2018թ. հոկտեմբերի 10-ին Տավուշի տարածաշրջանային պետական քոլեջում կայացավ «Միջին մասնագիտական կրթություն և աշխատաշուկա, հանրակրություն և մասնագիտական կողմնորոշում. հիմնախնդիրներ և լուծման ուղիներ» թեմայով մարզային ֆորում, որն իրականացրեց «Գործընկերություն և ուսուցում» (ԳՈՒՄ ՀԿ) հասարակական կազմակերպությունը՝ ի դեմս ՀԿ գործադիր տնօրեն Արտաշես Տոռոզյանի:

Ֆորումին ներկա էին քոլեջի տնօրենը, «Երիտասարդ Տավուշ» ԵՀԿ-ի նախագահը, «Պրոգրես» ՀԿ-ի նախագահը, տարածքային զբաղվածության կենտրոնի տնօրենը և աշխատակիցներ, դպրոցի տնօրեններ, ուսուցիչներ, քոլեջի ուսանողներ և այլ ներկայացուցիչներ:

Մարզային ֆորումին մասնակցում էին նաև ԵՊՀ Իջևանի մասնաճյուղի ուսանողներ և աշխատակիցներ, մասնավորապես՝ տնօրենի խորհրդական Արման Եգանյանը, շրջանավարտների և արտաքին շահակիցների հետ տարվող աշխատանքների համակարգող Էրինե Ղարայանը, Մարդկային ռեսուրսների կառավարման բաժնի աշխատակից Նարա Ղազարյանը:

Ֆորումի նպատակն էր մարզի ուսումնական հաստատությունների ներկայացուցիչների հետ քննարկել միջին մասնագիտական կրթության, աշխատաշուկայի, հանրակրթության ոլորտում մասնագիտական կողմնորոշման հիմնախնդիրները և ստանալ լուծմանն ուղղված առաջարկություններ:  

Մարզային ֆորումի ժամանակ անցկացվեց խմբային խաղ-քննարկում, որի ընթացքում յուրաքանչյուր հաստատություն պետք է ներկայացներ աշխատաշուկայում ամենաշատ հանդիպող 5 հիմնախնդիրները:

ԵՊՀ ԻՄ-ի աշխատակիցների և ուսանողների առաջարկությունների համատեղ քննարկման շնորհիվ մատնանշվեցին ամենահաճախ հանդիպող 5 հիմնախնդիրները՝

1. աշխատատեղի բացակայություն,
2. ուսումնական պրակտիկան փորձ չհամարելը,
3. ուսուցանվող թեմաների արդիականություն,
4. ինքնազարգացման խնդիր,
5. ոչ ճիշտ մասնագիտական կողմնորոշում:

2018թ. հոկտեմբերի 10-ին ԵՊՀ Իջևանի մասնաճյուղում կայացավ Ֆրանկոֆոնիային նվիրված հերթական միջոցառումը, որը կազմակերպել էր Ֆրանսերեն լեզվի և գրականության ամբիոնի դասախոս Սվետա Օհանյանը:

Այս տարի, ինչպես հայտնի է, հոկտեմբերի 7-12-ին Հայաստանում տեղի է ունենում Ֆրանկոֆոնիայի միջազգային կազմակերպության 17-րդ գագաթնաժողովը, որի առիթով Հայաստան են ժամանել Ֆրանսիայի տարբեր քաղաքներից, ինչպես նաև ֆրանկոֆոն այլ երկրներից բազմաթիվ պատվիրակություններ: Հայաստանը ողողված է ֆրանսերենով և ֆրանսիական շնչով, որից չէր կարող անմասն մնալ ԵՊՀ Իջևանի մասնաճյուղը:

ԵՊՀ ԻՄ-ում կազմակերպված միջոցառումը նվիրված էր գլխավորապես Փարիզի տեսարժան վայրերին:

Միջոցառմանը մասնակցող «ՖԼԳ» և «ԱԼԳ» մասնագիտությունների ուսանողները պրեզենտացիաների ուղեկցությամբ ներկայացրին երգեր ու բանաստեղծություններ:

Անդրադարձ կատարվեց Փարիզի խորհրդանիշ Էյֆելյան աշտարակին, Շանզ Էլիզե պողոտային, Կոնկորդ հրապարակին, Տյուլիեղի զբոսայգուն, Փարիզի Աստվածամոր տաճարին:

Ներկայացվեցին Օրսե և Լուվր թանգարանները: Շեշտվեց, որ Լուվրը աշխարհում ամենաշատ այցելություններ ունեցող թանգարաններից մեկն է, այնտեղ է տեղակայված բոլորին հայտնի Ջոկոնդան, Համուրաբիի կոդը և այլ աշխարհահռչակ գլուխգործոցներ:

Օրսե թանգարանում հիմնականում ցուցադրված են  իմպրեսիոնիստական շարժման նկարիչներ Մանեի, Դեգայի, Սեզանի, Ռընուառի և այլոց գլուխգործոցները:

Անդրադարձ կատարվեց նաև վերոնշյալ թանգարաններում զետեղված ամենահայտնի կտավներին և քանդակներին:

Մեր ուսանողներն իրենց գեղեցիկ ելույթներով ևս մեկ անգամ ապացուցեցին, որ ֆրանսերենը սիրո և երաժշտության լեզու է:

2018թ. հոկտեմբերի 9-ին ԵՊՀ Իջևանի մասնաճյուղի դահլիճում տեղի ունեցավ   ոչ ֆորմալ կրթության վերաբերյալ թրեյնինգ, որին մասնակցում էին Տավուշի տարածաշրջանում աշխատող «Լույս մանկանց» ծրագրի աշխատակիցներ՝ 60 ուսուցիչներ, ԵՊՀ ԻՄ-ի դասախոսներ:

Ծրագիրը, որն իրականացվում է Տավուշի թեմի առաջնորդարանի հետ համատեղ, Տ. Բագրատ եպիսկոպոս Գալստանյանի օրհնությամբ, միտված է երեխաների հոգևոր դաստիարակությանն ու զարգացմանը։

Դասընթացի բանախոսն էր կրթության փորձագետ Արեգ Թադևոսյանը։ 

Թրեյնինգի ընթացքում մասնակիցները նախ կատարեցին փոքրիկ գործնական աշխատանք՝ վերհանելով կրթության ոլորտի 10-ական խնդիր:

Դասընթացավարը շնորհանդեսի ուղեկցությամբ ներկայացրեց կրթության արդի մարտահրավերները:

Հանգամանորեն բացատրվեցին ակնկալվող կրթական վերջնարդյունքները (գիտելիք (ֆր.՝ savoir), հմտություն (ֆր.՝ savoir faire), մոտեցում (ֆր.՝ savoir être):

Մատնանշվեցին բանալի ունակությունները.

1. Հաղորդակցություն մայրենի լեզվով
2. Հաղորդակցություն օտար լեզուներով
3. Մաթեմատիկական, բազային գիտական և տեխնոլոգիական ունակություններ
4. Թվային ունակություններ
5. Սովորել ինչպես սովորել
6. Նախաձեռնողական և ձեռնարկատիրական ունակություններ
7. Մշակութային գիտակցություն և ինքնաարտահայտում:  

Դասընթացի մասնակիցները, լինելով ուսուցիչներ և դասախոսներ, ոչ ֆորմալ կրթության վերաբերյալ իրենց ստացած գիտելիքները հնարավորություն ունեն փոխանցելու աշակերտներին և ուսանողներին: 

2018թ. հոկտեմբերի 7-ին ԵՊՀ Իջևանի մասնաճյուղի «Կիրառական արվեստ» և «Դիզայն» մասնագիտությունների 4-րդ կուրսի ուսանողների առաջարկով և մասնաճյուղի տնօրենության աջակցությամբ կազմակերպվեց ճանաչողական այց դեպի Ամբերդ, որտեղ ուսանողներն ուսումնասիրեցին 10-րդ դարի ճարտարապետությունը:

Ուսանողներին ուղեկցում էր ԵՊՀ Իջևանի մասնաճյուղի դեկորատիվ-կիրառական արվեստի և դիզայնի ամբիոնի դասախոս, Տավուշի մարզի գլխավոր ճարտարապետ Միսակ Մելքումյանը: 

Համալսարանականները նաև այցելեցին Երևան, որտեղ ուսումնասիրեցին տարբեր  ճարտարապետական կառույցներ, քանդակներ, այգիների և պուրակների լանդշաֆտներ:

Ուսանողների ճանաչողական այցն ավարտվեց  պատկերասրահում:

Ճանաչողական այցի ընթացքում ուսանողները կատարեցին էսքիզային   աշխատանքներ և կողմնորոշվեցին ավարտական աշխատանքների թեմաների ընտրության ու հստակեցման հարցերում:

2018թ. հոկտեմբերի 7-ին Ֆրանկոֆոնիայի միջազգային գագաթնաժողովի շրջանակներում ԵՊՀ Իջևանի մասնաճյուղ էին այցելել Իջևանի բարեկամ Վալանս քաղաքի պաշտոնական պատվիրակությունը և զբոսաշրջիկների՝ 40 հոգուց բաղկացած խումբը:

Պատվիրակության կազմում էին Վալանսի քաղաքապետ Ն.Դարագոնը, փոխքաղաքապետ Ֆ.Դոման, Հայկական բարեգործական ընդհանուր միության Վալանսի մասնաճյուղի նախագահ Կեվին Մարկարյանը, «Վալանսի քույր քաղաաքներ» բարեկամության կոմիտեի նախագահ Ֆ.Ռիշբեն, քաղաքապետի խորհրդականներ Մ.Մարենը, Գ.Ռաստկլանը, Ն.Իլոզերը, «Մայեստրիս» համալսարանի տնօրենի օգնական Է.Տանը և այլ պաշտոնյաներ:

Հանդիպմանը մասնակցում էին Հայկական բարեգործական ընդհանուր միության անդամներ, մասնաճյուղի նախկին դասախոս Գ.Դանսետ-Համզյանը, Սիլվի Քոչյան-Բասմաջյանը, Սիլվիան Ջերանյանը, ովքեր Վալանսում հայանպաստ գործունեություն են ծավալում և հյուրընկալել էին մեր ուսանողներին ու դասախոսներին նախորդ տարիների այցերի ժամանակ:

Վալանսի պաշտոնական պատվիրակությանն ընդունեց ԵՊՀ Իջևանի մասնաճյուղի տնօրենի պաշտոնակատար Ա. Վ. Ցուցուլյանը: Նա շնորհակալություն հայտնեց համալսարան այցելելու, Ֆրանսիայում հայանպաստ գործունեություն ծավալելու, ուսանողների փոխանակման ծրագրերին աջակցելու համար: Պարոն Ցուցուլյանն ընդգծեց, որ Ֆրանսիան Հայաստանի բարեկամ երկիրն է, որը Հայոց ցեղասպանությունից հետո բնակատեղի է դարձել բազմաթիվ հայերի համար, ովքեր իրենց մտքի և բազկի ուժը ծառայեցրել են Ֆրանսիայի բարգավաճմանը: Նա նաև նշեց, որ ուսանողների փոխանակման ծրագիրը մեծապես նպաստում է ֆրանկոֆոնիայի տարածմանը:

Վալանսի քաղաքապետ Ն.Դարագոնը, շնորհակալություն հայտնելով ջերմ ընդունելության համար, նշեց, որ ֆրանսահայերը շատ արագ ինտեգրվում են և հաջողություններ գրանցում իրենց աշխատանքում: Քաղաքապետը շեշտեց, որ ֆրանսիական կողմը կշարունակի աջակցել ուսանողների փոխանակման ծրագրին:

Նա իր պատրաստակամությունը հայտնեց համագործակցելու ԵՊՀ Իջևանի մասնաճյուղի հետ՝ «Կիրառական արվեստ» և «Զբոսաշրջություն» մասնագիտությունների գծով: Պարոն Դարագոնը նաև հայտնեց, որ այս ուսումնական տարում 10 հոգուց բաղկացած խմբի կհրավիրեն կատարելագործելու ֆրանսերենի իրենց իմացությունը «Մայեստրիս» համալսարանում:

Մտքերի փոխանակությունից հետո պատվիրակության անդամները հանդիպեցին ԵՊՀ ԻՄ-ի՝ օտար լեզուներ ուսումնասիրող ուսանողների հետ:

Հանդիպման ընթացքում Վալանսի քաղաքապետը խոսեց հետագա ծրագրերից և պատասխանեց ուսանողների ու դասախոսների հարցերին:

ԵՊՀ Իջևանի մասնաճյուղից հյուրերը հեռացան ջերմ տպավորություններով և երկկողմ համագործակցությունը շարունակելու ծրագրերով: