2017թ. մայիսի 22-ից հունիսի 28-ը ԵՊՀ Իջևանի մասնաճյուղում կայացավ 2016-2017 ուստարվա II կիսամյակի առկա ուսուցման քննաշրջանը:

Ամփոփելով քննությունների արդյունքները՝ ԵՊՀ Իջևանի մասնաճյուղի ուսումնամեթոդական վարչության պետ Ա.Դավթյանը հաստատեց, որ քննաշրջանն անցկացվել է սահմանված կարգով, ըստ 2016-2017 ուստարվա երկրորդ կիսամյակի քննաշրջանի ժամանակացույցների, ուսանողներն ու դասախոսները  քննություններին մոտեցել են ամենայն պատասխանատվությամբ, խախտումներ չեն արձանագրվել:

Յուրաքանչյուր քննական գործընթացից հետո, որպես կանոն, դասախոսը ուսանողների հետ իրականացնում է քննարկում:

Քննությունների թափանցիկությունն ու հրապարակայնությունն ապահովելու նպատակով դրանց արդյունքները փակցվում են ֆակուլտետների ցուցատախտակներին և տեղադրվում են մասնաճյուղի պաշտոնական կայքէջում: Քննությունների արդյունքները քննարկվում են ֆակուլտետների խորհուրդների և ամբիոնների նիստերում:

Պարոն Դավթյանը նշեց, որ առկա ուսուցման համակարգում սովորող 480 ուսանողների (անվճար ուսուցմամբ՝ 115 ուսանող, վճարովի ուսուցմամբ՝ 365) ընդհանուր առաջադիմությունը 2016-2017 ուստարվա II կիսամյակում կազմել է 83% (ընդ որում՝ անվճար ուսուցմամբ ուսանողներինը՝ 100%, վճարովի՝ 76%):

Անբավարար գնահատականներ են ստացել 85 ուսանողներ (17.7%), որից անվճար ուսուցմամբ՝ 0 ուսանող,   վճարովի` 85:

Մասնաճյուղի ֆակուլտետներից ամենաբարձր առաջադիմությունն ապահովել է Կիրառական արվեստի ֆակուլտետը (91%), իսկ ամենացածրը՝ Տնտեսագիտության ֆակուլտետը (74%):

Բնական գիտությունների ֆակուլտետում քննաշրջանին մասնակցել են 96 ուսանողներ, այդ թվում` 18 անվճար և 78 վճարովի ուսուցման համակարգից: Ուսանողների ընդհանուր առաջադիմությունը կազմել է 78%, այդ թվում` 100% անվճար, 71%  վճարովի ուսուցման համակարգերում:

Տնտեսագիտության  ֆակուլտետում քննաշրջանին մասնակցել են 109 ուսանողներ, այդ թվում՝ 26 անվճար և 83 վճարովի ուսուցման համակարգից: Ուսանողների ընդհանուր առաջադիմությունը կազմել է 74%, այդ թվում` 100% անվճար,  65%  վճարովի ուսուցման համակարգերում:

Հումանիտար գիտությունների  ֆակուլտետում քննաշրջանին մասնակցել են 231 ուսանողներ, այդ թվում` 55 անվճար և 176 վճարովի ուսուցման համակարգից: Ուսանողների ընդհանուր առաջադիմությունը կազմել է 89%, այդ թվում` 100% անվճար,  83%  վճարովի ուսուցման համակարգերում:

Կիրառական արվեստի ֆակուլտետում քննաշրջանին մասնակցել են 44  ուսանողներ՝ 16 անվճար և 28 վճարովի ուսուցման համակարգից: Ուսանողների ընդհանուր առաջադիմությունը կազմել է 91%, այդ թվում` 100% անվճար, 84%  վճարովի ուսուցման համակարգերում:

2017թ. հունիսի 24-ին ԵՊՀ Իջևանի մասնաճյուղում կայացավ մասնագիտությունների կրթական ծրագրերի պատասխանատուների հետ հերթական հանդիպումը, որին մասնակցում էին տնօրենի խորհրդական Ա.Մակարյանը, ԵՊՀ ուսումնամեթոդական վարչության բակալավրիատի բաժնի, մասնաճյուղի տուրիզմի կառավարման և մշակութաբանության ամբիոնի վարիչ Գ.Հովհաննիսյանը, Ուսումնամեթոդական վարչության, ՄԿՈԱ բաժնի աշխատակիցները, ՄԿԾ-ների պատասխանատուները:

Հանդիպման ընթացքում քննարկվեցին կրթական ծրագրերի կառուցվածքային և բովանդակային վերափոխմանը վերաբերող հարցեր:

Հայտնի է, որ ԵՊՀ 2016-2020 զարգացման ռազմավարական ծրագրի իրականացման պլանի համաձայն՝ վերանայվել-վերափոխվել են մագիստրոսի և բակալավրի կրթական ծրագրերի կառուցվածքը և բովանդակությունը սահմանող նորմատիվ փաստաթղթերը (առկա և հեռակա ուսուցման համակարգերի համար):

Ըստ այդմ՝ Գ.Հովհաննիսյանը ներկայացրեց և մեկնաբանեց Բակալավրի կրթական ծրագրերով ուսումնական գործընթացի կազմակերպման՝ 2017թ. սեպտեմբերի 1-ից գործածության մեջ մտնող կարգում փոփոխության ենթարկված հիմնական դրույթները:

Մասնավորապես նշվեց, որ ուսումնական կիսամյակի համար սահմանվում է 20-շա­բաթյա տևո­ղու­թյուն, որը բաշխվում է հե­տևյալ հերթա­կա­նու­թյամբ. 8 շաբաթ լսա­րանային պարապ­մունքներ, 1 շաբաթ ընթա­ցիկ քննու­թյուն­ներ, 7 շա­բաթ լսարա­նային պարապ­մունքներ, 1 շաբաթ ըն­թա­ցիկ քննու­­­­­թյուն­ներ ու ստուգարքներ և 3 շաբաթ եզրափակիչ քննություններ:

Մանկավարժի որակավորում ստանալու համար համապատասխան մաս­­­­­նա­գիտու­թյուն­ների ուսանողները լրացուցիչ պետք է կուտակեն 30 կրեդիտ:

Ներկայացվեց, որ եզրափակիչ գնահատումով դասընթացի դեպքում, քննաշրջանի ընթացքում անց­կաց­վող եզրափակիչ քննությունից բացի, նախա­տեսվում է 2 ընթացիկ քննու­թյուն   /5+5+10=20/: Դասընթացը կարող է լինել եզրափակիչ գնահատումով միայն այն դեպքում, եթե կիսամյակում ունի առնվազն 60 ժամ լսա­րա­նա­յին բեռնվածություն:

Առանց եզրափակիչ գնահատման դասընթացը գնահատվում է կիսամ­յակի ըն­թացքում ուսումնական նյութի յուրացման աստի­ճանը որոշող 2 ընթացիկ քննու­թյունների արդյունքներով /10+10/:

Առանց ընթացիկ գնահատման (միայն եզրա­­փակիչ քննու­թյամբ) և առանց եզրա­փա­կիչ գնահատման կարող են լինել հիմ­նակա­նում փոքրածավալ մասնագիտա­կան դասընթաց­ները:

Ստուգարքային կարող են լինել բակա­լավրիատի ընդ­հա­­նուր կրթական կառու­ցա­­մասի դասընթացները:

Ընդգծվեց, որ եզրափակիչ գնահատումով դասընթացի գնահատման արդյունարար դրական նվա­զագույն միա­վորի՝ 8-ի շեմը չապահոված ուսանողն ակադե­միա­կան պարտ­քե­րի մար­ման շրջանում պետք է վերահանձ­նի եզրափա­կիչ քննու­թյունը` վեր­ջինիս համար սահ­մանված 10 միա­վո­րի ձեռք­բեր­ման հնա­րա­վո­րությամբ:

Առանց եզրափակիչ գնահատման դասընթացի գնա­հատման արդյու­նա­րար դրական նվազագույն միա­վորի շեմը չապահոված ուսա­նողն ակա­դե­­միա­­կան պարտ­քերի մար­ման շրջա­նում ընթացիկ քննություն­ները պետք է վերահանձնի առանձին-առանձին (իր ցանկությամբ՝ մեկը կամ երկուսը) և կարող է  վաստակել 8 և ավելի միավոր:

Առանց ընթացիկ գնահատման դասընթացի գնա­հատման արդյու­նա­րար դրական նվազագույն միա­վորի շեմը չապահոված ուսա­նողն ակա­դե­­միա­­կան պարտ­քերի մար­ման շրջա­նում պետք է  վե­րա­հանձնի ամբողջ դասընթացը և կարող է վաս­տակել 8 և ավելի միա­վոր:

Հատկանշվեց, որ ԵՊՀ կրթա­կան ծրագրերում առանձին դասընթացներ, ֆակուլտետի գի­տա­կան խորհրդի որոշմամբ և ուսումնական աշխատանքների գծով պրո­­ռեկ­տորի արտոնությամբ, կարող են կազմակերպվել առցանց եղանակով:

Ծավալվեց ակտիվ քննարկում, որի ընթացքում կրթական ծրագրերի պատասխանատուները պարոն Մակարյանի ու պարոն Հովհաննիսյանի կողմից ստացան իրենց  հետաքրքրող հարցերի պատասխանները և արտահայտեցին իրենց տեսակետները:

2017թ. հունիսի 17-ին ԵՊՀ Իջևանի մասնաճյուղում կայացավ ֆակուլտետների դեկանների և մասնագիտությունների կրթական ծրագրերի պատասխանատուների հետ հանդիպում, որի նպատակն էր իրականացնել որակավորումների ազգային շրջանակին (ՈԱՇ) համապատասխան կրթական ծրագրերի վերանայման ընթացքի և ձեռք բերված արդյունքների վերաբերյալ քննարկում:

Համաձայն մասնաճյուղի՝ 2016-20թթ. զարգացման ռազմավարական ծրագրի՝ Մասնագիտական կրթության որակի բաժինը տնօրենի խորհրդական Ա.Մակարյանի անմիջական աջակցությամբ պարբերաբար կազմակերպում է հանդիպում-քննարկումներ՝ համապատասխան խորհրդատվություններ տրամադրելու նպատակով:

Հերթական հանդիպում-քննարկման ընթացքում ներկայացվեց, որ նոր ուսումնական տարում մասնաճյուղն ակնկալում է ունենալ ՀՀ բարձրագույն կրթության  որակավորումների ազգային շրջանակի (ՈԱՇ, 07.07.2016թ., N714-Ն) պահանջներին համապատասխանեցված, նրան համադրելի  բակալավրի կրթական ծրագրեր:

Ընդգծվեց, որ կրթական ծրագրերի պատասխանատուներն իրենց աշխատանքային խմբերի հետ միասին ուսումնառության ակնկալվող վերջնարդյունքները ձևակերպելիս հիմք են ընդունել ՈԱՇ-ի պահանջները և կրթական ծրագրերի շահակիցների  ակնկալիքները:

Ընդհանուր դրույթներով տրվեցին ՈԱՇ-ում ներկայացված մասնագիտական, տեսական գիտելիքների և գործնական հմտությունների ձևավորման, վարպետության և նորարարության մասին վկայող վերջնարդյունքների, ուսանողների կարողությունների ամրագրման հայտնի մոտեցումները, մեկնաբանվեցին  դրանց ձևակերպման հնարավորությունները:

1. ՈԱՇ-ի պահանջներին համապատասխան գիտելիքներ, որոնք ընդգրկում են կոնկրետ մասնագիտության հիմնական հասկացությունների, գաղափարների, սկզբունքների, վերլուծական և քննադատական մեթոդների ու մոդելների իմացությունը,
2. իրենց մասնագիտության համար կարևոր տվյալներ, ցուցանիշներ և տեղեկատվություն հավաքագրելու, խմբագրելու, վերլուծելու, մեկնաբանելու, համադրումներ կատարելու, ինքնուրույն խնդիրներ և հարցադրումներ կատարելու և լուծելու, ինք­նու­րույն մաս­նա­գի­տա­կան գոր­ծու­նեութ­յուն ծա­վա­լելու, հետազոտական աշխատանքներ կատարելու, մասնագիտական ոլորտում ժամանակակից տեղեկատվական համապատասխան համակարգեր նպատակային կիրառելու հմտություններ,
3. մասնագիտական գրագետ, փաստարկված, հիմնավորված, տրամաբանական բանավոր և գրավոր խոսք, հաղորդակցման, թիմում աշխատելու և իր  մասնագիտական գիտելիքները կիրառելու, ինքնուրույն եզրահանգումներ կատարելու, մասնագիտական որոշումների դեպքում պատասխանատվություն ստանձնելու կարողություններ:

Ներկաների քննարկմանը դրվեցին 3 մասնագիտությունների՝ 2013թ.-ից  գործող կրթական ծրագրերում ամրագրված ուսումնառության կրթական վերջնարդյունքները:

Կրթական ծրագրերի պատասխանատուների միջև ծավալվեց ակտիվ քննարկում, որի ընթացքում նրանք ներկայացրին մասնագիտության կրթական  ծրագրերի, ուսումնառության վերջնարդյունքների ձևակերպման իրենց մոտեցումները, ստացան իրենց հուզող հարցերի պատասխանները, մատնանշեցին թերությունները:

Որոշվեց հաջորդ հանդիպմանը ներկայացնել ծրագրերի կրթական վերջնարդյունքների ավարտուն ձևակերպումները:

2016-2017 ուստարվա երկրորդ կիսամյակում՝ «Ինֆորմատիկա» դասընթացի շրջանակներում, ԵՊՀ ԻՄ-ի Կիրառական արվեստի ֆակուլտետի «Համակարգչային գրաֆիկա» մասնագիտության I կուրսի ուսանողները ՏՏ տեխնոլոգիաների միջոցով ներկայացրին գեղեցիկի վերաբերյալ իրենց մտահղացումները:

Դասախոս Քնար Օթարյանի խոսքով՝ ուսանողների մեջ լրացուցիչ հետաքրքրություն առաջացնելու, նրանց գործնական հմտությունները զարգացնելու նպատակով «Ինֆորմատիկա» առարկայի դասավանդումը հնարավորինս համապատասխանեցվել է սովորողների նախասիրություններին և ընդունակություններին:

Յուրացնելով «Scratch» ծրագրավորման լեզուն, որը տեքստային, գրաֆիկական, ձայնային, անիմացիոն և աուդիո խմբագիր է՝ ուսանողները «Scratch»-ով ստեղծել են տարբեր նախագծեր (ինտերակտիվ, մուլտիմեդիա, շնորհանդես, աշխատանք ֆրակտալ գրաֆիկայով և այլն):

Այսպես՝ 1-ին կուրսի ուսանողուհի Կարինե Ալավերդյանը, ուսումնասիրելով Սերպինսկու եռանկյունը և այն զուգակցելով ստացած գիտելիքներին, գրել է հետաքրքիր ծրագիր: Դրա համաձայն՝ իր իսկ նկարած Արարատ լեռան ֆոնի վրա զուգահեռ ցուցադրվում են երեք շարժվող դրվագներ. երկուսը գծագրում են մասշտաբի փոքրացումով կրկնվող եռանկյուններ, իսկ գունափոխվող արևը մերթ պտտվում է, մերթ տեղափոխվում 2 գագաթների միջակայքում: Տեղադրված ժամացույցը վերահսկում է այդ ամենը:

Գուրգեն Դալյանն, օրինակ, ուսումնասիրելով «Scratch» համակարգի աուդիո հնարավորությունները, համակարգչային ստեղնաշարը վերածել է երեք օկտավայով նվագող դաշնամուրային ստեղնաշարի:

Բավարար ալգորիթմական մտածողություն ձեռք բերելուց հետո ուսանողները սերտել են «VBA» լեզուն Excel միջավայրի համար և գրել են կիրառական ծրագրեր:

Դասախոսի հանձնարարությամբ՝ ուսանողները, ուսումնասիելով Ֆիբոնաչիի թվերի հաջորդականությունը և ոսկե հատույթի մեթոդը, որոնք Լեոնարդո դա Վինչին կիրառել է իր ստեղծագործություններում, գրել են ինքնուրույն աշխատանքներ և նշյալ մեթոդներով արել նկարներ:

«Միշտ էլ այն կարծիքին եմ եղել, որ միևնույն առարկան տարբեր մասնագիտական լսարաններում պետք է տարբեր ձևով մատուցել: Տվյալ դեպքում հաջող փորձ է արված իրար զուգորդելու մաթեմատիկական ու գեղագիտական սկզբունքները, որից ավելի շահավետ է դարձել առարկայի դասավանդումը», – նշեց Տուրիզմի կառավարման և մշակութաբանության ամբիոնի ասիստենտ, գեղագետ-գծանկարիչ Լևոն Լաճիկյանը՝ տվյալ առարկայի դասավանդման վերաբերյալ իր կարծիքն արտահայտելով: