագիտության երրորդ կուրսի ուսանողուհի Դիանա Հարությունյանի բիզնես գաղափարի իրականացման համար նախատեսվեց կազմակերպել հանդիպում հագուստի դիզայներ, ոճաբան Դիանա Շատվերյանի  հետ:

Հանդիպման ընթացքում ուսանողները խոսեցին նաև համաշխարհային և ֆինանսական գրականության վերաբերյալ իրենց նախասիրությունների, սիրելի գրքերի, մոտիվացիայի և կրթության առաջնահերթության մասին: Ուսանողների խնդրանքով ներկայացվեցին նաև ՀՀ կենտրոնական բանկում ուսումնական փորձաշրջան անցնելու հնարավորությունները և առավելությունները:

Համալսարանականները շնորհակալություն հայտնեցին հետաքրքիր հանդիպման համար և առաջարկեցին նմանատիպ հանդիպումներ ունենալ ԿԲ այլ ստորաբաժանումների ղեկավարների հետ ևս:

2021թ. դեկտեմբերի 10-ին ԵՊՀ ԻՄ–ում գործող Գիտելիքի նորարարական հաբում կայացավ ռուս խոշոր գրող Ֆ. Մ. Դոստոևսկու ծննդյան 200-ամյակին նվիրված գրական-երաժշտական ցերեկույթ, որը կազմակերպել էր ԵՊՀ ԻՄ-ի ռուսաց լեզվի և գրականության սեկցիայի դոցենտ, բ.գ.թ., Գյումրիում Ռուսաստանի գիտության և մշակույթի կենտրոնի Իջևանի մասնաճյուղի ղեկավար Մարատ Զուրաբյանը:

Միջոցառմանը ներկա էին ռուս գրականության սիրահարներ, ռուսերեն դասավանդող մասնագետներ, ԵՊՀ Իջևանի մասնաճյուղի վարչական և պրոֆեսորադասախոսական անձնակազմի անդամներ, մասնակցում էին ԵՊՀ ԻՄ-ի «Ռուսերեն լեզու և գրականություն» մասնագիտության ուսանողներ:

Ողջույնի խոսքով հանդես եկավ Մ.Զուրաբյանը՝ ներկայացնելով, որ 2021 թվականին Ռուսաստանը և համաշխարհային մշակութային հանրությունը նշում են ռուս գրող, մտածող և փիլիսոփա Ֆեոդոր Միխայլովիչ Դոստոևսկու ծննդյան 200-ամյակը։ Նա նշեց, որ Դոստոևսկու նկատմամբ հետաքրքրությունը հավերժական է, քանի որ նա շատ խորը թափանցեց մարդկային հոգու գաղտնիքների մեջ և ուղղություն տվեց մարդու մեջ մարդկայինի որոնմանը։ Նրա ստեղծագործությունները ամենաշատ ընթերցվողն են: Անշուշտ, Դոստոևսկու ստեղծագործությունների էությունը հասկանալը փորձ է՝ ինքներս մեզ հասկանալու: Նա պատկանում է այն ռուս գրողներին, որոնց կենսագրությունը սերտորեն կապված է ստեղծագործության հետ։ Ահա թե ինչու նրան հաջողվեց այդքան խորը ներթափանցել մարդկային հոգու առեղծվածի մեջ:

Միջոցառման ընթացքում «Ռուսերեն լեզու և գրականություն» մասնագիտության 1-ին և 2-րդ կուրսերի ուսանողները (Վանուհի Ասիրյան, Ամալյա Ավագյան, Նարե Արզումանյան, Մարիամ Դարբինյան, Օվսաննա Եգանյան, Նազելի Եսայան, Էլյա Թամամյան, Մոնիկա Մարդանյան, Մարիամ Միրիջանյան, Ռուզաննա Մխիթարյան, Գայանե Սարդարյան, Լիդա Ցուցուլյան, Սոնա Քասինյան, Լիաննա Օրդինյան, Մարիամ Բապուջյան, Դիանա Գալստյան, Ռոմելա Թամրազյան, Նարինե Շահնազարյան, Էվելինա Սանթրոսյան, Արփինե Վանեսյան) ներկայացրին Ֆ.Դոստոևսկու «Խեղճ մարդիկ» ու «Ոճիր և պատիժ» ստեղծագործությունների հիման վրա ստեղծված թատերական կոմպոզիցիան, «Ոճիր և պատիժ» վեպի գլխավոր հերոս Ռոդիոն Ռասկոլնիկովի մենախոսությունը, ռուս գրականության դասականի հայերեն հրատարակությունները:

Գրական-երաժշտական ցերեկույթի վերջում պարոն Զուրաբյանը շնորհակալություն հայտնեց բոլոր հյուրերին և ուսանողներին՝ մասնակցության ու տպավորիչ ելույթների համար, Գիտելիքի նորարարական հաբի համակարգող Ն.Մնացականյանին՝ միջոցառումը հաբում իրականացնելու համար:

 2021թ. դեկտեմբերի 9-ին ԵՊՀ Իջևանի մասնաճյուղ այցելեցին ԱԻՆ փրկարարական ծառայության Տավուշի մարզային փրկարարական վարչության բնակչության պաշտպանության բաժնի պետ, փրկարարական ծառայության փոխգնդապետ Վիկտոր Աբազյանը և նույն վարչության ճգնաժամային կառավարման կենտրոնի պետ, փրկարարական ծառայության փոխգնդապետ Սամվել Ուլիխանյանը:

Այցելության նպատակն էր ուսանողների հետ անցկացնել «Քաղաքացիական պաշտպանության (ՔՊ) ուժերի ստեղծման պատմությունը, ՔՊ մասին օրենքը, ՔՊ սկզբունքները, ձևերը, միջոցառումները» թեմայով դաս-քննարկում:

Դասի ընթացքում վարչության աշխատակիցներն ուսանողներին բացատրեցին, թե ինչ է քաղաքացիական պաշտպանությունը, այն բնութագրեցին որպես միջոցառումների համակարգ՝ ուղղված բնակչության և նյութական արժեքների պաշտպանությանը կամ պաշտպանության նախապատրաստմանը ՀՀ-ի վրա զինված հարձակման, դրա անմիջական վտանգի առկայության կամ պատերազմ հայտարարվելու դեպքում:

Անդրադարձ կատարվեց քաղաքացիական պաշտպանության երեք սկզբունքներին, որոնք են՝

• քաղաքացիական պաշտպանության կազմակերպումը և իրականացումը Հայաստանի Հանրապետության ամբողջ տարածքում,
• քաղաքացիական պաշտպանության իրականացումը տարբերակված՝ ըստ ռազմավարական, տարիքային, տարածքային, արտադրական-տարածքային առանձնահատկությունների,
• քաղաքացիական պաշտպանության կազմակերպումը կենտրոնացված կառավարման սկզբունքով:

Ապա ներկայացվեցին քաղաքացիական պաշտպանության ձևերը (տարհանումը, պատսպարումը, անհատական պաշտպանության միջոցներով ապահովումը), ՔՊ միջոցառումների տեսակները (նախապատրաստական և հիմնական), ծառայությունները:

Նշվեց, որ մասնաճյուղում քաղաքացիական պաշտպանությունը կազմակերպվում է ԵՊՀ ԻՄ-ի քաղաքացիական պաշտպանության շտաբի կողմից, որը ոլորտում իրականացնում է առանձնահատուկ գործունեություն` ուսուցման կազմակերպում, կազմավորումների ստեղծում, ՔՊ գույքի ձեռքբերման ուղիների մատնանշում, անձնակազմի և ուսանողների պատսպարման և տարհանման հարցերի ներկայացում և լուծում, ուսումնական վարժանքների պլանավորում ու իրականացում և այլն (մանրամասները՝ ԵՊՀ ԻՄ–ի քաղաքացիական պաշտպանության շտաբի կանոնադրությունում)։

Ընդհանուր գծերով ներկայացվեց նաև բնական աղետների, դրանց կանխարգելման միջոցառումների և պաշտպանվելու եղանակների մասին:

Ուսանողները ԱԻՆ ՓԾ Տավուշի մարզային փրկարարական վարչության աշխատակիցներից ստացան թեմայի վերաբերյալ իրենց հետաքրքրող հարցերի պատասխանները:

Հաջորդիվ նախատեսվում է կազմակերպել մեր ուսանողների այցը ԱԻՆ փրկարարական ծառայության Տավուշի մարզային փրկարարական վարչություն՝ տեղում ծանոթանալու մասնավորապես Իջևանի հրշեջ-փրկարարական ջոկատի աշխատանքներին, գույք-սարքավորումներին և անվտանգության կանոններին:

 2021թ. դեկտեմբերի 8-ին տեղի ունեցավ ԵՊՀ ԻՄ–ում վերապատրաստում անցած ուսուցիչների վկայականների հանդիսավոր հանձնումը, որին մասնակցում էին ԵՊՀ ԻՄ-ի տնօրենի պաշտոնակատար Անուշավան Մակարյանը, մասնաճյուղում հերթական ատեստավորման ենթակա ուսուցիչների վերապատրաստման ծրագրի համակարգող Ասյա Սարգսյանը, Կրթական բարեփոխումների և դասախոսների վերապատրաստման բաժնի մասնագետ Նարա Ղազարյանը:

Ս.թ. նոյեմբերի 1-30-ը Տավուշի, Լոռու և Գեղարքունիքի մարզերի 75  ուսուցիչներ ԵՊՀ ԻՄ-ում մասնակցել էին 110 ժամ տևողությամբ վերապատրաստումների, որոնց ընթացքը և արդյունքները ներկայացվել էին ԵՊՀ ԻՄ-ի տնօրենության նիստին  և ԿԶՆԱԿ-ի հետ առցանց հանդիպմանը:

Վկայականները հանձնելուց առաջ ուսուցիչներին ողջունեց պարոն Մակարյանը, խոսեց ուսուցիչ-մանկավարժի՝ սերունդներ կրթելու և դաստիարակելու կարևոր առաքելության մասին, երախտագիտություն հայտնեց նրանց՝ որքան պատվաբեր, նույնքան էլ պարտավորեցնող աշխատանքի համար: Անդրադառնալով իրականացված վերապատրաստման դասընթացներին՝ Ա.Մակարյանը նշեց, որ դրանք շատ կարևոր են ոչ միայն մասնագիտական գիտելիքների և հմտությունների զարգացման, այլև փորձի փոխանակման և ուսուցչական համայնքի ձևավորման տեսանկյունից: Հավելեց, որ թեև մասնաճյուղի կողմից առաջին անգամ են իրականացվում նման վերապատրաստումներ, բայց շատ ուրախ է, որ դրանք ունեցել են հաջող ընթացք և գոհացնող արդյունքներ, իրենց՝ ուսուցիչների կողմից արտահայտված դրական կարծիքներ ու արձագանքներ:

Հանձնելով վկայականները՝ տնօրենը շնորհավորեց ուսուցիչներին վերապատրաստումները հաջողությամբ ավարտելու կապակցությամբ և շնորհակալություն հայտնեց նրանց արդյունավետ համագործակցության  համար:

Ուսուցիչներն  իրենց  հերթին շնորհակալություն հայտնեցին ԵՊՀ Իջևանի մասնաճյուղին՝ արտահայտելով իրենց գոհունակությունը արհեստավարժ  պրոֆեսորադասախոսական կազմից, տրված հիմնարար գիտելիքներից: