2022թ. հունիսի 30-ին տեղի ունեցավ գործնական առցանց հանդիպում ԵՊՀ Իջևանի մասնաճյուղի և Ռուսաստանի պետական մասնագիտական-մանկավարժական համալսարանի ներկայացուցիչների միջև:

Առցանց հանդիպմանը ԵՊՀ Իջևանի մասնաճյուղից մասնակցում էին տնօրենի պաշտոնակատար Անուշավան Մակարյանը, փոխտնօրեն Մհեր Օթարյանը, գիտական քարտուղար Մհեր Աթոյանը և Օտար լեզուների ամբիոնի դոցենտ Սվետլանա Միխայլովնա Մինասյանը: Ռուսաստանի պետական մասնագիտական-մանկավարժական համալսարանը ներկայացնում էին դաստիարակչական աշխատանքի և երիտասարդական քաղաքականության գծով պրոռեկտոր Անտոն Իգորևիչ Լիժինը և մանկավարժական գիտությունների դոկտոր, պրոֆեսոր, Ռուսաց լեզվի և խոսքի մշակույթի ամբիոնի վարիչ Ալյոնա Ալեքսանդրովնա Եվտյուգինան:

Հանդիպման ընթացքում համալսարանների ներկայացուցիչները պատրաստակամություն հայտնեցին հետամուտ լինել կնքված համագործակցության հուշագրի նպատակների իրականացմանը, որից հետո առավել մանրամասն քննարկեցին երկու բուհերի առաջնահերթությունները, Հայաստանում և Ռուսաստանում համակցված/հիբրիդային կրթության զարգացման ապագա համատեղ գործունեության և նախագծերի ճանապարհային քարտեզը:

Քննարկումն անցավ անմիջական մթնոլորտում: Ա.Մակարյանը նշեց, որ նման հանդիպումներն ամրապնդում են երկրների և համալսարանների միջև բարեկամությունը, թույլ են տալիս գնահատել աշխատանքի որակը, զարգացնել և ընդլայնել մտահորիզոնը գիտական հետազոտական ոլորտում. «Այսպիսի հանդիպումներն ու քննարկումները տարբեր բուհերի գործընկերների հետ, որոնք ակտիվորեն աշխատում և հաջողություն են գրանցում ուսումնագիտական աշխատանքում ինչպես Ռուսաստանի Դաշնությունում, այնպես էլ Հայաստանի Հանրապետությունում, կարող են ունենալ զգալի ներդրում կրթության որակի բարձրացման գործում: Այսօր բարենպաստ հնարավորություններ են բացվում նաև տեղեկատվական տեխնոլոգիաների կրթության ոլորտում համատեղ նախագծերի իրականացման համար: Դրանց նկատմամբ հետաքրքրություն է ցուցաբերում թե՛ հայկական, թե՛ ռուսական կողմը: Մենք շահագրգռված և պատրաստ ենք համագործակցության, փորձի փոխանակման, համատեղ նախագծերի ու ծրագրերի իրականացման»:

Ա.Լիժինն իր հերթին նշեց, որ այսօր անհրաժեշտ է իրականացնել դասախոսների և ուսանողների փոխանակում, զարգացնել համատեղ հետազոտական և ուսումնամեթոդական հրատարակությունների առկա դրական փորձը, կիրառել ուսուցման հատուկ համակցված ձևեր: Ա.Եվտյուգինան ավելի մանրամասն ներկայացրեց հիբրիդային ուսուցման Ռուսաստանի պետական մասնագիտական-մանկավարժական համալսարանի փորձը: Ս.Մինասյանը խոսեց համակցված ուսուցման հնարավոր ձևափոխությունների մասին՝ որպես օրինակ բերելով 2022 թվականի մարտին ԵՊՀ Իջևանի մասնաճյուղում իրականացված «Սոցիալ-մանկավարժական նորարարությունները կրթության մեջ» միջազգային երիտասարդական գիտագործնական համաժողովը:

Կնքված հուշագրով և գործողությունների ճանապարհային քարտեզի հիման վրա կողմերն իրենց պատրաստակամությունը հայտնեցին համագործակցությունը զարգացնելու հետևյալ  ուղղություններով.

• համատեղ դասագրքերի, ուսումնական նյութերի մշակում,
• համատեղ դասընթացների մշակում մագիստրանտների, ավագ կուրսերի ուսանողների համար,
• համալսարանական գիտնականների պլանավորված համատեղ հրապարակումներ գիտական ամսագրերում,
• ուսումնական գործընթացի արդիականացում՝ որպես կրթական միջավայրի որակի բարելավման երաշխիք,
• համատեղ գիտական կոնֆերանսների, օլիմպիադաների, մրցույթների կազմակերպում (առցանց)՝ օլիմպիադաների և մրցույթների արդյունքների, կոնֆերանսի նյութերի հրապարակմամբ,
• ՀՀ և ՌԴ գիտական ու նախաձեռնող նախագծերի մրցույթներին մասնակցության համատեղ նախագծեր մշակելու նպատակով գիտական ստեղծագործական խմբերի ձևավորում:

ԵՊՀ Իջևանի մասնաճյուղի և Ռուսաստանի պետական մասնագիտական-մանկավարժական համալսարանի համագործակցությանը նվիրված առցանց հանդիպումն անցավ կառուցողական երկխոսության մթնոլորտում: Երկուստեք ցանկություն հայտնվեց զարգացնելու համագործակցությունը՝ մասնագիտական-մանկավարժական գործունեության մեջ նոր բարձունքներ նվաճելու նպատակով:

2022թ. հունիսի 30-ին Կրթական բարեփոխումների և դասախոսների վերապատրաստման բաժինը Ուսումնամեթոդական վարչության հետ համատեղ անցկացրեց ԵՊՀ ԻՄ-ում ուսումնական գործընթացի կազմակերպման նոր կարգի վերաբերյալ հանդիպում–քննարկում:

Հանդիպմանը ներկա էին ԵՊՀ ԻՄ-ի տնօրենի պաշտոնակատար Ա.Մակարյանը, փոխտնօրեն Մ.Օթարյանը, ֆակուլտետների դեկանները, կրթական ծրագրերի ղեկավարները, դեկանատների գործավարներն ու ամբիոնների լաբորանտները:

Ա.Մակարյանը ողջունեց երկու ստորաբաժանումների համատեղ նախաձեռնությունը՝ մասնավորապես նշելով, որ այդ հանդիպումը շատ կարևոր է, քանի որ ԵՊՀ ԻՄ-ի ուսումնական գործընթացի կազմակերպման նոր կարգում (30.04.2022թ. հաստատված ԵՊՀ ԻՄ-ի գիտական խորհրդի կողմից) կան գնահատման համակարգին վերաբերող էական փոփոխություններ, որոնց մասին պետք է տեղյակ լինեն բոլոր համալսարանականները, առաջնահերթ՝ ամբիոնների վարիչները, կրթական ծրագրերի ղեկավարները, դասախոսները, դեկանատների աշխատակիցները, ովքեր այս սեպտեմբերից աշխատելու են այդ կարգի համաձայն:

Պարոն Մակարյանը ևս մեկ անգամ հիշեցրեց, որ կարգն ուժի մեջ է մտնելու 2022թ. սեպտեմբերի 1-ից և վերաբերելու է 2022-2023 ուստարում և դրանից հետո ԵՊՀ ԻՄ ընդունված և՛ բակալավրիատի, և՛ մագիստրատուրայի ուսանողներին:

Այնուհետև Ուսումնամեթոդական վարչության պետ Ա.Դավթյանը մանրամասն ներկայացրեց ԵՊՀ ԻՄ-ի ուսումնական գործընթացի կազմակերպման կարգում կատարված փոփոխությունները: Նախ նա անդրադարձավ կարգի փոփոխման նպատակներին, որոնք են՝ բազմագործոն  գնահատման  համակարգ ներդնելը, դասախոսի  ազատության  աստիճանը մեծացնելը, դրական արդյունարար գնահատական միայն  մեկ  բաղադրիչով  չձևավորելը:

Ա.Դավթյանը շեշտեց, որ փոխվել է նաև գնահատման սանդղակը. այսուհետ «անբավարար» է համարվում 0-9, «բավարար»՝ 10-13, «լավ»՝ 14-17 միավորները:

Ապա առավել հանգամանորեն ներկայացվեցին եզրափակիչ գնահատումով, առանց եզրափակիչ գնահատման, առանց ընթացիկ քննությունների գնահատման դասընթացների գնահատման ձևերը, պարտադիր և ընտրովի բաղադրիչները, նրանց տրվող առավելագույն և նվազագույն միավորները, քննությունների վերահանձնման կարգը և քննական տեղեկագրերի տեսքերը:

Վերջում տեղի ունեցավ քննարկում. մասնակիցների կողմից ուղղված հարցերին տրվեցին պատասխաններ:

 2022թ. հունիսի 28-29-ը ԵՊՀ Իջևանի մասնաճյուղում տեղի ունեցան «Գծանկար» և «Կոմպոզիցիա» առարկաների ներբուհական քննությունները՝ «Դեկորատիվ-կիրառական արվեստ» և «Դիզայն» կրթական ծրագրերով ընդունելության համար:

Քննությունների անցկացման համար ձևավորվել էր տեսաձայնագրման սարքերով հագեցած 2 քննական կենտրոն: Քննություններն անցկացվեցին մեկական օրով՝ 4-ական ժամ տևողությամբ: Քննասենյակում դիմորդներն իրենց տեղն ընտրեցին վիճակահանությամբ:

«Գծանկար» առարկայի քննության ժամանակ հանձնարարվող առաջադրանքը նատյուրմորտ էր` հարթ ֆոնի վրա 3 գիպսե առարկաներից, գրաֆիտե մատիտով պարզ լուսավորությամբ` A2 ֆորմատի թղթի վրա, իսկ «Կոմպոզիցիա» առարկայի համար պարզ երկրաչափական, բուսական կամ կենդանական մարմիններից կառուցված զարդանախշային հորինվածք էր՝ դեկորատիվ մեկնաբանությամբ՝ A3 ֆորմատի թղթի վրա:

«Դեկորատիվ-կիրառական արվեստ» կրթական ծրագրով մասնաճյուղ էին դիմել 12, իսկ «Դիզայն» կրթական ծրագրով՝ 6 դիմորդներ: «Գծանկար» առարկայի քննության գնահատման ընթացքում հանձնաժողովի անդամները հաշվի էին առնում հորինվածքի գրագետ տեղադրումը թղթի մեջ, կառուցողական մոտեցումը, ծավալների տարածածավալային պատկերումը, ծավալների տոնային ընկալումը և նյութականության ստացումը, հորինվածքի եզրափակիչ մշակումը:

«Դեկորատիվ-կիրառական արվեստ» կրթական ծրագրի «Կոմպոզիցիա» առարկայի քննության ժամանակ գնահատվում էին զարդանախշերի ընտրությունը և գրագետ համադրելիությունը, կոմպոզիցիա ստեղծելու ստեղծագործական մտքի կիրառումը, զարդանախշերով միջնադաշտի և եզրային գոտիների ստեղծումը, դետալների՝ միմյանց  նկատմամբ կոմպոզիցիոն աշխատանքի ամբողջացումը, կոմպոզիցիայում զարդանախշերի չափերի ներդաշնակ համադրության առկայությունը, զարդանախշերի գունային սահուն, հակադիր, կտրուկ անցումների, տոնայնության արտացոլումը, զարդանախշերի հստակ սահմանազատման առկայությունը գունային տոների միջոցով, տաք և սառը գույների համադրության և ստեղծագործական մտքի առկայությունը:

«Դիզայն» կրթական ծրագրի «Կոմպոզիցիա» առարկայի քննության ժամանակ գնահատվում էին երկրաչափական ծավալային մարմինների գրագետ համադրելիությունը, կոմպոզիցիա ստեղծելու ստեղծագործական մտքի կիրառումը, երկրաչափական ծավալային մարմիններով կոմպոզիցիոն հորինվածքի դինամիկ ամբողջացումը (սկիզբ, հասունացում, ավարտ), կոմպոզիցիոն հորիվածքում մարմինների չափերի ներդաշնակ համադրության առկայությունը, գունային սահուն, հակադիր, կտրուկ անցումների տոնայնության արտացոլումը, երկրաչափական ծավալային մարմինների հստակ սահմանազատման առկայությունը գույների տոների միջոցով:

Քննական հանձնաժողովի նախագահը փաստեց, որ դիմորդների պատրաստվածության մակարդակը բավարար էր:

Քննությունների նվազագույն շեմը հաղթահարեցին բոլոր դիմորդները, որի կապակցությամբ սիրով շնորհավորում ենք նրանց՝ մաղթելով հաջողություններ և ամենայն բարիք նոր՝ 2022-2023 ուսումնական տարում:

2022թ. հունիսի 17-26-ը ԵՊՀ Իջևանի մասնաճյուղում կայացան հեռակա ուսուցման բակալավրի՝ 2021-2022 ուստարվա շրջանավարտների ավարտական աշխատանքների պաշտպանությունները 8 կրթական ծրագրերով՝ «Հոգեբանություն», «Բնապահպանություն և բնօգտագործում», «Պատմություն» «Տարրական մանկավարժություն և մեթոդիկա», «Ֆինանսներ (ըստ ոլորտի)», «Զբոսաշրջություն», «Ինֆորմատիկա և կիրառական մաթեմատիկա», «Քարտեզագրություն և կադաստրային գործ»:

Ուսումնամեթոդական վարչության և ֆակուլտետների ղեկավարների խոսքով՝ պաշտպանություններն իրականացվել են գործող կարգի և հաստատված ժամանակացույցների համաձայն:

2021-2022 ուստարվա հեռակա ուսուցման բակալավրի կրթական ծրագրերով ամփոփիչ ատեստավորմանը մասնակցում էր 166 շրջանավարտ, որից 11-ը՝ նախորդ տարիներից. 5-ը՝ Տնտեսագիտության ֆակուլտետից, 4-ը՝ Հումանիտար գիտությունների ֆակուլտետից, 2-ը՝ Բնական գիտությունների ֆակուլտետից:

«Հոգեբանություն» կրթական ծրագրով ատեստավորվող 15 ուսանողից «գերազանց» ստացավ 2-ը, «լավ»՝ 5-ը, «բավարար»՝ 8-ը:

«Բնապահպանություն և բնօգտագործում» կրթական ծրագրով ատեստավորվող 19 ուսանողից «գերազանց» ստացավ 4-ը, «լավ»՝ 4-ը, «բավարար»՝ 11-ը:

«Պատմություն» կրթական ծրագրով ատեստավորվող 21 ուսանողից «լավ» ստացավ 3-ը, «բավարար»՝ 14-ը, «անբավարար»՝ 3-ը, չներկայացած՝ 1 ուսանող:

«Տարրական մանկավարժություն և մեթոդիկա» կրթական ծրագրով ատեստավորվող 26 ուսանողից «գերազանց» ստացավ 3-ը, «լավ»՝ 13-ը, «բավարար»՝ 10-ը:

«Ֆինանսներ (ըստ ոլորտի)» կրթական ծրագրով ատեստավորվող 31 ուսանողից «գերազանց» ստացավ 1-ը, «լավ»՝ 6-ը, «բավարար»՝ 14-ը, «անբավարար»՝ 9-ը, չներկայացած՝ 1 ուսանող:

«Զբոսաշրջություն» կրթական ծրագրով ատեստավորվող 13 ուսանողից «գերազանց» ստացավ 3-ը, «լավ»՝ 7-ը, «բավարար»՝ 3-ը:

«Ինֆորմատիկա և կիրառական մաթեմատիկա» կրթական ծրագրով ատեստավորվող 20 ուսանողից «գերազանց» ստացավ 5-ը, «լավ»՝ 8-ը, «բավարար»՝ 7-ը:

«Քարտեզագրություն և կադաստրային գործ» կրթական ծրագրով ատեստավորվող 21 ուսանողից «գերազանց» ստացավ 1-ը, «լավ»՝ 7-ը, «բավարար»՝ 13-ը:

ԵՊՀ ԻՄ–ի ղեկավարության և ամբողջ անձնակազմի անունից բակալավրի որակավորում ստանալու առթիվ սիրով շնորհավորում ենք 2022թ. հեռակա ուսուցման մեր շրջանավարտներին, նրանց ցանկանում ենք մեծ ձեռքբերումներ մասնագիտական ոլորտում և անձնական կյանքում, նպատակների իրականացում, ամենայն բարիք: