2013թ. ապրիլի 27-ին ԵՊՀ Իջևանի մասնաճյուղում տեղի ունեցավ դպրոցականների ինտելեկտուալ խաղ, որը կազմակերպել էին Մինչհամալսարանական կրթության և մասնագիտական կողմնորոշման բաժինն ու Ուսանողական գիտական ընկերությունը:

Մասնակցում էին Տավուշի մարզի 11 դպրոցների (Բերդի վարժարան, Իջևանի և Բերդի ավագ, Այրումի, Ազատամուտի, Աչաջրի, Դովեղի, Թեղուտի, Խաշթառակի, Բերդավանի, Գետահովիտի միջնակարգ դպրոցներ) 12-րդ դասարանի աշակերտներից կազմված 5-հոգանոց թիմեր:

Ինտելեկտուալ խաղին ներկա էին ԵՊՀ ԻՄ-ի տնօրենը, ֆակուլտետների դեկանները, ՄԿՄԿ բաժնի վարիչը, ՈՒԳԸ-ի նախագահը, դասախոսներ, ուսանողներ:

Խաղը վարում էր Մելինե Մելիքյանը: Այն ընթացավ երկու փուլով: Երկրորդ փուլ անցան առավելագույն միավորներ հավաքած 5 թիմեր:

1-ին տեղը գրավեց Բերդավանի, 2-րդ տեղը` Խաշթառակի միջնակարգ դպրոցը:

Ելույթ ունեցավ մասնաճյուղի տնօրեն Ս.Առաքելյանը: Նա շնորհակալություն հայտնեց բոլոր մասնակիցներին,  դպրոցների տնօրեններին և ուսուցիչներին, շնորհավորեց հաղթողներին: Նա խոսեց ԵՊՀ Իջևանի մասնաճյուղի և նրա մասնագիտությունների մասին, խորհուրդ տվեց ընտրել ճիշտ մասնագիտություն և լավ սովորել:

1-ին և 2-րդ տեղերը գրաված թիմերը ստացան պատվոգրեր ու մրցանակներ: Մյուս թիմերը ստացան շնորհակալագրեր: Մրցանակ տրվեց նաև Իջևանի ավագ դպրոցին, որը պատասխանել էր մրցանակային հարցին:

2013թ. ապրիլի 19-ին Կիրառական արվեստի ֆակուլտետում կայացավ ավարտական աշխատանքների նախապաշտպանությունը, որին ներկա էին ֆակուլտետի գեղխորհրդի անդամները, աշխատանքները ղեկավարող դասախոսները:

Հրավիրված էին Ուսումնամեթոդական վարչության պետ Ա.Դավթյանը, վարչության ավագ տեսուչ Գ.Գյոզալյանը, Կրթության որակի ապահովման և գնահատման բաժնի մասնագետ Վ.Աղաբաբյանը, Հասարակայնության հետ կապերի և մամուլի պատասխանատու Հ.Վանյանը:

Ավարտական կուրսի ուսանողները իրենց աշխատանքները ներկայացրին Գեղխորհրդին՝ աշխատանքի կատարողականը ստուգելու, մինչև պաշտպանությունը անհրաժեշտ ցուցումներ ստանալու և բացթողումները լրացնելու համար:

Գեղխորհուրդը ուսանողներին ներկայացրեց ավարտական աշխատանքների պահանջները՝ համապատասխան միավորներով.

1. Ներկայացման որակը (0-6),
2. ձևակերպման որակը (0-6),
3. կատարման ինքնուրույնության աստիճանը (0-6),
4. արդիականությունը (0-2):

«Գեղանկարչություն» թեմայով ավարտական աշխատանք կատարող ուսանողները գեղխորհրդի կողմից  ստացան մի շարք ցուցումներ:

Մասնավորապես նշվեց, որ մեկի փոխարեն ներկայացվի երկու գեղանկար, բնանկարի կոմպոզիցիան լինի հավաքական էտյուդների արդյունք, որոնք նկարված լինեն բնօրինակից և համապատասխանեն մեր տարածաշրջանին:

Փայտի գեղարվեստական մշակմանը վերաբերող ավարտական աշխատանքների վերաբերյալ նշվեց, որ անհրաժեշտ է հաշվի առնել ընտրված փայտատեսակի կառուցվածքային առանձնահատկությունները, ընդգծել զարդանախշերը՝ աշխատանքների գեղարվեստական արժեքը մեծացնելու նպատակով, իսկ որոշ աշխատանքներ ապահովել պաշտպանիչ ծածկույթով:

Տեքստիլ բաժնի ավարտական աշխատանքների մասին ցուցումները վերաբերում էին գլխավորապես նրանց շրջանակներին և ցուցադրման հետ կապված խնդիրներին:

Կային գոբելեններ, որոնք շրջանակի կամ ենթաշրջանակի կարիք ունեին:

Ընդհանուր պահանջն այն էր, որ ուսանողները պաշտպանության ժամանակ կարողանան իրենց աշխատանքները ներկայացնել որպես պորտֆոլիո նախագծման արդյունք: