ԵՊՀ Իջևանի մասնաճյուղի և «Հույսի կամուրջ» հասարակական կազմակերպության միջև կնքված փոխըմբռնման հուշագրի հիման վրա 2024 թ. մարտի 22-ին ԵՊՀ ԻՄ «Հոգեբանություն» մասնագիտության առկա ուսուցման 4-րդ կուրսի ուսանողները մասնագիտական պրակտիկայի շրջանակներում «Հույսի կամուրջ» կազմակերպության սոցիալական մանկավարժների հետ համատեղ «Լոֆթ Իջևան»-ում անցկացրին «Միասին ապրել, միասին սովորել» խորագրով համադպրոցական ինտելեկտուալ խաղ-մրցույթը:

Միջոցառումն իրականացնում է «Հույսի կամուրջ» ՀԿ-ն ՀՀ ԿԳՄՍ նախարարության կողմից պատվիրակված ծառայությունների միջոցառումների շրջանակում «Լոֆթ Իջևան»-ի հետ համագործակցությամբ և միտված է հաշմանդամություն կամ կրթության առանձնահատուկ պայմանների կարիք ունեցող երեխաների համար հավասար և ներառական սոցիալ-կրթական միջավայրի ստեղծմանը:

Ինտելեկտուալ խաղին մասնակցում էին 7-9-րդ դասարանների աշակերտներ՝ Իջևան խոշորացված համայնքի 8 դպրոցներից (Իջևանի՝ Սպ. Սարգսյանի անվան թիվ 1, Ակնաղբյուրի, Լուսաձորի հիմնական և Աչաջրի՝ Հր. Թամրազյանի անվան, Վազաշենի, Խաշթառակի, Սարիգյուղի, Սևքարի միջնակարգ դպրոցներից): Թիմերում ընդգրկված էին 5-ական մասնակիցներ:

Ժյուրիի կազմում էին «Լոֆթ Իջևան» կենտրոնի համակարգող Աննա Մարդանյանը, աշխատակից Սվետլանա Եղիկյանը, «Հույսի կամուրջ» կազմակերպության սոցիալական մանկավարժ, «Սպորտը հանուն հավասար հնարավորությունների» ծրագրի օգնական Վահե Առուստամյանը, ԵՊՀ ԻՄ դասախոս Սվետա Սաֆարյանը և Ուսանողական խորհրդի նախագահ Դավիթ Ալեքսանյանը:

Խաղից առաջ ջութակի կատարումով ներկայացան Ազատամուտի արվեստի դպրոցի սաները, իսկ ընթացքում երաժշտական այլ կատարումներով ու ասմունքով հանդես եկան Սարիգյուղի և Վազաշենի միջնակարգ դպրոցների թիմերը:

Ինտելեկտուալ խաղ-մրցույթում հաղթեց Աչաջրի՝ Հր. Թամրազյանի անվան միջնակարգ դպրոցի թիմը:

Վերջում թիմերին տրվեցին մասնակցության հավաստագրեր, հաղթող թիմի անդամներին՝ նաև պատվոգրեր և գրքեր: 

2024 թ. մարտի 21-ին ԵՊՀ ԻՄ պրակտիկայի կազմակերպման և շահակիցների հետ համագործակցության բաժնի և Միասնական սոցիալական ծառայության Իջևանի տարածքային կենտրոնի համագործակցությամբ մասնաճյուղում կայացավ «Զբոսաշրջություն» մասնագիտության առկա և հեռակա ուսուցման տարբեր կուրսերի ուսանողների հետ Սոցիալական աշխատանքի զբաղվածության ծրագրերի բաժնի պետ Մ. Ճաղարյանի, նույն բաժնի գլխավոր մասնագետներ Ս. Ցուցուլյանի և Կ. Նազարյանի հանդիպումը:

Ներկա էին նաև Տնտեսագիտության ֆակուլտետի դեկանի պաշտոնակատար Ա. Մարգարյանը, ՊԿՇՀ բաժնի վարիչ Լ. Բեգինյանը, Տուրիզմի կառավարման և մշակութաբանության ամբիոնի դասախոս Ս․ Սաֆարյանը:

Մ. Ճաղարյանը ուսանողներին ներկայացրեց Միասնական սոցիալական ծառայության Իջևանի տարածքային կենտրոնի կողմից իրականացվող ծրագրերը: Նախ խոսվեց «Զբաղվածության ծրագիր՝ պատերազմի մասնակիցների և ժամկետային պարտադիր զինվորական ծառայությունից զորացրված գործազուրկ անձանց համար» ծրագրի մասին: Նշվեց, որ այն  հնարավորություն կտա Ադրբեջանի կողմից 2016, 2020 և 2022 թթ. սանձազերծված ռազմական գործողություններին մասնակցած գործազուրկ անձանց, ինչպես նաև 2020 թ. հետո ժամկետային պարտադիր զինվորական ծառայությունից զորացրված գործազուրկ քաղաքացիներին ձեռք բերել մասնագիտական հմտություններ, աշխատանքային փորձառություն և աշխատանք:

Ապա ներկայացվեց «2023 թվականին Լեռնային Ղարաբաղից բռնի տեղահանված անձանց համար կարճաժամկետ ուսուցման դասընթացի կազմակերպման և աշխատանքային փորձ ձեռք բերելու համար աջակցության տրամադրման» ծրագիրը, որը հնարավորություն կտա Լեռնային Ղարաբաղից բռնի տեղահանված գործազուրկ անձանց ձեռք բերել աշխատանքային փորձ:

Հաջորդիվ Սոցիալական աշխատանքի զբաղվածության ծրագրերի բաժնի աշխատակիցները մեր ուսանողներին ներկայացրին տարածաշրջանի տարբեր կազմակերպություններում առկա 97 թափուր հաստիքների մասին:

Այս հանդիպմանը ուսանողները ցուցաբերեցին մեծ հետաքրքրություն: Նախատեսվում է կազմակերպել նմանատիպ ևս մի քանի հանդիպում, որոնց շրջանակներում ուսանողներին կբացատրվեն գործատուին ճիշտ ներկայանալու, գրագետ և արդյունավետ ինքնակենսագրական կազմելու նրբությունները:

ԵՊՀ Իջևանի մասնաճյուղում Ա. Հ. Մակարյանի նախագահությամբ կայացավ Գիտական խորհրդի նիստ, որին մասնակցում էին ԵՊՀ ԻՄ գիտխորհրդի անդամները, այդ թվում՝ ԵՊՀ գիտական հարցերի գծով պրոռեկտոր Ռաֆայել Բարխուդարյանը:

Առաջարկված փոփոխություններով նիստում հաստատվեցին ԵՊՀ ԻՄ գիտական խորհրդի՝ 2023-2024 ուստարվա 2-րդ կիսամյակի նիստերի ժամանակացույցը, նույն ուստարվա 2-րդ կիսամյակի անվանական կրթաթոշակ ստացող ուսանողների ցուցակը, ԵՊՀ ԻՄ 2024-2025 ուստարվա ընդունելության ուսման վարձավճարների չափերը և դրանց չափաբաժիններն՝ ըստ մասնագիտությունների (կրթական ծրագրերի) և կրեդիտների, ԵՊՀ Իջևանի մասնաճյուղի և շահակից կառույցների համագործակցության ապահովման կանոնակարգը:

Քննարկվեցին ԵՊՀ ԻՄ զարգացման՝ 2022-2026 թթ․ ռազմավարական ծրագրի 2024 թ․ խնդիրներին, ԵՊՀ ԻՄ հումանիտար գիտությունների ֆակուլտետի «Հայոց լեզու և գրականություն» մասնագիտության 2-րդ կուրսի ուսանողուհի Սիրանուշ Արտակի Աբազյանին ԵՊՀ ԻՄ ուսանողական գիտական ընկերության նախագահի պաշտոնում հաստատելուն, մասնաճյուղում գործող «Ամերիկյան գրադարան և դասընթացների կենտրոն»-ի ծրագրերին, ԵՊՀ ԻՄ-ում «Դասավանդման գերազանցության մրցանակ» ամենամյա մրցույթի կազմակերպման և անցկացման կարգում փոփոխություններ կատարելուն վերաբերող հարցեր:

ԵՊՀ ԻՄ 2024-2025 ուստարվա ընդունելության ուսման վարձավճարների չափերի հետ կապված՝ ներկայացվեց, որ  ԵՊՀ ԻՄ տնօրենության՝ 2024 թ. հունվարի 31-ի նիստում քննարկվել է հարցը, և որոշվել է առաջարկել ԵՊՀ ԻՄ գիտական խորհրդին ոչ մեծ չափով փոփոխություններ իրականացնել ԵՊՀ Իջևանի մասնաճյուղի՝ 2024-2025 ուստարվա ուսման վճարների չափերում:

Գիտխորհրդի նիստում որոշվեց հաստատել ԵՊՀ ԻՄ 2024-2025 ուստարվա ընդունելության ուսման վարձավճարների չափերի նախագիծը:

ԵՊՀ Իջևանի մասնաճյուղի և շահակից կառույցների համագործակցության ապահովման կանոնակարգը հաստատելու հարցի վերաբերյալ զեկուցեց Մասնագիտական կրթության որակի ապահովման բաժնի վարիչ Մարիետա Ճաղարյանը: Զեկուցողը նշեց, որ ԵՊՀ Իջևանի մասնաճյուղի՝ 2022-26 թթ․ զարգացման ծրագրով պլանավորվել է մշակել ձեռնարկությունների հետ ԵՊՀ ԻՄ համագործակցության կարգ: Բաժինը մշակել է կանոնակարգ, որի նախագիծը նախապես քննարկվել է Գիտական խորհրդին կից որակի կառավարման մշտական հանձնաժողովի նիստում (31․10․2023) և այժմ ներկայացված է Գիտխորհրդի հաստատմանը:

Կանոնակարգը սահմանում է ԵՊՀ Իջևանի մասնաճյուղի հետ ՀՀ-ում գործող պետական, մասնավոր և միջազգային ձեռնարկությունների, ընկերությունների ու կազմակերպությունների կայուն համագործակցության  համակարգ ստեղծելու, ԵՊՀ ԻՄ ուսանողների ապագա կարիերայի զարգացմանն ու նրանց մասնագիտական գործունեությանն աջակցելու ձևերն ու մեխանիզմները, ձեռնարկությունների հետ համագործակցությունն ապահովող հանձնաժողովի աշխատակարգը:

Կանոնակարգի համաձայն՝ համագործակցության մեջ էական տեղ է հատկացվում մասնաճյուղի շրջանավարտներին: Առաջարկվում է ստեղծել «Շրջանավարտների միություն»՝ ձեռնարկությունների հետ համագործակցության ընդլայման, աշխատանքների հասցեականության բարձրացման համար:

ԵՊՀ Իջևանի մասնաճյուղի զարգացման՝ 2022-2026 թթ․ ռազմավարական ծրագրի 2024 թ․ խնդիրների մասին զեկուցեց Գիտխորհրդի նախագահ Անուշավան Մակարյանը՝ անդրադառնալով ռազմավարական 3 նպատակներից (Բարձրորակ կրթություն, Գիտություն և նորարարություն, Հանրային ներգրավում) բխող այն հիմնական խնդիրներին և գործողությունններին, որոնք առանձնացվել էին որպես առաջնահերթություններ՝ 2024 թվականին իրականացնելու համար:

Գիտական խորհրդի անդամները հաստատեցին ԵՊՀ ԻՄ հումանիտար գիտությունների ֆակուլտետի «Հայոց լեզու և գրականություն» մասնագիտության 2-րդ կուրսի ուսանողուհի Սիրանուշ Արտակի Աբազյանին ԵՊՀ ԻՄ ուսանողական գիտական ընկերության նախագահի պաշտոնում, նրան մաղթեցին բեղուն և արդյունավետ գործունեություն:

Այնուհետև ԵՊՀ ԻՄ-ում գործող «Ամերիկյան գրադարան և դասընթացների կենտրոն»-ի համակարգողներ Սյուզաննա Պետրոսյանը և Էդիտա Գրիգորյանը ներկայացրին կենտրոնի կողմից իրականացված աշխատանքները և առաջիկա ծրագրերը: Մասնավորապես նշեցին, որ «Ամերիկյան գրադարան և դասընթացների կենտրոն»-ի կողմից մասնաճյուղի ուսանողների, Իջևան քաղաքի և հարակից գյուղերի բնակիչների համար կազմակերպվել և անցկացվել են կրթական, մշակութային և տեղեկատվական միջոցառումներ, տարբեր թեմաների շուրջ ուսումնական կարճատև ծրագրեր և անգլերենի անվճար դասընթացներ, որոնց շնորհիվ զարգացել են մասնակիցների լեզվական, սոցիալական և տեխնիկական հմտությունները, նրանք ծանոթացել են ամերիկյան արժեքներին, պատմությանը և մշակույթին:

Անդրադարձ կատարվեց նաև ԵՊՀ Իջևանի մասնաճյուղի և «Փրոջեքթ Հարմոնի» հայկական մասնաճյուղի համատեղ ջանքերով 2024 թ. փետրվարից գործարկված «Քաղաքացիական կրթության կենտրոն» նախագծին, որի շրջանակներում ևս կիրականացվեն անվճար դասընթացներ և միջոցառումներ՝ ուղղված ուսանողների և դասախոսների, ինչպես նաև համայնքի երիտասարդների սոցիալական և տեխնիկական կարողությունների զարգացմանը, քաղաքացիական մասնակցության հնարավորությունների և երիտասարդական նախաձեռնությունների խթանմանը:

Մասնաճյուղի գիտխորհրդի՝ 63/3 որոշմամբ հաստատված ԵՊՀ ԻՄ-ում «Դասավանդման գերազանցության մրցանակ» ամենամյա մրցույթի կազմակերպման և անցկացման կարգում փոփոխություններ կատարելու հարցի կապակցությամբ որոշվեց սահմանված ժամկետում հայտարարել մրցույթ, առաջարկված փոփոխություններով հաստատել կարգը՝ առանց գնահատման չափանիշների տոկոսային բաշխման, իսկ այդ բաշխումը լրացուցիչ քննարկումներից հետո սահմանել տնօրենի հրամանով:

2024 թ. մարտի 7-ին մասնաճյուղում կայացավ ԵՊՀ ԻՄ հիմնադրման 30-ամյակին նվիրված բադմինթոնի՝ աղջիկների և կանանց բաց առաջնություն, որին մասնակցում էին Դիլիջանի կանանց՝ բադմինթոնի սիրողական խումբը, Իջևանի մարզադպրոցի բադմինթոնիստները և ԵՊՀ Իջևանի մասնաճյուղի ուսանողները:

Առաջնության կազմակերպման նպատակն էր մարզի բնակիչներին խթանել վարելու առողջ ապրելակերպ, բարձրացնել նրանց ֆիզիկական պատրաստվածության մակարդակը, մասսայականացնել սպորտը մարզում:

Բացման և ողջույնի խոսքով հանդես եկան ԵՊՀ Իջևանի մասնաճյուղի տնօրենի պաշտոնակատար Անուշավան Մակարյանը, Արտակարգ իրավիճակների, մարմնակրթության և սպորտի ամբիոնի դասախոս Վարդիթեր Պողոսյանը՝ կանանց տոնի առթիվ շնորհավորելով և բարեմաղթանքներ հղելով իգական սեռի բոլոր ներկայացուցիչներին, անդրադառնալով բաց առաջնության կազմակերպման նպատակին և կարևորությանը, մասնակիցներին և ներկաներին մաղթելով հաջողություն և դիտարժան խաղ: 

Մրցապայքարը գեղեցիկ էր և հետաքրքիր:

Իրենց վարպետությամբ աչքի ընկան Իջևանի մարզադպրոցի սաները, որոնց գրեթե չէր զիջում Դիլիջանի կանանց՝ բադմինթոնի սիրողական խումբը:

Հանդիպեցին Անիտա Արզումանյան–Օֆելյա Խեչյան և Իննա Ալավերդյան–Սիրանուշ Կիրակոսյան զույգերը: Հաղթողները խաղացին առաջին տեղի համար, պարտվողները՝ երրորդ:

Մրցանակային տեղեր գրավեցին Իջևանի մարզադպրոցի բադմինթոնիստները:

Առաջնության հաղթող ճանաչվեց Սիրանուշ Կիրակոսյանը:

Երկրորդ տեղը գրավեց Անիտա Արզումանյանը, երրորդ տեղը՝ Իննա Ալավերդյանը:

Հաղթողները ԵՊՀ ԻՄ տնօրենության կողմից պարգևատրվեցին մեդալներով, պատվոգրերով և հուշանվերներով:

2024 թ. մարտի 6-ին ԵՊՀ ԻՄ գրադարանում տեղի ունեցավ Ընդհանուր մաթեմատիկայի և բնագիտության ամբիոնի դոցենտ, ֆ.մ.գ.թ. Սերգեյ Ազարյանի “Дорога их жизни” եռահատորյակի շնորհանդեսը:

Սերգեյ Ազարյանը, լինելով գիտնական-մանկավարժ, ընթերցողի սեղանին է դրել “Дорога их жизни” եռահատոր վեպը, որի հիմքում ընկած են գլխավոր հերոսներ Միհրանի (Միրո) և Ստարիկի (Սերգեյ) կյանքն ու հետախուզական գործունեությունը: Վեպի գործողությունները հիմնված են Եվրոպայի, Հարավային Ամերիկայի, ԱՄՆ-ի և ԽՍՀՄ երկրներում տեղի ունեցող փաստական իրողությունների վրա, և դրանում բացահայտված են տարբեր հատուկ ծառայությունների աշխատանքի և գործողությունների հետաքրքիր դրվագներ:

Գրքի շնորհադեսին բացման խոսքով հանդես եկավ ԵՊՀ ԻՄ գրադարանի վարիչ Վլադիմիր Պողոսյանը՝ մասնավորապես նշելով․ «Այսօր ընթերցողի սեղանին է դրված գրող, գիտնական, մանկավարժ Սերգեյ Ազարյանի եռահատոր վեպը, որտեղ հեղինակն անդրադարձել է 20-րդ դարի կարևորագույն իրադարձություններից մեկի՝ Երկրորդ համաշխարհային պատերազմի հետախուզության և հակահետախուզության գործողություններին՝ հիմքում դնելով իր հոր՝ հետախույզ Ամիրխան Ազարյանի կյանքի և մասնագիտական ծառայության վիպականացված դրվագները»:

Սերգեյ Ազարյանի գրական ստեղծագործության առանձնահատկություններին անդրադարձավ բանասեր, լրագրող Վարդան Բաղդասարյանը՝ նշելով. «Տարիներ առաջ Արարատի մարզի Ոսկետափի միջնակարգ դպրոցում հանդիպեցի նոր տնօրենին: Հետագայում պարզվեց, որ այդ օրը ծանոթացել եմ գիտնական Սերգեյ Ազարյանի հետ, իսկ այսօր հպարտ եմ, որ ընկերն եմ գրող Սերգեյ Ազարյանի, որի գրական հայացքների աջակիցն եմ: Երբ գրքի առաջին հատորն արդեն պատրաստ էր, Ազարյանին առաջարկեցի այն հրատարակել Սանկտ Պետերբուրգում, որտեղից շուտով եկավ դրական պատասխանը, և առաջին հատորը տպագրվեց ավելի քան 5000 օրինակով: Գիրքը հեռու է գրական ձևախեղումներից, այստեղ մեծ է հեղինակի երևութական աշխարհն ու հերոսակերտման ընթացքը: Կարծում եմ՝ գիրքը միջոց է Հայրենական մեծ պատերազմը ըմռնելու և մեր՝ հայերիս դերակատարումը հաղթանակի գործում արժևորելու համար»:

Հաջորդիվ ելույթ ունեցավ գրող, հրապարակախոս Հովհաննես Ներզեթյանը՝ իր խոսքում նշելով, որ յուրաքանչյուր ստեղծագործող և ստեղծագործություն ծնվում են բարուց և սիրուց, եթե Սերգեյ Ազարյանը ծնողական մեծարանքի և սիրո պակաս ունենար, բնականաբար չէր կարող ընթերցողին հասանելի դարձել իր հետախույզ հոր վիպականացված կերպարը:

ԵՊՀ ԻՄ տնօրենի պաշտոնակատար Անուշավան Մակարյանն իր ելույթում շնորհակալություն հայտնեց Ս․ Ազարյանին և ներկա գտնվող հյուրերին՝ մասնաճյուղում գրական շունչը մշտապես կենդանի պահելու համար: Նա մասնավորապես նշեց․ «Գիրքն ընթերցվում է բավականին հեշտ, և ընթերցողին հատկապես գրավում են առանձին դետալային մանրամասները: Գրքի հեղինակը մաթեմատիկոս է, և դա հատկապես զգացվում է որոշ իրադարձությունների, տեղանունների, դեպքերի վայրերի և ժամանակի պահերի հստակ ներկայացումներից: Շնորհակալ եմ հեղինակին՝ ոչ միայն որպես մասնաճյուղի դասախոսի, այլև գրողի, ով իր գաղափարներն ու պատկերացումները փոխանցում է ուսանողներին, իսկ մենք՝ որպես ավանդապահ, գրքասեր հասարակության ներկայացուցիչներ, պատրաստ ենք հաջորդիվ ևս քննարկման դնել և արժևորել Սերգեյ Ազարյանի ապագա գործերն ու ստեղծագործությունները»:

Այնուհետև հանդես եկավ գրքի հեղինակը, ով շնորհակալություն հայտնեց շնորհանդեսի ներկաներին, բանախոսներին և կազմակերպիչներին: Սերգեյ Ազարյանն ընդհանուր գծերով անդրադարձավ իր երկի ստեղծման դրդապատճառին, հիմնական գաղափարին ու կերպարներին՝ ընդգծելով․ «Միայն հորս կյանքի մայրամուտին եմ իմացել իր հետախույզ լինելու մասին: Հայրս ֆանտաստիկ գիտելիքների և մտքի տեր անձնավորություն էր, տիրապետում էր յոթ լեզուների, հետախուզական ծառայություն էր իրականացրել աշխարհի 96 երկրում: Այս եռահատորյակով վիպականացրել եմ իր օրագրի գործողություններն ու հերոսներին, քայլել նրանց ճանապարհով, կիսել նրանց ճակատագրի սայթաքումներն ու վերելքները: Կարծում եմ՝ գիրքը հետաքրքիր է, հեշտ ընթեռնելի և ամենակարևորը՝ ուսուցողական: Կերպարները նվիրված են իրենց հայրենիքին, իրենց կոչմանն ու պատվին»:

Շնորհանդեսի վերջում ունկնդիրները հարցեր և շնորհակալական խոսքեր ուղղեցին հեղինակին: