2022թ. սեպտեմբերի 26-ին ԵՊՀ ԻՄ-ի «Հայոց լեզու և գրականություն» մասնագիտության առկա ուսուցման 2-4-րդ կուրսերի մի խումբ ուսանողներ Հայոց լեզվի և գրականության ամբիոնի դոցենտ, բ.գ.թ. Լ.Թումանյանի ուղեկցությամբ այցելեցին ՀՀ գիտությունների ազգային ակադեմիա՝ Լեյդենի համալսարանի դասախոս, հայագետ, բ.գ.թ. Հրաչ Մարտիրոսյանի զեկուցում-դասախոսությունն ունկնդրելու: Այն նախաձեռնել էր Հայոց լեզվի և գրականության ամբիոնի ասիստենտ, բ.գ.թ. Ս.Հովհաննիսյանը:

Զեկուցում-դասախոսության նպատակը հայոց լեզվի և մշակույթի ծագման ու պատմական զարգացման ընդհանուր նկարագիրը հնարավորինս հանրամատչելի ձևով ներկայացնել էր:

Ակնարկային դասախոսության թեմատիկ հենքում հայոց լեզվի պատմությունն էր՝ հնդեվրոպական ակունքներից մինչև գրաբար, աշխարհաբար ու բարբառներ: Բանախոսն առանձնահատուկ ուշադրություն դարձրեց Արցախի ու Սյունիքի տարածքների բարբառային ու լեզվամշակութային առանձնահատկություններին, ինչպես նաև այդ տարածաշրջաններում հայոց հնագույն դիցուհու պաշտամունքի մնացուկներին:

Դասախոսության ընթացքում կարևորվեցին լեզվական փոփոխությունների մշտարթուն ընթացքն ու տրամաբանությունը, հնչյունափոխական օրենքի ըմբռնումը, լեզվամշակութային բազմաշերտ իրողությունները, Հայկական լեռնաշխարհում (մասնավորապես Արցախում և Սյունիքում) հայոց լեզվի պատմական ներկայության լեզվամշակութային ու ժամանակագրական բնութագրերը, արդի լեզվական մարտահրավերները և այլն:

Զեկուցում-դասախոսությունն ուղեկցվեց ակտիվ քննարկումներով և մտքերի փոխանակությամբ, մասնավորապես՝ հայագիտական արդյունքի միջազգայնացման հարցերի քննարկմամբ:

Այս դժվարին օրերին հայագիտական նման դասընթացն ունկնդիրներին ստիպեց վերադառնալ իրենց ակունքներին, լցվել տոկունությամբ, տոգորվել հայրենասիրությամբ և հայերենասիրությամբ:

 2022թ. սեպտեմբերի 22-ին հերթական անգամ ԵՊՀ Իջևանի մասնաճյուղ այցելեց «Հայ-ֆրանսիական բարեկամություն և փոխանակում» միության անդամ պարոն Ջոս Միլիները:

Այցելության նպատակը ԵՊՀ ԻՄ-ի «Ֆրանսերեն լեզու և գրականություն» մասնագիտության վճարովի ուսուցման համակարգում սովորող բոլոր (տասներկու) ուսանողներին, ինչպես նաև անվճար ուսուցման համակարգի 3-րդ կուրսեցիներ Լ.Շախպարյանին, Ն.Գասպարյանին, Ա.Շահնազարյանին և Ա.Օթարյանին կրթաթոշակ հանձնելն էր:

Հանդիպման ընթացքում պարոն Միլիները կրթաթոշակները հանձնեց ուսանողներին, ովքեր առանձնահատուկ շնորհակալություն հայտնեցին «Հայ-ֆրանսիական բարեկամություն և փոխանակում» միության նախագահ տիկին Պոլետ Կուտանին՝ երկարատև համագործակցության, պարբերաբար կրթաթոշակներ տրամադրելու համար և խոստացան լինել ֆրանսերենի դեսպանները Տավուշի մարզում:

Այնուհետև կայացավ ԵՊՀ ԻՄ-ի տնօրենի պաշտոնակատար  Ա.Մակարյանի հետ Ջոս Միլիների հանդիպումը, որի ընթացքում քննարկվեցին երկկողմ համագործակցության հեռանկարները:

Հավելենք, որ ԵՊՀ Իջևանի մասնաճյուղի և «Հայ-ֆրանսիական բարեկամություն և փոխանակում» միության միջև համագործակցությունը ծավալվել է 2012 թվականից, երբ նույն թվականի սեպտեմբերի 28-ին մասնաճյուղ այցելած միության անդամներ Պոլետ Կուտանը և Բեռնար Կուտանը ներկայացրել էին կրթության ոլորտին վերաբերող ծրագիր, որը հավանության էր արժանացել ԵՊՀ ԻՄ-ի կողմից: 2021թ․ հոկտեմբերի 2-ին էլ մասնաճյուղի և միության միջև ստորագրվեց համագործակցության համաձայնագիր, ըստ որի՝ ֆրանսիական կողմը շարունակելու է կրթաթոշակներ հանձնել ԵՊՀ ԻՄ-ի «Ֆրանսերեն լեզու և գրականություն» մասնագիտության վճարովի ուսուցման համակարգի ուսանողներին, ինչպես նաև անվճար ուսուցման համակարգում սովորող այն ակտիվ ուսանողներին, ովքեր կնպաստեն մարզի դպրոցներում ֆրանկոֆոնիայի տարածմանը:

 2022թ. սեպտեմբերի 20-ին ԵՊՀ Իջևանի մասնաճյուղի գրադարանը հերթական անգամ համալրվեց մասնագիտական գրականությամբ:

Ստորև ներկայացնում ենք ձեռք բերված գրքերի ցանկը, որոնք հիմնականում վերաբերում են մասնագիտական հետևյալ ոլորտներին՝ օտար լեզու և գրականություն (ֆրանսերեն, անգլերեն, ռուսերեն),  հայոց լեզու և գրականություն, տուրիզմ, պատմություն, արվեստի պատմություն. 

1. Ջուլհակյան Մ.և ուրիշներ, Ֆրանսերենի դասագիրք, Երևան, 2013, 306 էջ (10 օրինակ):
2. Պոտոսյան Ա.Հ., ՀՀ տնտեսական և սոցալական աշխարհագրություն, Երևան, 2022, 546 էջ (10 օրինակ):
3. Русская орфография в упражнениях, А.В. Акопян, Д.Ю. Газарова, С.А. Мкртычян-Лалаян, Отв.ред. П.Б. Балаян, Фак. русской филологии, Ереван, Изд-во ЕГУ, 2013, 272 с.(5 օրինակ):
4. Նորագույն պատմություն, խմբ՝ Գալկին Ի. և ուրիշներ, Երևան, 1983, 664 էջ:
5. Եվրիպիդես, Ողբերգություններ, Երևան, 2021, 480 էջ:
6. Աղաբաբյան Ա., Ռեզիդենտը, Երևան, 2021, 472 էջ:
7. Մովսիսյան Արտակ, Հայաստանի նախապաշտոցյան գրավոր մշակույթի պատմություն, Երևան, 448 էջ:
8. Քոլլինգվուդ Ռ., Արվեստի հիմունքներ, Երևան, 2007, 423 էջ:
9. Սարուխանյան Ն., Հայ պատմագիտությունը 19-րդ դարում և 20-րդ դարասկզբին, Երևան, 2013, 544 էջ:
10. Նազարյան Ն., Մայրենին բոլորի համար, Երևան, 2007, 384 էջ:
11. Ղևոնդ Ալիշան, Հայոց հին հավատք կամ հեթանոսական կրոնները, Երևան, 2021, 312 էջ:
12. Սարգսյան Դ., Հոգեբանության պատմություն, Երևան, 2022, 272 էջ:
13. Ավետիսյան Յու և ուրիշներ, Հայոց լեզու և խոսքի մշակույթ, Երևան, 2019, 288 էջ:
14. Մխիթարյան Լ., Մարաշի ասեղնագործության գաղտնիքները, Երևան, 2020, 200 էջ:
15. Քյուրքչյան Ա., Խաչերեան Հ., Հայկական զարդատառ, Երևան, 2012, 192 էջ:

 2022թ. սեպտեմբերի 1-ին՝ Գիտելիքի և դպրության օրը, ԵՊՀ Իջևանի մասնաճյուղում տոնական միջոցառմամբ մեկնարկեց նոր՝ 2022-23 ուսումնական տարին:

Նոր ուստարում ԵՊՀ ԻՄ-ն իր հարկի տակ դիմավորեց առկա ուսուցման 186 առաջին կուրսեցիների, որոնց համար Ուսանողական խորհուրդը կազմակերպել էր միջոցառում:

Միջոցառման սկզբում հնչեցին Հայաստանի Հանրապետության օրհներգը և Երևանի պետական համալսարանի հիմնը, 1 րոպե լռությամբ հարգանքի տուրք մատուցվեց Արցախյան 44-օրյա պատերազմում անմահացած մեր հայորդիների հիշատակին:

Գիտելիքի և դպրության օրվա, նոր ուսումնական տարվա մեկնարկի առթիվ ԵՊՀ ԻՄ-ի տնօրենի պաշտոնակատար Անուշավան Մակարյանը շնորհավորական ուղերձ հղեց բոլոր համալսարանականներին՝ բուհի վարչական և պրոֆեսորադասախոսական անձնակազմին, ուսանողներին և հատկապես առաջին կուրսեցիներին: Նա մասնավորապես նշեց, որ Գիտելիքի օրը ոչ միայն պետական, այլև լայն իմաստով ազգային տոն է, որովհետև իր բազմադարյա գոյության ընթացքում հայ ազգի համար գիտությունը, գիտելիքը, գիրքը եղել են պաշտամունքի առարկա, և մեր ազգի բազմաթիվ ներկայացուցիչներ, գիտության մշակներ իրենց ներդրումն են ունեցել համաշխարհային քաղաքակրթության զարգացման մեջ: Տնօրենը շնորհավորեց բոլորին, բարի գալուստ և մաղթանքներ հղեց առաջին կուրսեցիներին:

Այնուհետև կայացավ առաջին կուրսեցիների երդման հանդիսավոր արարողությունը: Երդումն ընթերցեց մասնաճյուղի այս տարվա լավագույն դիմորդ, «Ռուսաց լեզու և գրականություն» մասնագիտության առաջին կուրսի ուսանողուհի Անահիտ Չիբուխչյանը: Նորաթուխ համալսարանականները երդվեցին արժանի լինել ԵՊՀ Իջևանի մասնաճյուղի ուսանող լինելու բարձր կոչմանը, լինել օրինավոր քաղաքացիներ, նպաստել երկրի պետականության զարգացմանը:

Գիտելիքի բանալին ԵՊՀ ԻՄ-ի «Ֆրանսերեն լեզու և գրականություն» կրթական ծրագրի 4-րդ կուրսի ուսանողուհի Լուսյա Շախպարյանը՝ որպես ավագ ընկեր, հանձնեց Անահիտ Չիբուխչյանին:

Տոնական միջոցառման ընթացքում հնչեցին երաժշտական կատարումներ:

Միջոցառումից հետո լսարաններում մեկնարկեցին նոր՝ 2022-2023 ուսումնական տարվա դասերը: 

 Սիրելի՜ համալսարանականներ, սիրով և սրտանց շնորհավորում եմ բոլորիս Գիտելիքի և դպրության օրվա կապակցությամբ՝ մաղթելով արդյունավետ ուսումնական տարի, հաջողություններ ու նոր ձեռքբերումներ։

Երևանի պետական համալսարանի առաքելությունը կրթական ու հետազոտական գործընթացների շարունակական և համակարգային արդիականացումն է, ինչը հնարավորություն կտա պատրաստելու որակյալ մասնագետներ ու ստեղծելու մտավոր անհրաժեշտ արդյունք, որն ավելի լավը կդարձնի մեր կյանքն ու մեզ շրջապատող աշխարհը։

Համալսարանի հիմնական նպատակն այնպիսի միջավայրի ձևավորումն է, որտեղ ուսանողները, դասախոսներն ու հետազոտողները կունենան նոր գիտելիք ստեղծելու և կիրառելու բացառիկ հնարավորություններ ու պայմաններ, ինչը ենթադրում է կամք, եռանդ, կառուցողական համագործակցություն համալսարանական համայնքի ներսում և դրանից դուրս, ինչպես նաև համալսարանականների ընդհանուր տեսլականի և նպատակների հստակեցմանն ուղղված համատեղ աշխատանք։

Սիրելի՜ ուսանողներ, անչափ կարևոր է, որ ԵՊՀ-ում դուք ոչ միայն ստանաք գիտելիքներ, այլև սովորեք ինքնուրույն մտածել, կարողանաք փնտրել ստեղծագործական լուծումներ, հասկանաք, թե ինչպես կյանքի կոչեք ձեր գաղափարներն ու լիարժեք ձևավորվեք որպես անհատ ու քաղաքացի։

ԵՊՀ զարգացման մեր ծրագրով, նորարար գաղափարներով ու նոր նախաձեռնություններով կշարունակենք անել ամեն ինչ, որ դուք այստեղ ստանաք որակյալ կրթություն, զարգացնեք ձեր ներուժը, ստեղծագործեք, լինեք երջանիկ և ձեր գործունեությամբ նպաստեք մեր երկրի զարգացմանն ու առաջընթացին։ Ես վստահ եմ, որ այս նպատակի իրագործման մեր լավագույն գործընկերը հենց դուք եք լինելու։

Այսօր առանձնահատուկ ուզում եմ շնորհավորել բոլոր առաջինկուրսեցիներին և բարի գալուստ մաղթել Երևանի պետական համալսարան։ Սիրելի՜ առաջինկուրսեցիներ, այսօրվանից դուք կրթական ու գիտական փառավոր պատմություն ունեցող համալսարանի ուսանող եք և համալսարանական մեծ ընտանիքի անդամ։ Ես հույս ունեմ, որ դուք կշարունակեք ԵՊՀ լավագույն ավանդույթները, կօգտվեք ձեզ ընձեռված բոլոր հնարավորություններից և լիարժեք կվայելեք ուսանողական կյանքը։

Մեկ անգամ ևս շնորհավորում եմ բոլորիս տոնական այս օրվա կապակցությամբ։