2018թ. փերրվարի 28-ին ԵՊՀ Իջևանի մասնաճյուղում կայացավ Գիտական խորհրդի նիստ՝ ԵՊՀ ԻՄ-ի գիտխորհրդի նախագահ, մասնաճյուղի տնօրեն Ս. Ա. Առաքելյանի նախագահությամբ:

Նիստի ընթացքում քննարկվեցին ԵՊՀ-ում բակալավրի ավարտական աշխատանքի պատրաստման և գնահատման կարգում կատարված լրացումներին, ԵՊՀ ԻՄ-ի կողմից կազմակերպվող գիտաժողովներին դրամական աջակցություն տրամադրելու կարգին, 2017-2018 ուստարվա հեռակա ուսուցման համակարգի երկրորդ կիսամյակի ուսումնական գործընթացի և առաջին կիսամյակի լուծարքային շրջանների նախապատրաստական աշխատանքներին վերաբերող մի շարք հարցեր:

Ամփոփվեց 2017-2018 ուստարվա առկա ուսուցման համակարգի առաջին կիսամյակի քննաշրջանը:

Նիստում հաստատվեցին ԵՊՀ ԻՄ-ի գիտական խորհրդի՝ 2017-2018 ուստարվա երկրորդ կիսամյակի աշխատանքային ժամանակացույցը և մասնաճյուղի՝ 2017-2018 ուստարվա երկրորդ կիսամյակի անվանական կրթաթոշակ ստացող ուսանողների ցանկը:

«Մոնթե Մելքոնյան»  անվանական կրթաթոշակի համար առաջադրվել էր Բնական գիտությունների ֆակուլտետի «Քարտեզագրություն և կադաստրային գործ» մասնագիտության անվճար ուսուցման համակարգի երրորդ կուրսի ուսանողուհի Անգին Հրաչյայի Ծատուրյանի  թեկնածությունը:

«Վազգեն Սարգսյան»  անվանական կրթաթոշակի համար առաջադրվել էր Հումանիտար գիտությունների ֆակուլտետի «Հայոց լեզու և գրականություն» մասնագիտության անվճար ուսուցման համակարգի երկրորդ կուրսի ուսանողուհի Աստղիկ  Արթուրի Ղազարյանի  թեկնածությունը:

«Մխիթար Գոշ»  անվանական կրթաթոշակի համար առաջադրվել էր Հումանիտար գիտությունների ֆակուլտետի «Պատմություն» մասնագիտության անվճար ուսուց­ման համակարգի երրորդ կուրսի ուսանողուհի Վանուհի Սամվելի Գևորգյանի  թեկնածությունը:

«Շառլ Ազնավուր»  անվանական կրթաթոշակի համար առաջադրվել էր Հումանիտար գիտությունների ֆակուլտետի «Անգլերեն լեզու և գրականություն» մասնա­գիտության անվճար ուսուցման համակարգի երրորդ կուրսի ուսանողուհի Էլինա Իշխանի Խաչատրյանի  թեկնածությունը:

«Երկրապահ» անվանական կրթաթոշակի համար առաջադրվել էր Հումանիտար գիտությունների ֆակուլտետի «Անգլերեն լեզու և գրականություն» մասնա­գիտության անվճար ուսուցման համակարգի երրորդ կուրսի ուսանողուհի Լիլիթ Արամի Ֆարմազյանի  թեկնածությունը:

«Սահակ Ձորափորեցի»  անվանական կրթաթոշակի համար առաջադրվել էր Տնտեսագիտության ֆակուլտետի «Սերվիս» մասնագիտության անվճար ուսուցման համա­կարգի երրորդ կուրսի ուսանողուհի Նարինե Վարդանի Մխիթարյանի թեկնածությունը:

Գիտխորհրդի նիստում քննարկված ընթացիկ հարցերից հատկանշական են Պատմության և հասարակագիտության ամբիոնի դոցենտ, պ.գ.թ. Ա.Հովհաննիսյանի «Հայոց եկեղեցին կիլիկյան շրջանում» աշխատությունը հրատարակության երաշխավորելու և Գիտական խորհրդի քարտուղար, Ընդհանուր մաթեմատիկայի և բնագիտության ամբիոնի դոցենտ, ֆ.մ.գ.թ. Մ. Ս. Աթոյանի՝ դոցենտի գիտական կոչում ստանալու համար սահմանված գործընթացին մասնակցելու հարցերը:

2018թ. փետրվարի 24-ին ԵՊՀ Իջևանի մասնաճյուղում կայացավ ուսումնական գործընթացներին վերաբերող կարգերի փոփոխությունների մասին սեմինար-խորհրդատվություն, որը վարում էր ԵՊՀ-ի ՈՒՄՎ ուսումնական գործընթացի վերահսկման բաժնի վարիչ Ա.Սարգսյանը:

Սեմինարին ԵՊՀ-ից մասնակցում էր ԵՊՀ-ի ՏՏԿՀ կենտրոնի տեղեկատվական համակարգերի բաժնի վարիչ Ն.Դանիելյանը, մասնաճյուղի ուսումնամեթոդական վարչության աշխատակիցները, ֆակուլտետների դեկանները, դեկանների տեղակալները, գործավարները:

  Սեմինար-խորհրդատվության նպատակն էր քննարկել Բակալավրի և մագիստրոսի կրթական ծրագրերով ուսումնական գործընթացի կազմակերպման, Բուհերում ուսանողների հեռացման (ազատման) և վերականգնման փոփոխված կարգերը:

Պարոն Սարգսյանն անդրադարձավ Բակալավրի և մագիստրոսի կրթական ծրագրերով ուսումնական գործընթացի կազմակերպման կարգի փոփոխությունների հետ կապված նոր տեղեկագրերի լրացման ձևերին:

Քննարկվեցին նաև ուսանողներին մանկավարժի լրացուցիչ որակավորում շնորհելու հետ կապված դասընթացների կազմակերպման խնդիրները, ինչպես և 2017-18 ուսումնական տարվա II կիսամյակից ուսանողների՝ մինչև 12 կրեդիտ ակադեմիական պարտքերի վերահանձնման գործընթացին վերաբերող դիմումները ԵՊՀ-ի SuperVision ծրագրով ամրագրելու և միաժամանակ հրամանագրելու հարցերը:

2018թ. փետրվարի 23-ին  ԵՊՀ Իջևանի մասնաճյուղի  բնական գիտությունների ֆակուլտետի «ԻԿՄ»  մասնագիտության 1-ին կուրսում տեղի ունեցավ մայրենի լեզվի միջազգային օրվան (փետրվարի 21) նվիրված բաց դաս, որը նախաձեռնել էր  Հայոց լեզվի և գրականության ամբիոնի ասիստենտ Ալիսա Հասանյանը՝ նույն կուրսի ուսանողուհի Լիանա Ներսիսյանի պատասխանատվությամբ:

Ուսանողները հանդես եկան հայոց լեզվին նվիրված բանաստեղծություններով, հայ և այլազգի մեծերի ասույթներով ու ստեղծագործական շարադրություններով՝ հաստատելով այն հիմնական գաղափարը, որ մայրենի լեզուն մեր «ազգային գոյության ու էության ամենախոշոր փաստն է», «մեր ժառանգության մեծագույն գանձը»:

Այնուհետև ներկայացվեց  փետրվարի 21-ը որպես Մայրենի լեզվի միջազգային օր ճանաչելու պատմությունը: Մասնավորապես նշվեց, որ 1947 թվականին, երբ անգլիացիները վերջապես հեռանում են Հնդկաստանից, կազմավորվում է Պակիստան պետությունը։ Այն կազմված էր երկու խոշոր տարածաշրջաններից, որոնք իրարից կտրուկ տարբերվում էին մշակույթով և լեզվով. արևմտյան Պակիստանում իշխում էր ուրդու լեզուն, իսկ արևելյանում՝ բենգալերենը։ Չնայած բենգալերենը միլիոնավոր մարդկանց մայրենի լեզուն էր, սակայն 1948 թվականին Պակիստանի կառավարությունն ամբողջ երկրի համար պետական լեզու է հռչակում ուրդուն։ Կառավարության որոշումը երկրի արեւելյան մասի բնակչության մեծ մասը դժգոհությամբ է ընդունում, բողոքի ցույցեր են տեղի ունենում։ Կառավարությունը ոչ միայն հաշվի չի նստում արևելյան տարածաշրջանի բնակիչների պահանջների հետ, այլև ճնշում է բենգալերենի պաշտպանությանն ուղղված ցույցերը։

1952 թվականին Դաքքա քաղաքում կայացած ուսանողական ցույցը ճնշելիս մի քանի մարդ զոհվում է՝ հանուն իրենց մայրենի լեզվի իրավունքի պաշտպանության: Այս ողբերգական դեպքերի հետևանքով բողոքի զանգվածային ցույցեր են ծայր առնում։ Հակամարտության ընթացքում 1956 թվականին բենգալերենը, ի վերջո, պետական լեզվի կարգավիճակ է ստանում։ Մայրենի լեզվի իրավունքների համար մղվող պայքարը նպաստեց բենգալցիների ազգային ինքնագիտակցության աճին։ Ազգային-ազատագրական պատերազմից հետո Արևելյան Պակիստանն առանձնացավ, և 1971 թվականին առաջացավ նոր պետություն՝ Բանգլադեշը։

Բանգլադեշում փետրվարի 21-ը նշվում է որպես ազգային տոն՝ Մայրենի լեզվի օր, իսկ մայրաքաղաք Դաքքայում զոհված ուսանողների հիշատակին կանգնեցված է հուշարձան։

Բուռն իրադարձությունների հիշատակին 1999 թվականի նոյեմբերին ՅՈՒՆԵՍԿՕ-ն փետրվարի 21-ը հռչակում է Մայրենի լեզվի միջազգային օր։

Բաց դասի վերջում  ելույթ ունեցավ  Ալիսա Հասանյանը՝ ևս մեկ անգամ կարևորելով մայրենի լեզվի դերն ու նշանակությունը, կոչ անելով սրբությամբ պահել ու պահպանել այն:

2018թ. փետրվարի 23-ին ԵՊՀ ԻՄ-ի հումանիտար գիտությունների ֆակուլտետում կայացավ «Անգլերենի բառագիտության որոշ դրույթներ» թեմայով դաս-միջոցառում, որը կազմակերպել էր Անգլերեն լեզվի և գրականության ամբիոնը՝ ի դեմս ամբիոնի վարիչ բ.գ.թ., դոցենտ Ք. Հարությունյանի:

Ներկա էին պրոֆեսորադասախոսական անձնակազմի ներկայացուցիչներ, «ԱԼԳ» և «ՖԼԳ» մասնագիտությունների ուսանողներ:

Միջոցառմանը մասնակցում էին «Անգլերեն լեզու և գրականութուն» մասնագիտության երրորդ կուրսի ուսանողները:

Դաս-միջոցառման ընթացքում ներկայացվեցին անգլերենի բառագիտությանը վերաբերող մի շարք խնդիրներ և հարցեր, մասնավորապես՝ հոմանիշների, հականիշների, համանունների և իմաստաբանական դաշտերի համակարգերը:

Ընդգծվեց բառագիտության դերը լեզվաբանության մեջ, ներկայացվեցին բազմիմաստության առանձնահատկությունները անգլերենում:

Ուսանողները հանդես եկան անգլերենի բառագիտության վերաբերյալ զեկուցումներով՝ զուգահեռներ անցկացնելով և համեմատելով հայերենի հետ:

Զեկուցումների ներկայացմանը հետևեց դասախոսների և ուսանողների մասնակցությամբ ակտիվ  քննարկում: