2020թ. նոյեմբերի 7-ին կայացավ 2020-2021 ուսումնական տարվա 1-ին կիսամյակում հետազոտական բաղադրիչ պարունակող դասընթացները վարող դասախոսների հետ առցանց հանդիպում-քննարկում, որը կազմակերպել էր ԵՊՀ ԻՄ-ի կրթական բարեփոխումների և դասախոսների վերապատրաստման բաժինը:

Այն վարեց ԵՊՀ ԻՄ-ի տնօրենի պաշտոնակատար Ա.Մակարյանը:

Հանդիպման սկզբում Ա.Մակարյանը հիշեցրեց, որ առաջնորդվելով 2020թ․ մարտի 12-ին ԵՊՀ գիտական խորհրդում հաստատված «Երևանի պետական համալսարանի բակալավրի և մագիստրոսի կրթական ծրագրերի մասնագիտական դասընթացներում հետազոտական աշխատանքի կատարման կարգով»՝ ԵՊՀ ԻՄ-ի բակալավրի և մագիստրոսի կրթական ծրագրերի մասնագիտական 2-6 դասընթացներում ներմուծվել է կուրսային աշխատանքներին փոխարինող հետազոտական աշխատանք, որի նպատակն է խթանել ուսանողների անհատական և խմբային հետազոտություն կատարելու ունակությունները և նպաստել նրանց մասնագիտական հմտությունների զարգացմանը:

Հանդիպման ընթացքում քննարկվեցին հետազոտական թեմաների ընտրության, աշխատանքների պատրաստման, դրանց ներկայացման և գնահատման չափանիշների վերաբերյալ դասախոսների մոտեցումները և իրականացված աշխատանքները:

Քննարկմանը մասնակցող դասախոսները ներկայացրին, որ ըստ նպատակահարմարության վերանայել են իրենց դասընթացների փաթեթները, մասնավորապես՝ վերջնարդյունքները, հետազոտության թեմաները և առաջադրանքները, ինքնուրույն աշխատանքների շրջանակներում իրականացվող նախագծերը, կիրառվող դասավանդման, ուսումնառության և գնահատման մեթոդները, գրականության ցանկը և այլն։

Առաջարկվեց պարբերական դարձնել հետազոտական բաղադրիչ պարունակող դասընթացները վարող դասախոսների հետ նման քննարկումները՝ իրենց առաջարկները,  հաջող փորձն ու իրականացված աշխատանքները ներկայացնելու նպատակով:

2020թ. հոկտեմբերի 23-24-ը ԵՊՀ Իջևանի մասնաճյուղում առաջին անգամ անցկացվեցին «Ընդհանուր մանկավարժություն» մասնագիտության «Դպրոցական մանկավարժություն և մեթոդիկա» կրթական ծրագրով 2020-2021 ուստարվա մագիստրատուրայի հեռակա ուսուցման ընդունելության հարցազրույցը և քննությունը։

ԵՊՀ ԻՄ-ի հեռակա ուսուցմամբ մագիստրատուրա լիցենզիայով սահմանված 25 տեղի համար ս.թ. սեպտեմբերի 10-ից մինչև հոկտեմբերի 12-ը դիմել էր մասնաճյուղի տարբեր տարիների և այլ ՀՀ պետական բուհերի բակալավրի, դիպլոմավորված մասնագետի կամ մագիստրոսի որակավորում ունեցող 38 շրջանավարտ: Նրանց մեծ մասը Տավուշի մարզի դպրոցներում արդեն դասավանդող ուսուցիչներ են կամ մասնագետներ, ովքեր նպատակ ունեն աշխատանք գտնել միջնակարգ ուսումնական հաստատություններում:

Ընդունելությունը կազմակերպվում է երկու փուլով. մանդատային հանձնաժողովի որոշմամբ հարցազրույց է կազմակերպվել 7 դիմորդի հետ, ովքեր ԵՊՀ ԻՄ-ում ստացել են մանկավարժի լրացուցիչ որակավորում, «Մասնագիտական մանկավարժություն» մասնագիտության բակալավրիատի առկա և հեռակա ուսուցման ձևերի վերջին երեք տարվա շրջանավարտներ են կամ ունեն առնվազն 5 տարվա մանկավարժական փորձ:

«Մանկավարժություն» առարկայից, ըստ նախապես տրամադրված հարցաշարի, քննություն պետք է հանձներ 31 դիմորդ: 6 դիմորդ քննությանը չի ներկայացել: Քննության արդյունքներին կարելի է տեղեկանալ այստեղ:

Մրցույթի արդյունքները կհրապարակվեն  հոկտեմբերի 27-ին:

«Դասավանդի՛ր, Հայաստան» հիմնադրամը, կարևորելով կրթության հասանելիությունը ինչպես դպրոցական, այնպես էլ բուհական մակարդակում, հայտարարում է ուսման վարձավճարը ամբողջապես փոխհատուցող կրթաթոշակ՝ բակալավրիատում և մագիստրատուրայում սովորող ավարտական կուրսի այն ուսանողների համար, որոնք.

• սովորում են բնագիտական, մաթեմատիկական կամ ՏՏ ուղղվածություն ունեցող ֆակուլտետներում (STEM),
• ունեն բարձր առաջադիմություն. ՄՈԳ-ը բարձր է 15-ից (20 բալանոց համակարգով),
• պատրաստակամ են տվյալ կրթական աստիճանը ստանալուց (բակալավրիատ/մագիստրատուրա) անմիջապես հետո միանալ «Դասավանդի՛ր, Հայաստան»-ի Առաջնորդության զարգացման երկամյա ծրագրին:

Կրթաթոշակին դիմելու համար մինչև նոյեմբերի 10-ը անհրաժեշտ է լրացնել հետևյալ հայտադիմումը՝ https://www.tfaforms.com/4848376:

Ընտրության գործընթացը.

• Հայտադիմում՝ https://www.tfaforms.com/4848376
• Անհատական հարցազրույց
• Պայմանագրի ստորագրում:

Այնուհետ ընտրված մասնակիցները, ըստ «Դասավանդի՛ր, Հայաստան»-ի ժամանակացույցի, կմիանան առցանց նախապատրաստական ծրագրին, իսկ 2021 թվականի հուլիսին՝ Ուսուցիչ-առաջնորդների ակադեմիային, որից հետո կմեկնարկի ծրագրին մանակցությունը։

«Դասավանդի՛ր, Հայաստան»-ի՝ ավարտական կուրսի ուսանողների համար նախատեսված կրթաթոշակի մանրամասները կարող եք տեսնել այստեղ:

Հարցերի դեպքում կարող եք դիմել Անժելա Ավագյանին (էլ. հասցե՝ anzhela.avagyan@teachforarmenia.org,  հեռ.՝ 041530039):

«ԴԱՍԱՎԱՆԴԻ՛Ր, ՀԱՅԱՍՏԱՆ» ԿՐԹԱԿԱՆ ՀԻՄՆԱԴՐԱՄ

Հոկտեմբերի 14-15-ը ԵՊՀ Իջևանի մասնաճյուղում անցկացվեցին հեռակա ուսուցման՝ 2020թ. ընդունելության ներբուհական քննությունները:

Սեպտեմբերի 10-30-ը մասնաճյուղում և առցանց եղանակով լրացված դիմում-հայտերի համաձայն՝ «Մաթեմատիկա», «Պատմություն», «Հայոց լեզու և գրականություն առարկաներից ներբուհական քնննություններ պետք է հանձներ 134 դիմորդ, որոնցից 22-ը չի ներկայացել մարտական հերթապահության մասնակցելու պատճառով:

Քննություններից առաջ և ընթացքում, ելնելով ստեղծված պայմաններից, մասնաճյուղում կատարվել են ախտահանման աշխատանքներ՝ պահպանելով պարետի կարգադրությունները: Աշխա­տակազմը և քննությանը սպասող դիմորդները մուտք են գործել քննասենյակ միայն ջերմաչափումից և ձեռքերի ախտահանումից հետո: Բարձր ջերմություն ունեցողներ չեն գրանցվել:

Քննասենյակում դիմորդներն իրենց տեղերն ընտրել են վիճակահանությամբ: Քննական գործընթացի թափանցիկությունն ապահովելու նպատակով քննասենյակում տեղադրված էր տեսախցիկ, որը հնարավորություն էր տալիս դրսում գտնվող մեծ էկրանի միջոցով հետևելու քննությանը:

2020թ․ ընդունելության կանոնների համաձայն՝ դիմորդները հանձնել են միայն մեկ՝ մասնագիտական առարկայի քննություն:

Քննության արդյունքներին դիմորդները տեղեկացվել են քննությունը հանձնելու հաջորդ օրը․ ժամը 10:00-ին արդյունքները փակցվել են ԵՊՀ ԻՄ-ի ընդունող հանձնաժողովի մուտքի մոտ, ինչպես նաև դրանք հրապարակվել են մասնաճյուղի պաշտոնական կայքում՝ «Դիմորդ» բաժնի Հեռակա ուսուցման «Ընդունելության արդյունքները» էջում:

«Մաթեմատիկա» առարկայի քննության համար հայտագրված 32 դիմորդից 4-ը չի ներկայացել, դրական շեմը հաղթահարել է 11 դիմորդ:

«Պատմություն» առարկայի քննության համար հայտագրված 26 դիմորդից 9-ը չի ներկայացել, դրական շեմը հաղթահարել է 15 դիմորդ:

«Հայոց լեզու և գրականություն» առարկայի քննության համար հայտագրված 76 դիմորդից 9-ը չի ներկայացել, դրական շեմը հաղթահարել է 51 դիմորդ:

Մրցույթի արդյունքները կհրապարակվեն մինչև ս․թ․ հոկտեմբերի 22-ը՝ ՀՀ ԿԳՄՍ նախարարի հաստատումից հետո։

2020թ. սեպտեմբերի 25-ից հոկտեմբերի 10-ը կայացավ Կրեդիտային համակարգով ԵՊՀ ԻՄ պրոֆեսորադասախոսական կազմի որակավորման բարձրացման կրթագիտական ծրագրի «Ուսուցման նորարարական մեթոդներ» մոդուլի «Տեսանյութերը որպես դասավանդման գործիք» 12 ակադեմիական ժամ տևողությամբ վերապատրաստման  առցանց դասընթացը, որը կազմակերպել էր ԵՊՀ ԻՄ-ի կրթական բարեփոխումների և դասախոսների վերապատրաստման բաժինը:

Դասընթացը վարեց ԵՊՀ եվրոպական լեզուների և հաղորդակցության  ֆակուլտետի  միջմշակութային  հաղորդակցության  անգլերենի  ամբիոնի  դոցենտ, բանասիրական գիտությունների թեկնածու Մարինե Հարությունի  Յաղուբյանը:  

Վերապատրաստման դասընթացի նպատակն էր մասնակիցներին ծանոթացնել տեսանյութների միջոցով դասավանդման մի քանի ռազմավարական ձևերին:

Դասընթացի ժամանակ դասախոսներին ներկայացվեցին ոչ միայն տեսանյութերի կիրառման արդյունավետությունը ուսուցման գործընթացում, այլև գործիքներ, որոնք կնպաստեն ուսուցման մեթոդների կատարելագործմանը:

Մասնավորապես ներկայացվեցին Panopto, Moodle, Zoom, Google Meet և Explain Everything ծրագրերի հնարավորությունները, ինչպես նաև առաջարկվեցին Adobe Audition CC, Adobe Premium Pro և Power Point հավելյալ ծրագրերը տեսաձայնագրման համար:

Դասընթացի ժամանակ ունկնդիրները քննարկեցին նաև շրջված դասարանի (Flipped Classroom) կիրառման առավելությունները:

«Տեսանյութերը որպես դասավանդման գործիք» դասընթացն ընդգրկում էր.

• Դասախոսություններ (առարկայի տեսական նյութի մատուցում),
• Փոքր խմբային վարժանքներ (տեսության ամրապնդում),
• Իրավիճակային ուսումնասիրություններ (խնդրի լուծման միջոցների փնտրտուք),
• Հարցեր և պատասխաններ (հմտությունների ու գիտելիքների ամրապնդում):

Դասընթացի վերջում մասնակիցները պատրաստել էին տեսանյութեր՝ գործնականորեն կիրառելով դասընթացի շրջանակներում իրենց ստացած գիտելիքները: