2014թ. հոկտեմբերի 9-ին ԵՊՀ Իջևանի մասնաճյուղի տնօրեն Ս.Առաքելյանը հանդիպում ունեցավ Իջևանի ավագ դպրոցի 12-րդ դասարանի մի խումբ աշակերտների հետ:

Հանդիպմանը մասնակցում էին նաև մասնաճյուղի մասնագիտական կրթության և պրակտիկայի կազմակերպման բաժնի վարիչ Վ.Աղաբաբյանը, անձնակազմի կառավարման բաժնի վարիչ Ա.Հովհաննիսյանը, դպրոցի տնօրենը և ուսուցիչներ:

Հանդիպման նպատակն էր աշակերտներին տալ մասնագիտական կողմնորոշում և մասնագիտությունների վերաբերյալ տեղեկատվություն:

Մասնաճյուղի տնօրեն Ս.Առաքելյանը աշակերտներին կոչ արեց հետևողական լինել մասնագիտությունների ընտրության հարցում, քանի որ դրանով են պայմանավորված հետագայում նրանց մասնագիտական ձեռքբերումները:

Տնօրենը ներկայացրեց մասնաճյուղում գործող մասնագիտությունները, ընդհանուր գծերով վերհանեց նրանց առանձնահատկություննները, ապա տեղեկացրեց, որ 2015 թվականից ԵՊՀ ԻՄ-ում կգործի նոր՝ «Հոգեբանություն» մասնագիտությունը:

Տնօրենը նշեց, որ մասնաճյուղը կարևորում է տարածաշրջանում արվեստների զարգացումը, և այդ նպատակով սույն թվականի հոկտեմբերի 15-ից մասնաճյուղում կգործի խմբակ, որի նպատակը կլինի օժտված և տաղանդավոր աշակերտներին նախապատրաստել «Կիրառական արվեստ» և «Դիզայն» մասնագիտությունների ընդունելության համար:

Նշվեց, որ մինչև նոյեմբերի 1-ը պարապմունքները համապատասխան մասնագետների կողմից կանցկացվեն անվճար:

Վերջում դպրոցի տնօրենը գոհունակություն հայտնեց մասնաճյուղի նման նախաձեռնության համար և նշեց, որ համագործակցությունը շարունակական բնույթ է կրելու:

2014թ. հոկտեմբերի 8-ին ԵՊՀ ԻՄ-ի հումանիտար գիտությունների ֆակուլտետում տեղի ունեցավ «Աչքերը հոգու հայելին են» թեմայով զեկուցումների ընթերցում, որը կազմակերպել էր մասնաճյուղի ուսանողական գիտական ընկերությունը:

Զեկուցումների թեման առաջարկել էր Հայոց լեզվի և գրականության ամբիոնի դոցենտ, բան. գիտ. թեկն. Աիդա Սարհատյանը:

Ներկա էին մասնաճյուղի հայոց լեզվի և գրականության ամբիոնի դասախոսներ, վարչական անձնակազմի ներկայացուցիչներ, ուսանողներ:

Զեկուցումներ կարդացին «Հայոց լեզու և գրականություն» մասնագիտության 1-ին կուրսի ուսանողուհի Տաթևիկ Հովսեփյանը, 3-րդ կուրսի ուսանողուհիներ Գոհար Գրիգորյանը և Մարուսյա Հովհաննիսյանը, «Մանկավարժություն և հոգեբանություն» մասնագիտության 2-րդ կուրսի ուսանողուհի Մարիամ Ղազարյանը:

Զեկուցումների նյութը ներկայացնում էր «Հայոց լեզու և գրականություն» մասնագիտության 3-րդ կուրսի ուսանողուհի Նարինե Ամիրխանյանը:

Զեկուցողները ընտրված թեմային մոտեցել էին ըստ իրենց մասնագիտությունների. նրանք ոչ միայն ներկայացրին զեկուցումներ, այլև հանդես եկան բանաստեղծություններով ու երգերով:

Հնչեցին հայ անվանի գրողներ Պարույր Սևակի, Համո Սահյանի բանաստեղծությունները` նվիրված աչքերին, նրանց գեղեցկությանն ու խորությանը:

Ուսանողների այս հետքրքիր նախաձեռնության կապակցությամբ վերջում իրենց գոհունակությունն արտահայտեցին դասախոսները:

2014թ. հոկտեմբերի 7-ին ԵՊՀ ԻՄ-ի կիրառական արվեստի ֆակուլտետի դահլիճում տեղի ունեցավ «Տավուշ» ռազմահայրենասիրական ակումբի անդամներին Երկրապահ կամավորների միության վկայականներ հանձնելու հանդիսավոր արարողությունը:

Ներկա էին Երկրապահ կամավորների միության Տավուշի մարզային խորհրդի նախագահ Ռուդիկ Դավթյանը, մասնաճյուղի տնօրեն Սամվել Առաքելյանը, վարչական և պրոֆեսորադասախոսական անձնակազմի ներկայացուցիչներ, ուսանողներ:

Մասնաճյուղի ռազմահայրենասիրական ակումբի անդամները կազմակերպել էին տոնական միջոցառում, որի ընթացքում հնչեցին ազգային-հայրենասիրական ոգեշունչ երգեր ու բանաստեղծություններ («Կիլիկիա», «Զինվորի երգը», «Մարտիկի երգը», «Գարեգին Նժդեհ», «Սասնա պարը» և այլն), թնդաց «Հաղթանակի պարը»:

Ներկայացվեց «Երկրապահ կամավորների միություն» հասարակական կազմակերպության համառոտ պատմությունը:

Մասնաճյուղի տնօրեն Ս.Առաքելյանը շնորհակալություն հայտնեց մասնակիցներին` հայրենասիրական բարձր ոգով ներշնչված անկեղծ ու անմիջական ելույթների համար. «Մենք հպարտ ենք, որ ունենք ձեզ նման երիտասարդություն, որն իր հայրենիքի, իր հայրենի հող ու ջրի իսկական տիրոջ ու պաշտպանի գիտակցությունն ունի, հայրենիք, առանց որի գոյության` ամեն ինչ դառնում է անիմաստ…»:

Այնուհետև ԵՊՀ ԻՄ-ի տնօրեն Սամվել Առաքելյանը և ԵԿՄ Տավուշի մարզային խորհրդի նախագահ Ռուդիկ Դավթյանը մասնաճյուղի «Տավուշ» ռազմահայրենասիրական ակումբի անդամներին հանձնեցին Երկրապահ կամավորների միության «Երիտասարդ երկրապահ»-ի վկայականները: