2014թ. հոկտեմբերի 17-ին ԵՊՀ ԻՄ-ում տեղի ունեցավ Գիտական խորհրդի նիստ, որը նախագահում էր ԵՊՀ ուսումնական աշխատանքների գծով պրոռեկտոր Ա.Կ. Գրիգորյանը:

Նիստում քննարկվեցին Հեռակա ուսուցման համակարգում դասավանդման արդյունավետության բարձրացման ուղղությամբ կատարվելիք աշխատանքների, ԵՊՀ ԻՄ-ի ռազմավարական ծրագրի 2011-2015թթ. կատարման ընթացքի, մասնաճյուղում Դասավանդման առաջավոր փորձի փոխանցման և երիտասարդ դասախոսների աջակցման կենտրոն ստեղծելու վերաբերյալ հարցեր:

Առաջին հարցի կապակցությամբ տնօրեն Ս.Առաքելյանը ներկայացրեց զեկուցում և Հեռակա ուսուցման բաժնի կրթության որակի բարելավմանն ուղղված առաջարկների նախագիծ:

Որոշվեց հաստատել ԵՊՀ ԻՄ-ի հեռակա ուսուցման բաժնի կրթության որակի բարելավմանն ուղղված առաջարկների նախագիծը:

ԵՊՀ ԻՄ-ի ռազմավարական ծրագրի 2011-2015թթ. կատարման ընթացքի մասին հարցի կապակցությամբ Մասնագիտական կրթության որակի ապահովման բաժնի ավագ մասնագետ Մ.Ճաղարյանը հանդես եկավ զեկուցումով:

Որոշվեց հանձնարարել ԵՊՀ ԻՄ-ի ուսումնամեթոդական վարչության պետ Ա.Դավթյանին 2014թ. դեկտեմբերի Գիտխորհրդի նիստին ներկայացնել 2011-2015թթ. ռազմավարական ծրագրի կատարողականը:

Հաջորդ հարցի վերաբերյալ զեկուցեց տնօրեն Ս.Առաքելյանը:

Որոշվեց մասնաճյուղում ստեղծել Դասավանդման առաջավոր փորձի փոխանցման և երիտասարդ դասախոսների աջակցման կենտրոն:

2014թ. հոկտեմբերի 16-ին Հումանիտար գիտությունների ֆակուլտետում տեղի ունեցավ «Սուրբ Թարգմանչաց» տոնին նվիրված միջոցառում, որը կազմակերպել էր Հայոց լեզվի և գրականության ամբիոնի ասիստենտ, բան. գիտ. թեկնածու Լուսինե Թումանյանը:

Միջոցառմանը ներկա էին Հումանիտար գիտությունների ֆակուլտետի դեկան Վ.Ալեքսանյանը, Հայոց լեզվի և գրականության ամբիոնի վարիչ Վ.Ավագյանը, դասախոսներ, ուսանողներ:

«Սուրբ Թարգմանչաց» տոնին նվիրված միջոցառմանը մասնակցում էին ուսանողներ` «Հայոց լեզու և գրականություն» մասնագիտության առաջին, երկրորդ և երրորդ կուրսերից:

Մասնակիցները ներկայացրին Աստվածաշնչից, Նարեկացու տաղերից և «Ողբերգության մատյանից» անգիր հատվածներ, որոնք ուղեկցվում էին հետաքրքիր ու պատկերավոր մեկնություններով և տեսանյութերով:

Ուսանողների կողմից ընդգծվեց այն գաղափարը, որ «Նարեկ» կարդացողը չի կարող վատ արարք գործել, և հատկապես մեր ժամանկներում, երբ օր օրի մեծանում է ժողովրդի՝ դեպի աշխարհիկ վայելքներ հակվածությունն ու աղանդավորական շարժումների թիվը, մեր բացարձակ մեծություններին դիմելն ու հատկապես Նարեկացի կարդալու կարիքն առօրեական է, հավերժական ու անհրաժեշտ:

Միջոցառումը նպատակ ուներ արժևորելու «Սուրբ Թարգմանչաց» տոնը, մայրենիի մեր առաջին ուսուցիչներին ու թարգմանիչներին, որոնք ոսկեդարից ի վեր մեծարվել ու գնահատվել են հայ ժողովրդի կողմից:

Հայ Առաքելական եկեղեցին նրանց դասել է Սրբերի շարքը, նվիրել նրանց տոն, որ համաժողովրդական է ու նշվում է դարեր շարունակ:

Սուրբ թարգմանիչներն իրենց կյանքով դարձան հայ ժողովրդի թարգմանն Աստծո մոտ:

Այսօր էլ նրանք շարունակում են իբրև փարոս լուսավորել հայոց ապագան: Մեր եկեղեցու հայրերը կարծես խոսում են մեզ հետ: Ս. Սահակը սովորեցնում է մեզ լինել խոնարհ, Ս. Մաշտոցը` չվախենալ և աղոթքով հաղթահարել դժվարությունները, Եզնիկը ուղեցույց է հավատքը պաշտպանելու, Եղիշեն հայրենասիրությամբ է լցնում մեզ, Խորենացին ուսուցանում է հայոց պատմությունը, Շիրակացին առաջնորդում է բնության և տիեզերքի գաղտնիքների մեջ, Գրիգոր Նարեկացին մեր հոգին բարձրացնում է դեպի Աստված, Շնորհալին հայ հավատքի բանաձևն է տալիս և սովորեցնում աստծո փառքը երգել:

Հետաքրքիր և ուսանելի միջոցառման կապակցությամբ վերջում իրենց գոհունակությունն արտահայտեցին ամբիոնի դասախոսները` մաղթելով, որ Թարգմանչաց ոգին ու նրանց շնորհները միշտ մնան հայ ազգի յուրաքանչյուր անհատի հետ:

ԵՊՀ Իջևանի մասնաճյուղի տնօրենի 2014 թ. հոկտեմբերի 15-ի № 164 հրամանով հաստատվել է  ԵՊՀ ԻՄ-ի տնօրենության կազմը.

• Սամվել Արշավիրի Առաքելյան – մասնաճյուղի տնօրեն,

• Գարուշ Գուրգենի Անանյան  – ամբիոնների աշխատանքների համակարգման և միջազգային կապերի գծով տնօրենի խորհրդական,

• Նաթելլա Սերոժի Գրիգորյան – տնօրենի օգնական,

• Մհեր  Սերգեյի  Աթոյան – գիտական խորհրդի քարտուղար,

• Մելանյա Մեսրոպի Մխիթարյան – գլխավոր հաշվապահ,

• Արկադի Ցոլակի Դավթյան – ուսումնամեթոդական վարչության պետ,

• Նաիրա Սուրենի Առուշանյան – ուսումնամեթոդական վարչության ուսումնական գործընթացի պլանավորման և վերահսկման բաժնի վարիչ,

• Ալբերտ Սարգսի Հովհաննիսյան –ԱԿ բաժնի վարիչ, իրավախորհրդատու,

• Վարդիշաղ Մամիկոնի Եգանյան – ԱԿ բաժնի վարիչի տեղակալ,

• Կամո Բենիկի Այվազյան – Վարչատնտեսական վարչության պետ,

• Հասմիկ Սամվելի Վանյան – հասարակայնության հետ կապերի և մամուլի պատասխանատու,

• Վարդան Արամայիսի Ալեքսանյան -Հումանիտար գիտությունների ֆակուլտետի դեկան,

• Մանվել Աշոտի Զաքարյան – Բնական գիտությունների ֆակուլտետի դեկանի ժ/պ,

• Նելլի Բաբկենի Խուդավերդյան – Տնտեսագիտության ֆակուլտետի դեկան,

• Ալեքսան Շամիլի Մարգարյան – Կիրառական արվեստի ֆակուլտետի դեկանի ժ/պ, արհբյուրոյի նախագահ, 

• Մարատ Հովիկի Զուրաբյան – Հեռակա ուսուցման բաժնի վարիչ,

• Արտակ Վոլոդյայի Ցուցուլյան – Ընդհանուր մաթեմատիկայի և բնագիտության ամբիոնի վարիչի ժ/պ,

• Մարիետա Ալբերտի Ճաղարյան – ՄԿՈԱ բաժնի ավագ մասնագետ,

• Վահան Արշակի Աղաբաբյան– մասնագիտական կողմնորոշման և պրակտիկայի կազմակերպման բաժնի վարիչ,

• Յուրա Իսրայելի Բեկնազարյան – ուսումնամեթոդական վարչության ՈՒԳՊՎ բաժնի ավագ դիսպետչեր, տնօրենության նիստերի քարտուղար:

2014թ. հոկտեմբերի 15-ին մասնաճյուղի տնօրեն Սամվել Առաքելյանը հանդիպում ունեցավ ուսխորհրդի անդամների հետ:

Հանդիպմանը ներկա էին նաև Մասնագիտական կրթության որակի ապահովման բաժնի ավագ մասնագետ Մ. Ճաղարյանը և տնօրենի օգնական Ն. Գրիգորյանը:

Հանդիպման ընթացքում ուսանողները ներկայացրին իրենց հետաքրքրող հարցերն ու խնդիրները, ստացան պատասխաններ:

Քննարկվեց ՄԿՈԱ բաժնին կից ուսանողական հանձնախումբ ստեղծելու հարցը:

Հանձնախմբում ընդգրկված ուսանողները կարող են ներկայացնել խնդիրներ, առաջարկություններ` կրթության որակի բարձրացման նոր ուղիներ գտնելու վերաբերյալ, իրականացնել դասալսումներ, մասնակցել և աջակցել որակի գործընթացներին և այլն:

Առաջարկվեց, որ յուրաքանչյուր մասնագիտությունից մեկական ուսանող ներառվի հանձնախմբի մեջ:

Մասնագիտական կրթության որակի ապահովման բաժնի ավագ մասնագետ Մ.Ճաղարյանը հիմնական գծերով ներկայացրեց հանձնախմբի անդամների պարտականություններն ու անելիքները:

Տնօրենը ուսանողներին կոչ արեց լինել ավելի ակտիվ, նախաձեռնող, պահանջատեր, միևնույն ժամանակ օբյեկտիվ: