Ընթերցասերներին հաճախ հանդիպող խնդիրներից մեկը թվայնացված գրքերի, հատկապես մասնագիտական գրականության ազատ (անվճար ներբեռնելի) հասանելիության սահմանափակությունն է: Համացանցում առկա են հարյուրավոր առցանց գրադարաններ ու շտեմարաններ, որոնցից լիարժեք օգտվելը, սակայն, պահանջում է հավելյալ գումար։ Բարեբախտաբար գոյություն ունեն նաև այնպիսի առցանց հարթակներ, որոնց հիմնադիրները հավատում են, որ թվային գրականությունը պետք է հասանելի լինի բոլորին՝ անկախ ֆինանսական հնարավորություններից: ArmScoop-ը ներկայացնում է 7 առցանց հարթակ, որտեղից հնարավոր է անվճար ներբեռնել գրքեր ու գիտական հոդվածներ։

Առցանց գիտական պաշարների բաց, ուղղակի և անվճար հասանելիություն ապահովող ամենամեծ երկու նախաձեռնությունների՝Sci-Hub և Library Genesis հարթակների և դրանցից օգտվելու եղանակների մասին կարդացեք այստեղ։

Internet Archive

Internet Archive թվային գրադարանը էլեկտրոնային գրականության աշխարհի խոշորագույն հարթակներից է, գործում է 1996 թվականից: Բացի բազմալեզու և բազմաժանր գրականության թվայնացման ու անվճար հանրայնացման հարթակ լինելուց այն նաև համացանցային կայքէջերի արխիվացման ամենամեծ ռեսուրսն է (ավելի քան 500 միլիարդ կայքէջ՝ 2016 թ․ հունիսի դրությամբ)։ Առաջնորդվելով «ամբողջական գիտելիքի համընդհանուր հասանելիություն» նշանաբանով՝ նախագիծը համագործակցում է տարբեր առաջատար համալսարնների, կրթական, գիտական ու մշակութային կենտրոնների հետ և օգտվողներին հնարավորություն տալիս օգտվելու շարունակ համալրվող տարբեր պաշարներից՝ էլեկտրոնային ազատ գրադարան (ավելի քան 10 միլիոն միավոր գրականություն), տեսանյութերի, նկարների, աուդիոգրքերի և այլ օգտակար նյութերի հավաքածուներ։ Գործում է Archive.org կայքում։ 

Open Library

Open Library բաց առցանց գրադարանը Internet Archive-ի շրջանակներում ստեղծված նախագծերից է, գործում է 2006 թվականից։ Առաջնորդվելով «մեկ առցանց էջ՝ երբևէ հրատարակված յուրաքանչյուր գրքից» սկզբունքով՝ նախագծի հեղինակները ստեղծել են մի հարթակ, որտեղ հնարավոր է ըստ արդեն գոյություն ունեցող դասակարգումների ավելացնել գրքեր, խմբագրել (ինչպես Վիքիպեդիայում) գրացանկը կամ գրքերի մասին տեղեկությունը։ Շարունակ համալրվող բազմամիլիոնանոց թվային պաշարներից հնարավոր է օգտվել հիմնականում երկու եղանակով՝ որոշակի ժամկետում փոխ առնել (կայքում գրանցվելուց հետո) ու կարդալ և երկրորդ՝ բաց հասանելիությամբ անվճար կարդալ և ներբեռնել ավելի քան 1,8 միլիոն միավոր ընդգրկող շտեմարանից։ 

Project Gutenburg

Project Gutenburg-ը ամենահին էլեկտրոնային գրադարանն է, ստեղծվել է դեռևս 1971 թվականին։ Ներկայում ընդգրկում է եվրոպական տարբեր լեզուներով (հիմնականում անգլերեն, ֆրանսերեն, գերմաներեն) և տարբեր ոլորտների առնչվող ավելի քան 50.000 գիրք՝ առցանց կարդալու կամ ներբեռնելու հնարավորությամբ:  Գրանցվելու անհրաժեշտություն չկա:

DigiLibraries.com

Այս հարթակն առաջարկում է ամենատարբեր ժանրի և ճաշակի բազմաթիվ գրքեր՝ անվճար ներբեռնելու հնարավորությամբ: Կայքի ձախ սյունակում անհրաժեշտ է ընտրել համապատասխան ոլորտը, և անհրաժեշտ գիրքը ներբեռնել հարմար ձևաչափով։ Կայքը պարբերաբար ավելացնում է թվային գրքերի իր պաշարը:

Twirpx.com

Twirpx.com կայքը ռուսալեզու առցանց շտեմարան է, որտեղ հնարավոր է գտնել ամենատարբեր ոլորտներին առնչվող գրքեր, գիտական հոդվածներ և այլ աշխատություններ: Անհրաժեշտ է միայն գրանցվել կայքում, որից հետո կայքը շնորհում է 100 միավոր: Յուրաքանչյուր ներբեռնված գիրք համարժեք է 10 միավորի, իսկ միավորները վերականգնելու համար հարկավոր է կայքում վերբեռնել որևէ գիրք կամ գիտական հոդված:

Amazon’s free kindle book selection

Բոլոր այն գրքերը, որոնց հեղինակային իրավունքի ժամկետը լրանում է, հայտնվում են այս հարթակում, որոնք հնարավոր է կարդալ անգամ առանց Kindle-ի: Բացի այդ, կարելի է գտնել նաև մեծ թվով նոր գրողների ստեղծագործություններ, որոնք հեղինակները ներկայացնում են միանգամայն անվճար օգտվելու հնարավորությամբ:

Planet eBook

Այլ հարթակների համեմատ այս կայքը չի առանձնանում իր ընտրության լայն հնարավորությամբ, սակայն այն առանձնացրել է դասական ժանրի բոլոր ժամանակների ամենահայտնի 80-ից ավել գրքեր (անգլերեն), որոնք կարելի է ներբեռնել PDF ֆայլի տեսքով:

ArmScoop-ը պարբերաբար անդրադառնում է հայկական և արտասահմանյան էլեկտրոնային գրադարաններին, որտեղից միանգամայն անվճար կարելի է ներբեռնել գրքեր, գիտական հանդեսներ, շտեմարաններ ու հավաքածուներ՝ իրենց համառոտ նկարագրություններով և համապատասխան հղումներով: ArmScoop-ի համահավաք գրադարանին կարող եք ծանոթանալ՝ այստեղ:

Աղբյուրը՝ http://armscoop.com

«Երիտասարդ պատմագետների ասոցացիա» հասարակական կազմակերպությունը Երևանի պետական համալսարանի պատմության ֆակուլտետի և Երևանի քաղաքապետին կից երիտասարդության հարցերի խորհրդի աջակցությամբ կազմակերպում է «Մեդիացիան որպես միջպետական կոնֆլիկտների լուծման այլընտրանքային տեխնոլոգիա» խորագրով չորրորդ աշնանային դպրոցը։

Դպրոցի նպատակն է համախմբել Հայաստանի բուհերից թվով 20-25 ուսանող երիտասարդների, որոնք ցանկություն ունեն ձեռքբերել լրացուցիչ մասնագիտական գիտելիքներ և կիրառական հմտություններ կոնֆլիկտաբանության, բանակցությունների, երրորդ կողմի միջոցով խնդրի լուծման տեխնոլոգիաների վերաբերյալ: Դասընթացի նպատակն է ունենալ արհեստավարժ կադրեր և տեղեկացված երիտասարդություն, որն իր գիտելիքներով և դիվանագիտական հմտությամբ արժանապատիվ կներկայացնի իր պետությունը տարբեր հարթակներում:

Անցկացման ժամանակը․ սեպտեմբեր-դեկտեմբեր, 2016 թ․
Դիմումների ընդունման վերջնաժամկետը․ 2016 թ. սեպտեմբերի 15՝ ժամը 18:00
Աշխատանքային լեզուն․ հայերեն
Դասընթացի մասնակցությունն անվճար է

Տեղեկատվական աջակից՝ ArmScoop գիտակրթական ցանց

Վկայականներ կտրվեն այն մասնակիցներին, որոնք դասընթացի շրջանակներում կմասնակցեն և կհաղթահարեն երեք հիմնական բաժինները՝ դասախոսություն, գործնական աշխատանք, ինքնուրույն աշխատանք։

Աշնանային դպրոցին մասնակցության համար անհրաժեշտ է մինչև նշված վերջնաժամկետը igyounghistorians@gmail.com էլ. հասցեով համառոտ ինքնակենսագրականի (CV) հետ միասին ուղարկել մոտիվացիոն նամակ՝ ինչու եք ցանկանում մասնակցել դպրոցին։

Հավելյալ տեղեկությունների համար կարող եք գրել igyounghistorians@gmail.com էլ. հասցեով։

Աղբյուրը՝ http://armscoop.com

2016թ. հուլիսի 17-ին ԵՊՀ ԻՄ-ի տնօրեն, պ.գ.թ., դոցենտ Սամվել Առաքելյանի գլխավորությամբ մասնաճյուղի պրոֆեսորադասախոսական անձնակազմի մի խումբ անդամներ՝ Հումանիտար գիտությունների ֆակուլտետի դեկանի ԺՊ, պ.գ.դ., պրոֆեսոր Ա. Ներսիսյանը, պ.գ.դ., պրոֆեսոր  Ռ.Նահապետյանը, փ.գ.թ., դոցենտ Է.Կյուրեղյանը, բ.գ.թ., դոցենտ Ա.Սարհատյանը, Կիրառական արվեստի ֆակուլտետի դեկանի ԺՊ, ֆմգթ., ասիստենտ Ա.Մարգարյանը, Գծանկարի, գունանկարի և քանդակի ամբիոնի դոցենտ, ՀՆՄ վարչության անդամ, Գեղանկարի սեկցիայի նախագահ Հ.Ասատրյանը և ուրիշներ, այցելեցին Գեղարքունիքի մարզ` պատանի երկրապահների ճամբար:

Այցելության նպատակը ռազմահայրենասիրական թեմաներով ակնարկային դասախոսություններ կարդալն էր:

Պատանի ու երիտասարդ երկրապահները հյուրերին դիմավորեցին ջերմ ողջույններով, անկեղծ խանդավառությամբ:

Նախ՝ ԵՊՀ Իջևանի մասնաճյուղի տնօրեն, ԵԿՄ Տավուշի մարզային խորհրդի փոխնախագահ Ս.Առաքելյանը ողջույնի խոսք ասաց  հանրապետության տարբեր վայրերից ու Արցախից ճամբարում ուսումնամարզական վարժանքներ և հրամանատարասերժանտական դասընթացներ անցնող երկրապահներին՝ մասնավորապես շեշտելով, որ հանձինս «Պատանի երկրապահներ»-ի՝ հանրապետությունում գործում է մի կրթական համալիր, որտեղ հերոսական սերունդ է դաստիարակվում. «Մենք ցանկանում ենք, որ մեր երկրի ապագան ամուր և հզոր ձեռքերում լինի, և դա մեզ ուժ ու վստահություն է տալիս և մենք պատրաստ ենք ամեն ինչ անելու, որ ձեր և մեր ցանկություններն իրականություն դառնան. դուք ապրեք ավելի բարեկեցիկ կյանքով, ավելի մեծ Հայաստանում, ավելի խաղաղ, լավ պայմաններում, քան մենք ենք ապրել: Կրկին շնորհավորում եմ ձեզ, որ դուք մասնակցում եք «Պատանի երկրապահ»-ի հրամանասերժանտական դասընթացներին…»:

Ապա մասնաճյուղի հմուտ ու փորձառու դասախոսները պատանի ու երիտասարդ երկրապահների համար կարդացին ակնարկային դասախոսություններ հայ ժողովրդի պատմության հերոսական դրվագների, հայոց լեզվի՝ որպես ազգապահպանման գործոնի, արվեստի պատմության, փիլիսոփայության վերաբերյալ:   

Սաղարթախիտ ծառերի տակ տեղադրված վրան-լսարաններում տարահասակ դպրոցականների և դասախոսների միջև ծավալվեց անկեղծ ու անմիջական  զրույց:

Գնալով մեծացավ ճամբարականների  հետաքրքրությունը և՛ հայոց պատմության դասի  հանդեպ, որը հայրենասիրական բուռն ներշնչանքով  վարում էր մասնաճյուղի տնօրեն, պ.գ. թ., դոցենտ Ս.Առաքելյանը, և՛ հայ ազգագրության, որ վարում էր ազգագրագետ, պ.գ.դ., պրոֆեսոր  Ռ.Նահապետյանը, և՛  Արցախի ու արդի  քաղաքական հարցերի նկատմամբ, որ անցկացնում էր պ.գ.դ., պրոֆեսոր Ա. Ներսիսյանը:

Անհագուրդ էր երեխաների ուշադրությունը փ.գ.թ., դոցենտ Է.Կյուրեղյանի և ՀՆՄ վարչության անդամ, Գեղանկարի սեկցիայի նախագահ, դոցենտ Հ.Ասատրյանի խոսքի ու գործնական-ուսուցողական ուշագրավ  խորհուրդների հանդեպ: Հ.Ասատրյանը երեխաներին խոստացավ, որ հաջորդ անգամ նրանց հետ հանդիպման կգա նկարչական ու քանդակագործական պարագաներով, որպեսզի նրանց առօրյան դառնա ավելի հագեցած ու հետաքրքիր:

Ճամբարականների մի խմբի հետ էլ պարապմունք անցկացրեց բ.գ.թ., դոցենտ  Ա.Սարհատյանը: Նա  հանդես եկավ  մեր լեզվին ու գրականությանը նվիրված սրտաբուխ ու վարակիչ  զրույց-դասախոսությամբ, որը ինքնամոռաց լսում և  առաջադրված հարցերին սիրով ու անկաշկանդ պատասխանում  էին ծառերի ստվերում նրա շուրջը բոլորած տղաներն ու աղջիկները՝ պարապմունքին գեղարվեստական շունչ հաղորդելով իրենց երգով ու ասմունքով:

 Հանդիպումն  ավարտվեց. պատանեկան  ջինջ հայացքներում մնաց հանդիպումից ստացած  հաճելի տպավորությունը, իսկ դասախոսները հեռացան՝ հիացած պատանի երկրապահների  հայրենասիրական ոգով ու պատրաստակամությամբ և վերադառնալու պայմանով:    

2016թ. հուլիսի 9-ին ԵՊՀ Իջևանի մասնաճյուղում կայացավ գիտական խորհրդի
նիստ, որին մասնակցում էին ԵՊՀ-ի ռեկտոր Ա. Հ. Սիմոնյանը, ուսումնամեթոդական վարչության պետ Հ.Ժամհարյանը, ուսանողների, շրջանավարտների և հասարակայնության հետ կապերի գծով պրոռեկտոր Ռ.Մարկոսյանը, ռեկտորի աշխատակազմի ղեկավար Ա.Ղարիբյանը, գիտխորհրդի անդամները, տնօրենի օգնական Ն.Գրիգորյանը, «Ֆրանսերեն լեզու և գրականություն» մասնագիտության կրթական ծրագրի ղեկավար Ա.Մարդանյանը, հասարակայնության հետ կապերի և մամուլի պատասխանատու Հ.Վանյանը:

Նիստը վարում էր Մայր բուհի ռեկտոր Ա.Սիմոնյանը:

Գիտխորհրդի նիստում քննարկվեցին օրակարգով նախատեսված հետևյալ հարցերը.

1. Տեղեկատվություն 2016թ. ԵՊՀ ԻՄ-ի առկա ուսուցմամբ բակալավրիատի
   ընդունելության իրավիճակի մասին:
2. ԵՊՀ ԻՄ-ում ստացած կրթությունից շրջանավարտների բավարարվածության գնահատման՝ 2016թ. հարցման արդյունքների մասին:
3. 2015-16 ուստարվա ամփոփիչ ատեստավորման արդյունքների քննարկում:
4. ԵՊՀ ԻՄ-ի՝ 2017թ. ընդունելության մասնագիտությունների ցանկի քննարկում (առաջարկություն ԵՊՀ-ի գիտական խորհրդին):

Զեկուցող՝ ԵՊՀ ԻՄ-ի գիտխորհրդի նախագահ, տնօրեն Ս. Ա. Առաքելյան

5. Ընթացիկ հարցեր.
   • . ԵՊՀ ԻՄ-ի տնտեսագիտության ֆակուլտետի ընդհանուր տնտեսագիտության ամբիոնի վարիչ, տնտ. գիտ. դոկտոր, պրոֆեսոր Հարություն Ալեքսանի Մարզպանյանի, Ռ.Մարկոսյանի, Ն.Խաչատրյանի  «Միգրացիայի  ռիսկերը  և  մարդկային  կապիտալի  վերարտադրությունը» համահեղինակային աշխատությունը հրատարակության երաշխավորելու մասին: 
   • . ԵՊՀ ԻՄ-ի տնտեսագիտության ֆակուլտետի տուրիզմի կառավարման և մշակութաբանության ամբիոնի դոցենտ, մանկ. գիտ. թեկն. Վահագն Վարազդատի Գրիգորյանի և Հայաստանի ազգային ագրարային համալսարանի ագրարային քաղաքականության և խորհրդատվության ամբիոնի վարիչ, տնտ. գիտ. թեկն., դոցենտ Աշոտ Երջանիկի Ոսկանյանի «ՀՀ տնտեսական աշխարհագրություն» ուսումնական ձեռնակի հրատարակության երաշխավորելու մասին:

Առաջին հարցի վերաբերյալ մասնավորապես նշվեց, որ 2016թ. ԵՊՀ ԻՄ-ի դիմորդների ընդհանուր թիվն  ըստ առաջին և երկրորդ հայտերի եղել է 228 հոգի (2015թ. եղել է 208 հոգի): Նրանցից 31 հոգի ստացել է անբավարար գնահատական և դուրս է մնացել մրցույթից, իսկ 197 հոգի ստացել է դրական գնահատական (2015թ.՝ 168 հոգի): Այս թվերը վկայում են ԵՊՀ ԻՄ-ի նկատմամբ հասարակության վստահության և առավել պատրաստված դիմորդների աճի մասին:

Ընդգծվեց, որ աննախադեպ է դիմորդների թիվը նոր բացված «Տարրական մանկավարժություն» մասնագիտությամբ՝ 43 հոգի (նախատեսված 39 տեղի փոխարեն): Մտահոգիչ է «Հոգեբանություն» ու «Ֆրանսերեն լեզու և գրականություն» մասնագիտություններով դիմորդների թվի սակավությունը:

Երկրորդ հարցի կապակցությամբ ընդհանրացնելով ԵՊՀ ԻՄ-ում ստացած կրթությունից շրջանավարտների բավարարվածության գնահատման՝ 2016թ. հարցման արդյունքները՝ նշվեց հետևյալը.

ԵՊՀ Իջևանի մասնաճյուղում շրջանավարտների հասարակական գիտակցության մեջ ուսումնառության ընթացքում ձեռքբերված տեսագործնական գիտելիքներն ու մասնագիտական կարողությունները պատշաճ մակարդակի ու որակի են (միջին գնահատականը՝ 4.5): Փաստ, որը խոսում է մասնաճյուղի ղեկավարության և պրոֆեսորադասախոսական անձնակազմի արդյունավետ գործունեության մասին:

Շրջանավարտները գոհ են նաև դասախոսների ու կրթության կազմակերպիչների կողմից իրենց ջանքերի գնահատման արդարացիությունից (4.4)  և ուսման համար ստեղծված պայմաններից (ժամանակակից տեխնիկական հնարավորություններ՝ 4.60, գրադարան-ընթերցասրահ՝ 4.5 և այլն):

Ընդհանուր բարձր և շատ բարձր գնահատականների համապատկերում առանձին դեպքերում կրթական որոշակի ռեսուրսներ (Ուսանողական կառույցների աշխատանք, մասնագիտական գրականության համալրվածություն) ուսանողները գնահատել են համեմատաբար ավելի ցածր:

Հարցաթերթի «Առաջարկություններ» բաժնում շրջանավարտները գրել են մի շարք ուշագրավ առաջարկներ, ինչպիսիք են՝ ուսանողներին գիտահետազոտական աշխատանքներում ավելի շատ ներգրավելը, «Ֆրանսերեն լեզու և գրականություն» մասնագիտության շրջանավարտների դիպլոմում կամ որևէ այլ կերպ իրենց անգլերենի իմացության հարցը վավերացնելը, ուսանողների գնահատման համակարգն ավելի  ճկուն դարձնելը և այլն, հարցեր, որոնք արդեն ղեկավարության ուշադրության կենտրոնում են և օբյեկտիվ հնարավորության ու նպատակահարմարության դեպքում ստանալու են պարտադիր լուծում:

Շրջանավարտները առաջարկներում բարձր են գնահատել ղեկավարության հոգատարությունը, պրոֆեսորադասախոսական կազմի պատշաճ մակարդակը, մասնաճյուղում ստացած իրենց որակյալ կրթությունը՝ այդ ամենի համար հայտնելով իրենց երախտագիտությունը:

Այս ամենը թույլ է տալիս կատարել որոշակի առաջարկություններ.

-հարցման արդյունքները տեղադրել մասնաճյուղի կայքում և քննարկել յուրաքանչյուր ֆակուլտետում,

-այն ամբիոններում, որտեղ ուսումնական գործընթացի առանձին բաղադրիչների գծով արտահայտվել է պակաս բավարարություն, դարձնել առանձին քննարկման ու վերլուծության առարկա, ինչը թույլ կտա հայտնաբերել վարչական ու բարոյահոգեբանական ռեսուրսներ՝ դրանց վերացման նպատակով,

-ուսանող-շրջանավարտների կարծիքը հաշվի առնելու ցանկացած փաստ դարձնել մասնաճյուղում ընդհանուր իրազեկման նյութ, հանգամանք, որը դրական կանդրադառնա մասնաճյուղի բարոյահոգեբանական մթնոլորտի վրա, ինչպես նաև կմեծացնի նման հարցումների՝ որպես բուհի կառավարման գործոնի արդյունավետությունը:

Երրորդ հարցի վերաբերյալ մասնավորապես նշվեց, որ ԵՊՀ Իջևանի մասնաճյուղում 2015-2016 ուստարվա ամփոփիչ ատեստավորումը (քննություններն ու ավարտական աշխատանքների պաշտպանությունը) անցկացվել է սահմանված կարգով ու պատշաճ մակարդակով, և ամփոփիչ ատեստավորման հանձնաժողովների նախագահներն ընդհանուր առմամբ գոհ են եղել շրջանավարտների պատրաստվածության մակարդակից:

Նիստի ընթացքում բավարար գնահատվեցին 2016թ. ԵՊՀ ԻՄ-ի առկա ուսուցմամբ բակալավրիատի ընդունելության իրավիճակը, ԵՊՀ ԻՄ-ում ստացած կրթությունից շրջանավարտների բավարարվածության գնահատման՝ 2016թ. հարցման և 2015-16 ուստարվա ամփոփիչ ատեստավորման արդյունքները:

Հրատարակության երաշխավորվեցին ԵՊՀ ԻՄ-ի ընդհանուր տնտեսագիտության ամբիոնի  վարիչ, տ.գ.դ., պրոֆ. Հ.Մարզպանյանի «Միգրացիայի  ռիսկերը  և  մարդկային  կապիտալի  վերարտադրությունը» համահեղինակային աշխատությունը և ԵՊՀ ԻՄ-ի տուրիզմի կառավարման և մշակութաբանության ամբիոնի դոցենտ, մ.գ.թ. Վ.Գրիգորյանի «ՀՀ տնտեսական աշխարհագրություն» համահեղինակային ուսումնական ձեռնարկը:

Յուրաքանչյուր հարցից հետո իրականացվեց քննարկում՝ նիստի մասնակիցների հարցերն ու առաջարկությունները լսելու և դրանց պարզաբանում տալու նպատակով:

Ամփոփելով նիստը՝ ԵՊՀ-ի ռեկտոր պարոն Ա.Սիմոնյանն իր գոհունակությունն արտահայտեց ԵՊՀ Իջևանի մասնաճյուղի զարգացման տեմպերից, ուղուց, ղեկավարությունից, կոլեկտիվից՝ բարեխղճորեն ու բարձր պատասխանատվությամբ իրականացվող աշխատանքի համար, հավաստեց, որ Մայր բուհն այսուհետև էլ կշարունակի աջակցել մասնաճյուղին՝ իր մրցունակությունը պահելու, շարունակական առաջընթաց ապրելու գործում: