2018թ. դեկտեմբերի 1-3-ը ՀՀ սպորտի և երիտասարդության հարցերի նախարարության տրամադրած դրամաշնորհի շրջանակներում ՀՀ երիտասարդական մայրաքաղաք Իջևանում տեղի ունեցավ «Հռետորական հմտությունների զարգացում» թեմայով դասընթաց, որն իրականացրեց «Հարմոնիա» հոգեբանության հանրային զարգացման կենտրոնը:

Դասընթացին մասնակցում էին Տավուշի մարզի 3 տասնյակ երիտասարդներ, որոնց մեծամասնությունը ԵՊՀ ԻՄ-ի ուսանողներ և շրջանավարտներ էին:

Հռետորական հմտությունների զարգացման դասընթացի նպատակն էր նպաստել երիտասարդների հաղորդակցման և հանրային խոսքի հմտությունների զարգացմանը: Երեք օր տևած ինտենսիվ դասընթացի ընթացքում երիտասարդները ծանոթացան հռետորական արվեստի նրբություններին՝ խոսքի զարգացման հնարքներից մինչև հուզմունքի ու վախի հաղթահարման մեթոդներ:

Սեմինարները վարեցին «Հարմոնիա» ՀՀԶԿ-ի նախագահ, ԵՊՀ ԻՄ-ի մանկավարժության և հոգեբանության ամբիոնի դասախոս Աշխեն Մկոյանը, հոգեբան, բազմաթիվ գրքերի հեղինակ Հրաչյա Ամիրյանը և “Mkoyan and Partners Law Firm” իրավաբանական ընկերության կառավարիչ գործընկեր, փորձագետ Սամվել Մկոյանը:

Դասընթացն իրականացվում էր ինտերակտիվ մեթոդներով, յուրաքանչյուր թեմայի ժամանակ մասնակիցները պրակտիկ վարժությունների միջոցով ամրապնդում էին ստացած գիտելիքները: Սեմինարավարներն աշխատում էին մասնակիցներին հնարավորինս շատ և օգտակար գիտելիքներ փոխանցել, որոնք իսկապես կնպաստեն մասնակիցների հմտությունների զարգացմանը։

Մասնակցիները մեծ ոգևորությամբ էին լսում բոլոր խոսնակներին, ներկայացնում էին իրենց տեսակետները և կարծիքները, խոսում էին իրենց ստացած տպավորությունների և գիտելիքների մասին։

Երրորդ օրը մասնակիցները հանդես եկան ելույթներով և տեղում ցուցադրեցին այն բոլոր հմտությունները, որոնք ստացել էին դասընթացի շրջանակում:

«Հարմոնիա» ՀՀԶԿ-ի նախագահ, ծրագրի պատասխանատու Աշխեն Մկոյանը ծրագիրն ամփոփեց հետևյալ խոսքերով. «Դասընթացն ունեցավ ավելի մեծ արձագանքներ, քան մենք սպասում էինք, ինչի համար անչափ ուրախ եմ։ Երիտասարդների զարգանալու անհագ ձգտումը և ոգևորությունը տեսնելով՝ կրկին համոզվեցինք, որ նման ծրագրերը պետք է հաճախակի բնույթ կրեն։ Շնորհավորում եմ մեզ և բոլոր մասնակիցներին՝ կայացած ծրագրի համար»:

Վերջում մասնակիցները ստացան հավաստագրեր:

Ծրագրի ինֆորմացիոն գործընկերներն էին ԵՊՀ ԻՄ-ի ուսանողական կառույցները, ՀԵՀ Տավուշի մարզի երիտասարդական կենտրոնը, «Հաջողակ կին» երիտասարդական ՀԿ-ն և «Ստեղծամիտ երիտասարդների միություն» ՀԿ-ն։

2018թ. դեկտեմբերի 1-ին ԵՊՀ ԻՄ–ի գրադարանում կայացավ Հայոց պատմության և հասարակագիտության ամբիոնի դասախոսներ, պ.գ.թ., ասիստենտ Ն.Գրիգորյանի և Ա.Ազատյանի համահեղինակած «ՀԱՅԱՍՏԱՆԻ ԱՌԱՋԻՆ ՀԱՆՐԱՊԵՏՈՒԹՅՈՒՆ. ԴԵՄՔԵՐ, ԴԵՊՔԵՐ» գրքի շնորհանդեսը:

Շնորհանդեսին ներկա էին բուհի վարչական և պրոֆեսորադասախոսական անձնակազմի ներկայացուցիչներ, ուսանողներ, հյուրեր:

Ն.Գրիգորյանի և Ա.Ազատյանի գրքի շնորհանդեսին բացման խոսքով հանդես եկավ գրադարանի վարիչ Վլադիմիր Պողոսյանը՝ ներկայացնելով, որ իր գործընկերների հեղինակած «Հայաստանի առաջին հանրապետություն. դեմքեր, դեպքեր» գիրքն իսկապես պահանջված, ուսանողի գրադարանին անհրաժեշտ հանրամատչելի գիրք է, որտեղ լավագույնս բացահայտված և մատչելի կերպով մատուցված է Հայաստանի առաջին հանրապետության կայացման քաղաքական, սոցիալ-մշակութային կյանքի բոլոր ասպարեզների նվաճումները, քաղաքական գործչի կերպարը: Նա հատկապես կարևորեց քաղաքական գործիչներին վերաբերող հատվածները, որոնցում փորձ է արված ներկայացնելու, ինչու չէ նաև ամրապնդելու պետական, ազգային գործչի կերպարը՝ ի դեմս Հ.Քաջազնունու, Ալ.Խատիսյանի, Սիմոն Վրացյանի և այլոց: Ընդգծվեց այն հանգամանքը, որ Առաջին հանարապետության տարիներին թույլ տրված սխալները մեզ կարող են օգնել այսօր, այս հեղաբեկվող ժամանակաշրջանում, երբ գաղափարներն ու առաջնորդները կարող են մեկ օրում դառնալ ոչ իրական:

Ելույթ ունեցան ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, Հումանիտար գիտությունների ֆակուլտետի դեկանի պաշտոնակատար Կ.Պողոսյանը, Հայոց պատմության և հասարակագիտության ամբիոնի վարիչի պաշտոնակատար Դ.Թինոյանը, ամբիոնի դասախոսներ, մասնավորապես՝ պ.գ.թ., դոցենտ Լ.Մկրտչյանը, Հայոց լեզվի և գրականության ամբիոնի վարիչի պաշտոնակատար Վ.Ավագյանը, ուսանողներ, հյուրեր՝ գրքի վերաբերյալ արժևորման ու գնահատանքի խոսքեր ասելով, գրքի լույսընծայման կապակցությամբ շնորհավորելով գրքի համահեղինակներին, ուսանողներին և բոլոր ներկաներին:

Ապա ելույթ ունեցան գրքի համահեղինակներ Ա.Ազատյանը և Ն.Գրիգորյանը՝ անդրադառնալով գրքի ստեղծման հանգամանքներին, նպատակին, գրքում արծարծված խնդիրներին. «Եթե խորհրդային տարիներին Հայաստանի  Առաջին Հանրապետության պատմության ուսումնասիրությունը գաղափարաքաղաքական նշանակություն ուներ, ապա վիճակը կտրուկ փոխվեց հետխորհրդային շրջանում, երբ մեր պատմաբանները մեծ թափով սկսեցին ուսումնասիրել Հայաստանի Առաջին Հանրապետության պատմությունը: Անկախության շրջանում շատ է գրվել Առաջին հանրապետության պատմության տարբեր հիմնահարցերի վերաբերյալ, այն աստիճան, որ թվում է, թե սպառվել էր այս թեման, և որևէ նոր խոսք չկար ասելու: Մեր նպատակն է եղել այս փոքրիկ գրքույկով հանրամատչելի ձևով ներկայացնել Առաջին հանրապետության կարճատև գոյության ընթացքում արձանագրված ձեռքբերումները և պետականության կայացման, արարման գործում մեծ ներդրում ունեցած հայրենասեր գործիչների գործունեությունը, իսկ այդպիսի գործիչները շատ էին, ովքեր սրտացավ էին հայ ժողովրդի համար: Բավական է հիշել մի օրինակ՝ կապված Հովհաննես Քաջազնունու հետ, երբ վերջինս, մեկնելով Ամերիկա, պետբյուջեից գումար վերցրեց վերարկու գնելու համար, սակայն գործուղումից վերադառնալուց անմիջապես հետո նա վաճառեց այդ վերարկուն և գումարը վերադարձրեց պետբյուջե»:

Եզրափակիչ խոսքով հանդես եկավ գրադարանի վարիչ Վ.Պողոսյանը՝ մասնավորապես նշելով. «Նմանօրինակ միջոցառումներով գրադարանը հնարավորություն է ստանում վերածվելու համընկնումների և հակադրումների, համասեռումների և տարասեռումների միջավայրի, որտեղ մենք փորձում ենք քննարկել, քննադատել, ինչու չէ նաև հակադրվել միմյանց՝ վեր հանելով ճշմարիտն ու արդարը։ Ուստի միմյանց մաղթենք առողջ միտք, անհնարինը հնարավոր դարձնելու մեծ կամք և հիշենք, որ քույր ու եղբայր են չկարողանալն ու չկամենալը, հազարամղոն ճանապարհորդությունն էլ սկսվում է մեկ քայլով: Կրկին շնորհավորում եմ հեղինակներին և ցանկանում ստեղծագործական նորանոր ձեռքբերումներ»:

Վերջում տեղի ունեցավ հյուրասիրություն:

Շնորհանդեսի բոլոր լուսանկարները տե՛ս Պատկերասրահում: 

2018թ. նոյեմբերի 30-ին ԵՊՀ Իջևանի մասնաճյուղի գրադարանում տեղի ունեցավ հանդիպում Հայոց լեզվի և գրականության ամբիոնի դասախոսների, «Հայոց լեզու և գրականություն» մասնագիտության ուսանողների և ժամանակակից գրող, ԵՊՀ ԻՄ-ի շրջանավարտ Նաիրա Փիրումյանի ու գրականագետ, գրաքննադատ Անի Փաշայանի հետ:

Հանդիպման նպատակն էր քննարկել Նաիրա Փիրումյանի «Տերևը» ժողովածուի պատմվածքները:

Բացման խոսքով հանդես եկան ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, Հայոց լեզվի և գրականության ամբիոնի վարիչի պաշտոնակատար Վ. Վ. Ավագյանը:

Զեկուցումներ ներկայացրին, հետաքրքիր և ազդեցիկ ելույթներ ունեցան «ՀԼԳ» մասնագիտության ուսանողները (Լուսինե Մելքումյան, Աննա Դովլաթբեկյան, Մանե Եգանյան, Գոհար Մխիթարյան և ուրիշներ), Հայոց լեզվի և գրականության ամբիոնի դասախոսները:   

«Տերևը» ժողովածուի պատմվածքներից մեկի՝ «30 սմ»-ի մասին ինքնատիպ զեկուցումով հանդես եկավ Հայոց լեզվի և գրականության ամբիոնի դոցենտ, բ.գ.թ. Աիդա Սարհատյանը՝ ընդգծելով պատմվածքում հեղինակի պատկերավոր, պարզ ու հստակ լեզուն՝ փիլիսոփայական խորքերով, անպաճույճ պատմելաձևը, ինքնակենսագրական բնույթը, մարդկային հոգու դրամատիկ հույզերով հագեցվածությունը. «Առաջին զգացումը, որ ապրում է ընթերցողը Նաիրա Փիրումյանի պատմվածքների ժողովածուն  ընթերցելիս, պատկերավոր, պարզ ու հստակ լեզուն է՝ փիլիսոփայական խորքերով… Ինքնակենսագրական բովանդակություն ունի… «30 սմ» պատմվածքը։ …Սահուն է հեղինակի լեզուն, պատմելաձևը՝ անպաճույճ. հիվանդանոցային կյանքի դրվագները լի  սիրով, բնական գույնով. պատմվածքն ասես նովելների մի փունջ է՝ մարդկային հոգու դրամատիկ հույզերով հագեցած. ահա Հորդանանից եկած գեղեցկուհի Սաբահի և պարսկահայ Ռազմիկի սիրո դրաման. կյանքը նրանց չէր կարող միացնել, որովհետև տարբեր էին կրոնները, կամ Կոստյայի և սիրունիկ Դաշայի սերը, որը ընդհատվել էր տղայի ծնողների պահանջով։ Սեղմ, բայց գունագեղ վրձնահարվածներով են կերտվել նաև մյուս հերոսների լիարյուն դիմանկարները… Իսկ ամենահետաքրքիրը աղջկա ցավոտ սիրո պատմությունն է, նրա և Թոդորի սիրո,  որ երանելիության չափ ցանկալի էր, անհնարին ու անհավանական լինելու չափ իրական, իսկ նրանց համբույրները՝ հեղված արցունքներով…»:

Զեկուցումների ընթերցումից հետո ուսանողները գրքի հեղինակ Նաիրա Փիրումյանից և գրականագետ Անի Փաշայանից ստացան գրքի ստեղծագործական պատմությանը, ընդհանրապես ստեղծագործական պրոցեսին, ժամանակակից գրականությանը և գրողներին վերաբերող իրենց հարցերի պատասխանները:   

Բոլոր լուսանկարները տես Պատկերասրահում: 

 2018թ. նոյեմբերի 26-29-ը ԵՊՀ Իջևանի մասնաճյուղում կայացավ «Կարիերայի զարգացում» թեմայով քառօրյա դասընթացը, որը «Տավուշի մարզի ինտեգրված և հավասարակշռված տնտեսական զարգացում» ծրագրի շրջանակներում կազմակերպել էր «Քմյունիթի սենթր ֆոր դիվելոփմենթ» տարածաշրջանային համագործակցության ՀԿ-ն, Եվրոպական Միության և ՀՀ կառավարության համաֆինանսավորմամբ:

Ծրագիրը նպատակաուղղված է ապահովելու Տավուշի մարզի համայնքների միջև առավել համաչափ սոցիալական և տնտեսական զարգացում` ստեղծելով նոր տնտեսական հնարավորություններ և աշխատատեղեր, ինչպես նաև զարգացնելու երիտասարդների կարողությունները:

Մասնաճյուղում կազմակերպված «Կարիերայի զարգացում» թեմայով դասընթացի նպատակն էր աջակցել բուհի ուսանողներին, շրջանավարտներին, գործազուրկ երիտասարդներին հասկանալու իրենց աշխատանքային ինքնությունը, ձևավորելու կարիերայի նպատակ և մշակելու ռազմավարություն/գործողությունների պլան՝ այդ նպատակին հասնելու համար:

Դասընթացին մասնակցում էին ԵՊՀ Իջևանի մասնաճյուղի ավարտական կուրսերի 59 ուսանողներ, շրջանավարտներ և աշխատանք փնտրող անձինք:

Կարիերայի զարգացման դասընթացը վարում էր Մարինա Պողոսյանը՝ MBA, CMC միջազգային որակավորված խորհրդատու և քոուչ, «Մենեջմենթ Սիսթեմս քընսալթինգ» ընկերության տնօրեն: Ավելի քան քսան տարի նա իր ներդրումն է ունեցել Հայաստանի խորհրդատվական շուկայի զարգացման մեջ՝ աշխատելով միջազգային կազմակերպությունների հետ, ինչպիսիք են «Քեմոնիքս Ինտերնաշնլ», «Նատան Ասոշիիտս», «Ջ. Ի. Ոստին Ասոշիիտս»: Մարինան նաև ավագ դասընթացավար է Կանանց ձեռներեցության ծրագրում, որն իրականացնում է Ամերիկյան համալսարանը Հայ կանանց միջազգային ասոցիացիայի ֆինանսավորմամբ: Համագործակցելով Եվրոպական բանկի հետ՝ Մարինան դասընթացներ է վարում տարբեր երկրներում՝ ուսուցանելով կառավարման խորհրդատուներին:

Դասընթացն անցկացվեց գործնական վարժությունների և ինտերակտիվ քննարկումների միջոցով։

Դասընթացի մասնակիցները հնարավորություն ունեցան նաև օգտվելու դասընթացավարի հետ 4 ժամ անհատական խորհրդատվությունից:

«Կարիերայի զարգացում» թեմայով դասընթացի վերջում մասնակիցները`

• Իմացան կարիերա և աշխատանք հասկացությունների հիմնական տարբերությունները:
• Կարողացան ձևավորել կարիերային վերաբերող SMART նպատակ:
• Իմացան կոմպետենցիայի սահմանումը և բացահայտեցին այն կոմպետենցիաները, որոնք առկա են իրենց մեջ, և որոնց հարկավոր է զարգացնել իրենց կարիերայի նպատակին հասնելու համար:
• Զարգացրին հաղորդակցման հմտությունները, որոնք անհրաժեշտ են ինչպես առօրյա կյանքում, այնպես էլ աշխատանք փնտրելիս:
• Բացահայտեցին աշխատանք գտնելու խոչընդոտները և գտան դրանց լուծումները:
• Մշակեցին իրենց կարճ կենսագրությունը (CV) և ուղեկցող/մոտիվացիոն նամակի օրինակ:
• Իմացան հաջողված հարցազրույցի գրավականները:
• Բացահայտեցին աշխատանքի որոնման գործիքները:

  2018թ. նոյեմբերի 29-ին ԵՊՀ Իջևանի մասնաճյուղում տեղի ունեցավ Տավուշի թեմի առաջնորդ գերաշնորհ Բագրատ Սրբազանի հետ ուսանողների հանդիպումը:

ԵՊՀ ԻՄ-ի ուսանողների նախաձեռնությամբ, կամավոր սկզբունքով ձևավորվել է 15 համայնքային խումբ, որոնց նպատակն է ուսանողների աջակցությամբ համայնքներում կատարել կարիքների վերհանում, նախագծերի մշակում, հետաքրքիր և մոտիվացնող դասընթացների կազմակերպում:

Հանդիպման նպատակն էր ծանոթանալ համայնքային խմբերի հետ, լսել նրանց կարծիքները, բարձրաձայնել սեփական գաղափարները, միասին գտնել լուծումներ դրանք իրագործելու համար:

Մի քանի համայնքային խմբեր արդեն ունեին ծրագրեր՝ սպասվող տոներին ընդառաջ:

Տավուշի թեմի առաջնորդ Տ. Բագրատ եպիսկոպոս Գալստանյանն իր աջակցությունը հայտնեց ուսանողներին, և կնքվեց փոխհամագործակցության համաձայնագիր: