2016թ. փետրվարի 4-ին ԵՊՀ ԻՄ-ում տեղի ունեցավ Ուսանողական խորհրդի` 2015-16 ուսումնական տավա II կիսամյակի անդրանիկ նիստը՝ մասնաճյուղի ՈՒԽ-ի նախագահ Ռազմիկ Հովսեփյանի գլխավորությամբ:

Նիստին ներկա էին Ուսանողական խորհրդի նախագահության անդամները:

Բացելով նիստը` Ռ.Հովսեփյանը ողջունեց ֆակուլտետային ուսանողական խորհրդի նորընտիր նախագահներին և մաղթեց նրանց արդյունվետ ու բովանդակալից աշխատանք: Նա ընգծեց, թե որքան մեծ է ֆակուլտետային ՈՒԽ-ի նախագահների դերը ֆակուլտետի կառավարման գործում, ներկայացրեց այն էական հատկանիշները, որոնք անհրաժեշտ են նորընտիր նախագահներին իրենց աշխատանքում:

Առանձնահատուկ շեշտվեց, որ նրանք պետք է կարողանան հմտորեն վերհանել ֆակուլտետում նկատած խնդիրները՝ գտնելով դրանց հաղթահարման ուղիները, համագործակցելով դեկանների, պրոֆեսորադասախոսական անձնակազմի, կուրսերի ավագների, ինչպես նաև ՈՒԽ-ի նախագահության մյուս անդամների հետ:

Նիստի ընթացքում ներկայացվեց, որ ՈՒԽ-ն պետք է ունենա իր աշխատանքային պլանը և շարունակի առաջնորդվել դրանով: Ընդ որում` աշխատանքային պլանը պետք է կազմվի այնպես, որ նպատակաուղղված լինի խթանելու ուսանողների գիտական, կրթական, հոգևոր, մշակութային, ստեղծագործական ու ֆիզիկական զարգացումը:

Նշվեց, որ Ուսանողական խորհուրդը պետք է առանձնանա իր պատասխանատու և համախմբված ուսանողներով, ովքեր կկարողանան ճիշտ ինքնադրսևորվել տարբեր օղակներում և աչքի կընկնեն իրենց ինտելեկտով, զարգացվածության աստիճանով, քաղաքակիրթ վարվեցողությամբ և մարդկային հարաբերություններում անհրաժեշտ նմանատիպ նորմերին տիրապետելու արվեստով:

Քննարկվեց ֆակուլտետային ՈՒԽ-ի նախագահների տեղակալների ընտրության հարցը և որոշվեց նորընտիր նախագահներին տալ տասը օր ժամանակ՝ տեղակալների թեկնածությունները նախագահությանը ներկայացնելու համար:

Ծավալվեց բուռն քննարկում նիստի օրակարգային և ընթացիկ հարցերի շուրջ, որոնք մինչև ՈՒԽ-ի համագումար նիստը պետք է լուծումներ ստանան:

Նիստի մասնակիցները հեռացան այս կիսամյակի առաջին հանձնարարություններով ու դրանք իրականացնելու վճռականությամբ:

ԵՊՀ ԻՄ-ի ուսանողական խորհուրդ

 2016թ. հունվարի 31-ին ԵՊՀ ԻՄ-ի «Սերվիս», «Անգլերեն լեզու և գրականություն» մասնագիտությունների ուսանողները՝ “World Vision Armenia” կազմակերպության Ալավերդու ՏԶԾ-ի, Երիտասարդների ձեռներեցության ծրագրի և Տավուշի թեմի աջակցությամբ, այցելեցին Ալավերդու տարածաշրջան՝ զբոսաշրջության ոլորտում փորձի փոխանակման նպատակով:

Մասնաճյուղից ուսանողներին ուղեկցում էին Տուրիզմի կառավարման և մշակութաբանության ամբիոնի ասիստենտ Պավել Ասիլբեկյանը և Օտար լեզուների ամբիոնի դասախոս Աստղիկ Սիմոնյանը:

Բարձր մակարդակով կազմակերպված ճանաչողական էքսկուրսիայի ընթացքում ուսանողներն այցելեցին Սանահինի և Հաղպատի վանական համալիրներ, որտեղ նրանց դիմավորեցին միջոցառման ղեկավար, Տուրիզմի զարգացման և երիտասարդների ձեռներեցության ծրագրի օգնական Նարինե Սիմոնյանը, ծրագրի կամավորները:

Նրանք ուսանողներին ներկայացրին իրենց պատրաստած էքսկուրսիոն փաթեթները, որոնք պարունակում էին  Սանահինի և Հաղպատի վանական համալիրներին վերաբերող ուշագրավ փաստեր, հետաքրքիր և արժեքավոր տեղեկություններ մանրանկարչության, Սայաթ-Նովայի կյանքի և գործունեության վերաբերյալ:

Սանահին և Հաղպատ այցելելուց հետո մեր ուսանողները եղան  “World Vision Armenia” կազմակերպության Ալավերդու գրասենյակում, որտեղ ամփոփվեցին շրջայցի արդյունքները և քննարկվեցին Տավուշի մարզում (Հաղարծին վանական համալիրում) վերոնշյալ ծրագրի իրականացման հետագա քայլերը:

Ուսանողները ստացան համապատասխան ցուցումներ և հանձնարարություններ Հաղարծին վանական համալիրի վերաբերյալ տվյալներ հայթայթելու և ներկայացնելու ուղղությամբ: 

Ճանաչողական այցի շնորհիվ մեր ուսանողները ոչ միայն ձեռք բերեցին զբոսաշրջությանը վերաբերող գործնական հմտություններ, այլև ստացան  համագործակցության նոր հնարավորություններ:

2016թ. հունվարի 28-ին` Հայոց բանակի կազմավորման 24-րդ տարեդարձին, ԵՊՀ Իջևանի մասնաճյուղի վարչական անձնակազմի մի խումբ ներկայացուցիչներ՝ տնօրեն Սամվել Առաքելյանի գլխավորությամբ, այցելեցին Իջևանի Ազատամարտիկների հրապարակ՝ հարգանքի տուրք մատուցելու հայրենիքի պաշտպանության սուրբ գործին իրենց կյանքը նվիրաբերած ազատամարտիկների հիշատակին: Նրանք ծաղիկներ դրեցին Իջևանում գտնվող` Զոհված ազատամարտիկների անունը հավերժացնող հուշարձանին:

Փա՛ռք ու պատիվ գիտակցված մահով անմահություն նվաճած մեր քաջ մարտիկներին, մեր բոլոր արծիվ-տղաներին, հայոց զինվորներին, ովքեր գիշեր-ցերեկ արթմնի հսկում են մեր հայրենիքի սահմաննները, սրբորեն պաշտպանում հայրենի հողը թշնամական ոտնձգություններից, հողի ազնիվ մշակին ոսոխի գնդակից, պահպանում երկրի խաղաղությունը, մանկան արդար քունն ու մեծի անդորրը…

Ձեր սուրբ գործի առջև խոնարհվելն ու երախտագիտություն հայտնելն այն նվազագույնն է, որ պարտավոր է անել յուրաքանչյուր հայ մարդ:

2016թ. հունվարի 8-27-ը ԵՊՀ Իջևանի մասնաճյուղում կայացան առկա ուսուցման համակարգի 2015-2016 ուստարվա I կիսամյակի եզրափակիչ գնահատմամբ և հանրագումարային քննությունները:

Ամփոփելով քննությունների արդյունքները՝ ԵՊՀ Իջևանի մասնաճյուղի ուսումնամեթոդական վարչության պետ Ա.Դավթյանը փաստեց, որ քննաշրջանն անցկացվել է սահմանված կարգով, ըստ 2015-2016 ուստարվա առաջին կիսամյակի քննաշրջանի ժամանակացույցների, դասախոսները և ուսանողները քննություններին մոտեցել են ամենայն պատասխանատվությամբ, և խախտումներ չեն նկատվել:

Նա նշեց, որ առկա ուսուցման համակարգում սովորում են 666 ուսանողներ, այդ թվում` անվճար ուսուցմամբ 155 ուսանող, իսկ վճարովի ուսուցմամբ՝ 511:

2015-2016 ուստարվա I կիսամյակում ուսանողների ընդհանուր առաջադիմությունը կազմել է 75.1%, այդ թվում` անվճար ուսուցմամբ 98%, վճարովի`68%:

Անբավարար գնահատականներ են ստացել 175 ուսանողներ (74%), որից անվճար ուսուցմամբ 3  ուսանող,   վճարովի` 172:

Մասնաճյուղի ֆակուլտետներից ամենաբարձր առաջադիմությունն ապահովել է Հումանիտար գիտությունների ֆակուլտետը (82.4%), իսկ ամենացածրը՝ Բնական գիտությունների ֆակուլտետը (70%):

Բնական գիտությունների ֆակուլտետում քննաշրջանին մասնակցել են 93 ուսանողներ, այդ թվում` 19 անվճար և 74 վճարովի ուսուցման համակարգից: Ուսանողների ընդհանուր առաջադիմությունը կազմել է 70% , այդ թվում` 100% անվճար, 61%  վճարովի ուսուցման համակարգերում:

Տնտեսագիտության  ֆակուլտետում քննաշրջանին մասնակցել են 158 ուսանողներ, այդ թվում` 39 անվճար և 119 վճարովի ուսուցման համակարգից: Ուսանողների ընդհանուր առաջադիմությունը կազմել է 72% , այդ թվում` 98% անվճար, 63%  վճարովի ուսուցման համակարգերում:

Հումանիտար գիտությունների  ֆակուլտետում քննաշրջանին մասնակցել են 327 ուսանողներ, այդ թվում` 77 անվճար և 250 վճարովի ուսուցման համակարգից: Ուսանողների ընդհանուր առաջադիմությունը կազմել է 82.4% , այդ թվում` 99.2% անվճար, 77%  վճարովի ուսուցման համակարգերում:

Կիրառական արվեստի ֆակուլտետում քննաշրջանին մասնակցել են 88 ուսանողներ`20 անվճար և 68 վճարովի ուսուցման համակարգից: Ուսանողների ընդհանուր առաջադիմությունը կազմել է 76%, այդ թվում` 95% անվճար, 71%  վճարովի ուսուցման համակարգերում: