2019թ. հունիսի 14-ին Հայ-ռուսական համալսարանում կայացավ «Որակավորումների արժանահավատ շնորհում» թեմայով ուսանողների և դասախոսների համաժողով, որը կազմակերպել էր Մասնագիտական կրթության որակի ապահովման ազգային կենտրոնը (ՈԱԱԿ)՝ իր 10-ամյակի միջոցառումների շրջանակում:

Համաժողովի (աշխատաժողովի) նպատակն էր քննարկման առարկա դարձնել արժանահավատ  որակավորումների շնորհումը և այդ համատեքստում ուսանողի հաջողության պլանավորումը,  շեշտադրել դասախոսի դերը արդյունավետ ուսուցման կազմակերպման գործում, խրախուսել իրենց աշխատանքը հետազոտող դասախոսներին և նպաստել հաջողված փորձի տարածմանը։ 

Աշխատաժողովին մասնակցում էին դասախոսներ և ուսանողներ, կրթության որակի ապահովման մասնագետներ, կարիերայի կենտրոնների աշխատակիցներ, կրթության կառավարիչներ:

ԵՊՀ Իջևանի մասնաճյուղից աշխատաժողովին մասնակցում էին երկու տասնյակից ավելի ներկայացուցիչներ՝ ԵՊՀ ԻՄ-ի մասնագիտական կրթության որակի ապահովման (ՄԿՈԱ) բաժնի աշխատակիցները, վարչական և պրոֆեսորադասախոսական անձնակազմի, ուսանողության ներկայացուցիչներ:

Նախ՝ ՈԱԱԿ տնօրեն Ռուբեն Թոփչյանը ողջունեց համաժողովի մասնակիցներին՝ վստահեցնելով, որ քննարկվող խնդիրներն ունեն լուծումներ, որոնք ի վերջո կապահովեն դրական արդյունք։

Կարևորելով  ուսանողի առաջընթացի ճիշտ պլանավորումը՝ պարոն Թոփչյանը նշեց, որ բարձրագույն կրթության հանրայնացման հետևանքով երբեմն բուհ են ընդունվում մարդիկ, որոնք պատրաստ չեն բարձրագույն ուսումնական հաստատությունում սովորելուն։  Նրա խոսքով՝ աշխարհը ձգտում է այդ խնդրի լուծմանը, դա հնարավոր է նաև Հայաստանում, պարզապես պետք է շատ աշխատել։

Համաժողովի շրջանակներում մասնակիցներին ներկայացվեց ուսանողի առաջընթացի պլանավորման հաջողված փորձ, եղան թեմատիկ հարցեր ու քննարկումներ։

Անդրադառնալով շնորհած որակավորումների արժանահավատությանը՝ Ռ.Թոփչյանը նշեց, որ բուհում ուսանողն  ստանում է տեսական գիտելիքներ, այսինքն՝ նրա ձեռք բերած փորձը տեսական է, և ավարտելուց հետո նա ինքնուրույն դա պետք է համապատասխանեցնի աշխատաշուկայի պահանջներին։ Պարոն Թոփչյանի խոսքով՝ եթե նախկին համակարգում դա գործող մոդել էր, ապա ներկայումս իրավիճակն այլ է. գործատուն բուհերից ակնկալում է  շրջանավարտներ, որոնք անմիջապես կսկսեն աշխատել։ Ուստի դասախոսի խնդիրն է ուսուցման ընթացքում ցույց տալ ուսանողին, թե իր տեսական գիտելիքն ինչպես կարող է կիրառելի դարձնել։ «Սա բավականին ծանր, բայց լուծվող խնդիր է»,- նշեց պարոն Թոփչյանը։

Մասնագիտական կրթության որակի ապահովման ազգային կենտրոնը  որակավորումների արժանահավատության խնդիրն ուշադրության կենտրոնում է պահում՝ աջակցելով բուհերի որակի ներքին ապահովման կենտրոններին խնդիրը բարձրաձայնել,  հասցնել մինչև կառավարման խորհուրդներ և խնդրի լուծման ուղղությամբ գործողություններ ձեռնարկել։

Կրթական գործընթացի արդյունավետության բաղադրիչներից է  նաև դասախոսի և  ուսանողի մոտիվացիան։ Շահակիցների մասնակցությամբ քննարկման շնորհիվ  պարզ դարձավ, որ դասախոսի համար լրացուցիչ մոտիվացիայի աղբյուր կարող են լինել հետազոտությունները։  Համաժողովի մասնակիցների կարծիքով՝ բուհերը պետք է խրախուսեն դասախոսներին, որոնք հետազոտում են հենց ուսուցման և ուսումնառության  հետ կապված խնդիրները, փորձում դրանց համար լուծում գտնել։ Հետազոտող դասախոսը ոչ միայն իր ներդրումը կունենա կրթական խնդիրների լուծման ուղիների մշակման գործում, այլև  ճանաչում ձեռք կբերի, ինչը լրացուցիչ մոտիվացիա կապահովի։

Ամփոփելով համաժողովի արդյունքները՝ ՈԱԱԿ տնօրենը  նշեց, որ այն ծառայել է իր նպատակներին. տեղի ունեցավ բաց քննարկում, բարձրաձայնվեցին սուր հարցեր, արտահայտվեցին տարբեր մոտեցումներ։ Նման քննարկումներն էլ բերում են որոշակի լուծումների և որակի ապահովման։

ՈԱԱԿ-ի 10-ամյակի միջոցառումները կշարունակվեն և  կամփոփվեն հոկտեմբերին Երևանում կայանալիք՝ Բարձրագույն կրթության որակի ապահովման եվրոպական ցանցի (ENQA) 10-րդ ընդհանուր համաժողովով:

Համաժողովի օրակարգը տե՛ս այստեղ:

Բոլոր լուսանկարները տե՛ս Պատկերասրահում։

 2019թ. հունիսի 13-ին ԵՊՀ Իջևանի մասնաճյուղում կայացավ հանդիպում Քանդակագործության, ճարտարապետության, շրջակա միջավայրի միջազգային ամենամյա փառատոնի իջևանյան հարթակի ներկայացուցիչների՝ ծրագրի համակարգող, քանդակագործ Գոռ Դավթյանի և նրա օգնական, ԵՊՀ ԻՄ-ի շրջանավարտ Հովհաննես Խաչատրյանի հետ:

Ներկա էին ԵՊՀ ԻՄ-ի մասնագիտական կրթության և պրակտիկայի կազմակերպման բաժնի վարիչը, պրակտիկաների ղեկավարներ, գիտակազմակերպական աշխատանքների համակարգողը, շրջանավարտների և արտաքին շահակիցների հետ տարվող աշխատանքների համակարգողը, պրակտիկանտ-ուսանողներ և շրջանավարտներ:

Հանդիպման նպատակն էր քննարկել Քանդակագործության, ճարտարապետության, շրջակա միջավայրի միջազգային ամենամյա փառատոնում ԵՊՀ ԻՄ-ի ուսանողների ներգրավվածության հարցը:

Քննարկման ընթացքում պայմանավորվածություն ձեռք բերվեց համատեղ աշխատանքներն սկսել ս.թ. հունիսի 24-ից:

Նշենք, որ միջազգային փառատոնը կազմակերպում է Երևանի «Մխիթար Սեբաստացի» կրթահամալիրը, փառատոնի աջակիցներն են ՀՀ ԿԳ, մշակույթի նախարարությունները, Երևանի քաղաքապետարանը, մարզպետարանները, քաղաքային և գյուղական համայնքները, Ճարտարապետության և շինարարության Հայաստանի ազգային համալսարանի ճարտարապետության ֆակուլտետը, Երևանի պետական գեղարվեստի ակադեմիան, «Սեբաստացիներ» հիմնադրամը:

Քանդակագործության, ճարտարապետության, շրջակա միջավայրի միջազգային ամենամյա փառատոնի մանրամասներին կարող եք ծանոթանալ հետևյալ հղումով: 

Փառատոնի իջևանյան հարթակի մասին կարող եք տեղեկանալ՝ անցնելով հետևյալ հղումով:

 2019թ. հունիսի 10-ին «Գեղարվեստական լուսանկարչություն» դասընթացի շրջանակներում ԵՊՀ ԻՄ-ում բացվեց «Դիզայն» 3-րդ կուրսի ուսանողների լուսանկարչական աշխատանքների ցուցադրությունը:

Բացման խոսքով հանդես եկավ «Գեղարվեստական լուսանկարչություն» դասընթացի դասավանդող,  Դեկորատիվ-կիրառական արվեստի և դիզայնի ամբիոնի դասախոս Արթուր Աղաբաբյանը: Նա ողջունեց ցուցադրության բոլոր այցելուներին ու մասնակիցներին, ներկայացրեց ցուցադրության կազմակերպման նպատակը. «Քանի որ նախորդ տարի ունեցանք լուսանկարչական աշխատանքների շատ հաջող ցուցադրություն, որոշեցինք այս տարի էլ կազմակերպել և ցուցադրությունը դարձնել ավանդական»:

Նախաձեռնությունը ողջունեց և նման միջոցառումների կազմակերպումը կարևորեց ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը՝ ընդգծելով, որ դրանք կարող են մոտիվացնել ուսանողներին՝ մասնագիտանալու այդ ուղղությամբ: 

Այս տարի էլ ցուցադրված էին գեղարվեստական բարձր մակարդակով արված աշխատանքներ, որոնք իրենց որակական ու տեխնիկական հատկանիշներով չէին զիջում ժամանակակից պրոֆեսիոնալ լուսանկարիչների աշխատանքներին:

Ցուցադրությունն ընդգրկում էր յուրաքանչյուր ուսանողից 3 լավագույն աշխատանք, որոնք «Գեղարվեստական լուսանկարչություն» դասընթացի շրջանակներում համատեղ ընտրվել էին դասախոսի և ուսանողի կողմից:

Մեծ մասամբ ներկայացված էին գեղարվեստական լուսանկարչության ժանրի աշխատանքներ, որոնք կոմպոզիցիայի և ստեղծագործական մտքի ճիշտ կառուցման արդյունք էին:

Ցուցադրված էին նաև ռեպորտաժային լուսանկարներ, որոնցում պատկերված էին առօրյա կյանքում հանդիպող իրավիճակներ, կենցաղային ուշագրավ դրվագներ:  

Լուսանկարչական աշխատանքների ցուցադրությունը մեծ տպավորություն գործեց այցելուների վրա. այն կտևի մինչև ս.թ. հունիսի 15-ը:

Սիրով հրավիրում ենք ԵՊՀ ԻՄ-ի կիրառական արվեստի ֆակուլտետ՝ ցուցադրությունը դիտելու:

Բոլոր լուսանկարները տե՛ս Պատկերասրահում:

 2018-19 ուստարվա վերջում «Էդիթ պրինտ» հրատարակչությունը լույս ընծայեց ԵՊՀ ԻՄ-ի տուրիզմի կառավարման և մշակութաբանության ամբիոնի ասիստենտ, արվեստաբան-գծանկարիչ, ՀՀ լրագրողների և ՀՀ նկարիչների միությունների անդամ Լևոն Լաճիկյանի (Լաչիկյանի)՝ «Գյումրի, իմ սեր» խորագրով գրաֆիկական թերթերի հավաքածուն:

Վերջինս պարունակում է այդ հայաշունչ ոստանը պատկերող 24 բացիկ, որոնք հին քաղաքին ուղղված նոր հայացք են:

Հավաքածու-ալբոմին կցված եռալեզու (հայերեն, ռուսերեն ու անգլերեն) առաջաբանում տրված է հինավուրց այդ բնակավայրի ամփոփ պատմությունը, որն սկսվում է Ք.ա. III հազարամյակից և ձգվում մինչև մեր օրերը: Հավաքածուի առաջաբանում մասնավորապես նշված է, որ Գյումրին քաղաքի կարգավիճակ ստացել է 1837թ., երբ հաստատվել է առաջին հատակագիծը՝ համահունչ ժամանակի քաղաքաշինական սկզբունքներին: XIX դարավերջին արդեն այն Անդրկովկասի երրորդ ամենամեծ առևտրական ու մշակութային կենտրոնն էր՝ Բաքվից ու Թիֆլիսից հետո: Պարզվում է նաև, որ Գյումրու անշփոթելի դիմագիծը կազմավորել են Կարինից, Կարսից, Մուշից ու Բասենից գաղթած վերաբնակները, ովքեր շարունակելով Արևմտյան Հայաստանի շինարարական հարուստ ավանդույթները՝ կառուցել են մեկը մյուսից տպավորիչ շինություններ, եկեղեցիներ ու փողոցներ: Մյուս կողմից էլ Գյումրին ժառանգորդն է քաղաքամայր Անիի:

Նույն առաջաբանում կարդում ենք. «Արվեստաբան-նկարիչ Լևոն Լաճիկյանն իր գծանկարների միջոցով անթաքույց սեր է փոխանցում առ Գյումրի՝ վերստեղծելով հայրենի քաղաքի պատմամշակութային անկրկնելի միջավայրը և հյուսելով հինավուրց այդ ոստանի նոր դիմապատկերը: Բացիկների այս հավաքածուն նոր հայացք է հին Գյումրուն, որ հավելյալ խոհեր ու վերաբերմունք է առաջացնում, միաժամանակ պարտքի նոր զգացողություն ծնում»:

Սիրով շնորհավորում ենք պարոն Լաչիկյանին և հիշեցնում, որ նա է Երևանի պետական համալսարանի բոլոր գլխավոր մասնաշենքերը պատկերող գծանկարների հեղինակը: Այդ գծանակարներից մեկն էլ զարդարում է ԵՊՀ-ի ֆեյսբուքյան էջի գլխավոր նկարը, իսկ աշնանը կայանալիք՝ Մայր բուհի 100-ամյակի տոնակատարության շրջանակներում կթողարկվի հոբելյանական նամականիշ, որի էսքիզի հեղինակը դարձյալ մեր դասախոսն է:

 2019թ. հունիսի 4-ին հարցազրույց ունեցանք ԵՊՀ Իջևանի մասնաճյուղի՝ 2013թ. շրջանավարտ, «Վեոլիա Ջուր» ՓԲԸ վարչական տնօրինության Բյուջեի և ներքին վերահսկողության բաժնի գլխավոր մասնագետ Նաիրի Միխայիլի Ճաղարյանի հետ:

– Խնդրում եմ՝ նշեք Ձեր ծննդյան թիվը և վայրը:
– Ծնվել եմ 1992թ. օգոստոսի 10-ին գեղատեսիլ Տավշո աշխարհի Իջևան քաղաքում:

– Պատմեք, խնդրում եմ, Ձեր ընտանիքի մասին:
– Ծնողներս Տավուշի մարզից են: Մայրս Սևքար գյուղից է, հայրս՝ Ենոքավան գյուղից: Մայրս՝ Դոնարա Փաշինյանը, արդեն երկար տարիներ աշխատում է ՀՀ Տավուշի մարզպետարանում՝ որպես Վարչատնտեսական բաժնի վարիչ: Ես ամուսնացած չեմ:

– Փոքր հասակում ի՞նչ եք երազել դառնալ:
– Փոքր հասակում երազանքներս շատ էին մասնագիտության ընտրության հարցում, և դրանք գրեթե ամեն օր փոխվում էին՝ կախված շրջապատող իրադրությունից: Առաջին երազանքս, որ հիշում եմ, ցանկանում էի դառնալ հրշեջ (որպեսզի կարողանամ վարել կարմիր հրշեջ մեքենա): Հիշում եմ՝ առաջին դասարանն ավարտելիս դասվարս հանձնարարել էր մեզ գրել շարադրություն՝ «Ի՞նչ ենք ուզում դառնալ, երբ մեծանանք» թեմայով: Խոստացել էր գրված շարադրությունները ծրարավորել և դպրոցն ավարտելիս՝ վերջին զանգին, հանձնել մեզ: 10 տարվա ընթացքում արդեն բոլորս էլ մոռացել էինք շարադրությունների բովանդակության մասին, և քաղցր հուշ էր 10 տարի անց ընթերցելու գրվածը: Այդ շարադրության մեջ գրել էի, որ ցանկանում եմ դառնալ ոստիկան (երևի նրա համար, որ մորեղբայրներս ոստիկան էին և նրանցով էի ոգեշնչված):

– Ի՞նչ կրթություն եք ստացել:
– Միջնակարգ կրթությունս ստացել եմ Իջևանի թիվ 5 դպրոցում: Դպրոցն ավարտելուց հետո ընդունվել եմ ԵՊՀ Իջևանի մասնաճյուղի տնտեսագիտության ֆակուլտետ: Բակալավրի կրթական աստիճան ստանալուց հետո ուսումս շարունակել եմ ԵՊՀ տնտեսագիտության և կառավարման ֆակուլտետի մագիստրատուրայում՝ «Ֆինանսաներ, դրամաշրջանառության և վարկ» մասնագիտությամբ:

– Ի՞նչ դեր է խաղացել ԵՊՀ ԻՄ-ում ստացած կրթությունը Ձեր կյանքում:
– ԵՊՀ ԻՄ-ի դերը իմ մասնագիտական կայացման փուլում անգնահատելի է. հիանալի պրոֆեսորադասախոսական անձնակազմ, որակյալ կրթություն ստանալու համար ստեղծված լավ պայմաններ, որոնք հնարավորություն տվեցին ինձ գերազանցությամբ շարունակելու և ավարտելու մագիստրատուրան:

– Ի՞նչ աշխատանքային փորձ ունեք:
– Բակալավրում սովորելու տարիներին զբաղվել եմ ակտիվ հասարակական գործունեությամբ՝ նախ ԵՊՀ ԻՄ-ի տնտեսագիտության ֆակուլտետի ուսանողական խորհրդի նախագահ, ապա 2012-2013 թվականներին՝ ԵՊՀ ԻՄ-ի ուսանողական խորհրդի նախագահ:
Մագիստրատուրայում սովորելու 2-րդ կուրսում՝ 2014-2015 թթ., ժամավճարային հիմունքներով որպես դասախոս աշխատել եմ ԵՊՀ ԻՄ-ի տնտեսագիտության ֆակուլտետում՝ վարելով «Տնտեսագիտության տեսություն», «Համաշխարհային տնտեսագիտություն» դասընթացների սեմինարները:
2017թ. հոկտեմբերից առ այսօր աշխատում եմ ՀՀ տարածքում ջրամատակարարման և ջրահեռացման ծառայություններ մատուցող ֆրանսիական «Վեոլիա Ջուր» ՓԲԸ-ում՝ որպես վարչական տնօրինության Բյուջեի և ներքին վերահսկողության բաժնի գլխավոր մասնագետ:

– Ո՞րն է Ձեր ամենասիրելի գիրքը:
– Հիմնականում ընթերցում եմ մասնագիտական գրականություն, գեղարվեստական գրականություն, ցավոք, ժամանակի սղության պատճառով շատ քիչ եմ ընթերցում: Իմ ամենասիրելի գեղարվեստական գիրքը Մարկ Արենի «Այնտեղ, որտեղ ծաղկում են վայրի վարդեր. անատոլիական պատմություն» վեպն է:

– Ո՞րն է Ձեր կարդացած վերջին գիրքը:
– Կարդացածս վերջին գիրքը ընկերոջս՝ Անդրանիկ Իսրայելյանի կողմից թարգմանված և «Նյու մեգ» հրատարակչության կողմից հրատարակված թուրք անվանի պատմաբան, ցեղասպանագետ Թաներ Աքչամի «Սպանության հրամաններ» գիրքն է:

– Ի՞նչ երաժշտություն եք նախընտրում, և ո՞րն է Ձեր սիրած երգը:
– Ես ռետրո ոճի երաժշտության սիրահար եմ, կարծում եմ՝ երաժշտությունը և խոսքային բովանդակությունը լավագույնս արտահայտվել է նախորդ դարի 80-90-ական թվականների երաժշտության մեջ: Սիրածս երգը “Scorpions” խմբի “Wind of Change” երգն է:

– Ո՞րն է Ձեր սիրած ֆիլմը:
– Սիրածս ֆիլմը Ուիլլ Սմիթի դերակատարմամբ “The pursuit of happiness” («Հաջողության հետապնդումը») ֆիլմն է:

– Ունե՞ք նախընտրելի մարզաձև:
– Նախընտրում եմ դիտել ֆուտբոլ, հատկապես, երբ խաղում է Հայաստանի ազգային հավաքականը և իսպանական Ռեալ Մադրիդը (երկրպագում եմ 2003 թ.-ից սկսած):
Սիրածս մարզաձևը, որով զբաղվել եմ երկար տարիներ, ձգումներ և պտույտներ պտտաձողի վրա (Street workout) մարզաձևն է:

– Ո՞րն է Ձեր սիրած վայրը Հայաստանում և արտերկրում:
– Արտերկրում չեմ եղել, իսկ Հայաստանում, համոզված եմ նաև ամբողջ աշխարհում, իմ ամենասիրելի վայրը ծննդավայրս է՝ Իջևանը:

– Ո՞ր հատկանիշներն եք գնահատում մարդկանց մեջ:
– Մարդկանց մեջ ամենաշատը գնահատում եմ ազնվությունը, բարությունը, պատասխանատվության զգացումը և ճշտապահությունը:

– Ունե՞ք նախընտրած ասույթ կամ կարգախոս, որով առաջնորդվում եք:
– Նախընտրածս կարգախոսը, որով էլ փորձում եմ առաջնորդվել իմ կյանքում, Կոնֆուցիոսի ձևակերպած միտքն է. «Մի՛ արա ուրիշներին այն, ինչ չես ցանկանա, որ անեն քեզ»:

– Ի՞նչ երբեք չեք անի:
– Երբեք օդապարիկով չեմ թռչի:

– Ինչի՞ց եք վախենում:
– Վախենում եմ հարազատ մարդու և նրա նկատմամբ ունեցած վստահության կորստից:

– Ինչի՞ համար եք ափսոսում:
– Ափսոսում եմ կյանքի որոշակի փուլերին և պահերին չարտահայտած/չասած մտքերի և խոսքերի համար:

– Ի՞նչն է օգնում Ձեզ որոշում կայացնել դժվարին իրավիճակներում:
– Հարազատ մարդկանց խորհուրդները:

– Ի՞նչն եք համարում Ձեր կյանքի ամենամեծ ձեռքբերումը:
– Ներկայումս իմ ամենամեծ ձեռքբերումը վստահելի և հավատարիմ ընկերներս են, ընկերներ՝ տվյալ բառի ամբողջական բովանդակությամբ և էությամբ:

– Ո՞րն է հաջողության հասնելու Ձեր բանաձևը:
– Կարծում եմ՝ յուրաքանչյուրիս հաջողության հասնելու հիմքում պետք է ընկած լինեն աշխատասիրությունը, նպատակասլացությունը, հավատը սեփական ուժերի նկատմամբ, ճիշտ ժամանակին, ճիշտ վայրում գտնվելը, ինքդ քո նկատմամբ խիստ պահանջներ դնելը, երբեք ձեռքբերվածով չբավարարվելը և ցանկացած ձախողումը որպես կյանքի նոր դաս ընկալելը:

– Ո՞րն է Ձեր ստացած ամենաթանկ խորհուրդը:
– Մայրս է տալիս ինձ ամենաթանկ խորհուրդները, որոնցից ցանկանում եմ առանձնացնել հետևյալները. «Յուրաքանչյուր, նույնիսկ ամենաչնչին որոշում կայացնելիս խորը դատի՛ր իրավիճակը, մշտապես գնահատի՛ր հնարավոր ռիսկերը և հետևանքները», «Երբեք որոշում մի՛ կայացրու նյարդայնացած ժամանակ և պահի ազդեցության տակ»:

– Ո՞րն է այն հիմնական խորհուրդ-պատգամը, որ Դուք կտաք երիտասարդներին (մասնավորապես՝ ԵՊՀ ԻՄ-ի ուսանողներին):
– Խորհուրդը, որ կցանկանայի տալ մասնավորապես ԵՊՀ ԻՄ-ի ուսանողներին, հետևյալն է՝ երբեք չբավարարվել ձեռք բերված գիտելիքներով, մասնագետ դառնում են միայն ու միայն ինքնակատարելագործման, ինքնակրթման ճանապարհով, այսօրվա ինֆորմացիան (ստացած գիտելիքը) վաղը կարող է արդեն հնացած լինել:
Սիրելի՛ ուսանողներ, մշտապես եղե՛ք տեղեկացված և ձգտե՛ք ավելիին:

– Շնորհակալ ենք ուշագրավ հարցազրույցի համար:

Հարցազրույցը վարեց ԵՊՀ ԻՄ-ի հասարակայնության հետ
կապերի և մամուլի պատասխանատու Հասմիկ Վանյանը: