2018թ. սեպտեմբերի 1-ին՝ Գիտելիքի և դպրության օրը, ԵՊՀ Իջևանի մասնաճյուղում տոնական միջոցառմամբ մեկնարկեց նոր ուսումնական տարին:

Մասնաճյուղը նոր ուստարում դիմավորեց 73 առաջին կուրսեցիների, որոնց համար Ուսանողական խորհուրդը կազմակերպել էր տոնական միջոցառում:

Ներկա էին ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, բուհի վարչական և պրոֆեսորադասախոսական անձնակազմի անդամները, մարզի տարբեր ոլորտների ներկայացուցիչներ, ուսանողներ, ծնողներ, հյուրեր:

Տոնական միջոցառումը մեկնարկեց Տավուշի թեմի առաջնորդ Տ. Բագրատ եպիսկոպոս Գալստանյանի օրհնության խոսքով ու աղոթքով:

Գիտելիքի և դպրության օրվա առթիվ Տավուշի թեմի առաջնորդը մասնավորապես նշեց. «ԵՊՀ ԻՄ հարգելի՛ տնօրենի պաշտոնակատար, սիրելի՛ դասախոսական կազմ, շատ սիրելի՛ ուսանողություն, աշակերտություն, միանալով բոլոր շնորհավորանքներին, ձեզ մի խնդրանք-հորդոր ունեմ. ձեր ողջ ուսումնական տարին մնացեք այնպես գեղեցիկ, ինչպես այս առաջին օրն եք՝ հոգով, մտքով և ձեր արտահայտությամբ: Սիրելի՛ ուսանողներ, չափազանց կարևոր առաքելություն ունեք դուք այսօր. մենք՝ Տավուշ աշխարհը, սահմանների անվտանգության երաշխավոր է ոչ միայն զենքով, զինականությամբ, այլև հատկապես ձեր ուսումնառությամբ, լավագույն որակներով կրթության, ձեր բարձրագույն արժեքների ձգտումով: Չսպառե՛ք, չվատնե՛ք ձեր ժամանակը, այն դարձրե՛ք արդյունավոր, պտղաբեր, հավաքե՛ք, ամբարե՛ք ձեզ համար այն ամենը, ինչը կտրվի ձեզ համալսարանական կյանքում, վայելե՛ք կյանքը համալսարանական լիուլի, բայց զգացե՛ք նաև այն մեծ պատասխանատվությունը, որ ձեր միջոցով կոչված է մեր կյանքը բարեփոխվելու, և շարժիչ ուժը, միջոցը, խթանը դուք եք…»:

Նոր ուսումնական տարվա մեկնարկի կապակցությամբ բոլոր համալսարանականներին՝ առաջին կուրսեցիներին, դասախոսներին, ուսանողներին, բուհի մյուս աշխատակիցներին, հյուրերին, շնորհավորեց ԵՊՀ ԻՄ-ի տնօրենի պաշտոնակատար Արտակ Ցուցուլյանը, բոլորին մաղթեց համարձակություն, ջանք, եռանդ՝ հաջողությունների հասնելու ճանապարհին.

«…Մեծագույն չարիքի պատճառ հանդիսացող ծուլությունը թո՛ղ բոլորիցս դուրս գա: Պատկերացրեք, որ եթե չլիներ ծուլությունը, չէր լինի աշխարհի վրա աղքատ և անկիրթ մարդ…: Ես, ևս մեկ անգամ շնորհավորելով, բոլորիս ցանկանում եմ եռանդ, կամք, համարձակություն, աշխատենք, դրսևորվենք, հասնենք այն նպատակներին, որ յուրաքանչյուրս մեզ համար դրել ենք: Շնորհակալություն»:   

Գիտելիքի և դպրության օրվա առթիվ ներկաներին շնորհավորանքի և բարեմաղթանքի խոսքեր հղեց Իջևանի զորամասի և ԵՊՀ ԻՄ-ի աշխատակից Վահագն Չոբանյանը:  

Առաջին կուրսեցիներին ամենալավն ու բարին մաղթեց ԵՊՀ Իջևանի մասնաճյուղի ուսանողական խորհրդի նախագահ Տիգրան Չիբուխչյանը: Որպես ավագ կուրսի ուսանող՝ Տիգրանը գիտելիքի բանալին հանձնեց մասնաճյուղի այս տարվա լավագույն դիմորդ, «Զբոսաշրջություն» մասնագիտության առաջին կուրսի ուսանողուհի Լաուրա Ուլիխանյանին:

Այնուհետև տեղի ունեցավ առաջին կուրսեցիների երդման հանդիսավոր արարողությունը: Նորաթուխ համալսարանականները երդվեցին արժանի լինել «Երևանի պետական համալսարան» հիմնադրամի Իջևանի մասնաճյուղի ուսանող լինելու բարձր կոչմանը, լինել օրինավոր քաղաքացիներ, նպաստել երկրի պետականության զարգացմանը:

Տոնական միջոցառումը շարունակվեց գրական-երաժշտական գեղեցիկ կատարումներով:

Բուհի շնորհալի ուսանողներն իրենց ընկերներին ու դասախոսներին շնորհավորեցին բարեհունչ ասմունքով, երգ ու պարով:

Միջոցառումից հետո Ուսանողական խորհրդի ներկայացուցիչները առաջին կուրսեցիներին ուղեկցեցին լսարաններ, նրանց ծանոթացրին բուհի առօրյային, ներկայացրին գործող ամբիոններն ու ստորաբաժանումները:      

2018-2019 ուսումնական տարվան ընդառաջ Տավուշի մարզի Խաշթառակ գյուղի բնակիչ պարոն Սամվել Դանիելյանը ԵՊՀ Իջևանի մասնաճյուղի գրադարանին նվիրաբերեց շուրջ 300 միավոր գրականություն:

ԵՊՀ ԻՄ-ի գրադարանային խորհուրդը և գրադարանի աշխատակազմը խորին երախտագիտություն և մեծ գոհունակություն են հայտնում բուհի նկատմամբ ցուցաբերված ուշադրության և գրքերի նվիրատվության համար:

Նրանք համոզմունք են արտահայտում, որ նվիրաբերված գրքերը մասնաճյուղի ընթերցողների լայն շրջանում հետաքրքրություն կառաջացնեն հայ և համաշխարհային գրականության, բնական գիտությունների առանձին գիտակարգերի վերաբերյալ:

ԵՊՀ ԻՄ-ի գրադարանային խորհուրդը նաև պատրաստակամություն է հայտնում պարոն Դանիելյանի հետ շարունակելու համագործակցությունը համատեղ միջոցառումների, քննարկումների շրջանակում:

2018թ. օգոստոսի 18-ին Իջևանի Քանդակների այգում «Քմյունիթի սենթր ֆոր դիվելոփմենթ» տարածաշրջանային համագործակցության ՀԿ թիմը Իջևանի զբաղվածության տարածքային կենտրոնի աջակցությամբ, Եվրոպական միության և ՀՀ Կառավարության կողմից համաֆինանսավորվող «Տավուշի մարզի ինտեգրված և հավասարակշռված տնտեսական զարգացում» ծրագրի շրջանակներում կազմակերպել էր աշխատանքի տոնավաճառ»:

Տոնավաճառում իրենց տաղավարներով ընդգրկված էին Տավուշի մարզի մոտ 50 կազմակերպություններ և անհատներ:

Առանձին տաղավարով ներկայացված էին և ԵՊՀ Իջևանի մասնաճյուղի կիրառական արվեստի ֆակուլտետի դասախոսներ Անուշ և Դոնարա Չիբուխչյանների, շրջանավարտների, մասնավորապես՝ Վարդան Եգանյանի, Անգին Մամյանի աշխատանքները:

Տոնավաճառի բացմանը ներկա էին Տավուշի մարզպետ Վահե Ղալումյանը, ՀՀ տարածքային կառավարման և զարգացման նախարարության տեղական ինքնակառավարման քաղաքականության վարչության պետ Աշոտ Գիլոյանը, Իջևանի քաղաքապետ Վարդան Ղալումյանը:   

Իր ողջույնի խոսքում հասարակական կազմակերպության նախագահ Հասմիկ Ազիբեկյանը շնորհակալություն հայտնեց գործընկեր կազմակերպություններին տոնավաճառի կայացմանն աջակցելու համար, նաև բոլոր նրանց, ովքեր հետաքրքրված են տոնավաճառով և առաջարկեց գնումներ կատարել ու աջակցել տեղական արտադրողին:

Մասնակից կազմակերպությունները և անհատները ներկայացրին իրենց արտադրանքը, թափուր աշխատատեղերը, վերցրեցին կոնտակտներ և CV-ներ, պատախանեցին տոնավաճառի այցելուների հարցերին:

2018թ. օգոստոսի 11-ին Արցախի պետական համալսարանի մի խումբ ուսանողներ ժամանեցին ԵՊՀ Իջևանի մասնաճյուղ:

Մեկ ամիս առաջ Արցախի պետական համալսարանը (ԱրՊՀ) կազմակերպել էր «ԱրՊՀ-2018» միջազգային ուսանողական ճամբար, որին մասնակցել էին նաև ԵՊՀ Իջևանի մասնաճյուղի երեք ուսանողներ:

Մեր բուհի և ԱրՊՀ ուսանողների ծանոթությունը մի քանի օրում վերածվեց շատ ջերմ մտերմության, և ճամբարի մասնակիցներն առաջարկեցին բուհի ղեկավարությանը ԱրՊՀ մի խումբ ուսանողների համար կազմակերպել ճանաչողական այց Իջևան՝ պատրաստակամություն հայտնելով նրանց հյուրընկալել իրենց բնակարաններում:

Մի քանի օրվա ընթացքում ԵՊՀ ԻՄ ՈԻԽ-ի մի խումբ ակտիվ անդամներ կազմեցին միջոցառումների ծրագիր, դիմեցին մարզի մի շարք կազմակերպությունների և կյանքի կոչեցին «ԱրՊՀ ուսանողների ճանաչողական այց Իջևան» ծրագիրը:

Հյուրերին դիմավորեցին ԵՊՀ ԻՄ-ի տնօրենի օգնական Արման Եգանյանը, դասախոս Սլավիկ Ալավերդյանը և ուսանողական խորհրդի ակտիվ անդամները: Նրանք հյուրերին պատմեցին մասնաճյուղի պատմությունը, ձեռքբերումները, էքսկուրսիա կազմակերպեցին կրթօջախի տարածքում, այնուհետև տեղավորեցին իրենց բնակարաններում:

3 օրվա ընթացքում հյուրերի հետ մշտապես գտնվում և բոլոր կազմակերպչական հարցերով զբաղվում էին ՈՒԽ-ի նախագահ Տիգրան Չիբուխչյանը, ՈՒԳԸ նախագահ Հրանտ Ղարագյոզյանը, Արցախի ճամբարի մասնակիցներ Շիրակ Գասպարյանը, Գերասիմ Ալավերդյանը, Արգիշտի Մարգարյանը, ՈՒԽ-ի նախագահության անդամներ Լուիզա Մադաթյանը, Լիանա Ներսիսյանը, Մարգարիտ Թամրազյանը, ՈՒԽ-ի ակտիվ անդամներ Սաթենիկ Հարությունյանը, Մերի Պետրոսյանը, Իրինա Փիրումյանը, Մարիամ Մելիքսեթյանը, Ջավահիր Մնացականյանը, Նվարդ Մելիքսեթյանը և Լավրենտ Նազարյանը:

Օգոստոսի 12-ի առավոտյան տեղի ունեցավ հանդիպում ԵՊՀ ԻՄ-ի տնօրենի ժամանակավոր պաշտոնակատար Արտակ Ցուցուլյանի հետ, որի ժամանակ հյուրերը ներկայացրին ԱրՊՀ-ի կառուցվածքը և գործունեությունը, քննարկվեցին երկու բուհերի և նրանց ուսանողական կառույցների համագործակցության հնարավորությունները:

Այնուհետև նրանք ակտիվորեն մասնակցեցին Երիտասարդության միջազգային օրվա միջոցառումների ծրագրին:

Արցախցի երիտասարդները ԵՊՀ ԻՄ-ի ուսանողների հետ մասնակցեցին Բադմինթոնի ցուցադրական մրցաշարին՝ մրցելով միմյանց և պրոֆեսիոնալ մարզիկների հետ։

Հյուրերը մասնակցեցին ԵՊՀ ԻՄ-ի տարածքում կազմակերպված միջոցառումներին, ծանոթացան Հայաստանում «Էրազմուս +» ծրագրի միջազգային բարձրագույն կրթական և երիտասարդական շարժունակության հատվածներին, «Մշակութային խճանկարին», «Հեղափոխության դեմքերն ու դեպքերը» բացօթյա ցուցահանդեսին, թատերականացված բացօթյա ակցիա-վիկտորինային, որի ժամանակ արցախցի ուսանողներից մեկը պարգևատրվեց խորհրդանշական նվերով։

Օրվա վերջում կայացած տոնական համերգից հետո խումբը խնջույք ունեցավ Իջևանի «ԴՈԿ» հյուրանոց-ռեստորանում:

Հաջորդ օրը միջհամալսարանական ակտիվ խումբը ուղևորվեց Ենոքավանի հարևանությամբ գտնվող «Լաստիվեր-Անապատ» հանգստյան գոտի: Ուսանողները անտառի միջով հետիոտն քայլեցին ավելի քան 3 կմ, տեսան գեղատեսիլ ջրվեժը և հանգստյան գոտու հետաքրքիր փայտե շինությունները: Կազմակերպվեց ինտելեկտուալ խաղ-մրցույթ, որի հաղթողները ստացան պատվոգրեր:

Օրվա վերջում ԵՊՀ ԻՄ-ի դահլիճում կազմակերպվեց երաժշտական-պարային երեկույթ:

Օգոստոսի 14-ին խմբին միացան ԱրՊՀ ևս 6 ուսանողներ, ովքեր հանգստանում էին Դիլիջանում: Բոլորը նախ այցելեցին Իջևանի դենդրոպարկ, ծանոթացան աշխարհի տարբեր երկրներից բերված յուրօրինակ ծառերին և թփերին, ապա այցելեցին Իջևանի պատմաերկրագիտական թանգարան, որտեղ ծանոթացան պատմական արժեք ներկայացնող ցուցանմուշներին, Իջևանի և Տավուշի մարզի տարածքից հայտնաբերված գտածոներին, մշակույթի նմուշներին, տարազին:

Այնուհետև խումբն այցելեց Մակարավանք, ծանոթացավ վանական համալիրի պատմությանը և ճարտարապետությանը, որից հետո ճաշեց Աչաջուր գյուղի հուշաղբյուրներից մեկում:

Արցախ մեկնելուց առաջ հյուրերին ԵՊՀ ԻՄ-ի կողմից գրքեր նվիրեց գրադարանի վարիչ Վլադիմիր Պողոսյանը:

Հյուրերը շատ էին տպավորվել ԵՊՀ ԻՄ-ի ընդունելությամբ, կազմակերպված միջոցառումներով, Իջևանի բնությամբ և մշակութային կոթողներով, որոնք նման են Արցախի բնությանը և կոթողներին: Երկու բուհերի ուսանողները խոստացան, որ կշարունակեն համագործակցությունը, և փոխադարձ այցերը կլինեն հաճախակի:

Ծրագրի իրականացնմանը մեծապես աջակցել են Իջևանի քաղաքապետարանը, Աչաջրի գյուղապետարանը, Իջևանի գինու, կոնյակի գործարանը, Հայաստանի էլեկտրական ցանցերի «Աղստև» մասնաճյուղը, «Արդշինբանկ» ՓԲԸ Իջևանի մասնաճյուղը, «Լաստիվեր-Անապատ» հանգստյան գոտին:

Օգոստոսի 12-ին ՀՀ 2018թ. երիտասարդական մայրաքաղաք Իջևանում մեծ շուքով նշվեց Երիտասարդության միջազգային օրը:

Ծրագրի բացումը տեղի ունեցավ Իջևանի Քանդակների զբոսայգում։ Ներկա էին ՀՀ կրթության և գիտության նախարար Արայիկ Հարությունյանը, Սպորտի և երիտասարդության հարցերի նախարարի տեղակալ Քրիստինե Ասատրյանը, Տարածքային կառավարման և զարգացման նախարարի տեղակալ Դավիթ Գևորգյանը, Տավուշի մարզպետ Վահե Ղալումյանը, Իջևանի քաղաքապետ Վարդան Ղալումյանը, Հայաստանում ՄԱԿ-ի մշտական համակարգող, Բնակչության հիմնադրամի ներկայացուցիչ Շոմբի Շարփը, համալսարանականներ՝ ԵՊՀ Իջևանի մասնաճյուղի տնօրենի պաշտոնակատար Արտակ Ցուցուլյանի գլխավորությամբ, այլ պաշտոնյաներ, կազմակերպությունների ղեկավարներ, իջևանաբնակ և Երևանից, ՀՀ մարզերից, Արցախից ժամանած հարյուրավոր երիտասարդներ:

Բացման ելույթներում պաշտոնյաները շնորհավորեցին երիտասարդներին և տարվա երիտասարդական մայրաքաղաք Իջևանին, կարևորեցին հասարակությունում երիտասարդության դերը և նշանակությունը, ներկայացրին օրվա խորհուրդը, բերեցին հաջողությունների հասած երիտասարդենրի օրինակներ, կոչ արեցին մասնակցել ծրագրով նախատեսված տարբեր միջոցառումներին։

Քանդակների զբոսայգուն կից տարածքում տեղի ունեցավ բադմինթոնի ցուցադրական մրցաշար, որին կարող էին մասնակցել նաև ցանկություն ունեցող երիտասարդները և մրցել պրոֆեսիոնալ մարզիկների հետ կամ էլ հետևել նրանց ցուցադրական ելույթներին։

Իջևանի գորգագործական կոմբինատի պատին Սպորտի և երիտասարդության հարցերի նախարարության և «Երիտասարդական միջոցառումների իրականացման կենտրոն» ՊՈԱԿ-ի ջանքերով կազմակերպվեց «ՍթրիթԱրթ»՝ հավասար հնարավորությունների, խաղաղության, հեղափոխության, բնապահպանության թեմաներով։ Նկարիչների մեջ էին ԵՊՀ ԻՄ-ի ուսանողներ Գուրգեն Դալյանը և Իրինա Փիրումյանը:

Տավուշի մարզպետարանի դահլիճում տեղի ունեցավ կառավարության ներկայացուցիչների մասնակցությամբ «Երիտասարդների հին խնդիրների լուծման նոր տեսլականը» թեմայով հանդիպում-քննարկում, որն իրականացրեց «Հոդված 3» ակումբը։ 

Այնուհետև նույն դահլիճում կայացավ «Երիտասարդական հնարավորություններ» խորագրով կոնֆերանս, որը կազմակերպել էին ՄԱԿ-ի Բնակչության հիմնադրամը, Իջևանի «ԻնֆոՏուն»-ը և Եվրասիա համագործակցություն հիմնադրամի հյուսիսային մասնաճյուղը։

Հայաստանի երիտասարդական հիմնադրամի Տավուշի մարզային կենտրոնում տեղի ունեցավ «Հաջողության իմ բանաձևը» թեմայով քննարկում, որի ժամանակ որոշակի փորձառություն ունեցող երիտասարդ աշխատողները իրենց փորձը փոխանցեցին ներկա գտնվող երիտասարդներին:

Բնականաբար, միջոցառումներ տեղի ունեցան նաև ԵՊՀ Իջևանի մասնաճյուղում:

«Յելլ» էքստրիմ պարկի հիմնադիր Տիգրան Չիբուխչյանը ներկայացրեց իր բիզնեսի հաջողության պատմությունը:

Միավորված ազգերի զարգացման ծրագրի աշխատակից Սիրանուշ Մանթարլյանը ներկաներին ծանոթացրեց «Ինտեգրված Գյուղական զբոսաշրջության զարգացում» ծրագրի կողմից Տավուշի մարզում իրականացվող զբոսաշրջային ծրագրերին:

Հայաստանում «Էրազմուս +» ծրագրի ազգային գրասենյակի տնօրեն Լանա Կառլովան ներկայացրեց ծրագրի միջազգային բարձրագույն կրթական հատվածը, բուհերի համագործակցության կարգը, ուսանողների և դասախոսների փոխանակման ծրագրերը:

«Հայ առաջադեմ երիտասարդություն» ՀԿ փոխնախագահ Գրիգոր Երիցյանն էլ ներկայացրեց «Էրազմուս+» ծրագրի երիտասարդական շարժունակության հատվածը:

Յուրօրինակ միջոցառում էր «Հայ առաջադեմ երիտասարդություն» ՀԿ-ի կողմից կազմակերպված «Մշակութային խճանկարը», որի ընթացքում Գերմանիայից, Շվեդիայից, Բելգիայից, Մոլդովայից, Ֆրանսիայից, Էստոնիայից, Վրաստանից և Ուկրաինայից 30 երիտասարդներ ներկայացրին իրենց երկիրը, մշակույթը, խոհանոցը և սովորույթները։

Միջոցառման ընքացքում ԵՊՀ ԻՄ-ի կիրառական արվեստի ֆակուլտետի դեկորատիվ-կիրառական արվեստի և դիզայնի ամբիոնի ասիստենտներ Անուշ Չիբուխչյանը և Դոնարա Չիբուխչյանը անցկացրին ապակենկարչության (վիտրաժ) վարպետության դաս՝ զուգահեռաբար ներկայացնելով նաև ֆակուլտետի ուսանողների և դասախոսների աշխատանքները: Միջոցառման ընթացքում ԵՊՀ ԻՄ այցելեց ՀՀ կրթության և գիտության նախարար Արայիկ Հարությունյանը, հանդիպում ունեցավ բուհի ղեկավարության հետ:

Քանդակների զբոսայգում երեկոյան մեկնարկեց «Հոդված 3» ակումբի կողմից իրականացվող «Հեղափոխության դեմքերն ու դեպքերը» բացօթյա ցուցահանդեսը, և անցկացվեց ՄԱԿ-ի կայուն զարգացման 17 նպատակներին նվիրված թատերականացված բացօթյա ակցիա-վիկտորինա, որի հաղթողները պարգևատրվեցին խորհրդանշական նվերներով։

Օրվա վերջում տեղի ունեցավ համերգ, որի ժամանակ գեղեցիկ համարներով հանդես եկան Սրբուկը և «Տիեզերք Բենդը»։