2018թ. օգոստոսի 10-ին ԵՊՀ ԻՄ-ի դահլիճում կայացավ «Կյանքի հմտություններ» խորագրով 8 ժամ տևողությամբ դասընթացը, որն իրականացվեց «Կոկա-Կոլա Հելլենիկ Բոթլինգ Քամփնի Արմենիա» ընկերության «ԵՐԻՏԱՍԱՐԴՆԵՐԻ ԶԱՐԳԱՑՈՒՄ» 2018-2020թթ. եռամյա ծրագրի շրջանակներում՝ IAB Բիզնեսի Միջազգային Ակադեմիայի կողմից:

Դասընթացին մասնակցեցին Տավուշի մարզի մոտ 80 երիտասարդներ, այդ թվում՝ ԵՊՀ Իջևանի մասնաճյուղի մի քանի տասնյակ ուսանողներ և շրջանավարտներ:

Բացման խոսքով հանդես եկավ ԵՊՀ ԻՄ-ի տնօրենի ժամանակավոր պաշտոնակատար Արտակ Ցուցուլյանը, ով ողջունեց մասնակիցներին, շնորհակալություն հայտնեց կազմակերպիչներին, կոչ արեց լինել ակտիվ և յուրացնել այն հմտությունները, որոնք կնպաստեն իրենց առաջընթացին:

IAB Բիզնեսի Միջազգային Ակադեմիայի տնօրեն Թամարա Հովհաննիսյանը ներկայացրեց ծրագրի կառուցվածքը, դասընթացավարին և մենթորներին:

Դասընթացում ներառված թեմաներն էին.

• Ինքնաճանաչում և ինքնազարգացում,
• Մասնագիտական կապերի ստեղծում և ամրապնդում,
• Հետադարձ կապի հմտություններ,
• Ես՝ որպես հաղորդակցվող:

Դասընթացավար Հայարփի Սահակյանը յուրաքանչյուր թեմայի վերաբերյալ ներկայացրեց տեսական նյութ, այնուհետև մասնակիցներն ուղղեցին իրենց հարցերը, լրացրին թեստեր, կատարեցին խմբային աշխատանքներ: Դասընթացի մասնակիցները հանդես եկան ելույթներով և դերային խաղերով, որոնց ժամանակ նրանց օգնում էին մենթորները, ովքեր հիմնականում Տավուշի մարզի գործատուներ և տարբեր կազմակերպությունների ղեկավարներ էին:

Երիտասարդները սովորեցին, թե ինչպես վերլուծել սեփական հնարավորությունները, ճիշտ ձևակերպել նպատակ և դրան հասնելու ճանապարհը, ինչին ուշադրություն դարձնել CV գրելու, գործատուների հետ նամակագրութան և աշխատանքի հարցազրույցի ժամանակ, ունենալ հաշիվ LinkedIn սոցիալական ցանցում և այլ հմտություններ:

Գործատուները փոխանցեցին իրենց փորձը, նաև աշխատանքի առաջարկներ կատարեցին մասնակիցներից մի քանիսին, ինչը խոսում է ծրագրի արդյունավետության և ազդեցության մասին:

Վերջում Թամարա Հովհաննիսյանը շնորհակալություն հայտնեց մասնակիցներին և մենթորներին, դասընթացի կազմակերպմանը և մասնակիցների հավաքագրմանը աջակցած անձանց և կազմակերպություններին, մասնավորապես ԵՊՀ Իջևանի մասնաճյուղին, և կոչ արեց ակտիվորեն տարածել ծրագրի վերաբերյալ հայատարարությունը՝ նորանոր երիտասարդներ ներգրավելու համար:

Հաջորդ դասընթացին մասնակցելու համար կարող եք լրացնել այս հայտը՝ https://goo.gl/oRf48T, իսկ եթե ցանկանում եք գրանցվել որպես մենթոր, անհրաժեշտ է լրացնել հետևյալ հայտը՝ https://goo.gl/qE9X3W:

2018թ. օգոստոսի 4-ին ԵՊՀ Իջևանի մասնաճյուղի տարածքում գործող Տավուշի տուրիզմի զարգացման և հետազոտության կենտրոնում տեղի ունեցավ հանդիպում «Երիտասարդության հայ-ռուսական միություն» հասարակական կազմակերպության  ներկայացուցիչների և Տավուշի մարզի երիտասարդների միջև:

Հանդիպմանը ներկա էին միության համանախագահ Ռաֆայել Պողոսյանը, միության անդամներ, Տավուշի մարզպետի տեղակալ Տիգրան Թամրազյանը, մարզպետարանի աշխատակիցներ, ԵՊՀ Իջևանի մասնաճյուղի տնօրենի ժամանակավոր պաշտոնակատար Արտակ Ցուցուլյանը, բուհի աշխատակիցներ, ռուսաց լեզվի և գրականության դասախոսներ, ուսանողներ, ՀԵՀ Տավուշի մարզային կենտրոնի, Տավուշի մարզում գործող մի շարք հասարակական կազմակերպությունների ղեկավարներ և ակտիվ անդամներ, աշակերտներ:

Հանդիպման սկզբում Ռաֆայել Պողոսյանը պրեզենտացիայի և տեսանյութերի միջոցով ներկայացրեցԵրիտասարդության հայ-ռուսական միության ստեղծման պատմությունը, նպատակը և ծավալած գործունեությունը: Նանշեց, որ կազմակերպությունը համագործակցում է ՌԴ երկու տասնյակ երիտասարդական, պետական և հասարակականկազմակերպությունների հետ, համախմբում և կապեր է ստեղծում հատկապես ՀՀ մարզերի և ՌԴ շրջաններիերիտասարդների միջև, նպաստում հայ երիտասարդների մասնակցությանը տարբեր միջազգային ծրագրերի:

Ընդգծվեց, որ միությունը մասնավորապես կազմակերպում է Հայրենական մեծ պատերազմին և տարբեր հիշարժան տարեթվերին նվիրված մեծամաշստաբ միջոցառումներ, հայ-ռուսական երիտասարդական համաժողովներ:

Այնուհետև Ռ.Պողոսյանը, պատասխանելով ներկաների հարցերին, նշեց, որ կազմակերպությունըաշխատում է ամբողջովին հասարակական հիմունքներով, պարբերաբար ներգրավում է նոր կամավորներ, նպաստում նրանցզարգացմանը, և այժմ կազմակերպության բազմաթիվ անդամներ աշխատում են տարբեր պատասխանատու պաշտոններում:

Երիտասարդության հայ-ռուսական միության համանախագահը նաև նշեց, որ Տավուշի մարզում պլանավորվում է կազմակերպել մեծ միջոցառումներ ՌԴ մի շարքմարզերի երիտասարդական կազմակերպությունների հետ: Շուտով մարզում կստեղծվի նաև միության մասնաճյուղ կամներկայացուցչություն, որի միջոցով Տավուշի երիտասարդներն անմիջապես հնարավորություն կունենան տեղեկանալտարբեր միջազգային ծրագրերի մասին և կապ հաստատել արտերկրի երիտասարդների հետ:

Ա. Վ. Ցուցուլյանն ընդգծեց, որ ԵՊՀ Իջևանի մասնաճյուղի ուսանողները պետք է ներգրավված լինեն Տավուշիմարզում տեղի ունեցող երիտասարդական ծրագրերում և կոչ արեց ակտիվ համագործակցել միության հետ:

Վերջում ներկաները շնորհակալություն հայտնեցին միության ներկայացուցիչներին՝ Տավուշի մարզը ուշադրության կենտրոնում պահելու համար, մաղթեցին արդյունավետ համագործակցություն:

2018թ. հուլիսի 30-ին տեղի ունեցավ «Հայ-ֆրանսիական բարեկամություն և փոխանակում» միության ներկայացուցիչների հերթական այցը ԵՊՀ Իջևանի մասնաճյուղ:

Բուհում հյուրընկալվել էին միության անդամներ Մարտին և Դոմինիկ Պետիժանները, հանդիպմանը ներկա էին ԵՊՀ ԻՄ-ի տնօրենի ԺՊ Արտակ Ցուցուլյանը, Ֆրանսերեն լեզվի և գրականության ամբիոնի պատասխանատու Աիդա Մարդանյանը, մասնաճյուղի մի խումբ աշխատակիցներ և ուսանողներ:

Մասնաճյուղի և միության համագործակցությունը բավականին երկար պատմություն ունի: Միության նախագահ տիկին Պոլետ Կուտանի արյան կանչը նրան բերել է Հայաստան՝ Իջևան, և այդպիսով հիմք է դրվել միության ու ԵՊՀ ԻՄ-ի ֆրանսերեն լեզվի և գրականության ամբիոնի դասախոսների, տվյալ մասնագիտության ուսանողների համագործակցությանը:

Ըստ համաձայնագրի՝ յուրաքանչյուր ուսումնական տարում վճարովի համակարգում սովորող ուսանողներին տրվում է կրթաթոշակ, որը նպատակ ունի զարգացնելու Ֆրանկոֆոնիան և աջակցելու սահմանամերձ մարզում ապրող ընտանիքներին:

2017-2018 ուստարում «Ֆրանսերեն լեզու և գրականություն» մասնագիտության չորրորդ կուրսի վճարովի համակարգում սովորող ուսանողուհիները ներգրավվեցին «Տավուշի տուրիզմի զարգացման և հետազոտության կենտրոնի» աշխատանքներում և Անժելա Վանեսյանի անվան ֆրանկոֆոնիայի կենտրոնի գործունեության մեջ: Ծավալելով ակտիվ գործունեություն Իջևանում և Տավուշի մարզում՝ ուսանողուհիներն իրենց ներդրումն ունեցան մարզի զբոսաշրջային զարգացման ծրագրում, մասնավորապես կենտրոնի աշխատակից Սյուզաննա Պետրոսյանի օգնությամբ պատրաստեցին Տավուշի մարզի մասին զբոսաշրջային բուկլետ աշնանը կայանալիք Ֆրանկոֆոնիայի գագաթնաժողովի համար:

Կրթաթոշակների առաջին փոխանցումը կատարվեց մարտ ամսվա վերջին, իսկ մյուս մասը հուլիսի 30-ին: Մասնաճյուղի ուսանողներին հանդիսավոր կերպով կրթաթոշակները հանձնեցին միության անդամներ Մարտին և Դոմինիկ Պետիժանները:

Աիդա Մարդանյանը, ողջունելով ֆրանսիացի հյուրերին, ներկայացրեց «Հայ-Ֆրանսիական բարեկամություն և փոխանակում» միության և ԵՊՀ Իջևանի մասնաճյուղի համագործակցության պատմությունը և տիկին Պոլետ Կուտանի հայրենանվեր բարեգործությունները:

Կրթաթոշակ հատկացվեց «Ֆրանսերեն լեզու և գրականություն» մասնագիտության 2018թ. շրջանավարտներ Անի և Արաքս Ամիրաղյաններին, Վարդուհի Առաքելյանին, Լիլիա Ավագյանին, Դիանա Մաիլյանին, Սոնա Ենգիբարյանին, Անի Չոբանյանին, Լուսինե Սահակյանին և Կարոլինա-Մարիամ Ասատրյանին:

Կրթաթոշակներից բացի՝ ֆրանսիացի հյուրերը ներկաներին հանձնեցին նաև նվերներ:

Միջոցառմանը ներկա էր նաև Սյուզաննա Պետրոսյանին հյուրընկակած ֆրանսուհի Էդիթ Պաժոն, ով հանդես եկավ երաժշտական համարներով:

Պարոն Ա. Վ. Ցուցուլյանը ողջունեց միության և ԵՊՀ ԻՄ-ի համագործակցությունը, նշեց, որ վերջինս մեծապես նպաստում է տարածաշրջանում ֆրանսերենի տարածմանը և զարգացմանը:

Տնօրենի պաշտոնակատարն իր խոսքում ընդգծեց, որ հարուստ է ոչ թե նա, ով շատ ունի, այլ նա, ով պատրաստ է կիսվել իր ունեցածով, շնորհակալություն հայտնեց միությանը՝ մեր ուսանողներին ֆինանսապես աջակցելու և խրախուսելու համար:

Վերջում նա հյուրերին հանձնեց շնորհակալագիր:

2018թ. հուլիսի 6-21-ին Արցախի Հանրապետության Ասկերանի շրջանի Պատարա գյուղում տեղի ունեցավ Արցախի պետական համալսարանի նախաձեռնած և բարերար Ֆիլիպ Էգգերի ֆինանսավորմամբ կազմակերպված «ԱրՊՀ-2018» ամառային ուսանողական միջազգային ճամբարը, որին մասնակցում էին ԱրՊՀ, ՀՀ և արտերկրի բուհերից 70-ից ավելի ուսանողներ:

Ճամբարն ընթացավ 5-ական օր տևողությամբ՝ 3 փուլերով: 3-րդ փուլին մասնակցեցին նաև ԵՊՀ Իջևանի մասնաճյուղի ուսանողներ Գերասիմ Ալավերդյանը («ԻԿՄ» 2-րդ կուրս), Արգիշտի Մարգարյանը («ԻԿՄ» 2-րդ կուրս) և Շիրակ Գասպարյանը («Պատմություն» 2-րդ կուրս):

Ճամբարի բացման հանդիսավոր արարողությանը ներկա էին Արցախի Հանրապետության ԿԳՍ նախարար Նարինե Աղաբալյանը, ԱԳ նախարար Մասիս Մայիլյանը, ՄԵՀԶ նախարար Լեռնիկ Հովհաննիսյանը, ԱրՊՀ ղեկավար կազմը:

Ողջունելով ներկաներին` ԱրՊՀ ռեկտոր Մանուշ Մինասյանը շնորհակալություն հայտնեց ծրագրի իրականացմանը աջակցած անձանց և կազմակերպություններին` նշելով, որ ճամբարի կազմակերպումը ոչ միայն ուսանողների, այլև ԱրՊՀ ղեկավարության երազանքն էր, որն այս տարի հաջողվեց իրականություն դարձնել:

«Իմ բուհը» խորագրով ելույթներով հանդես եկան ճամբարի մասնակից բուհերը ներկայացնող ուսանողները` հակիրճ պատմելով իրենց բուհերի ուսանողական գործունեության մասին:

Ուսանողական միջազգային ամառային ճամբարի մասնակիցները, արցախյան բնության անձեռակերտ գեղեցկությունը վայելելուց բացի, հնարավորություն ունեցան մասնակցելու պաշտոնական հանդիպումների, արցախյան պատերազմի, անվտանգության, բարոյագիտություն և տրամաբանության, համացանցի և այլ թեմաներով դասախոսությունների, բանավեճերի ու քննարկումների, Արցախի պատմամշակութային կոթողներ ճանաչողական արշավների և էքսկուրսիաների, խարույկի շուրջ անցկացվող երեկոների, մարզական և մշակութային ծրագրերի, երիտասարդական ժամանցային այլ միջոցառումների։ Եղան բանախոսներ նաև արտերկրից, ովքեր հանդես եկան հետաքրքիր դասախոսություններով։

Հուլիսի 20-ին կայացավ ճամբարի փակման հանդիսավոր արարողությունը, որին ներկա էին ԱՀ ԱԺ նախագահ Աշոտ Ղուլյանը և ԱրՊՀ ղեկավարությունը:

Կարևորելով նման ճամբարների կազմակերպումը` ԱԺ նախագահն այսպես դիմեց ներկաներին. «Ուսանողական տարիները լավագույն տարիներն են: Մեր օրերում ժամանակը, մտածողությունը և տեղեկատվությունն ամենապահանջվածն են: Ժամանակը երիտասարդների համար միշտ կա, մտածողությունը կամ ինտելեկտը այս ժամանակահատվածում է, որ պետք է ձեռք բերեք, տեղեկատվությունն էլ այսօր հասանելի է բոլորիդ: Մնում է, որ այս ամենը ճիշտ օգտագործեք` մտածելով, որ մենք փոքր երկիր ենք, կարևոր տեղ ենք գրավում տարածաշրջանում, մենք խնդիրներ ունենք լուծելու պետականորեն և ազգովի, որ մենք շարունակում ենք սահման պահել` ազգային ինքնություն պաշտպանելով, որ սահման պահելու առաքելությունը ձեր տարիքի երիտասարդներին է վերապահված: Եվ մարդիկ, որ ամեն օր այդ ծառայությունն են իրականացնում, թիկունքում պետք է զգան ամրություն և հավատարմություն»:

Վերջում ճամբարի մասնակից ուսանողներն արտահայտեցին իրենց տպավորությունները, հանդես եկան ասմունքով, երաժշտական և ազգագրական պարերի կատարումներով:

2018թ. հուլիսի 2-20-ը ԵՊՀ Իջևանի մասնաճյուղում ընթանում են անգլերենի ամառային դասընթացներ, որոնք կազմակերպվել են Դեթրոյթից ժամանած անգլերենի դասավանդողների խմբի ու ԵՊՀ ԻՄ-ի անգլերեն լեզվի և գրականության ամբիոնի համատեղ ջանքերով:

Անգլերենի դասընթացները վարում են Բարբարա Հարությունյանը, Ալիս Արգնյանը և Զաբել Բելյանը, ովքեր նախորդ տարի ևս դասընթացներ են իրականացրել կրթօջախում:

Դասընթացին մասնակցում են ԵՊՀ ԻՄ-ի աշխատակիցներ, ուսանողներ, շրջանավարտներ, Իջևանի և հարակից համայնքների դպրոցների աշակերտներ:

Մասնակիցները, ըստ անգլերենի իմացության մակարդակի, բաշխված են 9 խմբերի՝ յուրաքանչյուր դասախոսի մոտ 3-ական:

Սկսնակները սովորում են անգլերենի հնչյունները ճիշտ արտասանել և այլ տարրական գիտելիքներ:

Ավելի բարձր խմբերում դասընթացն իրականացվում է տարբեր թեմատիկ քննարկումների, անգլերենի դարձվածքների ուսումնասիրության ձևով: